Lucas 10 - Embéo e Majaró Lucas 1837 (Caló)

JERÓ X.

¹ Y despues de ocono araqueró o Erañó tambien averes setenta y dui; y os bichabó de dui en dui anglal de ó á saro foros y gau, aduque ó terelaba de abillar.

² Y les penaba! Aromali a mies sinela baribustri, tami os randiñadores frimés. Manguelelad pues al Erañó e mies, que bichabele randiñadores á desqueri mies.

³ Chalad: He acoi menda bichabelo sangue, sasta brajias en medio de lueyes.

⁴ Na lliguereleis quisóbu, ni manrañea, ni calcos, ni aspasareis á cayque por o drun.

⁵ André o saro quer que chalareis, brotobo penelad: paz sinele á ocona quer.

⁶ Y si sinare oté chaboro de paz, se chibará opré ó jiré paz; y si nanai, se limbidiará á sangue.

⁷ Y socabelad andré o matejo quer, jamando y piyando ma junos terelen, presas o randiñador digno sinela de desquero jayere. Na naqueleis de quer andré quer.

⁸ Y andré o saro foros andré coin chalareis, y sangue ustilaren, jamelad ma sangue childaren anglal.

⁹ Y chibelad mistos á os merdés, sos andré ó terelare, y penadles: Se ha abillado sunparál á sangue o chim de Debél.

¹⁰ Tami si andré o foros andré que chalareis, na ustilaren sangue, abillando por desqueres maasqueres, penelad:

¹¹ Aun o pracos, sos se ha pegado á amangue de jiré foros, chibelamos contra sangue: Chanelad no obstante, que ha abillado sunparal o chim de Debél.

¹² Sangue penelo, que andré ocola chibes sinará fetér a baji de Sodoma que de ocola foros.

¹³ ¡Ysna de tucue, Corozain! ¡Ysna de tucue Bethsaida! Que si andré Tyro, y andré Sydón se hubiéran querdi as buchias, sos se han querdi andré sangue, chiros há que bestelados andré conel de gono y andré jaquestaro, hubieran querdi penitencia.

¹⁴ Aromali para Tyro, y Sydón, sinará andré o juicio fetér baji, que para sangue.

¹⁵ Y tucue, Capharnaúm, ardiñado disde o Charos, disde o butrón sinarás chibado ostely.

¹⁶ O sos junela á sangue, junela á mangue. Y ó sos girela á mangue, girela á ocola, sos mangue bichabó.

¹⁷ Y limbidiáron os setenta y dui sat pesquital, penando: Erañó, aun os bengues se nos sujetan andré tiro nao.

¹⁸ Y les penó: Dicaba á Satanas sasta yeque maluno, sos peraba del Charos.

¹⁹ Diquelais: que sangue he diñado sila de pirar opré gulistrabas, y birberechas, y opré saro o ezor e daschmanu: y chichi sangue dañará.

²⁰ Tami andré ocono na asaseleis sangue: que os bengues os sinelen sujetos, antes asaselaos de que jires naues sinelan randados andré o Charos.

²¹ André ocola mateja ocana se asaseló andré o Peniche, y penó; Díñelo á tucue chimusolano, Dada Erañó e Tarpe y de la pu, presas ucharaste oconas buchias, á os Chandes y peruiques, y as has chibado en dut a os chinores. Andiar sinela, Dada: presas andiar ha sinado de tun pesquital.

²² Sarias as buchias a mangue sinelan diñadas de minrio Dada. Y cayque chanela, coin sinela o Chaboro, sino o Dada, ni coin sinela o Dada, sino o Chaboro, y ocola, á sos lo camelare penar o Chaboro.

²³ Y limbidiándose hacia os discipules, penó: Majares as aquias, sos diquelan ma sangue diquelais.

²⁴ Presas á sangue penelo, que baribustres Prophetas, y Crallises camelaron dicar ma sangue diquelais, y na lo dicáron; y junelar ma junelais, y na lo juneláron.

²⁵ Y se ardiñó yeque Chande de la Eschastra, y le penó somia pesquilarle: ¿Duquendio, que quereláre somia terelar chipen deltó?

²⁶ Y ó le penó: ¿André á Eschastra qué sinela randado? ¿sasta lirenas?

²⁷ O rudelando penó: Camelarás al Erañó tun Debél de saro tun carlochin, y de sari tun ochi, y de sari tun sila, y de sari tun chaneleria: y á tun proximo sasta á tun matejo.

²⁸ Y le penó: Mistos has rudelado: Querelad ocono, y vivisarás.

²⁹ O camelandose justificar á desquero matejo, penó a Jesus: ¿Y coin sinela minrio proximo?

³⁰ Y Jesus ustilando a varda, penó: Elabel chalaba ostely de Jerusalém á Jerichó, y diñó andré bastes de yeques randes, sos le randáron; y despues de terelarle curado, le mequeláron pas-mulo, y se chapescáron.

³¹ Anacó pues, que nacaba por o matejo drun yeque erajai: y pur o dicó, nacó de muy dur.

³² Y andiar matejo yeque Levita, bigoreando sunparal de ocola stano, y dicandole, nacó de dur.

³³ Tami yeque Samaritano, sos chalaba desquero drun, se bigoreó sunparal de ó: y pur le dicó, se lo diñó canrea.

³⁴ Y bigoreandose, le pandó as merdes, chibelando andré siras ampio y mol: y chibandolo opré desquero gra, lo lligueró a yeque mesuna, y tereló cuidado de ó.

³⁵ Y aver chibes sicobó dui calés, y os diñó al julai, y le penó: Garabelamanguele: y o saro sos gastisareles de butér, menda á tucue lo diñare pur limbidie.

³⁶ ¿Coin de ocolas trin penchabelas que sinaba o proximo de ocola, sos diñó andré bastes es randes?

³⁷ Ocola, rudeló o Chandé, sos tereló canrea sat ó: Pues cha, le penó, y querela tucue o matejo.

³⁸ Y anacó, que sasta sinasen andré drun, chaló Jesus andré yeque gau: y yeque cadchi, sos se hetó Martha, lo ustiló andré o quer de siró.

³⁹ Y ocona terelaba yeque plañi, araquerada Maria, sos bejelada á os pindres e Erañoró, junelaba su varda.

⁴⁰ Tami Martha sinaba ocupada gajere andré as haciendas e quer: y siró se abilló y penó: ¿Erañó, na diqueles, sasta minri plañi, mangue ha mequelado colcori somia querelar? penle pues, que mangue ayude.

⁴¹ Y o Erañó le rudeló, y penó: Martha, Martha, baribu cuidadosa sinelas, y andré baribustrias buchias te trajatelas.

⁴² Aromali jomte solamente yeque buchi. Maria ha ustilado a aricata fetér, sos na le sinará nicobelada.