Lucas 3 - Criscote e Majaró Lucas 1872 (Caló)

¹ Y andré ye berji pansch‐dequimo e clajitasmo de Tiberio Cæsar, sinando Brono Aljeñicato [Poncio Pilato] Chino‐baro de Judéa, y Herodes Tetrarcha de Galiléa, ta desquero plano Philipo Tetrarcha de Iturea, y e chim de Trachônite, ta Lysanias Tetrarcha de Abilina,

² Sinando Manclayes es erajais Annás y Caiphas, abilló a carema ye Erañoró opré Barsané, chabo de Zacharias, andré o torbergelí.

³ Y abilló por saro o chim de Jordan pucanando o bordelipen de aberuco pa mecos de gregostres,

⁴ Sasta sinela randado andré o criscote de las caremas de Isaias Propheta: Gole de yeque garlando andré o torbergelí: Vriardad o drun ye Erañoró, Querelad bastarrias as fedas de leste.

⁵ Saro jinco tan se perelará; y saro bur y plai se pejerá: y o techafao sinará enderezado: y os drunes parabaos quejelános.

⁶ Y dicará sari maas a berabea de Debél.

⁷ Y penó á os manuces, que abillaban pa que los muchobelase: ¿Rati de chaplescas, coin penó á sangue á najar de la tornasibá sos perfiné abillar?

⁸ Querelad pues frujería digna de aberuco, y na os chitelais penar: Terelamos por batu á Abraham. Presas sangue penelo, que astisarela Debél de cabas barendañias surdinar chabores á Abraham.

⁹ Presas acana sinela chitada la chinaora á la penebrí es eruques, ta saro eruque, sos na diñele frujería lachí, sinará velado, y chibado andré a yaque.

¹⁰ Y le puchababan os manuces, y penaban: ¿Pues que querelaremos?

¹¹ Y rudelando les penaba: O manu sos terela dui coneles, diñele al manu sos na terela: y o sos terela que jamar, querele o matejo.

¹² Y abilláron tramisto leque os Anglanes, pa que os bordelase, y le penáron: ¿Duquendio, que querelaremos?

¹³ Y o les penó: Na ustileis butér de or so os sinela penado.

¹⁴ Le puchababan tramisto os jundunares, penando: ¿Y mu que querelaremos? Y les penó: Na queraleis choro á cayque, ni le mareleis, y sineleis retejos sar jiré plasaripen.

¹⁵ Y sasta os manuces pachibelasen, y os sares penchibasen enré desqueres carlochines, si por baji Barsané sinaba o Crisirné:

¹⁶ Rudeló Barsané, y penó á os sares: Menda en chachipen muchobelo sangue andré paní: Tama abillará avér baributér silno que menda, de or sos ne amolelo de despandar os jurnies de desqueres tirajais: ocola muchobelará sangue andré o Chanispero Majaro, ta yaque:

¹⁷ De or sos la barbanaora sinela andré su baste; y alimpiará desquero era, y chibará o gi andré su graní, y la pus jachara sar yaque merinao.

¹⁸ Y andiar pucanaba averias baribustrias buchías á la sueti andré sus araqueripénes.

¹⁹ Tama Herodes o Tetrarcha, sinando chingarado por leste pre bausale de Herodias romi de sun planó, y de sarias as buchías chorias sos Herodes habia querdi,

²⁰ Chitó á sarés sus tuyalipénes tramisto ocona de querelar pandar á Barsané andré la estaripel.

²¹ Y chundeó, que sasta sari a sueti lillase o bordelipen, tramisto sinaba bordelado Jesus; ta sinando ó manguelando á Debél, se despandó o Tarpe:

²² Y pejó ostely opréle o Chanispero Majaro andré trupo, sasta ballestero: y se juneló ocono gole del Tarpe: Tumen sinelas minrio Chabal camelado; andré tumen menda me alendelo.

²³ Y o Jesus presimelaba á terelar sasta de trianda berjis, chabo, segun se penelaba, de Simprofíe, chabo de Heli, chabo de Mathat,

²⁴ Chabo de Levi, chabo de Melchi, chabo de Janne, chabo de Simprofíe,

²⁵ Chabo de Mathathias, chabo de Amos, chabo de Nahum, chabo de Hesli, chabo de Nagge,

²⁶ Chabo de Mehath, chabo de Mathathias, chabo de Semei, chabo de Simprofíe, chabo de Juda,

²⁷ Chabo de Joanna, chabo de Resa, chabo de Zorobabél, chabo de Salathiel, chabo de Neri,

²⁸ Chabo de Melchi, chabo de Addi, chabo de Cosán, chabo de Helmadan, chabo de Her,

²⁹ Chabo de Jesus, chabo de Eliezer, chabo de Jorim, chabo de Mathat, chabo de Levi,

³⁰ Chabo de Simeón, chabo de Judas, chabo de Simprofíe, chabo de Jonás, chabo de Eliakim,

³¹ Chabo de Melea, chabo de Menna, chabo de Mathatha, chabo de Nathán, chabo de David,

³² Chabo de Jessé, chabo de Obed, chabo de Booz, chabo de Salmon, chabo de Naason,

³³ Chabo de Aminadab, chabo de Arám, chabo de Esron, chabo de Pharé, chabo de Judas,

³⁴ Chabo de Jacob, chabo de Isaac, chabo de Abraham, chabo de Thares, chabo de Nachor,

³⁵ Chabo de Sarug, chabo de Regan, chabo de Phaleg, chabo de Heber, chabo de Sale,

³⁶ Chabo de Cainán, chabo de Arphaxad, chabo de Sem, chabo de Noyme (Noé), chabo de Lamech,

³⁷ Chabo de Mathusalé, chabo de Henoch, chabo de Jared, chabo de Malaleel, chabo de Cainán,

³⁸ Chabo de Henos, chabo de Seth, chabo de Adám, sos fué chabal de Un‐debél.