Santiago 5 - Kaqchikel Santo Domingo (Xenacoj)

Ri ndikikꞌulwachij ri bꞌeyomaꞌ itzel kinoꞌoj

¹ Rix bꞌeyomaꞌ, tiwakꞌaxaj reꞌ:¡Kixoqꞌ y kixsikꞌin chi oqꞌej roma ri pataneq pa iwiꞌ!

² Ri ibꞌeyomal xa qꞌayinaq rubꞌanun y ri itziaq iyakon xchikopir qa.

³ Ri iqꞌanapueq y ri isaqipueq xpusir qa ruwech, y jariꞌ ndikꞌutu iwichin chi rix kꞌekꞌ, y roma ri ikꞌekꞌel, keriꞌ rubꞌanun ri ibꞌeyomal, y jariꞌ ri nditaqo iwichin pa qꞌaqꞌ. Rix iwetaman chi rojkꞌo chik chupan ri kꞌisibꞌel teq qꞌij, y xa tzꞌan bꞌeyomal imolon ruchiꞌ.

⁴ Tiyaꞌ cuenta chare chi ri koqꞌej ri samajelaꞌ ri xkimal ruwech ri itikoꞌ ri ma xeꞌitaj ta, jariꞌ ri ndisujun iwichin, y ri koqꞌej rejeꞌ xakꞌaxex pe roma ri Ajaw ri kꞌo nojel uchuqꞌaꞌ pa ruqꞌaꞌ.

⁵ Jakꞌa rix, chireꞌ chochꞌulew ikꞌuan jun kꞌaslen ri kin nojel kꞌo iwikꞌin, y nojel ri ndurayij ri iwánima iyoꞌon chare. Itiojrisan iwiꞌ achel wakx ri xe chik koyobꞌen ri qꞌij chin ngekamisex.

⁶ Ri wineq ri maneq itzel kibꞌanun chiwa, xeꞌisujuj y xitzꞌuk aqꞌ chikij chin xeꞌiteq pa kamik, y rejeꞌ ma jun achike xetiker xkibꞌen chin xkitoꞌ kiꞌ pa iqꞌaꞌ.

Ma tikꞌo ikꞌuꞌx chiroyobꞌexik ri Ajaw

⁷ Romariꞌ hermanos, ma tikꞌo ikꞌuꞌx, xa kin rikꞌin nojel iwánima tiwoyobꞌej ri qꞌij atoq ri Ajaw Jesucristo xtuqaqa chik jumbꞌey. Tiyaꞌ cuenta chare chi jun ri ndisamej pa rulew chutikik ru-semilla, ma ndikꞌo ta rukꞌuꞌx ndiroyobꞌej ndiqaqa ri nabꞌey teq jabꞌ y ri rukꞌisibꞌel jabꞌ pa ruwiꞌ ri rutikoꞌ.

⁸ Keriꞌ chuqaꞌ rix, ma tikꞌo ikꞌuꞌx ndiwoyobꞌej ri qꞌij atoq ri Ajaw nduqaqa chik jumbꞌey, xa kin tikꞌojeꞌ ruchuqꞌaꞌ iwánima rikꞌin rijaꞌ chin jumul, porque jubꞌaꞌ chik ndirajoꞌ chin nduqaqa.

⁹ Hermanos, ma kixwalal chirij chik jun, chin keriꞌ ma tibꞌan keriꞌ chiwa rix. Tiyaꞌ cuenta chare chi ri Jesucristo ri Qꞌatoy Tzij pa kiwiꞌ konojel wineq, jubꞌaꞌ chik ndirajoꞌ chin nduqaqa.

¹⁰ Hermanos, tiwoqaj raqen kibꞌey ri profetas. Rejeꞌ ma xkꞌo ta kikꞌuꞌx, xa kin xkikachꞌ ri kꞌayew xkiqꞌasaj, y xkiqꞌalajrisaj ri xubꞌij pe ri Ajaw pa kánima.

