Romanos 6 - Kaqchikel Santo Domingo (Xenacoj)

Roj kamineq chuwech ri mak y kꞌo qakꞌaslen rikꞌin ri Cristo

¹ ¿Achike ndiqabꞌij pa ruwiꞌ nojel ri qabꞌiꞌin pe? ¿Utz kami chi kꞌa ndiqabꞌen mak, chin keriꞌ más ndikꞌiyer ri ru-favor ri Dios pa qawiꞌ?

² ¡Ma utz ta! Porque roj xqayaꞌ yan kan ri mak, y achel roj kamineq chik chuwech, romariꞌ ma utz ta chi kꞌa ndiqabꞌen mak.

³ ¿Ma iwetaman ta kꞌa chi qonojel ri xojbꞌan yan bautizar, xe jun qabꞌanun rikꞌin ri Cristo Jesús? Riꞌ ndubꞌij tzij chi achel junan xojken yan rikꞌin rijaꞌ.

⁴ Romariꞌ, roj achel xojmuq yan junan rikꞌin ri Cristo chin xojken chuwech ri mak atoq xojbꞌan bautizar. Y achel ri Cristo xkꞌastajbꞌex pe chikikajal ri animaꞌiꞌ rikꞌin ruchuqꞌaꞌ ri Tataꞌaj Dios ri kin nimalej wi ruqꞌij, keriꞌ chuqaꞌ roj achel xojkꞌastajbꞌex yan pe keriꞌ, chin ndiqakꞌuaj jun kꞌakꞌakꞌ kꞌaslen.

⁵ Porque si rikꞌin ri xojbꞌan bautizar achel xojken yan rikꞌin ri Cristo, keriꞌ chuqaꞌ jun qꞌij más apu chiqawech ngojkꞌastajbꞌex, achel xkꞌastajbꞌex e rijaꞌ chikikajal ri animaꞌiꞌ.

⁶ Qetaman chi ri itzel kꞌaslen xqakꞌuaj rubꞌanun kan, xbꞌajix cho cruz junan rikꞌin ri Cristo ri nixta jun rumak, y keriꞌ ri itzel rurayinik ri qa-cuerpo xkꞌis ruchuqꞌaꞌ, chin keriꞌ ma ngojkꞌojeꞌ chi ta chuxeꞌ ruchuqꞌaꞌ ri mak.

⁷ Porque si jun wineq kamineq chik chuwech ri mak, ri mak maneq chik ruchuqꞌaꞌ pa ruwiꞌ.

⁸ Y si ri itzel kꞌaslen xqakꞌuaj rubꞌanun kan xken rikꞌin ri Cristo cho cruz, kin kuqul qakꞌuꞌx chi ndikꞌojeꞌ qakꞌaslen rikꞌin rijaꞌ chin jumul.

⁹ Porque qetaman chi ri Cristo xkꞌastajbꞌex pe chikikajal ri animaꞌiꞌ y ma ndiken chi ta, y ri kamik maneq chik ruqꞌaꞌ chare.

¹⁰ Porque rikꞌin ri kamik ri xuqꞌasaj, xukꞌis ruchuqꞌaꞌ ri mak chin jumul. Y wokami kꞌes, y rikꞌin ri rukꞌaslen ndunimrisaj rubꞌiꞌ ri Dios.

¹¹ Keriꞌ chuqaꞌ rix, jumul tiyaꞌ pa iwánima chi rix kamineq chik chuwech ri mak, pero rix kꞌes chin ndinimrisaj rubꞌiꞌ ri Dios, porque xe jun ibꞌanun rikꞌin ri Cristo Jesús.

¹² Romariꞌ, ma tiyaꞌ qꞌij chare ri mak chi ndubꞌen mandar pa i-cuerpo ri xa ndiken, chin ma ngixrutaqchiꞌij chubꞌanik ri itzel teq rurayinik.

¹³ Nixta tiyaꞌ ri iqꞌa-iwaqen chin ngeꞌok rusamajibꞌal ri mak chin ngekusex chin ndibꞌan itzel teq achike, xa kin tijachaꞌ iwiꞌ pa ruqꞌaꞌ ri Dios, achel rukꞌulun chi ndikibꞌen ri ekamineq chik chuwech ri mak y kꞌo chik ri kꞌakꞌakꞌ kꞌaslen nduyaꞌ ri Dios kikꞌin. Ri iqꞌa-iwaqen tijachaꞌ pa ruqꞌaꞌ ri Dios chin ngerukusaj chin ndibꞌen ri chaj wi chin ndibꞌan.

