Santiago 2 - Kaqchikel Santo Domingo (Xenacoj)

Junan kiwech keqatzꞌetaꞌ ri wineq

¹ Nu-hermanos, rix ri itaqin ri Qajaw Jesucristo ri kin nimalej ruqꞌij, nibꞌij chiwa chi ma utz ta chi ngeꞌichaꞌ kiwech wineq.

² Porque si apeꞌ imolon iwiꞌ pa rubꞌiꞌ ri Dios, ndeqaqa jun achi rukusan jabꞌel teq tzieq, y chi ruwiꞌ ruqꞌaꞌ rukusan anillo bꞌanun chare qꞌanapueq, y ndeqaqa chuqaꞌ jun achi ri maneq ok ruchajin y jarajaj teq tzieq rukusan,

³ rix ja ri achi ri rukusan jabꞌel teq tzieq utz nditzꞌet ruwech y kereꞌ ndibꞌij chare: Katzꞌuyeꞌ chireꞌ chupan re jabꞌel tzꞌuyubꞌel reꞌ. Pero chare ri achi maneq ok ruchajin, kereꞌ ndibꞌij: Rat kapeꞌeꞌ na chiriꞌ, o katzꞌuyeꞌ chireꞌ pa ulew chiwaqen.

⁴ Atoq keriꞌ ndibꞌen, ndiqꞌalajin chi ngeꞌichaꞌ kiwech wineq, y xa ngixok qꞌatoy teq tzij ri rix ukꞌuan roma itzel teq noꞌoj, porque ma junan ta kiwech ngeꞌitzꞌet ri wineq.

⁵ Nu-hermanos ri tzꞌan ngixinwojoꞌ, tiwakꞌaxaj re nibꞌij chiwa: Ri Dios eruchaꞌon ri maneq ok kichajin chochꞌulew chin ndikitaqij rijaꞌ, y riꞌ kin nimalej bꞌeyomal, y eruchaꞌon chuqaꞌ chin ngeꞌok pa ru-reino ri Dios, reino ri sujun chake konojel ri ngeꞌojowan richin.

⁶ Pero rix maneq keqalen ndibꞌen chake ri maneq ok kichajin. ¿Ma nduqaqa ta kꞌa chiꞌikꞌuꞌx chi ja ri bꞌeyomaꞌ ri ngixkiyaꞌ pa kꞌayew chin ngewaꞌ chiwij, y ja chuqaꞌ ri bꞌeyomaꞌ ri rix kijororen ngixkikꞌuaj pa qꞌatbꞌel tzij chin ndikiqꞌabꞌaj tzij chiwij?

⁷ ¿La ma ja ta kꞌa ri bꞌeyomaꞌ ri ngeyoqꞌon rubꞌiꞌ ri Ajaw, bꞌiꞌaj ri xsikꞌix pa iwiꞌ chin xixok richin?

⁸ Rix kin utz ndibꞌen, si qetzij ndibꞌen cumplir ri ley ruyoꞌon ri Rey Dios, ri tzꞌibꞌan kan chupan ri rutzij y kereꞌ ndubꞌij: Kaꞌawojoꞌ ri wineq achel ndawojoꞌ awiꞌ rat. Keriꞌ tzꞌibꞌan kan.

⁹ Pero si rix ngeꞌichaꞌ kiwech wineq, mak ngixtajin rikꞌin. Y kin rukꞌulun ndiqaqa pa iwiꞌ ri castigo nduyaꞌ ri Dios, porque rix qꞌajoy tzij chin ri ru-ley ri Dios.

¹⁰ Porque si jun ndubꞌen nojel ri ndubꞌij chupan ri ley, pero nduqꞌej jun chikiwech ri mandamientos, riꞌ ndubꞌen chare ri jun riꞌ, chi ndok qꞌajoy tzij chin nojel ri mandamientos.

¹¹ Porque ri Dios kereꞌ rubꞌiꞌin kan: Ma takanoj rukꞌexel ri achoq ikꞌin rat kꞌulan. Y xubꞌij kan chuqaꞌ: Ma kakamisan. Si jun ma rukanon ta rukꞌexel ri achoq ikꞌin kꞌulan, pero ndikamisan, ri jun riꞌ okuneq jun qꞌajoy tzij chin ri ley.

¹² Romariꞌ, tichajij iwiꞌ rikꞌin ri ndibꞌij y ri ndibꞌen, porque kin ja ri utzulej teq tzij ri elesayon pe iwichin chuxeꞌ ruchuqꞌaꞌ ri mak, jariꞌ ri xtikusex chiwij chin ndiqꞌat tzij pa iwiꞌ.

¹³ Porque si jun wineq ma ndupoqonaj ta kiwech wineq, ma ndijoyowex ta chuqaꞌ ruwech rijaꞌ chupan ri qꞌij atoq ri Dios nduqꞌet tzij pa kiwiꞌ ri wineq. Pero ri ndipoqonan, kin xtijoyowex ruwech chupan ri qꞌij riꞌ.

