Lucas 19 - Criscote e Majaró Lucas 1872 (Caló)

¹ Y Jesus terelando chalado andré, nacaba por Jericho.

² Y he acoi manu acarado Zachéo: y ocona sinaba Brotobo‐anglano, ta balbalo:

³ Y orotaba dicar á Jesus, coin sinase: y na le astis pre la baribu sueti, presas sinaba chinoro de trupo.

⁴ Y chalando anglal, se costunó andré eru‐sycomoro pa dicarle, presas por oté terelaba de nacar.

⁵ Y pur bigoreó Jesus á ocona tan, surdinelando as aquias, le dicó, y le penó: abillel ostely yescotria, presas perfiné que mangue achibes soscabele andré tun quer.

⁶ Y ó chaló ostely yescotria, y le lilló asaselandose.

⁷ Y dicando ocono sares, sonsiquereláron, penando, que terelaba chalado á soscabar andréquer de yeque choro.

⁸ Tama Zachéo, chibandose anglal e Erañoró, le penó: Erañó, a paque de or so terelo diñelo á os chorores: y si andré buchí terelo jojabado á manu, le voltisarelo star trincho butér.

⁹ Y Jesus le penó: Achibes ha abillado berabea á ocona quer: presas o tramisto sinela chabo de Abraham.

¹⁰ Presas o Chabal e manu abilló á orotar, y á berabar or so sinaba chibado á najabar.

¹¹ Junelando ondoles ocono, plastañó penandoles yeque tarquino, pre bausale de sinar sunparal de Jerusalém: y presas penchababan que yescotria se mequelaria dicar o Clajita de Debél:

¹² Penó pues: Manu gacho chaló á chim dur, pa lillar yeque clajita oté, y despues limbidiarse.

¹³ Ta acarando á deque de desqueres lacrés, diñó lengue deque estongrias, ta penó len: paruguelad sarsalen disde que abillelo.

¹⁴ Tama os de desquero foros na le camelaban, y bichobando palal de leste yeque plastañí, le penáron: Na camelamos que clajiyele ocona opré de amangue.

¹⁵ Y pur limbidió, despues de lillar o clajita, penó acarar á ocolas lacrés, á sos terelaba diñado o jayere, pa chanelar or so cata yeque terelaba paruguelado.

¹⁶ Bigoreó pues o brotobo, y penó: Erañó; tiri estongri ha ganisarado deque estongrias.

¹⁷ Y le penó: Sinela mistos, lacho lacró. Presas enré a fremíta has sinado gacho, terelarás ezori opré deque fores.

¹⁸ Y abilló aver, y penó: Erañó: Tiri estongri ha querdi pansch estongrias.

¹⁹ Y penó á ocona: Tucue terelalo opré pansch fores.

²⁰ Y abilló o trino, y penó: Erañó, acoi terelas tiri estongri, sos terelo aracateada enré yeque diclo.

²¹ Presas terelaba dal de tumen, sos sinelas manu gribule: Lillelas or so na chitaste, y chinelas or so na pacharracaste.

²² Oclinde ó le penó: Choro lacró, abrí de tiri mui sarplarelo tucue: Chanelabas que menda sinaba manu gribule, que lillelo or so na chité, y chinelo or so na pacharraqué.

²³ ¿Pues sosque na diñaste minrio jayere al banco, pa que pur limbidiase lo lillára sar segron?

²⁴ Y penó á ondolen sos sinaban oté: Nicabeladle a estongri, y diñadsela al lacró sos terela deque estongrias.

²⁵ Y ondoles le penáron: Erañó, que terela deque estongrias.

²⁶ Pues menda sangue penelo, que á saro ocola sos terelará, se le diñará, y terelará butér: tama al sos na terela, se le nicobará aun or so terele.

²⁷ Y en quichi á ocolas minres daschmanuces, sos na cameláron que menda clajiyase oprélen, laneladmelen acoi, y mareladlen anglal de mangue.

²⁸ Y penado ocono guillaba anglal costunando á Jerusalém.

²⁹ Y anacó, que pur bigoreó sunparal de Bethphage, y de Bethania, al bur, sos se acarela or Bur de Chetallis, bichabó dui es desqueres discolis,

³⁰ Penando: Chalad á ocona gau, sos sinela de mamui: y yescotria que chalareis andré, alachareis curoró de gel jongabado, y opré sos nardian encalomó cayque: despandadlo, y laneladlo.

³¹ Y si manu puchabelare sangue: ¿Sosque lo despandais? A leste rudelareis andiar: Presas o Erañó terela brajata de leste.

³² Chaláron pues ondoles sos habian sinado bichabados, y alacháron o curoró, sos sinaba sasta les habia penado.

³³ Y pur despandaban al curoró, les penáron os julais: ¿Sosque despandais al curoró?

³⁴ Y ondoles rudeláron: Presas o Erañó terela brajata de leste.

³⁵ Y lo laneláron á Jesus. Y chibando opré o curoró desqueres talarores: chitáron á Jesus opré.

³⁶ Y chalando ó andiar, bucharáron desqueres coneles andré ye drun.

³⁷ Y pur bigoreó sunparal al luchipen ye Bur de Chetallis, sari la berribu es discolis se chitó á alendarse, y á majarificar á Undebél á goles bares pre sarias as buchías, sos habian dicado,

³⁸ Penando: Majarificado o Crallis, sos abillela andré o nao e Erañoró, pache andré o Charos, y chimusolano andré os Sastos.

³⁹ Y yeques es Phariseyes sos sinaban enré a sueti, le penáron: Docurdo, chingara á tires discolis.

⁴⁰ O les rudeló: Sangue penelo, que si oconas mequelaren, as barias diñarán goles.

⁴¹ Y pur bigoreó sunparal, al dicar o Foros, orobó opréle, penando:

⁴² ¡Ysna! si pincherases la buchí andré ocona tun chibes, sos astisarela lanelartucue la pache! Tama acana sinela esparrusada de tirias aquias.

⁴³ Presas abillarán chibeses opré tucue, pur tires daschmanuces te chibarán carbe al rendepe, y te chibarán relli, y te pandarán pre sarias aligátas.

⁴⁴ Y chibarán tucue ostely, y á tires chabes, sos sinelan andré tucue, y na mequelarán andré tucue bar opré bar; presas na pincheraste o chiros de tiri visitacion.

⁴⁵ Y chalando andré a cangri presimeló á bucharar abrí á sares ondoles sos quinaban y binaban andréla,

⁴⁶ Penandolen: Libanado sinela: Minrio quer, quer de ocanagimia sinela. Tama sangue lo terelais querdi tunia de randes.

⁴⁷ Y cata chibes siscabelaba andré a cangri. Tama os Manclayes es erajais, y os Libanes, y os brotobores e sueti le camelaban marar.

⁴⁸ Y na chanelaban que querelarse sarsalé. Presas sari a sueti terelaba cengarica de junelarle.