¹⁴ Porque ri mak ma utz ta chi ndikꞌojeꞌ ruchuqꞌaꞌ pa iwiꞌ, porque ma rixkꞌo ta chuxeꞌ ri ley xyoꞌox chare ri Moisés chin ndibꞌen ri ndubꞌij, xa kin rixkꞌo chuxeꞌ ri ru-favor ri Dios.

Wokami roj okuneq rusamajelaꞌ ri Dios chin ndiqabꞌen ri chaj wi chin ndibꞌan

¹⁵ Rikꞌin ri qabꞌiꞌin pe, ¿utz kami ndiqabꞌen mak, porque ma rojkꞌo chi ta chuxeꞌ ri ley, xa kin chuxeꞌ ri ru-favor ri Dios? Ma utz ta.

¹⁶ ¿Ma iwetaman ta kꞌa chi atoq rix ndiyaꞌ iwiꞌ chuxeꞌ rutzij jun chin ndinimaj, kin ja ri achoq chare ngixniman ri okuneq ajaw pa iwiꞌ? Si rix ndichaꞌ ndiyaꞌ iwiꞌ chuxeꞌ ruchuqꞌaꞌ ri mak chin ndibꞌen ri ndirajoꞌ, riꞌ ngixrukꞌuaj pa kamik, pero si ndichaꞌ ndiyaꞌ iwiꞌ pa ruqꞌaꞌ ri Dios chin ndinimaj rutzij, riꞌ ngixrukꞌuaj chin ndibꞌen ri chaj wi chin ndibꞌan.

¹⁷ Jumbꞌey kan xixkꞌojeꞌ chuxeꞌ ruchuqꞌaꞌ ri mak, pero matiox chare ri Dios, wokami rikꞌin nojel iwánima iniman ri tijonik ri yoꞌon kan chiwa.

¹⁸ Y xixelesex pe chuxeꞌ ruchuqꞌaꞌ ri mak, y xixok rusamajelaꞌ ri Dios chin ndibꞌen ri chaj wi chin ndibꞌan.

¹⁹ Re nutzꞌibꞌan e, xa jun relik ejemplo nukusan, porque kꞌa cuesta chiwa ndikꞌoxomaj ruchojmil ri niwojoꞌ nibꞌij. Jumbꞌey kan, rix xeꞌikusaj ri iqꞌa-iwaqen chin xeꞌibꞌanalaꞌ ri itzel y ri seqꞌ teq nojibꞌel ri xixkikꞌuaj chupan ri itzel kꞌaslen. Wokami, tikusaj kꞌa ri iqꞌa-iwaqen chin ndibꞌen ri chaj wi chin ndibꞌan, porque riꞌ ndubꞌen loqꞌolej chare ri ikꞌaslen chuwech ri Dios.

²⁰ Atoq kꞌa rixkꞌo chuxeꞌ ruchuqꞌaꞌ ri mak, ma xibꞌen ta ri chaj wi chin ndibꞌan.

²¹ ¿La kꞌo kami utz xukꞌen pe ri mak pa ikꞌaslen ri tiempo riꞌ? Ma jun. Y wokami xa ngixkꞌix ndikꞌuxlaꞌaj, porque ri mak pa rukꞌisibꞌel xa kamik ndukꞌen pe.

²² Pero wokami, xixelesex yan pe chuxeꞌ ruchuqꞌaꞌ ri mak y xixok rusamajelaꞌ ri Dios, y riꞌ kꞌo utz ndukꞌen pe chiwa porque ndubꞌen chare ri ikꞌaslen chi ndok loqꞌolej y pa rukꞌisibꞌel ndok iwichin ri kꞌaslen ma ndikꞌis ta.

²³ Porque ri tojik ndukꞌen pe ri mak, ja ri kamik, jakꞌa ri Dios ndusipaj ri kꞌaslen ma ndikꞌis ta, y riꞌ roma xe jun qabꞌanun rikꞌin ri Qajaw Cristo Jesús.