Tashches Corintoĉantyidyes 10 - Tsimane

Jam raꞌ jämꞌtacdyeꞌcheꞌ cudyitiĉaꞌ

¹ Vojity, yejĉojamꞌ dyijtucsejamꞌ miꞌin junꞌ chuc bäꞌyaque jiquej muꞌin urucyaty vóshiꞌ tsun, jiꞌc̣honactyiꞌ jiquej Egiptoĉan in. Cäjyasĉan jac jiquej räj muꞌin in cäc̣häꞌchuiꞌ dyicbaꞌbadyeꞌ in, judyeyaꞌ räj ñutsenꞌjeꞌ Mar Jäijnäs in.

² Yoquiꞌdyemꞌ cäc̣häꞌchuiꞌyaꞌ in mọꞌ dyicbaꞌbadyeꞌ, judyeyaꞌ räj ñutsenꞌjeꞌ tsiqueꞌ in, räj ayotute muꞌ Moisés in, muꞌtum bäꞌyi in, jeñej buꞌyi jiꞌchojtity Moisésyaꞌ in, meꞌ shupquiꞌ mọꞌ.

³ Räjdye muꞌin chimeꞌ jebeiꞌ in mọꞌ säcsedyeꞌ soꞌmacsis Jenꞌ,

⁴ judyeyaꞌ chimeꞌ räjtumdye tyeij in mọꞌ ojñiꞌ mijĉansiꞌ soꞌmacsis Jenꞌ. Muꞌ mij jeñej buꞌyi Cristo, meꞌ buꞌyi muꞌ, muꞌ penꞌdyetucsity cäjyasĉan jac jiquej.

⁵ Meꞌ tsanꞌ meꞌ arajdye qui namꞌ räjyaij jam maꞌjotacsi muꞌ Jenꞌ, mọꞌdyes qui räj säñi in cäjyasĉan jac jiquej in, mọꞌĉan vaꞌcac aꞌ muꞌin.

⁶ Tsundyes meꞌ cạveꞌ jiquej in, paj qui tsun q̂uinꞌ chị́jaꞌ, paj qui tsun jam meꞌ mạꞌjejaꞌ aꞌc̣his dyijyedyeꞌ, jam jeñej muꞌin jiquej in.

⁷ Jam raꞌ timaꞌquetiñeꞌ jämꞌtacdyeꞌ, jam jeñej muꞌin jiquej pạrej in, yoj yiꞌdyemꞌ sánacdyeꞌ o: "Muntyiꞌ feshtaij in, säcsi in, tyeij in, judyeyaꞌ aꞌc̣his jämꞌtaqui in", yiꞌ.

⁸ Tsun na jam raꞌ voꞌvoyejaꞌ, jam jeñej muꞌin jiquej in. Juchadyes muꞌin muꞌ Jenꞌ vaꞌtacdyeꞌ soꞌmacsi jiquej, yirisĉan mạyedyeꞌ shach ijacsi päräꞌ quiꞌtac chibin jiyiꞌ mir muntyiꞌ in, meꞌtum ijacsi.

⁹ Tsun raꞌ jam meꞌ jịꞌĉojtyeja muꞌ Cristo areꞌĉa cạtyeja vaꞌtacdyeꞌ, jam jeñej muꞌin jiquej in, yoquiꞌdyemꞌ jịꞌĉojteyaꞌ Jenꞌ jiquej u in, muꞌ juteyeyacsi nas muꞌin qui jiꞌjitsacsi in, ujacsi in.

¹⁰ Mijam raꞌ ñiñeja Jenꞌ q̂uinꞌ, jam jeñej muꞌin jiquej in, ñinacdyeꞌyaꞌ muꞌin muꞌ Jenꞌ jutete anjer ijacsity muꞌ qui ijacsi.

¹¹ Tsundyes meꞌ cạveꞌ jiquej in paj qui tsun q̂uinꞌ jäquiꞌvety jam meꞌ dyijyejaꞌ tsun. Tsundyes muꞌ Jenꞌ jiꞌsañeyacsi räj ọij paj qui mọꞌ q̂uinꞌ jiꞌchäyisinꞌ tsun, ĉaĉaij na c̣hẹiꞌyaꞌ jadyiquis tupudyeꞌ atsvun.

¹² Tyi chuc vaꞌbunyi yi, "Yụ fer buꞌyi Jenꞌdyes", yi, tyi chuc yity in peñi raꞌ in.

