Tito 3 - Kaqchikel Santo Domingo (Xenacoj)

Ri tijonik ri ndikꞌatzin nduyaꞌ ri Tito

¹ Takꞌuxlaꞌaj chake ri hermanos chi tikinimaj kitzij ri ngebꞌanun gobernar y kekinimaj chuqaꞌ ri chꞌaqa chik ri kꞌo uchuqꞌaꞌ pa kiqꞌaꞌ pa ruwiꞌ ri tinamit. Takꞌuxlaꞌaj chuqaꞌ chake chi ndikꞌatzin chi jumul tikꞌojeꞌ pa kánima chi ndikibꞌen jalajaj ruwech utz chake chꞌaqa,

² chi ma itzel kechꞌaꞌa chirij jun wineq, y ma tikibꞌen oyowal. Utz kinoꞌoj y loqꞌ kánima tikibꞌanaꞌ chikiwech konojel.

³ Porque jumbꞌey kan, roj chuqaꞌ ma jun qanoꞌoj, xetal xojtajiyaj rikꞌin. Ma xojniman ta chuwech ri Dios. Kin roj chꞌakatin. Xojkꞌojeꞌ chuqaꞌ pa ruqꞌaꞌ ri itzel teq rayinik ri xeqabꞌanalaꞌ y xkikot qánima kikꞌin. Chubꞌanik xqabꞌen itzel teq achike chake chꞌaqa wineq. Itzel xqanaꞌ chare roma utz kibꞌanun chꞌaqa chik, itzel xqatzꞌetelaꞌ qiꞌ chiqawech y xeqabꞌanalaꞌ itzel teq achike ri achoq roma ri wineq xmulu kikꞌuꞌx qikꞌin.

⁴ Pero atoq ri Dios ri Qakolonel xuqꞌalajrisaj ri utzulej runoꞌoj y xuqꞌalajrisaj chuqaꞌ chi ngerajoꞌ konojel wineq,

⁵ xojrukal pe pa ruqꞌaꞌ ri mak. Y keriꞌ xubꞌen, pero ma roma ta kꞌo utz qabꞌanaloꞌon pe, xa kin roma xujoyowaj qawech, y xubꞌen chꞌajchꞌaj chaqe roma xuyaꞌ jun kꞌakꞌakꞌ qalaxik, y xujel ri qakꞌaslen roma ri samaj ndubꞌen ri Espíritu Santo pa qánima.

⁶ Ri Dios kin ma xukꞌekꞌej ta xuyaꞌ pe ri Espíritu Santo pa qawiꞌ y ja ri Qakolonel Jesucristo xukusaj chin xuyaꞌ pe.

⁷ Y ri Dios xubꞌen keriꞌ chin nixta jun qamak ndiqeqalej chuwech roma ri favor ruyoꞌon chaqe, chin keriꞌ ndok qichin ri utzulej kꞌaslen ma ndikꞌis ta ri qoyobꞌen rikꞌin nojel qánima.

⁸ Nojel re ngitajin chutzꞌibꞌaxik chawa kin qetzij wi y utz chin nditaqix, y niwojoꞌ chi ma kataneꞌ chikitijoxik ri kitaqin chik ri Dios rikꞌin re tzij reꞌ, chin keriꞌ ndikꞌojeꞌ pa kánima chi ndikꞌatzin ndikibꞌen utz chake chꞌaqa chik. Porque nojel reꞌ kin utz y kꞌo utz ndukꞌen pe chake konojel.

⁹ Pero ma tachuquchaꞌ awiꞌ kikꞌin wineq pa ruwiꞌ tzij ri ma jun utz ndikikꞌen pe, achel ri tzij ngetzijox pa ruwiꞌ nukꞌun teq bꞌiꞌaj kichin wineq ri xekꞌojeꞌ ojer kan. Y ma tabꞌen oyowal, nixta tatzeq apu awiꞌ chupan tzij ngekibꞌanalaꞌ ri wineq ri ma junan ta ngenojin pa ruwiꞌ ri ndubꞌij ri ley xyoꞌox chare ri Moisés. Porque nojel tzij achel riꞌ xa ma jun kibꞌeyal y ma jun utz ndikikꞌen pe chawa.

¹⁰ Y si kꞌo jun ri ndirajoꞌ ndujech kiwech ri hermanos rikꞌin jun tijonik ri ma qetzij ta, tapixabꞌaj. Tabꞌij chare chi ma tubꞌen keriꞌ. Y si abꞌiꞌin chik chare jumbꞌey y ma ndiniman ta, tabꞌij chik jumbꞌey chare. Y si keriꞌ ma ndiniman ta, ma tayaꞌ chik qꞌij chare chi ndikꞌojeꞌ chiꞌikajal rix ri ndimal iwiꞌ pa rubꞌiꞌ ri Ajaw.

¹¹ Porque ri ndibꞌanun keriꞌ, ndiqꞌalajin chi ma pa rubꞌeyal chi ta ndinojin, xa kin mak ndajin rikꞌin, y ruyon chuwech royon castigo pa ruwiꞌ.

Ri rukꞌisibꞌel teq achike nduchilabꞌej e ri Pablo

¹² Atoq niteq e ri hermano Artemas o ri hermano Tíquico apeꞌ ratkꞌo, chimanchiꞌ kabꞌiyin chinukꞌulik pa tinamit Nicópolis, porque nubꞌanun ruwech chi chiriꞌ niqꞌasaj ri tiempo chin tew.

¹³ Tabꞌanaꞌ nojel ri ngatiker ndabꞌen chin ndayaꞌ e ri ndikꞌatzin chake ri Zenas ri jabꞌel retaman rubꞌeyal ri leyes y ri Apolos, chin keriꞌ kin kꞌo kikꞌin nojel ri ndikꞌatzin chin ri kibꞌey.

¹⁴ Y ri hermanos tiketamaj ndikibꞌen ri utz chin ngekitoꞌ ri ndikꞌatzin kitoꞌik, chin ndiwachin jabꞌel ri kikꞌaslen chuwech ri Dios.

Ri rukꞌisibꞌel teq tzij ndubꞌij ri Pablo chupan re wuj reꞌ

¹⁵ Konojel ri hermanos ri ekꞌo wikꞌin ndikiteq e ruxunaqil awech. Tayaꞌ chuqaꞌ ruxunaqil kiwech konojel ri ngojkajoꞌ ri junan qataqin ri Jesucristo kikꞌin. Ri favor ri nduyaꞌ ri Dios kin ta xtikꞌojeꞌ pa iwánima rix iwonojel.