Lucas 18 - Criscote e Majaró Lucas 1872 (Caló)

¹ Y les penaba tramisto cabo tarquino: que perfiné manguelar gayere, y na mequelarse,

² Penando: Sinaba yeque Barander andré foros, sos na darañaba á Un‐debél, ni pachibaba á manu yeque;

³ Y sinaba andré o matejo foros piuli, sos abillaba á leste y le penaba: Querelame sugilla de minrio daschmanu.

⁴ Y ó pré baribu chiros na camelaba. Tama despues de ocono penó enré sí: Aunsos na darañelo á Debél, ni pachibelo á manu yeque;

⁵ Tama, presas ocona piuli querela playi á mangue, le querelaré jarsia, pa que con su baribu abillar no quiñele mangue.

⁶ Y penó o Erañó: Junelad or so penela o Barander choro.

⁷ ¿Pues Un‐debél na querelará jarsia á desqueres chabes, sos acarelan á leste á gole chibes y rachi, y terelará orpachirima sarsalen?

⁸ Sangue penelo, que sigo os listrabará. Tama pur abillará o Chabal e manu ¿penchabelais que alachará fé opré ye pu.

⁹ Y penó tramisto cabo tarquino á yeques, sos pachibelaban á sí matejos, sasta si sinaban laches, y na pachibelaban á os averes:

¹⁰ Dui manuces chaláron opré á la cangri á manguelar á Un‐debél: O yeque Phariséo, y o aver Anglano.

¹¹ O Phariséo sinando en pindré, manguelaba enré sun ochí de caba beda: Un‐debél, chimusolano te diñelo, presas na sinelo sasta os averes manuces, randes, chores, pirandes; andiar sasta sinela cabo Anglano.

¹² Parrotobelo dui alicatis cata curque: diñelo dequezmos de o saro sos terelo.

¹³ Tama o Anglano, soscabando muy dur, darañaba aun costunar as aquias al Tarpe: sino que curaba sun chepo, penando: Un‐debél; terela canrea de mangue choro!

¹⁴ Sangue penelo, que cabo chaló justificado á sun quer, y otoba nanai: presas saro manu, sos se surdinela, sinará bucharado ostely; y ó sos se chibele ostely, sinará surdinelado.

¹⁵ Y le lanelaban tramisto chabes chinores, pa que os pajabase. Y pur lo dicáron os discolis, os chingaraban.

¹⁶ Tama Jesus os araqueró, y penó: Mequelad, que abillelen á mangue os chinores, y na os chingareis; presas á manuces sasta ondoles sinela o Clajita de Debél.

¹⁷ Anariana sangue penelo, que ó sos na lillase o Clajita de Debél, sasta chinoro, na chalará andréle.

¹⁸ Y le puchabó yeque Manclay, penando: Docurdo lacho: ¿que querelaré pa alachar a mestepen verable?

¹⁹ Y Jesus le penó: ¿Sosqué acarelas mangue lacho? Cayque sinela lacho, sino Un‐Debél colcoro.

²⁰ Chanelas os Pucanamientos: Na marelarás: Na pirabarás: Na randelarás: Na penelarás jujana: Pachibela á tiro batu, y á tiri dai.

²¹ O penó: Saro ocono he querdi ende que sinaba chinoro.

²² Pur juneló Jesus ocono, le penó: Aun á tucue querela farsilája yeque buchí: binela saro que terelas, y dinlo á os chorores, y terelarás jandorripen andré o Tarpe: y abillel, y plastañamangue.

²³ Pur ó juneló ocono, se chitó soronje: presas sinaba baribu balbalo.

²⁴ Y Jesus le penó, pur le dicó soronje: Sar quichi cureló chalarán andré o Clajita de Debél ondoles sos terelan jandorro!

²⁵ Presas buchí butér facil sinela nacar brote pre la aqui de yeque jutia, que chalar manu balbalo andré o Clajita de Debél.

²⁶ Y penáron ondoles sos juneláron ocolo: ¿Pues coin astisarela berabarse?

²⁷ Les penó: Or so n’astis pa os manuces, astis pa Un‐debél.

²⁸ Y penó Pedro: Mistos diquelas, que mu terelamos mequelado sarias buchías, y terelamos plastañado tucue.

²⁹ O les penó: Chachipé sangue penelo, que cayque sinela, sos terele mequelado quer, ó batuces, ó planes, ó romi, ó chaboeia pre o Clajita de Debél,

³⁰ Sos na terele de alachar baribu butér andré ocona chiros: y andré o chiros que abillele a chipen verable.

³¹ Y lilló Jesus en corcoria á os deque ta dui: y os penó: Diquelad, chalamos á Jerusalém, y sinarán quereladas sarias as buchías, que randáron os Prophetas del Chabal e manu.

³² Presas sinará entreguisarado á os Busnés, y sinará flamado, y curado, y chotiado.

³³ Y despues que le curaren, le nicabarán a chipen, y ostinará al tríno chibes.

³⁴ Tama ondoles na jabilláron chichi de ocono: y ocona carema sinaba esparrusada á ondolen; y na jabillaban or so les penaba.

³⁵ Y chundeó, que bigoreando sunparal á Jericho, sinaba yeque chindo bestelado aligatas del drun, mangando trimán.

³⁶ Y pur juneló a sonsi e sueti sos nacaba puchabó, que sinaba ocono.

³⁷ Y le penáron, que nacaba Jesus Nazareno.

³⁸ Y penó á gole, gole: Jesus, Chabal de David, terela canrea de mangue.

³⁹ Y ondoles sos chalaban anglal le chingaraban, pa que mequelase. Tama ó garlaba baributér: Chabal de David, terela canrea de mangue:

⁴⁰ Y Jesus querelando facorro, penó que se le lanelasen. Y pur sinaba sunparal, le puchabó,

⁴¹ Penando: ¿Que camelas que te querele? Y ó rudeló: Erañó, que diquele.

⁴² Y Jesus le penó: Diquela, tun fé te ha chibado lacho.

⁴³ Y yescotria dicó, y le plastañaba chimusolanificando á Debél. Y pur dicó ocono sari a sueti, diñó chimusolano á Debél.