¹³ Jam jayej mọꞌyaꞌ jacches jiꞌpenacdyedyes in, räjenꞌdye muntyiꞌ in vaj meꞌ jịꞌĉojtyeꞌ in. Muꞌ na Jenꞌ jịꞌcätseꞌ p̂eyacdyeꞌ muꞌ, yiꞌ junꞌ chuc muꞌ chịj ñutsjityinac miꞌin paj qui jam peñi miꞌin. Muꞌ raꞌ ñutsjityinac paj qui jam jiyiꞌ fer mọꞌ jiꞌpenacdyeꞌ miꞌindyes, judyeyaꞌ raꞌ chimeꞌ ñútyinac paj qui tupuj dyichjetiñeꞌ mọꞌ, meꞌ raꞌ c̣hoñi miꞌin, paj qui jam peñi miꞌin jiꞌpenacdyeꞌyaꞌ.

¹⁴ Chätidyeꞌ mạꞌjeyacdyety yụ, jam raꞌ damꞌ cudyiti jämꞌtacdyeꞌcheꞌ miꞌin mijam raꞌ ĉọcsequi muꞌin meꞌtyity in.

¹⁵ Yụ nash chị́yeyac anic dyijyedyeꞌtumtyiꞌ miꞌin tupuj chäyibutiĉaꞌ p̂eyacdyeꞌ yụs miꞌin, jedac rụijsis jedac jam.

¹⁶ Jämꞌdyeyaꞌ jebejaꞌ jiꞌdyijvitidyes säcsedyeꞌ, tsun yoshoropaij jéjaꞌ Jenꞌ tyédyedyes. Mọꞌ tyédyeꞌ jorojĉanjisinꞌ junꞌ chuc räj vaj cäts tsundyes muꞌ Cristo yụꞌtaqui chäsh muꞌ. Chimeꞌdye muꞌ pan jebeja tsun, muꞌ chimeꞌ jorojĉanjisinꞌ junꞌ chuc räj cäts tsundyes muꞌ Cristo yụꞌtaqui aꞌ muꞌ.

¹⁷ Meꞌ tsanꞌ daiꞌtyiꞌ tsun, jeñej qui namꞌ yirity shupquejaꞌ, ĉaĉaij na vaj cäts tsun jebeja yirity mọmoꞌ pan.

¹⁸ Meꞌdye chimeꞌ muꞌin Israeltyiꞌ vóshiꞌ in, muꞌin damꞌjety shush in jiꞌcoꞌshayacsiꞌ Jenꞌdyes, vaj cäts muꞌin soꞌmete Jenꞌ in.

¹⁹ Jam nash yi yụ mọꞌyaꞌ ferdyeꞌ jämꞌtacdyeꞌsiꞌ, mijam mọꞌ shush jadyiquis jämꞌtacdyeꞌyaꞌ meꞌchuiꞌ ferdyeꞌ.

²⁰ Meꞌ tsanꞌ meꞌ muꞌin jam anicjetety Jenꞌ in soꞌmeꞌ jedyeꞌ jämꞌtacdyeꞌ jụijyaꞌ in, sọyoꞌ qui namꞌ soꞌmeꞌ in, meꞌ buꞌyiꞌ mọꞌ. Yụ jam mạꞌjeꞌ joꞌmes paj qui mọꞌ jebetiñeꞌ paj qui jam vaj meꞌ sọyoꞌtum miꞌin.

²¹ Jam tupuj päräꞌ cäc̣häꞌchujaꞌ tsun, mọꞌdyes qui jam junꞌ tyéjaꞌ tsun Ayosĉansiꞌ tyéquis judyeyaꞌ sọyosĉansiꞌ chimeꞌ, mijam junꞌ jebejaꞌ mọꞌ jiꞌdyijvitidyes Ayodyes säcsedyeꞌ judyeyaꞌ sọyos säcsedyeꞌ chimeꞌ.

²² Meꞌ buꞌjaꞌ jụijyaꞌ tsun muꞌ raꞌ Jenꞌ jịꞌfajqueja. ¿Mujuꞌchaꞌ buty ferdyeꞌtum tsun, uyaꞌyaꞌ buty muꞌ Jenꞌ ĉọ́ja? Jam junꞌ.

Jịꞌcaveyacsejaꞌ mạꞌjitidyes vojitydyes tsun

²³ Pạrej yi in: "Itŝiꞌ jedyeꞌ ñucchusinꞌsiꞌ tsun, junꞌ chuc mạꞌjejaꞌ ĉụiꞌ jụijyaꞌ tsun, tupuj meꞌ bäꞌjaꞌ tsun", yi in. Anicdye tsanꞌ meꞌ, pạrej qui namꞌ jämꞌtaĉaꞌ jụijyaꞌ meꞌ, mọꞌ jam jämꞌsiꞌ tsundyesiꞌ paj qui Jenꞌdyes bäꞌjaꞌ tsun. Meꞌ tsanꞌ itŝiꞌ ñucchusinꞌsiꞌ tsun, meꞌ qui namꞌ bäꞌjaꞌ junꞌ chuc mạꞌjejaꞌ jụijyaꞌ tsun, mọꞌ jam damꞌ ñútyisinꞌ paj qui fer buꞌjaꞌ Jenꞌdyes tsun.