Ri rutaqin ri Ajaw ndikꞌatzin ndubꞌen ri utz

¹⁴ Nu-hermanos, ¿kꞌo kami reqalen si jun ndubꞌij chi rutaqin ri Ajaw, pero ma ndubꞌen ta ri utz chake chꞌaqa chik? ¿La ndikolotej kami ri jun riꞌ, roma xe ok ndubꞌij chi rutaqin ri Ajaw?

¹⁵ Tiqabꞌij na kꞌa chi kꞌo jun hermano o jun hermana ri maneq chi ok kitziaq ndikikusaj, y maneq chuqaꞌ achike ndikikꞌux qꞌij-qꞌij,

¹⁶ y si jun chiꞌikajal rix kereꞌ ndubꞌij e chake: ¡Man ta jun achike xtikꞌulwachij pa bꞌey! ¡Tikusaj yan chik pimilej itziaq y tiwilij yan chik utz-utz iwiꞌ! Pero ma nduyaꞌ ta e ri ndikꞌatzin chake chin ndikiqꞌasaj ri kikꞌaslen, ¿achike ndikꞌatzin ri tzij ndubꞌij e chake?

¹⁷ Keriꞌ chuqaꞌ ri ndibꞌiꞌin chi rutaqin ri Ajaw, pero ma ndubꞌen ta ri utz chin ngerutoꞌ chꞌaqa chik, xa ma jun reqalen ndubꞌij chi rutaqin ri Ajaw.

¹⁸ Naq xa kꞌo jun ri kereꞌ xtibꞌiꞌin chuwa: Riyin nutaqin ri Ajaw, jakꞌa rat ndabꞌen ri utz chake chꞌaqa. Chare ri jun riꞌ, kereꞌ nibꞌij: Rat ndabꞌij chi ataqin ri Ajaw, pero ma ndabꞌen ta ri utz chake chꞌaqa. Takꞌutuꞌ kꞌa chinuwech achike modo chi qetzij ataqin ri Ajaw, si ma ndabꞌen ta ri utz. Y riyin nikꞌut chawech chi qetzij nutaqin ri Ajaw rikꞌin ri utz nibꞌen chake chꞌaqa chik.

¹⁹ Rat ataqin chi ri Dios xe jun. ¡Kin utz chi keriꞌ ndataqij! Pero hasta ri itzel teq espíritu ndikitaqij chi ri Dios xe jun, y romariꞌ kin ngebꞌarbꞌot chi xibꞌriꞌil.

²⁰ Rat xa rat achel jun wineq ri maneq runoꞌoj keriꞌ. Takꞌoxomaj kꞌa chi ma jun utz ndukꞌen pe chawa si xaxe ok ndabꞌij chi ataqin ri Ajaw, y ma ndabꞌen ta ri utz chake chꞌaqa chik.

²¹ Tiqakꞌuxlaꞌaj kꞌa ri xubꞌen ri qatit-qamamaꞌ Abraham ojer. Rijaꞌ xutaqij ri xubꞌij ri Dios chare porque xusuj ri rukꞌajol Isaac pariꞌ jun altar, romariꞌ ri Dios xubꞌen chare chi nixta jun rumak xreqalej.

²² Rikꞌin reꞌ, ndiqatzꞌet chi ri Abraham qetzij xutaqij ri Ajaw, y rikꞌin ri xubꞌen chunimaxik ri Dios, kin tzꞌaqet wi pa ránima chi rutaqin ri Ajaw.

²³ Y rikꞌin riꞌ, xbꞌanatej ri tzꞌibꞌan kan chupan ri rutzij ri Dios pa ruwiꞌ ri Abraham, ri kereꞌ ndubꞌij: Ri Abraham xutaqij ri xbꞌix chare roma ri Dios, y romariꞌ ri Dios xubꞌen chare chi nixta jun rumak xreqalej. Y ndubꞌij chuqaꞌ ri rutzij ri Dios chi ri Abraham ramígo ri Dios.

²⁴ Rikꞌin riꞌ ndiqatzꞌet chi jun wineq ma xe ta ok roma ndubꞌij chi rutaqin ri Ajaw, kin ja ta romariꞌ nixta jun rumak reqalen chuwech ri Dios, xa kin ndikꞌatzin chuqaꞌ ndubꞌen ri utz ri ndirajoꞌ ri Dios.

²⁵ Keriꞌ chuqaꞌ ri Rahab ri ixaq ri xukꞌayilaꞌ riꞌ chake achiꞌaꞌ ojer, nixta jun rumak xreqalej chuwech ri Dios, porque xerewaj pa rachoch ri ekaꞌiꞌ achiꞌaꞌ etaqon e chin ndekitzꞌetaꞌ chilaqꞌel ri tinamit Jericó, y xeruteq pa jun chik bꞌey chin xeꞌanimej.

²⁶ Romariꞌ ri rukꞌuꞌx ri qabꞌiꞌin pe jareꞌ: Si jun ndubꞌij chi rutaqin ri Ajaw, pero ma ndubꞌen ta ri utz chake chꞌaqa chik, xa ma jun reqalen ndubꞌij chi rutaqin ri Ajaw. Xa achel jun cuerpo kamineq, y maneq chik ri ránima.