Lucas 6 - Criscote e Majaró Lucas 1872 (Caló)

¹ Y chundeó que yeque Canché duisquero brotobo, o chiros que nacase por os ortalames, desqueres discolis velaban jeres de gi, ta frecandolos andré as bastes, los jamaban.

² Y yeques es Phariseyes les penaban: ¿Sosque querelais or so na sinela lacho andré os Canchés?

³ Y Jesus lillando a carema, les rudeló: ¿Ni aun abelais lirenado ocolo or sos queró David, pur tereló boquis ó, ta ocolas sos sinaban sarsalé?

⁴ Sasta chaló andré o quer de Debél, ta lilló os manres e prochitamiento, y jamó, ta diñó á ocolas sos sinaban sarsalé: aunsos n’astisarelaban jamar de ondolen, sino os erajais colcores?

⁵ Ta penó lengue: O Chabal e manu sinela Erañó tramisto e Canché.

⁶ Y chundeó, que aver Canché chaló tramisto andré a socreteria, ta siscabelaba. Ta sinaba oté manu sos terelaba jayrí a baste bastari.

⁷ Y os Libanes, y os Phariseyes le sinaban bersaliando, pa dicar, si chibaria lacho andré Canché: pa alachar de que querelar sastéji.

⁸ Tama ó pincheraba os penchamientos de ondolen, y penó al manu, sos terelaba a baste jayrí: Costunatucue, y sinchitatucue andré majara. Ta ó costunandose, se sinchitó en pindré.

⁹ Y Jesus penó lengue: Sangue puchabelo: ¿Diñela la Liri ochardilo de querelar mistos andré Canchés, ó querelar choro, díñar mestepen ó nicobarla?

¹⁰ Y dicando á os sares al rendepé, penó al manu: Buchara tun baste, ó la bucharó, ta sinaba chibado lacho a baste.

¹¹ Y ondoles se pereláron de jollín, ta chamuliaban os yeques sar os averes que querelarian sar Jesus.

¹² Y anacó andré ocolas chibeses, que chaló abrí al bur á manguelar, ta nacó sari la rachi manguelando á Debél.

¹³ Y pur sinaba de chibes acaró á os discolis de leste, ta escogiseró deque ta dui de ondolen, sos acaró Apostoles.

¹⁴ A Simon, á sos diñó o sobre‐nao de Pedro, ta á Andres desqueró plal, á Santiago, y á Barsalí, á Phelipe, y á Bartholomé.

¹⁵ A Mathéo, y á Thomas, á Santiago de Alphéo, y á Simon acarado o Zelador.

¹⁶ A Judas plal de Santiago, ta á Judas Iscariotes, sos sinaba o Binador (Traydor.)

¹⁷ Y chalando bajines sarsalen entrisaró andré yeque pepédro sar la quimbila de desqueres discolis, y de yeque sueti bari de sari a Judéa, y de Tyro, y de Sidón,

¹⁸ Sos abelaban abillado a junelarle, y pa que los chibase lacho de desqueres nasalipenes. Ta ondoles sos sinaban puniados de Bengues prachindes sinaban chibados lacho.

¹⁹ Y sari a sueti camelaba pajabarle: presas abrí de leste chaló sila, y os chibaba lacho á sares.

²⁰ Y ó surdinando as aquias acia desqueres discolis, penaba: Majarados os chorores, presas á sangue sinela o Clajita de Debél.

²¹ Majarados sangue sos acana terelais boquis: presas pereralés sinareis: Majarados sangue sos acana orobais; presas girelareis.

²² Majarados sinareis, pur sangue na‐camelaren os manuces, ta sangue buchararen de ondolen, ta sangue curaren, ta pucanaren o nao de sangue, sasta choro, pre bausale de o Chabal e manu.

²³ Asaselaos andré ocola chibes, ta alendaos; presas o jandorripen (tesoro) de sangue sinela baro andré o Tarpe; presas de ocona beda querelaban á os Prophetas os batuces de ondolen.

²⁴ ¡Tama ysna de sangue os balbales, presas terelais jire longono!

²⁵ ¡Ysna de sangue os, sos sinelais perelalés; presas terelareis boquis! Ysna de sangue os, sos acana girelais; presas golareis ta orobareis!

