Hebreos 1 - Re C'ac'a Testamento pa Kach'abal

Re Dios xucusaj re Ruc'ajol Jesucristo chin xusekresaj re ruch'abal

¹ Ajuer can tiempo, q'uiy bey xch'o re Dios quiq'uin re kavinak xe'c'ue' ajuer can. Y tak xch'o quiq'uin, xe'rucusaj re rusamajela' re xbex profetas chique. Y chin xusekresaj re ruch'abal chique re rusamajela' re', q'uiy formas xucusaj.

² Jac'a chupan re ka-tiempo yoj, re Dios can ja re Ruc'ajol Jesucristo xucusaj chin xusekresaj re ruch'abal chakavach. Re Dios pa ruk'a' re Ruc'ajol xujach-va ronojel chin che ja reja' re xoc Rajaf. Y chuka' pa ruk'a' reja' xuya-va chin xuban ronojel cosas.

³ Riq'uin re Jesucristo nik'alajin re ruk'ij y ru-poder re Dios. Roma re Jesucristo je junan riq'uin re Dios. Y ja re Jesucristo re ac'ayon chin ronojel, y ja riq'uin ru-poder re ruch'abal re tz'amayon ronojel re c'o. Reja' xcom chin che xuch'aj re kamac, y xc'astaj, c'are' xbetz'uye' chila' chicaj pa rajquik'a' re namalaj Dios.

Re Ruc'ajol re Dios c'o más ruk'ij que chiquivach re ángeles

⁴ Ja re Jesucristo re c'o más ruk'ij que chiquivach re ángeles. Y roma re samaj xuban, re Dios xuya' más ruk'ij. Y chuka' re rube' camas-va rajkalen que chach re be'aj ángel,

⁵ roma re Dios man jun bey rubin cha jun ángel: Ja rat re yat Nuc'ajol, y mare' ninya' ac'aslen. Y chuka' man jun bey rubin chij jun ángel: Ja reja' re Nuc'ajol y ja yen re Rutota'.

⁶ Y tak re Dios xutak-pa re Ruc'ajol chach re ruch'ulef, can xk'alajin-va che c'o ruk'ij, roma xubij chique conojel re ru-ángeles: Tiya' ruk'ij re Nuc'ajol.

⁷ Y chiquij re ángeles xaxe nubij: Re nu-ángeles camas ye'biyin chubanic re nusamaj, roma nimban chique che je ancha'l cak'ik' y je ancha'l relámpago.

⁸ Jac'a cha re Ruc'ajol nubij: Rat yat Dios, can xtaban gobernar chin nojel tiempo, y choj naban gobernar.

⁹ Can ajovan re choj y can atzelan re etzelal. Y mare' yen re a-Dios nbanon chava che yaqui'cot pan avánma. Yen nbanon chava che más yaqui'cot que chiquivach re nic'aj chic, re nbanon chuka' chique che ye'qui'cot.

¹⁰ Y chuka' re Dios xubij cha re Ruc'ajol: Ajaf, rat xabano re ruch'ulef, y chuka' re rocaj riq'uin re ak'a' xaban-va.

¹¹ Re ruch'ulef y re rocaj xque'q'uis. Pero rat man jun bey xcaq'uis. Re ruch'ulef y re rocaj xa can xque'tziakor, ancha'l nitziakor jun tziak,

¹² can xtabotz c'a-a ruchi' y xca'jal-a, ancha'l tijal jun tziak re man otz-ta chic. Jac'a rat man jun bey xcajalataj. Man jun bey xtiq'uis re ac'aslen.

¹³ Y chuka' re Dios man jun bey xubij cha jun ángel: Catz'uye' pa vajquik'a', y xque'nya' pan ak'a' re ye'tzelan avichin.

¹⁴ Re ángeles xa je espíritu y je rusamajela' re Dios. Y ja reje' re ye'tak roma re Dios chin ye'quito' re xque'colotaj chach re quimac.