¹¹ Tiyaꞌ cuenta chare chi roj jabꞌel rokiqꞌij ndiqatzꞌet ri xkikachꞌ ri kꞌayew xkiqꞌasaj ojer kan. Rix iwakꞌaxan ri kꞌayew xukachꞌ ri Job, y iwetaman chuqaꞌ ri utz ri xubꞌen ri Ajaw chare pa rukꞌisibꞌel. Porque ri Ajaw kin utzulej runoꞌoj y kin ndujoyowaj kiwech ri wineq.

¹² Nu-hermanos, pa ruwiꞌ ri nubꞌiꞌin pe chiwa, nibꞌij chuqaꞌ chiwa chi ma tibꞌen jurar atoq ngixchꞌaꞌa, xaxe tibꞌij jaꞌn atoq keriꞌ wi ri ndibꞌij, o naq atoq ma ke ta riꞌ. Ma tiyaꞌ chupan ri itzij ri kaj, ri rochꞌulew o jun chik achike, chin keriꞌ ri Dios ma nduqꞌet ta tzij pa iwiꞌ roma keriꞌ xtibꞌen.

Ri ruchuqꞌaꞌ ri oración

¹³ Si kꞌo jun nduqꞌasaj kꞌayew chiꞌikajal, tubꞌanaꞌ orar. Si kꞌo jun ndikikot, tubꞌixaj rubꞌiꞌ ri Dios.

¹⁴ Si kꞌo jun ndiyawej, keroyoj ri eꞌukꞌuey bꞌey kichin ri ndikimal kiꞌ pa rubꞌiꞌ ri Ajaw, y rejeꞌ tikibꞌanaꞌ orar pa ruwiꞌ y tikimalaꞌ chare aceite olivo pa rubꞌiꞌ ri Ajaw.

¹⁵ Y ri oración ri ndibꞌan rikꞌin kuqubꞌel kꞌuxlaj, ndubꞌen chi ri ndiyawej ndikꞌachaj, porque ri Ajaw ndukꞌachojrisaj, y si ri ndiyawej kꞌo mak erubꞌanun, ngekuyutej.

¹⁶ Romariꞌ rix chiꞌiwachibꞌil iwiꞌ tiyaꞌ chiwij ri mak eꞌibꞌanaloꞌon, y tibꞌanaꞌ orar pa iwiꞌ chiwech chin ngixkꞌachaj chuwech ri iyabꞌil. Tiwetamaj chi ri oración ri ndubꞌen jun ri chojmilej rukꞌaslen, kꞌo ruchuqꞌaꞌ chin ndibꞌanatej ri ndukꞌutuj.

¹⁷ Achel xbꞌanatej rikꞌin ri profeta Elías ojer, rijaꞌ maske xa jun ok relik wineq ri xunaꞌ rayinik pa ránima achel roj, pero roma rijaꞌ rikꞌin nojel ránima xubꞌen orar y xukꞌutuj chi ma tiqaqa jabꞌ pa ruwiꞌ ri rochꞌulew, kin keriꞌ wi xbꞌanatej y ma xubꞌen ta jabꞌ oxiꞌ junaꞌ rikꞌin nikꞌaj.

¹⁸ Y atoq xeꞌeqꞌax yan ri oxiꞌ junaꞌ rikꞌin nikꞌaj, xubꞌen chik orar, y xpuꞌun chik jabꞌ chikaj, y ri tikoꞌ jabꞌel chik xewachin.

Keqatoꞌ ri aj mak wineq chin nditzolij pe kánima rikꞌin ri Dios

¹⁹ Nu-hermanos, si kꞌo jun chiꞌikajal ndisach ri qetzij bꞌey chuwech, y jun chiꞌikajal rix ndubꞌen chi nditzolij pe ránima rikꞌin ri Dios,

²⁰ tiwetamaj kꞌa, chi ri ndibꞌanun chare jun aj mak chi nditzolij pe chupan ri qetzij bꞌey, ndukal ri ránima chuwech ri kamik, y ndubꞌen chi santienta mak ngekuyutej.