²⁶ ¡Ysna de sangue, pur majarificaren sangue os manuces; presas andiar querelaban á os Prophetas calabeosos os batuces de ondolen!

²⁷ Tama penelo á sangue sos lo junelais: ¡Camelad á jires enormes, querelad mistos á ondolen sos camelan sangue choro!

²⁸ ¡Majarad á ondolen sos zermañelan á sangue, ta manguelad á Debél por ondolen sos acarelan sangue choro!

²⁹ Y á leste sos curáre tucue andré yeque fila, dinle tramisto a aver. Ta á leste sos nicobeláre tucue o platamugion, na impidas leste lliguerar tramisto o conel.

³⁰ Din á os sares or so tute manguelaren: y á leste sos ustiláre or so sinela de tucue, na se lo manguele.

³¹ Y or so camelais que querelen á sangue os manuces, ocolo matejo querelad sangue á ondolen.

³² Y si camelais á ondolen sos camelan á sangue, ¿que sardañá terelareis? Presas os chores tramisto camelan á ondolen sos os camelan.

³³ Y si querelais mistos á ondolen sos querelen mistos á sangue, ¿que sardañá terelareis? Presas os chores tramisto querelan ocono.

³⁴ Y si prestisareis á ocolas, de or sos fronsaperais reulillar, ¿que lachipen querelareis? Presas tramisto os chores prestisaran yeques á averes, pa lillar aver trincho.

³⁵ Camelad pues á jires enormes: querelad mistos, y diñad prestado, y na fronsapereis por ocono chichi; ta jire jandorripen sinará baro, ta sinareis chabes e Sastísimo, presas ó sinela gacho aun pa os tuyales ta chores.

³⁶ Sinelad pues canreosos, sasta tramisto jire Batu sinela canreoso.

³⁷ Na sarpleis, y na sinareis sarplados; na sardeneis, y na sinareis sardenados; estomad, y sinareis estomados.

³⁸ Diñad, y á sangue se diñará: meelfa lachi, quichardinada por ostely, chalabeada, ta mas que perelali diñarán andré jire chepo: presas sar la mateja meelfa sar sos meelfareis, á sangue se truterá á meelfarar.

³⁹ Y les penaba tramisto yeque tarquino: ¿Pré baji astisará yeque chindo guiar á aver chindo? ¿Na perarán os dui andré o carbe?

⁴⁰ No sinela o discoli opré desquero Docurdo, tama sinará dosta lacho saro ocola sos sinare sasta desquero Docurdo.

⁴¹ ¿Y sosque diquelas a chiriria andré a aquia de tun plal, y na diquelas a condari, sos terelas andré tun aquia?

⁴² ¿O sasta astisarelas penar á tun plal: Me quelamangue, plal, sicobar á tucue a chiriria, sos sinela andré tun aquia? no dicando tucue a condari, sos sinela andré tun aquia? Tuyalo, sicobela brotoboro a condari de tun aquia, y despues dicarás, pa sicobar a chiriria de tun plal.

⁴³ Presas na sinela eruquel lacho, sos parbarela frujerías chorias: ni eruquel choro, sos terela frujerías lachias.

⁴⁴ Cata eruquel sinará pincherado por la frujería. Presas na lillelan orfis de sillofis, ni lillelan traquias de erajardas.

⁴⁵ O manu lacho del jandorripen lacho de desquero carlo sicobela lacho: y o manu choro del jandorripen choro sicobela choro; presas de la baribustria e carlo penela a mui.

⁴⁶ ¿Sosque pues acarais mangue Erañó, Erañó, y na querelais or so penelo?

⁴⁷ O saro sos abillela á mangue, y junela minrias caremas, y as querela, penaré sangue á coin sinela simuñi.

⁴⁸ Sinela simuñi á yeque manu sos queró quer, sos cavisaró ta ajincó, ta chitó a temelioni silnamente opré yeque bar; ta pur peró or brijindopé, diñó sila‐ha la len contra ocona quer, ta n’astisaró chalabearlo, presas sinaba chitado opré bar.

⁴⁹ Tama or sos junela, y na querela bajin, simuñi sinela á yeque manu, sos chitó desquero quer opré chiquen bi temelioni, ta contra sos diñó sila‐ha la len, ta yescotria peró: ta sinaba bari la bridaque de ocola quer.