Lucas 20 - Embéo e Majaró Lucas 1837 (Caló)

JERÓ XX.

¹ Y anacó yeque chibes, que sinando ó andré a cangri bedando á la sueti, y evangelizando, se catanáron os Manclayes es erajais sat os pures,

² Y le penáron de ocona manera: Penamangue sa’ que solar querelas oconas buchias; ó coin sinela ó sos te diñó ocona sila.

³ Y Jesus rudeló, y les penó: Tambien menda querelaré sangue yeque pucha. Rudeladmangue:

⁴ ¿O bautismo de Juan sinaba del Tarpe, ó de los manuces?

⁵ Junos, penchababan andré de sí, penando: Si penaremos, que del Tarpe, penará: ¿pues presas na le pachibelasteis?

⁶ Y si penaremos: De los manuces, a sueti sari marelarános sat baras, pues terela por chachipe, que Juan sinaba Propheta.

⁷ Y rudeláron que na chanelaban de duque sinaba.

⁸ Y les penó Jesus: Pues na penelo sangue, sa’ que solar querelo oconas buchias.

⁹ Y se chibó á penar á la sueti ocona parabola: Manu chitó yeque resis, y la diñó a rentiserar á yeques randiñadores: y ó sinaba ausente pre baribu chiros.

¹⁰ Y yeque chibes bichabó yeque de desqueres lacrés á os randiñadores, somia que le diñasen del mibao e resis. Tami junos curáron á ocona, y le bichabáron vacío.

¹¹ Y aver begai bichabó aver lacró. Tami junos curáron tambien á ocona, y ultrajisarandole, lo bichabáron vacío.

¹² Y limbidió á bichabar á aver trincho: á coin junos de la mateja beda curáron, y le bucharáron abrí.

¹³ Y penó o Erañó e resis: ¿Qué querelaré? Bichabaré á minrio camelado chaboro: Astis sinar, que pur le diquelen, le terelen bajin.

¹⁴ Pur le diqueláron os randiñadores, penchabáron andré sí, y penáron: Ocona sinela o heredero; marelemosle, somia que sinele amari a heredad.

¹⁵ Y sicobandole abrí e resis, le mareláron. ¿Que querelará pues sat junos o julai e resis?

¹⁶ Abillará, y marelará á oconas randiñadores, y diñará sun resis á averes. Y sasta junos lo juneláron, le penáron: Na sinele andiar.

¹⁷ Y ó dicandolos, penó: ¿Pues que sinela ocono, sos sinela randado: A bar, sos bucharáron junos sos edificaban, ocona abilló á sinar a mas udschi e esquina?

¹⁸ Saro ocola, sos perare opré ocola bar, quebrantado sinará: y opré coin siro peráre, le nacicará.

¹⁹ Y os Manclayes es erajais, y os Libanes le camelaban chibar baste andré ocola ocana, tami cangueláron á la sueti: presas jabilláron, que contra junos terelaba penado ocona varda.

²⁰ Y acechandole bichabáron juntunes, sos se fingiesen laches, somia ustilarle andré alguna varda, y lliguerarle á la jurisdicion, y solar e Poresquero.

²¹ Oconas pues le puchabáron, penando: Duquendio, chanelamos que penelas y bedelas mistos; y que na querelas bajin á cayque, sino que bedelas en chachipen o drun de Debél.

²² ¿A amangue sinela mistos poquinar costiñi á Cæsar, ó nanai?

²³ Y ó, jabillando a choripen de junos, les penó: ¿Presas tentisarais mangue?

²⁴ Mequelame dicar yeque calé. ¿De coin sinela a chichi, y o letrero, sos terela? De Cæsar; le rudeláron junos.

²⁵ Y les penó: Pues diñelad á Cæsar ma sinela de Cæsar: y á Debél ma sinela de Debél.

²⁶ Y na astisáron reprehender desquerias vardas anglal e sueti: tami daránelados de sun respuesta sonsibeláron.

²⁷ Tambien se bigoreáron yeques os Sadduceyes, sos nieguisarelan a resurreccion, y le puchabáron.

²⁸ Penando: Duquendio: Moyses ha libanado andré sun embéo: Si merare o plal de manu terelando romi, bi mequelar chabores, que se romandiñase sat siró o plal, y ardiñele linage á desquero plal.

²⁹ Pues sinaban efta plalores, y ustiló romi o mas baro, y meró bi chabores.

³⁰ Y la ustiló o duincho, y meró tambien bi chaboro.

³¹ Y la ustiló o trincho. Y andiar en begai sares os efta, sos meráron bi mequelar sucesion.

³² Segritona es sares meró tambien a romi.

³³ ¿Pues andré a resurreccion, de coin de junos sinará romi? Presas sares os efta la tereláron por romi.

³⁴ Y Jesus les penó: Os chabores de ocona sueti se romandiñelan, y sinelan diñados en romandiñipen:

³⁵ Tami junos sos sinarán juzgados cabalicos de ocola sueti, y e resurreccion es mulés, na se romandiñarán, ni sinarán diñados en romandiñipen.

³⁶ Presas n’astis que merelen butér: presas sunelan iguales á os Manfarieles, y chabores sinelan de Debél, pur sinelan chabores e resurreccion.

³⁷ Y que os mules terelan de ardiñar, lo dialó tambien Moyses, pur sunparal á la beldolaya araqueró al Erañó, o Debél de Abraham, y o Debél de Isaac, y o Debél de Jacob.

³⁸ Y na sinela Debél es mules, sino es vivos: presas sares vivisarelan á ó.

³⁹ Y rudelando yeques es Libanés, le penáron: Duquendio, mistos terelas penado.

⁴⁰ Y darañeláron á puchabarle butér.

⁴¹ Y ó les penó: ¿Sasta penelan, que o Christo sinela Chaboro e David?

⁴² Y o matejo David penela andré o embéo es Psalmes: Penó o Erañó á minrio Erañoró: bestelatucue á minri bastari,

⁴³ Disde que bucharele á tires daschmanuces bajines de tires pindrés.

⁴⁴ Si David o araquerela Erañó: ¿Pues sasta sinela chaboro de ó?

⁴⁵ Y junelando sari a sueti, penó á desqueres discipules:

⁴⁶ Garabelaos de os Libanes, sos se alendelan á pirelar sat nubés bares, y les pesquibela sinar saludados andré os masqueres, y camelan as brotoborias bestis andré as synagogas, y os brotobores asientos andré as jachipenes;

⁴⁷ Sos jamelan os queres es piulias, querelando barias ocanagimias. Oconas terelarán condenacion mas bari.