Ébéru 1 - Tii Iitihi: Élele Iitihi na mwo Coho

wo iésu kériso ke e piwéden (Pwahamii tii: 1.1―4.13 )

¹ É ânebun, ke e pacihe lépwo watihenye wo Padué, na lé pwaadeniin bé ne ni *péroféta ten, ne he ni bwopwonen na hiwon.

² Ke, é ha a benaamwon ce, na caa *ni bénebwéne tan, ke e pacihekenye ko pa Naîn. Be é mu kon, ke wo Padué, ke e tabuhi a miiden me a bwohemwo me ati ni naado na lé mu hen. Ke te weeng kuti, na e pipégalieng wo Padué, beme e bo ne ten ati ni naado naa.

³ Me genye ali pa Naîn, ke genye alihi *a wâé me a bwo ubwo Padué Caa. Be te piwielu ne ha ati ni bwopwonen. Ati ni naado na lé tuie, ke lé te tai mulie mu ko ni pwooti ten, na nihe pwojunuun. Te weeng kuti pa Naîn, li e puu taabwon ni ta pwo tenye. Ke é alecehen, ke e mwojuia daamwo he *miiden, pele Padué. Ke wo Padué, pana te nihe pwojunuun, ke e pwo me e tebwo *pwo a juin [beme e pihuôhi ati ni naado].

E piwéden koja ni âcélo

⁴ Wo Padué, ke e ne me e piwéden koja ati ni *âcélo wo pa Naîn. Ke e ne ten a nii apulie, na te nihe pwonaado ne kon, koja ati ni nii apulie.

⁵ Be time e mu uce pii te pace céiu âcélo wo Padué pie: É jenaa, ke é pii beetihi: Wogo pa naîng, ke woéo pa caa tem. Psaume 2.7 Ke a céiu mwo: O woéo pa caa ten, ke bo pa naîng. 2 Samuel 7.14

⁶ Kehe me e habwii pa Naîn, ne pele lépwona lé mu pelen, ke e ne ten a mwomwon de pa bécéiuhe ewa. Ke e huôhi pie: Wâé heme ati ni âcélo tong, ke me lé tai pipaunueng. Psaume 97.7

⁷ Ke mepwo é ne ko ni âcélo, [ni apipenem den] ke e pii wo Padué pie: É ne me lé pwohewii a dan , ke me lé pwohewii ni duwele miû. Psaume 104.4

Pwooti ko pa Naîn

⁸ Kehe icehi ana weengi ana e pii ne ko pa Naîn: Te wogo [pa Naîng] ke wogo Padué ! O te tice pwonehi a Mwametau tem. Go bo Daame dieli mwo. O mwomwon a bwo pihuô tem.

⁹ Wâé tem a mwomwon, ke muhi tem ko a ta. Ke woéo Padué Caa tem, ke é caa pipégaliko koja ni béém. É céihi a tabe ûde ne pwo punim. É ne tem a pipwodéén na te nihe ubwo wéden. Psaume 45.7−8

¹⁰ E pii mwo wo Padué ne ko pa Naîn pie: É ha atabuhi kon, ke te wogo Padaame , na go tabuhi a bwohemwo. Go pwo ko ni im a miiden.

^11-12 O bo tieden a bwohemwo ati, me a miiden [me ati nina e mu hen]. Kehe icehi ana te wogo cehi na go o bo mu dieli mwo. Go o tapipidulé pwohewii a epwén. Go o capipilé pwohewii a ukéiu talihi. Te wogo cehi na go te mu cawi; go te *mulie dieli mwo. Psaume 102.26−28

¹³ Ke weengi a céiu naado li e pii wo Padué: Go âbé tebwo éni pwo a juing. [É ne tem a pihuô. Ke o pipaunuko dieli mwo.] É pwo me go caaite nina lé pipwopa ne kom. Psaume 110.1 Kona geé niimihi pie, e pii anaa te pace céiu âcélo ten? [Ûhu! E pii anaa te pa Naîn!]

¹⁴ Be mepwo é ne ko lépwo âcélo, ke te ju ni apipenem cehi. Be e pahedelé wo Padué, beme ni apicani tenye, wogenye na e bo celuimikenye.