Tashches Corintoĉantyidyes 12 - Tsimane

Jenꞌsiꞌ Ạꞌedyeꞌ räj tsun soꞌmisinꞌ carijtacdyedyes

¹ Vojity, q̂uinꞌ yụ raꞌ jịꞌchiqueyeyac junꞌ chuc mọꞌ Jenꞌsiꞌ Ạꞌedyeꞌ muꞌ soꞌmisinꞌ tsun carijtacdyedyes Jenꞌdyes.

² Chịj miꞌin jambiꞌdyemꞌ anicjetinte Jenꞌ jiquej miꞌin, cäc̣häꞌchutiñeꞌ jiquej miꞌin mọꞌin jämꞌtacdyeꞌ in, anic fibis mọꞌin in, mọmꞌ jiquej räjĉan dyijtutiñeꞌ miꞌin, anic ferdyeꞌtum ĉọ́tiñeꞌ miꞌin.

³ Yụ raꞌ jéyac miꞌin, tyi chuc jasoꞌmiti p̂eyacdyeꞌ Jenꞌsiꞌ Ạꞌedyeꞌ muꞌ, muꞌ jam junꞌ jañäñiti muꞌ Jesús. Tyi chuc jam játŝutity Jenꞌsiꞌ Ạꞌedyeꞌ muꞌ, muꞌ jam junꞌ yi: "Jesús anictyity Ayoꞌ tsun", mijam yi.

⁴ Mọꞌyaꞌ yịjyi carijtacdyedyes soꞌmisinꞌsiꞌ tsun, meꞌ tsanꞌ meꞌtum, yiris qui namꞌ Jenꞌsiꞌ Ạꞌedyeꞌ muꞌ soꞌmisinꞌsiꞌ.

⁵ Meꞌdye chimeꞌ yịjyi mọꞌyaꞌ carijtacdyeꞌ, muꞌ qui namꞌ yirity Ayoꞌ tsun yojdyetydyemꞌ carijtyeyejaty u.

⁶ Meꞌ meꞌdye chimeꞌ ferdyeꞌ muꞌ carijtacdyedyes muꞌ mọꞌ soꞌmisinꞌsiꞌ, muꞌ qui namꞌ Jenꞌ yirity soꞌmacsity.

⁷ Meꞌdyes qui muꞌ Jenꞌ räjenꞌdye soꞌmisinꞌ ferdyeꞌ Ạꞌedyeꞌyaꞌ muꞌ, meꞌ jịꞌĉojqui Ạꞌedyeꞌ muꞌ. Muꞌ meꞌ soꞌmisinꞌ ferdyeꞌ muꞌ paj qui vaj meij ñútyitiĉaꞌ bäꞌjaꞌ tsun,

⁸ jam qui namꞌ vaj meꞌ soꞌmacsiꞌ carijtacdyedyes. Pạrej soꞌmacsiꞌ paj qui dyijyedyeꞌtum jịꞌchiyacsi in junꞌ chuc raꞌ bäꞌyi in, judyeyaꞌ pạrej soꞌmacsiꞌ chị́dyemꞌ mọꞌyaꞌ qui jịꞌchiyacsi jätäjyiꞌ chuc Jenꞌsiꞌ p̂eyacdyeꞌ muꞌ.

⁹ Chimeꞌ mọꞌ Jenꞌsiꞌ Ạꞌedyeꞌ muꞌ pạrej soꞌmacsiꞌ paj qui mujuꞌchaꞌ anicjete Jenꞌ in, judyeyaꞌ mọꞌdye pạrej soꞌmacsiꞌ ferdyeꞌ paj qui jiꞌchäcacseban muntyiꞌ in,

¹⁰ judyeyaꞌ chimeꞌ soꞌmacsiꞌ paj qui jịꞌcaveyacsi ferdyeꞌ in, pạrej na soꞌmacsiꞌ ferdyeꞌ paj qui jịꞌchiqueyacsi in mọꞌ p̂eyacdyeꞌ jasoꞌmitis Jenꞌ in. Pạrej soꞌmacsiꞌ paj qui tupuj chị́yacsebi in yoctyis jiꞌchäyitidyeꞌ muꞌin, areꞌ Jenꞌsiꞌ muꞌ, vatyquej raꞌ sọyos mọꞌ. Judyeyaꞌ chimeꞌ pạrej soꞌmacsiꞌ paj qui yocsiꞌĉan p̂eyacdyeꞌ p̂eyaqui in, judyeyaꞌ pạrej chimeꞌ soꞌmacsiꞌ paj qui jịꞌchiqueyacseban in jätäjyiꞌ chuc mọꞌ p̂eyacdyeꞌ p̂eyes in.

