Lucas 7 - Criscote e Majaró Lucas 1872 (Caló)

¹ Y pur carjibó de penar sarias oconas caremas á la sueti, sos junelaba, se chaló andré Capharnaúm.

² Y sinaba oté baribu nasalo y sunparal á la meripen yeque lacró de yeque Jojerian (Centurion); sos sinaba baribu camelado de leste.

³ Y pur juneló penar de Jesus, bichabó á leste yeques pures es Chuti, manguelandole, que abillase á chibar lacho á desquero lacró.

⁴ Y ondoles, yescotria que abilláron á Jesus, le querelaban barias brichardilas, penando: Amolela o manu que le otorguisareles ocono.

⁵ Presas camela á amari rati: ta ó amangue ha querdi yeque cangri.

⁶ Y Jesus chalaba sarsalen. Ta pur sinaba sunparal e quer, bichabó á leste o jojerian desqueres monres, penando: Erañó, na te quiñes, que menda na sinelo dosta lacho de que chales andré de minrio quer.

⁷ Por ocono ni aun he penchabado que menda amolelo de nichobelar á orotarte: Tama penlo sar yeque carema, y sinará chibado lacho minrio lacró.

⁸ Presas menda tramisto sinelo manu chitado ostely de las caremas de averes, y terelo jundunares ostely de mangue; y penelo á ocona: Cha, y chala; y al aver: Abillel, y abillela; y al lacró de mangue: Querel ocono, y querela.

⁹ Pur Jesus juneló ocono, se mirató: y dicando palal á la sueti, sos plastañaba leste, penó: En chachipen sangue penelo, que ni andré Israel he alachado fé tan barí.

¹⁰ Y pur ondoles limbidiáron al quer sos abelian sinado bichabados, alacháron sasto al lacró, sos abelia sinado nasalo.

¹¹ Y chundeó despues, que chalaba á yeque foros acarado Naim, y desqueres discolis chalaban sarsalé, y yeque bari plastañi de sueti.

¹² Y pur abilló sunparal de la bundal e foros, he acoi que sicobaban abrí á yeque mulo, chabo colcoro de sun dai, sos sinaba piuli, y abillaba sarsalí baribustri sueti e foros.

¹³ Yescotria que la dicó o Erañó, perelalo de canrea por lasca, le penó: Na orobeles.

¹⁴ Y chaló sunparal, y pajabó á la jestari e muló. Ta ondoles sos lo lligueraban, se sustiláron. Y penó: Bédoro, á tucue penelo, costunatucue.

¹⁵ Y se bejeló ó sos abelia sinado muló, y se chibó á araquerar, y le diñó á sun dai.

¹⁶ Y tereláron os sares dal baro, y majarificaban á Debél, penando: Propheta baro se ha surdinado andré amangue; ta Debél ha abillado á sun sueti.

¹⁷ Y o chimusolano de ocona zibo voltisaró por sari Judéa, ta por sari a pu.

¹⁸ Y penáron á Barsané desqueres discolis sarias oconas buchías.

¹⁹ Y Barsané acaró dui es discolis de leste, y os bichabó á Jesus, penando: ¿Sinelas tumen ó sos ha de abillar, ó fronsaperamos á aver?

²⁰ Y sasta abillasen á leste oconas manuces, le penáron: Barsané o Bordelidor ha bichabado amangue á tucue, y penela; ¿Sinelas tumen ó sos ha de abillar, o fronsaperamos á aver?

²¹ Y Jesus andré ocola matejo chiros chibó lacho á baribustrés de nasalipénes, y de merdipénes, y de bengues chores, y diñó sila de dicar á butres chindoquendes.

²² Y despues os rudeló, penando: Chalad, ta penad á Barsané, or so abeleis junelado ta dicado: Que os chindoquendes diquelan, os langues pirelan, os zarapiosos sinelan chibados lacho, os cajuques junelan, os mules se surdinelan, á os chorores sinela pucanada la Lachi Nevipen.

²³ Y majaro sinela ó, sos na sinare escandalizado andré mangue.

²⁴ Y pur hubieron chalado os discolis de Barsané, se chibó á penar á la sueti de Barsané: ¿Sochalasteis á dicar andré o torbergelí? ¿reche chalabeado del bear?

²⁵ ¿Tama so chalasteis abrí á dicar? ¿Manu chito de coneles surabis? Anaraniá ondoles sos chitelan coneles surabis, ta se parbarelan andré palifepénes, andré os querés es Crallises sinelan.

