Ioane 1 - Tii Iitihi: Élele Iitihi na mwo Coho

A pwooti na e pé a éé apulie

¹ Ha atabuhi kon, ke a Pwooti. Ke a Pwooti, ke e pele Padué. Ke a Pwooti, ke Padué.

² E te mu pele Padué ha atabuhi kon.

³ Tai ni naado ati, ke lé tabuhi mu kon. Te tice celi e tabuhi heme tieeng.

⁴ É mu kon, ke pwo a mulip, a pwéélang te ni apulie.

⁵ E pwéélang ha a melepiing. Ke time e uce hegieng na a melepiing.

A bwo pajuujuhi na a pwéélang

⁶ Wo Padué, ke e pahede pa apulip na pii kon pie Ioane.

⁷ E âbé beme e *pajuujuhi a pwéélang, beme lé céihi ne kon ne ni apulie ati.

⁸ Time e uce âbé mu kon a pwéélang, kehe e tuie beme e pajuujuhi a pwéélang.

⁹ A pwéélang naa, ke a ju pwéélang na e tuie ne pwo a bwohemwo, beme e pwéélang ko ni apulie ati.

¹⁰ Ke a Pwooti, ke e caa mu pwo a bwohemwo. Ke e tabuhi a bwohemwo wo Padué ko a Pwooti. Ke time lé uce temehieng ne pwo a bwohemwo.

¹¹ E tuie ne pele ni béén, ke time lé uce hegieng.

¹² Nina lé hegieng, ke lé céihi ne ko a niin, ke e ne telé a pihuô beme lé naî Padué.

¹³ Time lé uce âbeele mu ko ana nime pa apulie kon, kehe lé âbeele mu ko Padué.

E pé a éé apulie a Pwooti

¹⁴ Ke e pé a éé apulie a Pwooti, ke e mu hadeniinye, ke ubwo a pwonimen konye. Ke genye caa alihi a bwo ubwo na a wâé ten, a wâé te pa Naîn na te céiu nang, na e âbé mu ko Caa.

¹⁵ E pajuujueng wo Ioane, ke e pii me ubwo pie: «Weeng pana é piieng pie, e bo âbé céing wo pa apulie na te nihe pwonaado ne kon kojaéo, be e caa te mi mu ânebuhung.»

¹⁶ Nye caa tai hegi ati a *adéihi, ko a bwo eânimen denye.

¹⁷ Mepwo é ne ko ni patén, ke e ne tenye mu ko *Moosé. Kehe wo Iésu *Kériso, ke a pwaaden ko a *pipwoééhe tice ja kon, ke a *juuju.

¹⁸ Te tice pace apulie celi e ali Padué, kehe te pa Naîn na te céiu nang, be e mu ko Caa, ke weeng na e pipatemehieng denye.

Ioane pa apipuu apulie

¹⁹ Wo lépwo apihuô juif ne *Iérusaléma, ke lé pahede lépwo béé *apwoâpwailo me lépwo béé apipenem ko a *mwaiitihi me lé â tahimwo Ioane pie: «Wogo, ke he woo?»

²⁰ Ke time e uce waaneduwohi kolé, kehe e te pii telé pie: «Woéo, ke time uce pa Mesia.»

²¹ Ke lé tahimwoeng mwo pie: «Wogo ke he woo? He wogo ke wo péroféta *Élia [na me e mi ânebuhen]?» Ke e pii telé pie: «Ûhu!» Ke lé tahimwoeng mwo pie: «Kona wogo ke he pa Péroféta [na e piieng wo Moosé]?» Ke e pii telé pie: «Ûhu!»

²² Ke lé pii ten pie: «Kona wogo, ke he woo? Go pii teme, beme geme â pii te lépwona lé pahedekeme bé. Kona wogo, ke he go pii pie woté ne kom?»

²³ Ke e hegi ne telé pie: «Woéo, ke wo pali e piieng wo péroféta Isaia: Pwo pa apulie ha a da na e toii da pie: “E âbé wo Padaame! Pwopweehi a pwaadeniin!”» Ésaïe 40.3

²⁴ Mepwo é ne ko ni apulie na pahedelé ngen, ke lé mu hadeniilé ne ni Farasaio. [Woélé, ke a céiu dihe pwoiitihi te lépwo *Juif.]

²⁵ Ke lé tahimwoeng mwo pie: «É mu ko ade na go puu ni apulie, hemepie time uce wogo wo Kériso, ke time uce wogo wo Élia, ke time uce wogo pa Péroféta?»

²⁶ Ke e hegi ne telé wo Ioane pie: «É puu ni apulie ko a tabe, kehe e ha awiemewé wo pa apulie na time geé uce temehieng.