¹¹ Meꞌ meꞌ soꞌmac in anicjetety Jenꞌ in, meꞌ tsanꞌ meꞌ buꞌyi, yiris qui namꞌ Jenꞌsiꞌ Ạꞌedyemꞌ mọꞌ soꞌmacsis carijtacdyeꞌ muꞌin, junꞌ junꞌ chuc mạꞌjeꞌ mọꞌ, meꞌ meꞌ soꞌmacsiꞌ.

Tsun jeñej buꞌjaꞌ muntyis aꞌ muꞌ

¹² Ọij aꞌ tsun yiris mọmoꞌ, daiꞌ qui namꞌ jedyeꞌ meꞌchuiꞌ. Meꞌdye muꞌ chimeꞌ Cristo, meꞌ tsanꞌ daiꞌ tsun anicjejaty, yojdyemꞌ mus aꞌ umꞌ, meꞌ buꞌjaꞌdye mọmoꞌ tsun yuꞌsinꞌ.

¹³ Räjenꞌdye tsun, paj tsanꞌ judío tsun, paj tsanꞌ jam judío tsun, paj tsanꞌ úñity tsun, paj tsanꞌ jam úñity tsun, räjenꞌ qui namꞌ tsun Jenꞌsiꞌ Ạꞌedyeꞌ muꞌ yuꞌsinꞌ tsun paj qui Cristoty tsun, jeñej buꞌjaꞌ Cristos aꞌ muꞌ, meꞌ buꞌjaꞌ tsun, räjenꞌ tsun soꞌmac Jenꞌsiꞌ Ạꞌedyeꞌ muꞌ.

¹⁴ Aꞌ muntyis tsun jam yiris mọmoꞌ jedyeꞌ jämꞌtac, daiꞌ mọꞌyaꞌ jedyeꞌ meꞌchuiꞌ.

¹⁵ Vatyquej yiꞌ jụijyaꞌ yuj tsun: "Yụ nash jam aꞌ buꞌyiꞌ ĉaĉaij na yụ jam un", yiꞌ vatyquej jụijyaꞌ. Meꞌ tsanꞌ meꞌ yiꞌ yuj tsun, yejĉoiꞌ qui namꞌ tacaꞌ aꞌ tsun.

¹⁶ Vatyquej yiꞌ jụijyaꞌ chun tsun: "Jam nash aꞌ buꞌyiꞌ yụ ĉaĉaij na yụ jam vej", vatyquej yiꞌ jụijyaꞌ. Meꞌ tsanꞌ meꞌ yiꞌ chun tsun, yejĉoiꞌ qui namꞌ tacaꞌ aꞌ tsun.

¹⁷ Yedyej vej mọmoꞌ jụijyaꞌ aꞌ tsun, a vuty jam junꞌ seꞌvaĉaꞌ u. Yedyej chun mọmoꞌ aꞌ jụijyaꞌ tsun, a vuty jam junꞌ jụꞌsaĉaꞌ u.

¹⁸ Jam na meꞌ, muꞌ Jenꞌ rụij yuꞌbusinꞌ aꞌ tsun, muꞌ yuꞌtyiyisinꞌ räj aꞌsiꞌ jedyeꞌ tsun junaꞌ junaꞌ buꞌyiꞌ chuc jämꞌ ĉọiꞌ muꞌ, mọꞌyaꞌ yụꞌtyeꞌ.

¹⁹ Yiris mọmoꞌ aꞌsiꞌ jedyeꞌ jụijyaꞌ tsun, junꞌdyemꞌ mọꞌ aꞌ shupquiꞌ.

²⁰ Daiꞌ jedyeꞌ Jenꞌ jämꞌtyiyisinꞌ aꞌsiꞌ tsun, meꞌ tsanꞌ meꞌ, yiris qui namꞌ aꞌ shupquiꞌ tsun.

²¹ Vej tsun jam junꞌ ñiñeꞌ un tsun, jeꞌ: "Yụ jam jemonye mi", mijam mọꞌ joꞌnoꞌ tsun ñiñeꞌ mọꞌ yuj tsun, jeꞌ: "Yụ jam jemonye mi."

²² Jam meꞌ aꞌsiꞌ jedyeꞌ tsun, yódyesdyemꞌ itŝiꞌ ferdyeꞌ omꞌ, mọꞌ anic mọjoꞌchaꞌ jemonjaꞌ tsun.

