Tashches Corintoĉantyidyes 1 - Tsimane

Tashches voryedyeꞌ Pablosiꞌ

^1-2 Yụ nash Pablo jutactyiꞌ Jesucristoty muꞌ, Jenꞌ ĉụiꞌsiꞌyaꞌ dyijyedyeꞌ muꞌ meꞌ yuꞌtyin yụ. Yụ Sóstenestum vojity tsun, yụ sáñeꞌ miꞌindyes anicjetintety Jenꞌ miꞌin Corintoĉan bäꞌyity miꞌin. Miꞌin fayactyiꞌ paj qui Jenꞌdyety miꞌin, miꞌin nash Jesucristoty Ayoꞌ tsun, judyeyaꞌ räj yocvety chimeꞌ junaty ĉụiꞌ in muꞌin timaꞌquetety Jesucristo in, ĉaĉaij na chimuꞌdye muꞌintyiꞌ Ayoꞌ muꞌin.

³ Yụ cọdyete tsuntyiꞌ Jenꞌ judyeyaꞌ muꞌ Jesucristo Ayoꞌ tsun paj qui muꞌ ñịbeꞌjitidyes soꞌminac miꞌin, judyeyaꞌ paj qui soꞌminac maꞌjodyeꞌ ĉojtyiꞌĉandyes miꞌin.

Ñịbeꞌyedyes soꞌmisinꞌ muꞌ Cristo

⁴ Yụ yejĉoij yoshoropaij jéte Jenꞌ miꞌindyes, ĉaĉaij na muꞌ ñịbeꞌjinac miꞌin Jesucristoyaꞌ.

⁵ Jenꞌ anic ñútyinac miꞌin ĉaĉaij na Cristoty miꞌin, muꞌ räj soꞌminac ñịbeꞌyedyes, meꞌ räj dyijyedyeꞌ muꞌ soꞌminac miꞌin paj qui rụij voroꞌtacsi miꞌin.

⁶ Meꞌdyes qui mọꞌ Cristos p̂eyacdyeꞌ muꞌ taĉan buꞌyimꞌ ĉojtyiꞌĉan miꞌin,

⁷ mọꞌdyes jam junꞌ jayej miꞌindyes Jenꞌsiꞌ ñịbeꞌyedyes muꞌ, muꞌ räj soꞌminac carijtacdyes miꞌindyes, paj qui yejĉoij miꞌin junꞌ quiꞌ chuc ayijyaꞌ tupudyeꞌ atsijbanyaꞌ muꞌ Jesucristo Ayoꞌ tsun, muꞌ bisvaꞌtintety miꞌin.

⁸ Muꞌ raꞌ fer buꞌyi yuꞌtyinac miꞌin paj qui rụij bäꞌyi miꞌin junꞌ quiꞌ chuc jadyiquis tupudyeꞌ, atsijbanyaꞌ muꞌ Jesucristo Ayoꞌ tsun, paj qui jam jụꞌñiij daquishunac ĉụiꞌsiꞌyaꞌ vej muꞌ.

⁹ Jenꞌ nash jịꞌcätsety p̂eyacdyeꞌ muꞌ, muꞌ fayinactyiꞌ miꞌin, judyeyaꞌ yuꞌtyinac paj qui Jesucristoty miꞌin Ạvaꞌ muꞌ, muꞌ Ayoꞌ tsun.

Jam cäts dyijyi muꞌĉantyiꞌ anicjetety Jenꞌ in

¹⁰ Vojity, Jesucristoscheꞌ tịj muꞌ Ayos tsun, yụ ferdyeꞌtum jéyac miꞌin: vaj cäts dyijyejamꞌ miꞌin, jam raꞌ yoc yoc dyijyi miꞌin, mijam raꞌ fáquitidyeꞌtum bäꞌyi miꞌin, vaj meꞌ dyijyejamꞌ ĉojtyiꞌĉan miꞌin.

¹¹ Vojity, pạrej Cloétyiꞌ chätidyeꞌ mọꞌ jiꞌchäquiyin yụ in jin yụ in miꞌin ca jam cäts dyijyi miꞌin.

¹² Meꞌ ca bäꞌyi miꞌin, yoc yoc ca dyijyedyeꞌ meꞌchutiñeꞌ miꞌin. Pạrej ca muꞌyaꞌ yi miꞌin: "Yụ cäc̣häꞌchutety Pablo", yi miꞌin, pạrej ca yi miꞌin: "Yụ cäc̣häꞌchutety Apolos", yi ca miꞌin, pạrej ca yi muꞌyaꞌ miꞌin: "Yụ cäc̣häꞌchutety muꞌ Pedro", judyeyaꞌ chimeꞌ pạrej ca yi miꞌin: "Yụ cäc̣häꞌchutety muꞌ Cristo", meꞌ meꞌ ca yi miꞌin.

