Santiago 4 - Kaqchikel Santo Domingo (Xenacoj)

Ri bꞌaneq kánima chirij ri itzel teq achike, eyakatajneq chirij ri Dios

¹ ¿Achike kꞌa ri ndibꞌanun chiwa chi itzel nditzꞌet iwiꞌ chiwech chin ngeꞌibꞌen kakaj y nimaꞌq teq oyowal? Ri ndibꞌanun keriꞌ chiwa, ja ri itzel teq rayinik kꞌo pa iwánima, ri ndikajoꞌ ngixkiyaꞌ chuxeꞌ ri kuchuqꞌaꞌ.

² Rix ngixjamem chirij kꞌiy achike, pero roma ma ndiwil ta, hasta ngixkamisan, y itzel ndinaꞌ chare roma utz rubꞌanun jun chik, y roma ma ngixtiker ta ndiwil ri ndiwojoꞌ, ndibꞌanalaꞌ kakaj y nimaꞌq teq oyowal chiwech. Rix maneq iwikꞌin ri ndiwojoꞌ, porque ma ndikꞌutuj ta chare ri Dios.

³ Y atoq rix ndikꞌutuj jun achike chare ri Dios, rijaꞌ ma nduyaꞌ ta pe chiwa, porque ma ndikꞌutuj ta chin ndibꞌen ri utz, xa chin ndibꞌanalaꞌ ri itzel teq achike ndirayilaꞌ.

⁴ ¡Rix ma xe ta chare ri Dios iyoꞌon ri iwánima! ¿La ma iwetaman ta kꞌa si ndibꞌa iwánima chirij ri ndusuj ri rochꞌulew, rix yakatajneq chirij ri Dios? Romariꞌ konojel ri ndibꞌa kánima chirij ri ndusuj ri rochꞌulew, kin eyakatajneq chirij ri Dios.

⁵ Ma tinojij rix chi maneq reqalen ri tzꞌibꞌan kan chupan ri rutzij ri Dios ri kereꞌ ndubꞌij: Ri Dios santienta ndirajoꞌ ri espíritu ri ruyoꞌon chaqe. Keriꞌ tzꞌibꞌan kan.

⁶ Pero ri Dios ngojrutoꞌ más rikꞌin ri nimalej ru-favor ruyoꞌon pa qawiꞌ, achel ndubꞌij chupan ri rutzij: Ri Dios ma ndukꞌen ta apu kiwech ri ndikinimrisalaꞌ kiꞌ, pero nduyaꞌ ri ru-favor pa kiwiꞌ ri ndikiqasaj kiꞌ chuwech. Keriꞌ tzꞌibꞌan kan.

⁷ Romariꞌ, kin tijachaꞌ iwiꞌ pa ruqꞌaꞌ ri Dios. Ma tiyaꞌ lugar chare ri itzel chi ngixrutaqchiꞌij, y keriꞌ ri itzel ndanimej e y ngixruyaꞌ kan.

⁸ Kixjel apu rikꞌin ri Dios, y ri Dios kin xtijel pe iwikꞌin rix. ¡Rix aj mak, tichojmirisaj ri ikꞌaslen! ¡Y rix ri ndiwojoꞌ ndiyaꞌ ruqꞌij ri Dios, pero xa ndibꞌanalaꞌ chuqaꞌ itzel teq achike, tichꞌajchꞌojrisaj kꞌa ri iwánima!

⁹ ¡Kixbꞌison, tiqꞌaxa iwánima y kixoqꞌ roma ri imak! ¡Rix ri ngixtzeyaj roma ri itzel teq achike ngeꞌibꞌanalaꞌ, titzꞌamaꞌ oqꞌej, y rix ri ndikikot ri iwánima roma ri itzel teq achike ngeꞌibꞌanalaꞌ, kixbꞌison!

¹⁰ Tiqasaj iwiꞌ chuwech ri Ajaw, y rijaꞌ kin xtunimrisaj iqꞌij.

¹¹ Hermanos, riyin nibꞌij chiwa chi ma utz ta ngixwalal chirij jun chik. Ri ndiwalal chirij jun hermano, o ndubꞌij chi ma ja ta ri ndajin rikꞌin, xa kin chirij ri ley chin ri Dios ndiwalal y ndubꞌen chi ri ley maneq reqalen. Y si jun maneq reqalen ndubꞌen chare ri ru-ley ri Dios, xa ma ndunimaj ta ri ley. Pa rukꞌexel riꞌ, xa ndeqꞌax rutzij pa ruwiꞌ ri ley.

¹² Xaxe wi jun ri Qꞌatoy tzij ri yoyon pe ri ley, y ja rijaꞌ ri kꞌo uchuqꞌaꞌ pa ruqꞌaꞌ chin ngerukal ri wineq o ndukꞌis kiqꞌij. Jakꞌa rat, ¿achike kꞌa rat chin ndabꞌij si utz o ma utz ta rubꞌanun ri kikꞌaslen ri wineq?

Ma tinimrisaj iwiꞌ roma ri ndiwojoꞌ ndibꞌen

¹³ Wokami tiwakꞌaxaj ri nibꞌij chiwa rix ri ndibꞌilaꞌ kereꞌ: Wokami o chuwaꞌq ngojbꞌa pa jun chik tinamit y ngojbꞌekꞌojeꞌ chiriꞌ jun junaꞌ, ngojloqꞌon y ngojkꞌayin chin ndiqabꞌen méra, ngixchajeꞌ.

¹⁴ Y xa ma iwetaman ta ri ndipuꞌun pa ruwiꞌ ri ikꞌaslen chuwaꞌq-kabꞌij. Porque ri ikꞌaslen xa achel ri neblina ndiqaqa chochꞌulew, ri xa jubꞌaꞌ ok kꞌo y ndikꞌis paqiꞌ e.

¹⁵ Ri ndikꞌatzin ndibꞌij rix, jareꞌ: Si ri Ajaw nduyaꞌ qakꞌaslen, ndiqabꞌen ri jalajaj teq achike qanojin, kixchajeꞌ.

¹⁶ Pero rix ma ke ta riꞌ ndibꞌij, xa ndinimrisalaꞌ iwiꞌ rikꞌin ri tzij ndibꞌilaꞌ chuwech ri Dios. Y ri keriꞌ ndibꞌij xa kin itzel wi.

¹⁷ Porque si jun retaman ndubꞌen ri utz, y ma ndubꞌen ta, xa mak ri ndajin rikꞌin.