Lucas 21 - Criscote e Majaró Lucas 1872 (Caló)

¹ Y sinando diando, dicó os balbales sos bucharaban desquerias diñipenes andré a jestari yi cangri.

² Y dicó tramisto yeque piuli chorori, sos chibelaba dui nostaritos.

³ Y penó: En chachipé sangue penelo, que caba chorori piuli ha chibado butér que sares os avéres.

⁴ Presas sares ocolas terelan bucharado pa prochibamientos de Debél, de sun balbalipea: Tama acaba de desqueri chororipea terela chibado sari la nostaripen sos terelaba.

⁵ Y rudeló á yeques, sos penaban de la cangri, que sinaba vriardí de barias pacuarias, y de diñipenes:

⁶ Oconas buchías sos diquelais, abillarán chibeses, pur na sinará mequelada bar opré bar, sos na sinará detechescada.

⁷ Y le puchabáron, y penáron: ¿Docurdo, pur sinará ocono? y que simache sinará, pur ocono presimeláre á sinar?

⁸ O penó: Diquelad, que na sineleis jojabados: presas baribustres abillarán andré minrio nao, penando: Menda sinelo, y o chiros sinela sunparal: aracateaos pues de chalar palal de ondolen.

⁹ Y pur junelareis chingaripenes y jestias, sangue na cangueleis: presas perfiné que ocono anaquele brotoboro, tama na sinará yescotria o terreplecó.

¹⁰ Oclinde les penaba: Se surdinará sueti contra sueti, ta clajita contra clajita.

¹¹ Y sinará bares pu‐chalabeos por os gaues, y nasalipenes, y boquises, y sinará buchías miratosas, y barias simaches e Charos.

¹² Tama anglal de saro ocono sangue lillarán, y plastañarán, entreguisarando sangue á as Socreterías, y á os estaripeles, y lliguerarán sangue á os Crallises, y á os Poresqueres, por minrio nao.

¹³ Y ocono sinará sasta machiria á sangue.

¹⁴ Terelad yeque buchí silni andré jires carlés, o na penchabar anglal or so terelais de rudelar.

¹⁵ Presas menda diñaré sangue mui y chaneleria, al que n’astisarelarán contrapenar, ni querelar jeró sares jires daschmanuces.

¹⁶ Y sinareis binados de jires batuces, y plalores, y rati, y monres, y querelarán merar á yeques de sangue.

¹⁷ Y sares solajarán á sangue pre minrio nao.

¹⁸ Tama na se najibará yeque bal de jires jerés.

¹⁹ Sar jiri orpachirima listrabareis jirias ochías.

²⁰ Pues pur dicareis á Jerusalém pandada al crugos de jundunares, oclinde chanelad que sun najipen sinela sunparal.

²¹ Oclinde ondoles sos sinelan andré la Judéa, najilelen á os bures: y ondoles en majara de lati se sicobelen abrí; y ondoles andré os bures na chalen andré de lati.

²² Presas oconas sinelan chibeses de curelo pre crejete, pa que se perelalen sarias as buchías, sos sinelan libanadas.

²³ Tama ysna de las cambrias, y de ocolas sos diñelan de mamiserar andré ocolas chibeses! Presas sinará bari quichardinipen opré a pu, y tornasibá pa ocona sueti.

²⁴ Y perarán á la mui e estuche: y sinarán lliguerados utildes á sares os chimes, y Jerusalém sinará atelis os pindrés de los Busnes: disde que se perele o chiros es Busnes.

²⁵ Y terelará simaches andré o Can, y andré a Chimutra, y andré as cherdillas; y andré la pu dajiralo de sueti en perpléjo; o Maçulotende y as gulas catabranando;

²⁶ N’astisarando os manuces chanisperar pre bausale de o dal y canguelo es buchías, sos opre‐abillarán á sari a surdan: presas as silas e Tarpe sinarán chalabeadas:

²⁷ Oclinde diquelarán al Chabal e manu abillar opré yeque aparáti sar sisla bari ta chimusolano.

²⁸ Pur presimelaren pues á perelarse oconas buchías, diquelad, y surdinelad jires jeres; presas sunparal sinela jire berabea.

²⁹ Y les penó yeque jandeblabán: Diquelad la eru‐orfi, y sares os eruqueles.

³⁰ Pur bucharelan ya abrí de sí as parójis, jabillais que sunparal sinela o canriano.

³¹ Andiar tramisto sangue, pur dicalareis querelarse oconas buchías, chanelad que sunparal sinela o Clajita de Debél.

³² En chachipen sangue penelo, que na nacará ocona chindaracion, disde que sarias oconas buchías sinarán quereladas.

³³ O Char ta la pu nacarán: tama minrias caremas na nacarán.

³⁴ Diquelad pues por sangue, na sinele que jires carlés se cartrabelen de ingodinepen y de matipen, y de las canrias de ocona chipen: y que abillele de singo opré sangue ocola chibes.

³⁵ Presas andiar sasta yeque maluno abillará opré sares sos sinelan opré yi chiche de sari a jolili.

³⁶ Pues sinelad changanés manguelando á Un‐debél andré saro chiros, pa que amolareis de chapescar sarias oconas buchías, sos perfiné sinar, y de sinar en pindré, anglal e Chabal e manu.

³⁷ Y sinaba de chibes siscabelando andré yi cangri: ta arachis chalaba abrí, y lo nacaba andré o bur, acarado Bur es Chetallis.

³⁸ Y sari a sueti se surdinó de clarico, pa abillar á junarle andré a cangri.