¹³ ¿Daiꞌ buty ĉọ́tinte miꞌin Jiꞌc̣honsinꞌtyiꞌ tsun? ¿Yụ adac ijac croshcheꞌ miꞌindyes? Meꞌdyes qui buty meꞌ, ¿yụ́scheꞌ tịj jiꞌchojti miꞌin? Mijam méquiꞌ meꞌ.

¹⁴ Yoshoropaij jéte Jenꞌ yụ, yụ jam chojtyeyac miꞌin, meꞌdye muꞌin mọmoꞌ chojtacsi yụ Crispo judyeyaꞌ Gayo.

¹⁵ Mijam yoctyiꞌ chojtacsi yụ, vatyquej raꞌ yi miꞌin: "Muꞌ Pablo chojtacsi muntyiꞌ in ĉụiꞌsiꞌcheꞌ tịj jiꞌjäcdyi", vatyquej raꞌ yi miꞌin.

¹⁶ Jäquiꞌve dyijyeban yụ, yụ́dye jiquej chojte muꞌ Estéfanas räjenꞌdye acaꞌĉantyiꞌ chätidyeꞌ muꞌ. Pạrej aty jam dyijyeban yụ, vatyquej raꞌ muꞌyaꞌ yoctyiꞌ chojtacsi jiquej yụ.

¹⁷ Jenꞌ jam meꞌ jutin yụ paj qui yụ chojtacsi mọmoꞌ muntyiꞌ in, muꞌ jutin yụ paj qui voroꞌtacsity mọmoꞌ yụ muntyiꞌ in, jịꞌchiqueyacsity yụ jämꞌsiꞌ p̂eyacdyeꞌ muꞌ, meꞌ buꞌyiꞌ yụꞌtacdyeij. Voroꞌyedyeꞌyaꞌ yụ p̂eijte yụ muꞌ Cristo, jam qui namꞌ jiꞌmaꞌjotacdyes p̂eyacdyeꞌ dạqueꞌ yụ, paj qui mọꞌyaꞌ seꞌ jaꞌyacsi yụ. Meꞌ jụijyaꞌ yụ, a vuty fibis shupquiꞌ p̂eyacdyeꞌ Jesucristos u muꞌ, mọꞌ p̂eijbites yụ, yiꞌ junꞌ chuc ijac croshcheꞌ jiquej muꞌ.

Cristo meꞌchupte Jenꞌsiꞌ ferdyeꞌ muꞌ judyeyaꞌ dyijyedyeꞌ muꞌ

¹⁸ Muꞌin vaꞌtacdyety in fibis ĉọiꞌ in mọꞌ p̂eyacdyeꞌ voroꞌtacsejas tsun q̂uinꞌ, mọꞌ p̂eyeꞌ junꞌ chuc ijac croshcheꞌ muꞌ Cristo. Tsun na c̣honjaty chị́yejaꞌ tsun mọꞌdye p̂eyacdyeꞌ jorojĉanjepte Jenꞌsiꞌ ferdyeꞌ muꞌ,

¹⁹ rụijdye yiꞌ sánacdyeꞌ: "Yụ raꞌ jịꞌmotsacsebi chị́dyeꞌ muꞌin dyijyedyeꞌtumtyis in, yụ raꞌ fibis yụꞌtacsebi dyijyedyeꞌ muꞌin", yi muꞌ Jenꞌ.

²⁰ Muꞌ Jenꞌ jorojĉanjeyacsi anic fibis dyijyedyeꞌ muꞌin jacchetysiꞌ muntyis in, mọꞌ fibis shupquiꞌ Jenꞌsiꞌyaꞌ vej muꞌ. Meꞌ tsanꞌ dyijyedyeꞌtumtyiꞌ ĉúti in, judyeyaꞌ jiꞌchäyitity in, judyeyaꞌ chịj p̂eyaquity in judyeyaꞌ chịj chutity p̂eyacdyeꞌyaꞌ in jacchesyaꞌ jedyeꞌ, räj joꞌmes in mọꞌ fibidyes shupquiꞌ Jenꞌsiꞌyaꞌ vej muꞌ.

²¹ Jenꞌ dyijyedyeꞌtumtyiꞌ, muꞌ yi úchety jacchety muntyiꞌ in ĉụiꞌsiꞌyaꞌ dyijyedyeꞌ muꞌin jam tupuj chị́yete Jenꞌ in. Jenꞌ ĉụiꞌsiꞌyaꞌ dyijyedyeꞌ muꞌ, dyijyi muꞌ raꞌ jiꞌc̣honacsi tyi chuc anicjeꞌtyiꞌ in mọꞌ p̂eyacdyeꞌ voroꞌtacsejas tsun. Meꞌ tsanꞌ muꞌin muntyiꞌ in fibis ĉọiꞌ in, mọꞌ qui namꞌ tupuj jiꞌc̣honacsiꞌ.