²⁶ Tama so chalasteis abrí á dicar? Propheta? Anaraniá sangue penelo, y fetér que Propheta.

²⁷ Cabo sinela, de or sos sinela randado: He acoi bichabelo minrio Manfariel anglal de tun chiche, sos julabará tun drun anglal de tucue.

²⁸ Presas menda penelo sangue, que andré os chindados de romias, na sinela fetér Propheta que Barsané o Bordelidor; tama o mendesquero andré o Clajita de Debél, sinela fetér que ó.

²⁹ Y sari a sueti, y os Anglanes, sos le juneláron, diñáron chimusolano á Debél, ondoles sos abelian sínado muchobelados sar o bordelipen de Barsané.

³⁰ Tama os Phariseyes, y os Chandes de la Liri gireláron del alao de Debél enré sí matejos, ocolas sos na abelian sinado muchobelados por leste.

³¹ Y penó o Erañó: Pues á coin penaré, que se simuñielan os manuces de ocona rati, y á coin sinelan simuñis?

³² Simuñis sinelan á os chabes, sos sinelan bejelados andré o maasquero chamuliando andré sí, y penando: A sangue hemos giyabelado sar pajandias, y na quelasteis: charabares con‐a‐sangue hemos sinado, y na orobasteis.

³³ Presas abilló Barsané o Bordelidor, sos na jamaba manro, ni piyaba mol, ta penelais: Bengui terela.

³⁴ Abilló o Chabal e manu, sos jamela, y piyela, ta penelais: He acoi manu jamador, y matogarno, monro de Anglanes y chores.

³⁵ Tama a chandipen ha sinado jarsiada por sares desqueres chabes.

³⁶ Y le mangaba yeque Phariséo, que chalase jamar sarsalé: y habiendo chalado andré o quer e Phariséo, se bejeló á la mensalle.

³⁷ Y yeque manusardi crejetéra, sos sinaba andré o foros, chanelando que sinaba á la mensalle andre o quer e Phariséo, lligueró yeque jestarica de alabastro, perelali de ampio palife.

³⁸ Y sinchitandose á desqueres pindrés palal de leste, se chibó á muchobelarle sar la pani de sus aquias os pindrés, y os querelaba jayres sar la bal de desquero jeró, y le chupendiaba os pindrés, y os ampiaba sar o ampio.

³⁹ Y pur ocono dicó o Phariséo, sos le terelaba acarado á sun quer, penó andré sí matejo: Si cabo manu sinaba Propheta, chaneleria mistos sos, ta so sinela a manusardi, sos le pajabela; presas sinela crejetéra.

⁴⁰ Y Jesus le rudeló, penando: Simón, camelo penar á tucue yeque buchí. Y ó rudeló: Docurdo, pen.

⁴¹ Dui bisaráron jayere á yeque manu: o yeque le bisaró pansch gres cories, ta o aver pancherdi.

⁴² Tama sasta na terelasen chichi de que plasararle, se los estomó á os dui. ¿Pues coin es dui le camela fetér?

⁴³ Rudeló Simón, y penó: Penchabelo, que ocola, á sos estomó butér. Ta Jesus le penó: Mistos has penchabado.

⁴⁴ Y trutandose acia a manusardi, penó á Simón: ¿Diquelas caba manusardi? Menda? e chalé andré tun quer, na diñaste mangue pani pa os pindrés: tama caba sar la pani de desquerias aquias ha muchobelado minres pindrés, y os ha jayrugado sar desquerias balas.

⁴⁵ Na diñaste mangue chupendi: tama caba, ende que abilló andré, na ha mucado á chupendarme os pindrés.

⁴⁶ Na ampiaste minriojeró sar ampio; tama caba sar ampio palife ha ampiado minres pindrés.

⁴⁷ Pre o matejo penelo; que estomados le sinelan os baribustres gregostres de lati, presas cameló baribu. Tama al que mendesquero se estoma, mendesquero camela.

⁴⁸ Y penó á lati: Estomados á tucue sinelan os crejetes.

⁴⁹ Y ocolas sos jamelaban oté, se chibáron á penar enré sí: ¿Coin sinela cabo, sos aun os crejétes estoma?

⁵⁰ Y penó á la manusardi: Tun fé ha berabado tucue: Chatucue en pache.