Lucas 14 - Criscote e Majaró Lucas 1872 (Caló)

¹ Y anacó que chalando Jesus yeque Canché andré o quer de yeque es Phariseyes bares á jamar manro, ondoles le sinaban dicando.

² Y he acoi manu nasalo de la pani‐nasalipen sinaba anglal de leste.

³ Y Jesus araquerando á os Chandes yi Liri, y os Phariseyes, les penó: ¿Astis chibar lacho andré Canché?

⁴ Tama ondoles mui na gucanáron: O oclinde le lilló, le chibó lacho, ta le bichabó.

⁵ Y les rudeló, y penó: ¿Coin de sangue, sos dicando desquero gel, ó desquero goruy perado andré butron, na le sicobele abrí yescotria andré chibes de Canché?

⁶ Y na les astis rudelar á oconas buchías.

⁷ Y dicando tramisto sasta os acarados á os jachipenes orotaban as brotoborias bestes á la mensalle, les araqueró yeque tarquino, ta penó:

⁸ Pur sináres acarado á romandiñapenes, na besteles tute andré la brotobori beste, que na sinele que oté haya yeque pachibelado butér que tute.

⁹ Y que abillele ó sos acaró á tucue, y á leste, ta penele: Din a beste á ocona, y que oclinde tereles á ustilar a segritina beste sar bragapachi.

¹⁰ Tama pur sináres acarado, chal, ta bestelatute andré a beste segritina; pa que pur abillele ó sos tucue acaró, penele: Monro, costuna opré butér. Andiar sinarás pachibelado anglal de os sares sos sináren tusa á la mensalle.

¹¹ Presas saro ocola, sos se surdinela, sinará bucharado ostely: ta ó sos se chitela ostely, sinará surdinado.

¹² Y penaba tramisto á leste sos le habia acarado: Pur diñelas jachipen, ó chasilati, na acareles á tires monres, ni á tires plalores, ni á tiri rati, ni á tires contiques balbales, que na sinele que ondoles acarelen á tucue, andré desqueri alicati, ta poquinelen á tucue.

¹³ Tama pur querelas jachipen, acara á os chorores, guillopios, langues ta chin loquendes.

¹⁴ Y sinarás bresban, presas na terelan sar so poquinar tucue: Tama tucue se poquinará pur se costunarán os laches de meripen.

¹⁵ Pur yeque de ondolen sos jamelaban á la mensalle juneló ocono, le penó: Bresban ó sos jamará manro andré o Clajita de Debél.

¹⁶ Y ó penó: Yeque manu queró jachipen bari, ta acaró á baribustres.

¹⁷ Y pur bigoreó a ocana yi jachipen, bichabó á yeque de desqueres lacrés á penar á os acarados, que abillasen, presas saro sinaba childo.

¹⁸ Y os sares, sasta yeque, se chibáron á excusarse: O brotobo le penó: He quinado coyme, ta mangue perfiné chalar dicarlo: tucue manguelo que mangue tereles estomado.

¹⁹ Y penó aver: He quinado pansch cro de goruyés, ta camelo chalar á probisarlos: tucue manguelo que mangue tereles estomado.

²⁰ Y penó aver: He romandiñado romi, y andiar n’astis mangue chalar aotar.

²¹ Y limbidiando o lacró, diñó floja á desquero Erañó de ocono saro. Oclinde ululé o batico e quer, penó al lacró: Sicobelatucue yescotria á os maasqueres, ta á las ulichas e foros, ta lanelamangue acatan os sares chororés, y mangues, y chindes, y langues alachares.

²² Y penó o lacró: Erañó, sinela querdi, sasta lo penaste, y aun tan sinela.

²³ Y penó o Erañó al lacró: Chal á os drunes, y á as rellis, y querelalos con sila abillar, pa que se perele minrio quer.

²⁴ Penelo á tucue, que cayque de ocolas manuces, sos sináron acarados, jamará minrio jachipen.

²⁵ Y baribustri sueti chalaba sarsalé, ta limbidiandose penó lengue:

²⁶ Si yeque abillela á mangue, y camela desquero batu, y dai, y romi, y chabes, y plalores, y penias, y aun tramisto desqueri chipen, n’astis que sinele discoli de mangue.

²⁷ Y o sos na lliguerela desqueri trijul opré as barandías, y abillela palal de mangue, n’astis que sinele discoli minrio.

²⁸ ¿Presas coin de sangue camelando querelar yeque turno, brotoboro bestelandose, na jinela o jandorro de que terela brajáta, chanelando que perfiné carjibarlo.

²⁹ Que na sinele que despues de chitar a bar brotobori, ta na asilando carjibar, os sares sos lo diquelen, se chibelen á girelarse de leste.

³⁰ Penando: Cabo manu se chibó á querelar, ta na le astis carjibar.

³¹ ¿O que Crallis camelando chalar á chingarar contra aver Crallis, gres, bestelandose na penchabela, si le astis, sar deque milan manuces querelar jeró contra leste sos abillela sar bis milan?

³² De aver beda, pur o aver aun sinela dur, bichabela desqueri oropera, manguelandole lias de pache.

³³ Pues andiar saro ocola de sangue, sos na bucharela de leste sari buchí que terela, n’astis le sinelar minrio discoli.

³⁴ Lachi sinela la lon. Tama si á la lon nicobelan desquero saboruncho, ¡sar so sinará alonada!

³⁵ Na sinela lachi, ni pa la jolili, ni pa la groñi: tama la techescarelan abrí. Coin terela canis de junelar, que junele.