Tashches Corintoĉantyidyes 11 - Tsimane

¹ Cäc̣häꞌchubutiĉamꞌ yụs dyijyedyeꞌ yojdyemꞌ yụ u cäc̣häꞌchupte Cristos dyijyedyeꞌ muꞌ.

Junꞌ chuc raꞌ p̂en jimacdyeꞌĉan in

² Vojity, yụ maꞌjoij miꞌindyes ĉaĉaij na räjĉan dyijtutiĉaꞌ yụ miꞌin, judyeyaꞌ chäquibutiĉaꞌ yụs jiꞌchäyitidyeꞌ miꞌin soꞌmeyacsiꞌ yụ jiquej.

³ Yụ mạꞌjeꞌ jéyac ọij, muꞌ Cristo ayoꞌbuꞌyi räjdyes sonꞌdyes in, meꞌdye muꞌ sonꞌ ayoꞌbuꞌyi p̂endyes muꞌ, judyeyaꞌ muꞌ Jenꞌ ayoꞌbuꞌyi Cristodyes.

⁴ Mọꞌdyes muꞌ sonꞌ jam tupuj p̂urꞌ buꞌyiꞌ yụꞌtaqui joꞌnoꞌ muꞌ cọdaqui Jenꞌcheꞌ jụijyaꞌ, judyeyaꞌ jịꞌchiqueyacsi p̂eyacdyeꞌ jasoꞌmitis Jenꞌ jụijyaꞌ. Meꞌ jụijyaꞌ muꞌ, jeñej äcäijjeyacdyeꞌ Ayoꞌcheꞌ, meꞌ shupquiꞌ mọꞌ.

⁵ P̂en na jụijyaꞌ jemoñeꞌ p̂urꞌ buꞌyiꞌ yụꞌtaquiꞌ joꞌnoꞌ mọꞌ, cọdaquiꞌ Jenꞌcheꞌ jụijyaꞌ, judyeyaꞌ jịꞌchiqueyacsiꞌ p̂eyacdyeꞌ jasoꞌmitis Jenꞌ jụijyaꞌ. Jam meꞌ yụꞌtaquiꞌ jụijyaꞌ mọꞌ, äcäijjeyaquiꞌ vämtyiꞌ mọꞌ, meꞌ shupquiꞌ mọꞌ. Jam meꞌ mạꞌjeꞌ p̂urꞌ buꞌyiꞌ joꞌnoꞌ jụijyaꞌ mọꞌ, där tsị́caiꞌ shupquiꞌ, jeñej qui täꞌtsetacsiꞌ fin mọꞌ, meꞌ shupquiꞌ mọꞌ.

⁶ Mọꞌdyes jam mạꞌjeꞌ p̂urꞌjeyaquiꞌ joꞌnoꞌ jụijyaꞌ mọꞌ, damꞌdye jämꞌ täꞌtsetac fin mọꞌ. Chị́jaꞌ tsun därsiꞌ tsị́cadyeꞌ meꞌ täꞌtsetac jụijyaꞌ p̂ensiꞌ fin mọꞌ, jemoñeꞌ qui p̂urꞌ buꞌyiꞌ yụꞌtaqui joꞌnoꞌ mọꞌ jimacdyeꞌĉan.

⁷ Sonꞌ na jụijyaꞌ in jam jemoñeꞌ muꞌin p̂urꞌ buꞌyiꞌ yụꞌtaqui joꞌnoꞌ muꞌin, ĉaĉaij na muꞌ sonꞌ jämꞌtac yódyeijdyemꞌ muꞌ Jenꞌ u, judyeyaꞌ jịꞌcavepte ferdyeꞌ muꞌ. P̂en na jịꞌcavaquiꞌ vämtyis ferdyeꞌ mọꞌ,

⁸ ĉaĉaij na muꞌ sonꞌ jam p̂ensiꞌ aꞌ mọꞌ jämiꞌ jiquej, mọꞌ chat p̂en jämiꞌ sonꞌsiꞌ aꞌ muꞌ jiquej.

⁹ Muꞌ sonꞌ jam p̂endyety jämꞌte Jenꞌ, mọꞌ p̂en jämꞌtyeꞌ muꞌ Jenꞌ sonꞌdyes jiquej.

¹⁰ Mọꞌdyes q̂uinꞌ mọꞌ p̂en jemoñeꞌ p̂urꞌ buꞌyiꞌ yụꞌtaquiꞌ joꞌnoꞌ mọꞌ, mọꞌ jorojĉanyiꞌ mọꞌ ayotuquiꞌ vämtyiꞌ mọꞌ, judyeyaꞌ paj qui jämꞌ buꞌyiꞌ anjersiꞌyaꞌ vej muꞌin.