²⁴ Jam raꞌ ĉụiꞌsimꞌ jedyeꞌ dyijtujaꞌ tsun, dyijtucsejaꞌ raꞌ chimeꞌ vojity tsun paj qui nọ́tacsejaꞌ.

²⁵ Tupuj jebetiñeꞌ miꞌin jụꞌñis ĉụiꞌ mọmoꞌ shush jiꞌmincaiꞌsiꞌ in jiꞌmincacdyeꞌĉan. Jam raꞌ jéyacsi miꞌin: "¿Jam caꞌ jämꞌtacdyeꞌyaꞌ jadyiquis ọij?" vatyquej raꞌ voryi in: "Anicdye meꞌ", yi in chat qui raꞌ jiꞌyoquiti ĉojtyiꞌĉan miꞌin jebetiñeꞌyaꞌ.

²⁶ Ọij jac räjtumdye jedyeꞌ mọꞌ Ayoꞌsiꞌ muꞌ.

²⁷ Chimeꞌdye yirity jam anicjetety Jenꞌ meꞌ fayinac jụijyaꞌ miꞌin paj qui jebetacsi miꞌin, tupuj mọmoꞌ jebetacsi miꞌin. Aty meꞌ jụijyaꞌ, jebejamꞌ jedyeꞌ chuc soꞌminac in, mijam raꞌ jétinte: "¿Jam caꞌ jämꞌtacdyeꞌyaꞌ jadyiquis ọij?" jam raꞌ jétinte, paj qui jam ĉụiꞌ jiꞌyoquiti ĉojtyiꞌĉan miꞌin jebetiñeꞌyaꞌ.

²⁸ Vatyquej raꞌ yirity yi jụijyaꞌ muꞌyaꞌ: "Ọij shush jämꞌtacdyeꞌyaꞌ jadyiquis", yi jínac jụijyaꞌ, chat qui raꞌ q̂uinꞌdyemꞌ jam jebetiñeꞌ paj qui yoctyiꞌ in jam jiꞌyoquiti ĉojtyiꞌĉan in.

²⁹ Meꞌ tsanꞌ jebetiñeꞌ miꞌin, miꞌin raꞌ jam yoqui ĉojtyiꞌĉan miꞌin, muꞌ raꞌ chat jínactyiꞌ, muꞌ raꞌ yoqui ĉojtyiꞌĉan muꞌ jebetiñeꞌ jụijyaꞌ miꞌin, ĉaĉaij na tacaꞌ dyijyi jämꞌtacdyeꞌcheꞌ muꞌ. Vatyquej raꞌ pạrej yi miꞌin: "¿Junꞌ yụ u farajjeꞌ ọij jebeiꞌ yụ? Meꞌ tsanꞌ pạrej muꞌyaꞌ tacaꞌ cạquity jämꞌtacdyedyes dyijyedyeꞌ muꞌin, yụ qui namꞌ jam meꞌ, faraj buꞌyi yụ.

³⁰ Tupuj mọꞌ jebeiꞌ yụ ĉaĉaij na aty yoshoropaij jéte Jenꞌ yụ säcsedyedyes, mọꞌdyes jam tupuj ñäñin yụ in säcsedyedyes", vatyquej raꞌ yi miꞌin.

³¹ Rụij tsanꞌ meꞌ dyijyedyeꞌ miꞌin, meꞌ tsanꞌ meꞌ, yụ qui na ramꞌ jéyac miꞌin, Jenꞌ räjĉan dyijtumac, räj jedyeꞌ chuc jebetiñeꞌ, jedyeꞌ chuc tyeij miꞌin, räjĉan raꞌ rụij dyijyi miꞌin paj qui muꞌin muntyiꞌ in timaꞌquete Jenꞌ in miꞌindyes.

³² Junꞌ chuc bäꞌyi miꞌin, jedyeꞌ chuc jebetiñeꞌ, meꞌ dyijyedyeꞌtum raꞌ bäꞌyi miꞌin paj qui jam jiꞌyocacsi miꞌin muꞌin judío in, judyeyaꞌ muꞌin jam judío in, jam raꞌ chimeꞌ jiꞌyocacsi miꞌin muꞌin anicjetety Jenꞌ in.

³³ Meꞌ yụ chimeꞌ dyijyedyeꞌtum bäꞌyi, paj qui maꞌjotyin yụ in räj muntyiꞌ in, jam yụmꞌ ĉụiꞌ maꞌjotyiti, räj muntyiꞌ dyijtucsi yụ, mạꞌjeꞌ yụ paj qui muꞌin c̣hoñi chimeꞌ in.