Lucas 15 - Criscote e Majaró Lucas 1872 (Caló)

¹ Ta abilláron á leste sares os Anglanes ta os chores pa junelar.

² Ta os Phariseyes ta os Libanes sonsiquereláron, penando: Cabo paillo lillela á os chores, ta jalela sarsalen.

³ Y les araqueró yeque tarquino, penando;

⁴ ¿Coin enré sangue sinela o manu, sos terela gres brajias, y si se najabela yeque braji, na mequela as esñerdi ta eñia averes andré os bures, y chala orotar a braji sos se habia najabado, disde alacharla?

⁵ Y despues de alacharla, la lillela opré desqueres picos, y se alendela.

⁶ Y abillando al quer acarela á desqueres panales, y contiques, penando: Alendaos mensa, presas he alachado a braji, sos se habia najabado.

⁷ Sangue penelo, que andiar sinará butér osuncho andré o Tarpe opré yeque chor sos quereláre aberuco, que opré esñerdi ta eñia laches, sos na terelan brajata de aberuco.

⁸ ¿O que romi sos terela deque chulis, si se najabela yeque chuli, na urdiflela la mermelli, y julabela o quer, y orotela a chuli emposunó disde alacharla.

⁹ Y despues de alacharla, catanela as monrias, y sunparalas, y penela: Alendaos mensa, presas he alachado a chuli, sos se habia najabado.

¹⁰ Andiar sangue penelo, que sinará osuncho anglal es majares de Un‐debél por yeque chor sos querela aberuco.

¹¹ Y peno: Manu tereló dui chabes:

¹² Y o mas chinoro penó á desquero batu: Batico, dinme a pajin e jandorro, sos ha de sinar minri, ta le diñó sun pajin.

¹³ Y frimes chibeses despues, catanando o mas chinoro saro desquero parné, se chaló a aver chim baribustrias millas, y oté najabó saro o parné, vivisarando gurujumente.

¹⁴ Y pur terelaba bucharado o saro, abilló boquis bari andré ocola chim, y ya na tereló que jalar.

¹⁵ Y chaló, y se binó lacró de yeque gacho de ocola chim, sos le bichabó á desqueres oltariques á aracatear balichés.

¹⁶ Y camelaba perelarse as porias de las drojis que os baliches jamelaban; y cayque le diñaba chichi.

¹⁷ Tama limbidiando á sí matejo, penó: ¡Quichis curadores sinelan andré o quer de minrio batusch, sos terelan mas manro que dosta, tama menda acoi sinelo merando de boquis.

¹⁸ Mangue ardiñelaré, y chalaré al batusch, y le penaré: Batu, he querdi crejete contra o Tarpe y anglal de tucue;

¹⁹ Ya na sinelo dosta lacho de sinar acarado tun chabo: querelame lacró, sasta sinela yeque de los paillés.

²⁰ Y se ardiñeló, y se chaló orotar sun batu. Y sasta aun sinaba dur baribu, sun batu le dicó, y le tereló canrea, y chaló najando, y l’ustiló al querlo, ta le diñó chumipen.

²¹ Y o chabo penó: Batu, he querdi crejete contra Un‐debél y anglal de tucue: ya na sinelo dosta lacho de sinar acarado tun chabo.

²² Tama o batu penó á desqueres lacrés: Lanelad acoi os coneles mas laches, y chiteladle, y le chibelad l’angustro andré a bas, y tirajaisch en os pindrés.

²³ Y lanelad petano chullo, ta mareladlo, y jalemos, y querelemos jachipen.

²⁴ Presas se meró minrio chabo, y terela chipen de nebel: sinaba najabado, y acana sinela alachado. Y se chibáron querelar a jachipen.

²⁵ Y o chabo mas baro sinaba abrí, y pur abilló sunparal al quer, juneló as singas ta o giyabar:

²⁶ Ta acaró á yeque es lacrés, y le puchabó que sinaba ocolo.

²⁷ Y o lacró le penó: Ha abillado tiro plal, y tiro batu ha marelado goruy chinoro chudcho, presas en chipen ha abillado.

²⁸ Tama ó sinaba ululé, y na camelaba chalar andré; tama sicobandose o batu abrí, se chibó á mangarle.

²⁹ Y rudeló á desquero batusch, y penó: He acoi tantos berjis he sinado randiñando para tucue, y nardian he querdi contra tirias caremas, y nardian me has diñado yeque bruñíta pa jalarla féteménte sar minres panales.

³⁰ Tama pur abilló cabo tiro chabo, sos terela gastisarado desquero parné sar lumiacas, le has marelado goruy chinoro chudcho.

³¹ Oclinde le penó desquero batusch: Chabal, gayeres sinelas mensa, y o saro sos terelo sinela tiro.

³² Tama sinaba mistos querelar jachipen, y alendarnos, presas se meró tun plal, y terela chipen de nebel; sinaba najabado, y acana sinela alachado.