²² Jeshaꞌ muꞌin judío in mọꞌ chum dyijtuiꞌ in mạꞌjeꞌ tashcheꞌ cạvepte ferdyeꞌ in, chat q̂uinꞌdyemꞌ qui raꞌ anicyi in. Muꞌin na griego in jam judío in, jam meꞌ muꞌin in, mọmꞌ dyijtuiꞌ in muntyis dyijyedyeꞌ muꞌinsiꞌ dyijyedyeꞌtumtyis ĉútity in.

²³ Tsun na jam meꞌ, voroꞌtacsi tsun Cristos p̂eyacdyeꞌ muꞌ, junꞌ chuc muꞌ ijac croshcheꞌ. Muꞌin na judío in äcäijjepte in sänꞌdyeꞌ muꞌ, muꞌin na jam judío in fibis muꞌin ĉọpte in.

²⁴ Muꞌin na fayactyiꞌ Jenꞌtyiꞌ muꞌ, meꞌ tsanꞌ judío in, meꞌ tsanꞌ jam judío in, räj muꞌin anicjetety in chịj in muꞌdye Cristo meꞌchupte Jenꞌsiꞌ ferdyeꞌ muꞌ judyeyaꞌ dyijyedyeꞌ muꞌ chimeꞌ.

²⁵ Meꞌ tsanꞌ jacchety muntyiꞌ in fibis ĉọpte in Jenꞌsiꞌ dyijyedyeꞌ muꞌ, mọꞌ qui namꞌ mọjoꞌchas dyijyedyeꞌ muꞌ, ọyaꞌyaꞌdye muntyis dyijyedyeꞌ muꞌinsiꞌ dyijyedyeꞌtumtyis ĉútity in. Jacchety muntyiꞌ in itŝiꞌ ferdyeꞌ ĉọpte in, muꞌsiꞌ na ferdyemꞌ jam tyi chaꞌshepte cätsbite in, itŝiꞌ méquis muntyis ferdyeꞌ muꞌin.

Tsimꞌtactyiꞌ Jenꞌtyiꞌ in

²⁶ Vojity, miꞌin chịj junꞌ chuc bäꞌyi miꞌin yoquiꞌdyemꞌ Jenꞌ fayinacyaꞌ jiquej u, jam daiꞌ muꞌyaꞌ dyijyedyeꞌtumtyiꞌ miꞌin. Muntyisyaꞌ vej muꞌin, mijam daiꞌ muꞌyaꞌ fer buꞌyity miꞌin mijam daiꞌ mujuꞌchatytyiꞌ ạvaꞌ miꞌin.

²⁷ Jenꞌ jam muꞌin tsimꞌtacsi, muꞌ tsimꞌtacsi muꞌin jam dyijyedyeꞌtumtyiꞌ in muntyisyaꞌ vej muꞌin, paj qui muꞌin jorojĉanjeyacsi in junꞌ chuc fibity muꞌin dyijyedyeꞌtumtyiꞌ ĉútity in. Chimeꞌdye tsimꞌtacsi muꞌin jam fer buꞌyity in muntyisyaꞌ vej muꞌin, paj qui muꞌin jorojĉanjeyacsi in itŝiꞌ muꞌinsiꞌ ferdyeꞌ in muꞌin fer buꞌyi ĉútity in.

²⁸ Chimeꞌdye muꞌ Jenꞌ tsimꞌtacsi muꞌin uyaꞌyaty in äcäijjeyactyiꞌ in úchetyyaꞌ muntyiꞌ in, jam jedyedyety ĉọcsity in. Muꞌin tsimꞌtacsi muꞌ Jenꞌ paj qui muꞌin jorojĉanjeyacsi in junꞌ chuc fibis dyijyedyeꞌ muꞌin, muꞌinsiꞌ fer buꞌyitysiꞌ in, mọꞌ jam yaꞌiꞌ Jenꞌsiꞌyaꞌ vej muꞌ.

²⁹ Muꞌ Jenꞌ yi paj qui jam yirity muntyiꞌ vaꞌbunyi Jenꞌsiꞌyaꞌ vej muꞌ.

³⁰ Jenꞌ yi Cristoty miꞌin, muꞌ soꞌminac anicsis dyijyedyeꞌ muꞌ, judyeyaꞌ rụij yuꞌtyinac chimeꞌ, judyeyaꞌ Jenꞌdyety yuꞌtyinac, judyeyaꞌ jiꞌc̣honnac chimeꞌ.

³¹ Meꞌ cạ̈tsiꞌ sánacdyeꞌ, yiꞌ: "Jam raꞌ ĉụiꞌ timaꞌquiti miꞌin, Ayoꞌ mọmoꞌ timaꞌquemac", yiꞌ sánacdyeꞌ.