¹¹ Tsun na anicjejaty Jenꞌ, muꞌ sonꞌ jemoñeꞌ fer p̂en, meꞌdye mọꞌ chimeꞌ p̂en fer jemonte sonꞌ.

¹² Meꞌ tsanꞌ mọꞌ p̂en sonꞌsiꞌ aꞌ muꞌ jämiꞌ jiquej, q̂uinꞌ qui namꞌ muꞌ sonꞌ p̂enĉan naꞌi in, muꞌdye Jenꞌ meꞌ jämꞌtyeꞌ.

¹³ Ĉụiꞌsiꞌyaꞌ dyijyedyeꞌ jätäjyi tyuꞌ u miꞌin, yiris p̂en cọdaquiꞌ Jenꞌcheꞌ jụijyaꞌ ¿jam buty p̂urꞌ buꞌyiꞌ joꞌnoꞌ mọꞌ? Jemoñeꞌ p̂urꞌ buꞌyiꞌ joꞌnoꞌ yụꞌtaquiꞌ.

¹⁴ Chimeꞌdye mọꞌyaꞌ yicdyeꞌ muntyis muꞌin anic där tsịcaꞌ shupqui muꞌ sonꞌ jiꞌmoc̣hayeꞌ fin jụijyaꞌ muꞌ.

¹⁵ Mọꞌ chat p̂en meꞌdye yụꞌtac moc̣haꞌ fin mọꞌ paj qui jämꞌyiꞌ, ĉaĉaij na muꞌdye Jenꞌ meꞌ soꞌmacsi paj qui mọꞌ busdyesiꞌ joꞌnoꞌ mọꞌin.

¹⁶ Pạrej muꞌyaꞌ jam mạꞌjeꞌ seꞌveꞌtyiꞌ jụijyaꞌ in ọij jiꞌchäyitidyeꞌ, yụ raꞌ jéyacsi mọꞌ mọmoꞌ yicdyeꞌ tsun jimacdyeꞌĉansiꞌ. Chimeꞌdye meꞌ yi in junanaty ĉụiꞌ in vajmuꞌyaijĉantyiꞌ in muꞌin ñuruꞌtyity Cristoty in.

Cäj cạiꞌ in mọꞌ jiꞌdyijvitidyes säcsedyeꞌ

¹⁷ Q̂uinꞌ yụ raꞌ voroꞌtyeyac miꞌin, jam qui na ramꞌ timaꞌqueyac miꞌin, ĉaĉaij na jam rụij cạtiñeꞌ dyijyedyeꞌ miꞌin jimacdyeꞌĉan. Mọꞌ vajmuꞌyadyeꞌ miꞌin mọꞌ jam méquiꞌ ñútyinac, dadamꞌ yocvejinac.

¹⁸ A nash jin yụ in junꞌsiꞌ chuc jimaquiyaꞌ ca miꞌin, jam ca vaj cäts dyijyi miꞌin, yụ na chet anicyi.

¹⁹ Anicdye meꞌ, ĉaĉaij na meꞌ mọmoꞌ bäꞌyi muntyiꞌ in, yoc yoc dyijyity in. Meꞌ tsanꞌ jam rụij meꞌ, mọꞌyaꞌ tupuj chị́jaꞌ tyijtyi chuc rụij bäꞌyity in.

²⁰ Vajmuꞌyaij jụijyaꞌ miꞌin meꞌ tsanꞌ jebetiñeꞌ mọꞌ jiꞌdyijvitidyes säcsedyeꞌ jam mọꞌ Ayodyes shupquiꞌ, ĉaĉaij na ca aꞌc̣hisyaꞌ dyijyedyeꞌ säcsi miꞌin.

²¹ Cäj cäj ca säcsi miꞌin, pạrej tashcheꞌ säcsi miꞌin, ĉụiꞌ ĉụiꞌ jebaĉan säcsedyeꞌ miꞌin junꞌ quiꞌ chuc ca mạꞌjetiñeꞌ jebetiñeꞌ, pạrej qui namꞌ ca muꞌyaꞌ shuꞌqui miꞌin, yoctyiꞌ na dáquisyaꞌ yi in.

²² Meꞌ miꞌin jeñej äcäijjeyacdyeꞌ Jenꞌcheꞌ muꞌintumdye ñuruꞌtyity muꞌ, meꞌ shupquiꞌ mọꞌ, judyeyaꞌ chimeꞌ miꞌin jịꞌtsicayacsi muꞌin ñịbety in. ¿Junꞌ meꞌ u miꞌin? ¿Itŝiꞌ adac ĉaĉaij ĉụiꞌsiꞌ acaꞌ miꞌin paj qui muꞌyaꞌ säcsi miꞌin? ¿Joꞌmesyaꞌ adac raꞌ timaꞌqueyac yụ? ¡Jam junꞌ!