²³ Pạrej aꞌsiꞌ jedyeꞌ tsun ọyaꞌyaꞌ ĉọĉaꞌ, mọꞌ qui namꞌ mọjoꞌchaꞌ ĉọjcajaꞌ tsun, judyeyaꞌ chimeꞌ pạrej aꞌsiꞌ jedyeꞌ tsun jam tupuj mọꞌ cạvejaꞌ mijam jịꞌcavejas, mọꞌ jumjejaꞌ mọmoꞌ.

²⁴ Yocsiꞌ na aꞌsiꞌ jedyeꞌ tsun mọꞌ mọmoꞌ jịꞌcavejaꞌ tsun. Anicdye meꞌ, muꞌ Jenꞌ räj jämꞌ yuꞌbusinꞌ aꞌsiꞌ jedyeꞌ tsun, muꞌ mujuꞌchaꞌ yụꞌtacsi mọꞌ ọyaꞌyaꞌ ĉọ́jas tsun,

²⁵ paj qui jam yocvevej buꞌyiꞌ aꞌsiꞌ jedyeꞌ tsun, paj qui vaj meij ĉujcatiꞌ in, chimeꞌ paj qui vaj meꞌ ñútyitidyeiꞌ in.

²⁶ Areꞌyiꞌ jụijyaꞌ yiris aꞌsiꞌ jedyeꞌ tsun, räjtumdye vatyquej areꞌreiꞌ aꞌ tsun. Timaꞌcac jụijyaꞌ yiris aꞌsiꞌ jedyeꞌ tsun räjtum vatyquej maꞌjoiꞌ in aꞌsiꞌ jedyeꞌ tsun.

²⁷ Miꞌin nash Cristos buꞌyi aꞌ muꞌ, miꞌin nash cäts yirity jịjcaij shupqui miꞌin Cristos aꞌ muꞌ.

²⁸ Meꞌdye muꞌ Jenꞌ jämꞌ yụꞌtacsi muꞌin anicjetety Jenꞌ in, paj qui muꞌdyes carijtaqui in. Mujuꞌchaty muꞌ yụꞌtacsi muꞌin jutactyiꞌ Jenꞌtyiꞌ in, judyeyaꞌ chimeꞌ muꞌin jasoꞌmitity p̂eyacdyeꞌ Jenꞌ in, judyeyaꞌ muꞌin chimeꞌ jịꞌchiyacsity in. Chimeꞌdye pạrej muꞌyaꞌ yụꞌtacsi muꞌin jịꞌcaveyacsity ferdyeꞌ in, judyeyaꞌ muꞌin jiꞌchäcacsebantyiꞌ areꞌreijtyiꞌ in, judyeyaꞌ muꞌin nọ́tacsity in, judyeyaꞌ muꞌin bächäcsity in muꞌin anicjetety Jenꞌ in, judyeyaꞌ muꞌin yocsiꞌĉan p̂eyacdyeꞌ p̂eyaquity in, meꞌ meꞌ Jenꞌ yụꞌtacsi paj qui muꞌin anicjetety Jenꞌ in vaj meij ñútyitidyeij in.

²⁹ ¿Yedyej buty jutactyiꞌ Jenꞌtyiꞌ muꞌ? Jam. Chimeꞌdye jam yedyej jasoꞌmitity p̂eyacdyeꞌ Jenꞌ in, mijam chimeꞌ yedyej jịꞌchiyacsity in, mijam yedyej jịꞌcaveyacsity ferdyeꞌ in.

³⁰ Chimeꞌdye jam yedyej jiꞌchäcacsebantyiꞌ areꞌreijtyiꞌ muntyiꞌ in, mijam yedyej yocsiꞌĉan p̂eyacdyeꞌ p̂eyaquity in, mijam yedyej jịꞌchiqueyacsebantyiꞌ p̂eyacdyeꞌ muꞌin, jam. Muꞌdyemꞌ Jenꞌ yoc yoc yụꞌtacsi paj qui meꞌ tupuj carijtaqui muꞌdyes in.

³¹ Jemoñeꞌ räjĉan dyijtutiñeꞌ miꞌin paj qui muꞌ Jenꞌ meꞌ soꞌminac mọꞌ mọjoꞌchas carijtacdyedyes miꞌin. Q̂uinꞌ raꞌ yụ jéyac mọjoꞌchaꞌ jemonacsiꞌ, ọyaꞌyaꞌ jemonjaꞌ yocsiꞌ carijtacdyeꞌ.