²⁷ Weeng na e âbé alecehung. Ke time uce jan ne kong me e tuwo ni tai ko ni dihibwaan.»

²⁸ Tai ninaa, ke tuie ne Bétani, ko a céiu goon ne Ioridano, he na e pipuu apulie nelang wo *Ioane pa apipuu apulie.

Pa Naî Padué wo Iésu

²⁹ É ha acaama hen, ke e ali Iésu wo Ioane, he e âbé céiieng. Ke e pii pie: «Weengi pa *Nahi Muto te Padué. Weeng na e pétaabwon ni ta pwo te ni apulie pwo bwohemwo.

³⁰ Weeng na é caa mi piieng, pie: Pwo pana e bo âbé alecehung, na te nihe pwonaado ne kon kojaéo, be e caa te mi mu lang ânebuhung.

³¹ «Time é uce mi temehieng ânebun, ke é âbé puu ni apulie ne ha a tabe, beme e patemehieng te lépwo *Isaraéla.»

³² Weengi ana e uti wo Ioane: «É alihi a *Jenen Iitihi he e opé mu he miiden pwohewii a meni pwojo, ke e ole huîin.

³³ Time é uce mi temehieng. Kehe pana e pahedeéo me é puu ni apulie ko a tabe, ke e pii tong pie: “Pana go bo alihi heme e ole huîin a Jenen Iitihi, ke weeng pana e bo puu ni apulie ko a Jenen Iitihi.”

³⁴ «É alihi, ke é pajuujuhi pie: Weeng pa *Naî Padué.»

E tode ni acémun den

³⁵ É ha acaama hen, ke e mwo te mu lang wo Ioane me lupwo acémun den.

³⁶ Ke e ali Iésu, ke e pii pie: «Neko ali Nahi Muto te Padué!»

³⁷ Lu caa téne wo lupwo acémun den a bwopiinen naa, ke lu âcéi Iésu.

³⁸ E biteeng wo Iésu, ke e alilu he lu ko âcéin, ke e pii telu pie: «Geu hanee?» Ke lu pii ten pie: «Rabi (pa apipune), é wé he celi go mu lang?»

³⁹ Ke e hegi ne telu wo Iésu pie: «Geu âbé me geu alihi.» Ke lé tai miân, beme lé alihi he celi e mu lang. He babwén ko paa inetéale ko alecehe goahen, ke lé mu lang ha a tan naa.

^40-41 Wo André, pa céiu béélé, ke e â too Simon Pétéru, pa âjiénen, ke e pii ten pie: «Gemu caa too pa Mesia [pana pipégalieng].» A bwopiinen pie ‘Kériso’ [he pwo *grek].

⁴² Ke e pééeng nge céii Iésu. Ke e alieng wo Iésu, ke e pii ten pie: «Wogo Simon, pa naî Jonas. Bo a niim pie Céfas†.» Ai Pétéru: a bwopiinen pie ‘a péi’.

E tode Filip me Natanaël

⁴³ É ha acaama hen, ke e â Galilé wo Iésu. Ke e too Filip, ke e pii ten pie: «Go âbé céing!»

⁴⁴ Wo Filip, ke pa apulie Betsaïda, a mwopopwaalé te André me Pétéru.

⁴⁵ E ân wo Filip, ke e too Natanaël, ke e pii ten pie: «Geme caa too pali e piieng wo Moosé ne he ni patén, ke lé cihe mwo kon ne ni péroféta! Wo Iésu mu Nazaret, pa naî Josef.»

⁴⁶ Ke e pii ten wo Natanaël pie: «He te jan me e âbé mu Nazaret aceli wâé?» Ke e hegi ne ten wo Filip pie: «Âbé me go alihi!»

⁴⁷ E ali Natanaël wo Iésu, he e âbé beniieng, ke e pii ne kon pie: «Weengi pa ju Isaraéla, na te tice pipwohuô kon.»

⁴⁸ E pii ten wo Natanaël pie: «Go temehiéo mu wé?» Ke e hegi ne ten wo Iésu pie: «Ânebuhe a bwo todeko te Filip, he go ko mu haahi a majing, ke é caa te aliko.»

⁴⁹ E hegi ne ten wo Natanaël, ke e pii ten pie: «Pa apipune, wogo pa Naî Padué, pa daame Isaraéla!»

⁵⁰ E hegi ne ten wo Iésu pie: «Go céihi be he é pii tem pie, é aliko ne haahi a majing? Go bo alihi ce naado celi nihe ubwo koja anaa!»

⁵¹ E pii mwo pie: «É pii tewé a juuju pie: Geé bo alihi a miiden heme tehi, ke lé bo taa ke ole ne ni *âcélo te Padué, huîi pa *Nahi Apulie.»