Jiꞌdyijvitidyes säcsedyeꞌ Ayos

²³ Muꞌ Ayoꞌ tsun soꞌmin yụ ọij jiꞌchäyitidyeꞌ, yụ jiꞌjiyeyac miꞌin jiquej. Mọꞌdye tsedyedyeꞌ, yoquiꞌdyemꞌ muꞌ Jesús Ayoꞌ tsun jiꞌmincac raꞌ ayoꞌyaꞌ jiquej u muꞌ, muꞌ tapjete pan,

²⁴ yoshoropaij jéte Jenꞌ, q̂uemiꞌvete qui, chat qui jéyacsi: "Uts pan jeñej buꞌyi ĉụiꞌsiꞌ aꞌ yụ, mọꞌ raꞌ yụꞌtac miꞌindyes. Jebemac miꞌin paj qui räjĉan dyijtutiĉaꞌ yụ miꞌin."

²⁵ Ijaij säcsi in, tyéquis qui tapjeꞌ muꞌ, jéyacsi: "Ọij tyéquisĉansiꞌ jeñej buꞌyiꞌ chäsh yụ, yụꞌtac raꞌ miꞌindyes, mọꞌ raꞌ jasoꞌmitiꞌ ferdyeꞌ mọꞌ mụiꞌsis p̂eyacdyeꞌ Jenꞌsiꞌ muꞌ. Tyévac miꞌin paj qui yụ dyijtutiĉaꞌ miꞌin," yi Ayoꞌ tsun jéyacsi.

²⁶ Jämꞌdyeyaꞌ jebetinte uts pan judyeyaꞌ tyétiñeꞌ ọij tyéquisĉansiꞌ, meꞌ raꞌ p̂eijbitinte sänꞌdyeꞌ Ayos muꞌ, meꞌ raꞌ yejĉoiꞌ junꞌ quiꞌ chuc atsijbanyaꞌ muꞌ.

²⁷ Tyi chuc itŝity dyijyedyeꞌ jebete muꞌ pan judyeyaꞌ tyeij mọꞌ tyéquisĉansiꞌ, muꞌin meꞌtyity in äcäijjepte in Ayoꞌsiꞌ aꞌ muꞌ judyeyaꞌ chäsh muꞌ.

²⁸ Tashcheꞌ chum raꞌ cạvaĉaꞌ ĉụiꞌtyiꞌ ĉojtyiꞌ tsun, vatyquej raꞌ mọꞌyaꞌ juchaj tsun, chat qui raꞌ meꞌsiꞌ q̂uinꞌdyemꞌ chuja muꞌ pan judyeyaꞌ tyéjaꞌ mọꞌ tyéquisĉansiꞌ.

²⁹ Ĉụiꞌ mọmoꞌ jụijyaꞌ jebeja judyeyaꞌ tyéjaꞌ, jam dyijtupja Ayoꞌsiꞌ aꞌ jụijyamꞌ, vaꞌtacdyeꞌ raꞌ cạjaꞌ tsun.

³⁰ Anicdye meꞌ daiꞌ muꞌyaꞌ japacjoijtyiꞌ miꞌin, pạrej aty jam feryi miꞌin, pạrej säñi miꞌin.

³¹ Ĉụiꞌ cạvaĉaꞌ juchaj tsun, judyeyaꞌ farajjejaꞌ, chat qui raꞌ aty jam cạjaꞌ vaꞌtacdyeꞌ Jenꞌsiꞌ muꞌ.

³² Jenꞌ vaꞌtacdyeꞌ soꞌmisinꞌ paj qui mọꞌ jiꞌchäyisinꞌ paj qui jam tsunmun vaꞌcac tsäquiꞌsisĉan, jam raꞌ jeñej muꞌin in úchety jacchety in jam anicjetety Jenꞌ in.

³³ Mọꞌdyes vojity, vajmuꞌyaij jụijyaꞌ miꞌin, jebetiñeꞌ raꞌ jiꞌdyijvitidyes säcsedyeꞌ jụijyaꞌ miꞌin, jam raꞌ yiristum säcsi miꞌin, bisti chum raꞌ miꞌin, junꞌ quiꞌ chuc räj venchuij in,

³⁴ paj qui jam vaꞌtacdyeꞌ cạtiñeꞌ miꞌin. Dáqui jụijyaꞌ miꞌin jemoñeꞌ säcsetaqui chum ĉụiꞌsiꞌyaꞌ acaꞌ miꞌin. Mọꞌdyety yocsiꞌ jedyeꞌ in, jambiꞌ vorjeyeyac, mọꞌ raꞌ jịꞌchiqueyac aty ventyecyacyaꞌ yụ.