Lucas 20 - Criscote e Majaró Lucas 1872 (Caló)

¹ Y chundeó yeque chibes, que sinando ó andré a cangri siscabelando á la sueti, y evangelizando, se catanáron os Manclayes es erajais sar os Pures,

² Y le penáron de ocona beda: Penamengue que solar‐ha querelas oconas buchías; ó coin sinela ó sos te diñó ocona sila.

³ Y Jesus rudeló, y penó lengue: Tramisto menda querelaré sangue yeque pucha. Rudeladmangue:

⁴ ¿O bordelipen de Barsané sinaba del Tarpe, ó de los manuces?

⁵ Ondoqueles, penchababan enré de sí, penando: Si penaremos, que del Tarpe, penará: ¿pues sosque na le pachibelasteis?

⁶ Y si penaremos: De los manuces, a sueti sari marelarános sar barendañias, pues terela por chachipe, que Barsané sinaba Propheta.

⁷ Y rudeláron que na chanelaban de duque sinaba.

⁸ Y les penó Jesus: Pues na penelo sangue, que solar‐ha querelo oconas buchías.

⁹ Y se chibó á penar á la sueti ocona tarquino: Manu chitó yeque resis, y la diñó á rentiserar á yeques randiñadores: y sofanó abrí de su chim per baribu chiros.

¹⁰ Y yeque chibes bichabó yeque de desqueres lacrés á os randiñadores, pa que le diñasen de la frujería yi resis. Tama ondoles curáron á ocona, y le bichabáron bardadí.

¹¹ Y aver alicati bichabó aver lacró. Tama ondoles curáron tramistos á ocona, ta querelandole baribu tuyal, lo bichabáron bardadí.

¹² Y limbidió á bichabar á aver trincho; y á ocono de la timuñi beda curáron, y le bucharáron abrí.

¹³ Y penó o Erañó yi resis: ¿Que querelaré? Bichabaré á minrio camelado chabo: Astis sinar, que pur le diquelen, le pachibarán.

¹⁴ Pur le diqueláron os randiñadores, penchabáron enré sí, y penáron: Cabo sinela o chabal, marelemos leste, pa que sinele nonrri la resis.

¹⁵ Y lliguerandole abrí yi resis, mareláron leste: ¿Que querelará pues sarsalen o julai yi resis?

¹⁶ Abillará, y marelará á oconas randiñadores, y diñará sun resis á averes. Y sasta ondoles lo juneláron, le penáron: Na sinele andiar.

¹⁷ Y ó dicandolen, penó: ¿Pues que sinela ocono, sos sinela randado: A bar, sos bucharáron os tasarbañis, ocona abilló á sinar a mas sasti yi epicon?

¹⁸ Saro ocola, sos perare opré ocola bar, bridaquelado sinará: y opré sos siro peráre, le marabeará.

¹⁹ Y os Manclayes es erajais, y os Libanes le camelaban chibar baste andre ocola ocana, tama cangueláron á la sueti: presas jabilláron, que contra ondolen terelaba penado ocono tarquino.

²⁰ Ta bersaliandole bichabáron juntunes, sos se diñalasen por laches, pa ustilarle andré chimoni carema, y lliguerarle á la beste, y bas e Poresquero.

²¹ Oconas pues le puchabáron, penando: Docurdo, chanelamos que penelas y siscabelas mistos; y que na querelas pachi á cayque, sino que bedelas en chachipen o drun de Debél.

²² ¿A amangue sinela mistos poquinar jandorro á Cæsar, ó nanai?

²³ Y ó, jabillando a choripen de ondolen, les penó: ¿Sosque pajabais mangue?

²⁴ Mequelame dicar yeque corio. ¿De coin sinela a chiche, y o liter, sos terela? De Cæsar; le rudeláron ondoles.

²⁵ Y penó lengue: Pues diñelad á Cæsar or so sinela de Cæsar: y á Debél or so sinela de Debél.

²⁶ Y na astisáron berjar bejanbi enré desquerias caremas anglal e sueti: tama darañelados de sun rudepen muquláron.

²⁷ Tramistos se bigoreáron yeques es Sadduceyes, sos penelan que no avela repurelamiento, y le puchabáron,

²⁸ Penando: Docurdo: Moyses ha libanado andré sun criscote: Si merare o plal de manu terelando romi, ta na mequelare chaboeia, que se romandiñase lasa o plal, ta surdinele chaboeia á desquero plal.

²⁹ Pues sinaban efta plalores, y lilló romi o mas baro, y meró na mequelando chaboeia.

³⁰ Y la lilló o duincho, y meró tramistos na mequelando chaboeia.

³¹ Y la lilló o trincho. Y andiar en alicati sares os efta, sos meráron na mequelando chaboeia.

³² Segritina es sares meró tramistos a romi.

³³ ¿Pues andré o repurelamiento, de coin de ondolen sinará romi? Presas sares os efta la tereláron por romi.

³⁴ Y Jesus les penó: Os chabes de ocona sueti se romandiñelan, y sinelan diñados en romandiñipen:

³⁵ Tama ondoles sos sinelan penchabados dosta‐laches por ocola sueti, y e costunipen es mulés, na se romandiñarán, ni sinarán diñados en romandiñipen.

³⁶ Presas n’astis que merelen butér: Presas sinelan iguales á os Manfarieles, y chabes sinelan de Debél, pur sinelan chabes e repurelamiento.

³⁷ Y que os mules terelan de surdinar, lo siscabó tramisto Moyses, pur sunparal á la brosibaña acaró al Erañó, o Debél de Abraham, y o Debél de Isaac, y o Debél de Jacob.

³⁸ Y na sinela Debél es mules, sino es apuchéris: presas sares apuchelan lesque.

³⁹ Y rudelando yeques es Libanes, le penáron: Docurdo, mistos terelas penado.

⁴⁰ Y darañeláron á puchabarle butér.

⁴¹ Y ó les penó: ¿Sasta penelan, que o Crisirné sinela Chabal de David?

⁴² Y o matejo David penela andré o gabicote es Psalmes: Penó o Erañó á minrio Erañoró: bestelatucue á minri bastari,

⁴³ Disde que bucharele á tires daschmanuces bajines de tires pindrés.

⁴⁴ Si David acarela leste Erañó: ¿Pues sasta sinela chabal de leste?

⁴⁵ Y junelando sari a sueti, penó á desqueres discolis:

⁴⁶ Garabelaos de os Libanes, sos se alendelan á pirelar sar plastamugiones uriardaos, y les pesquibela sinar salameados andré os maasqueres, y camelan as brotoborias bestis andré as socreterias, y as brotoborias peas andré os jachipenes;

⁴⁷ Sos jamelan os querés es piulias, querelando barias ocanagimias. Oconas terelarán sardenacion baributri.