San Mateo 6 - Kaqchikel Santo Domingo (Xenacoj)

Ma tabꞌananej atoq ngaꞌatoꞌ ri wineq

¹ Atoq rix ndibꞌen utz chare jun, ma tibꞌananej chikiwech ri wineq, porque si keriꞌ ndibꞌen, ri aj chikaj Itataꞌ nixta jun rajel-rukꞌexel xtuyaꞌ pe chiwa.

² Romariꞌ, atoq ngaꞌatoꞌ ri wineq ri nixta jun ok kichajin, ma tawelesaj rutzijol, achel ndikibꞌen ri wineq kaꞌiꞌ kipalej. Rejeꞌ pa teq sinagogas, y pa teq bꞌey ndikelesaj rutzijol ri utz ngetajin rikꞌin, xe chin ndiyoꞌox kiqꞌij. Kin qetzij nibꞌij chiwa, chi ri kiqꞌij ndiyoꞌox, xa kin xe ok riꞌ ri rajel-rukꞌexel ndiyoꞌox chake.

³ Pero rat atoq ngaꞌatoꞌ ri maneq ok kichajin, nixta chare ri awachibꞌil ri kin utz-utz retaman anoꞌoj tatzijoj.

⁴ Chin keriꞌ ri toꞌonik ndabꞌen, kin xe wi rat etamayon richin, y keriꞌ, ri Atataꞌ Dios ri kin ndutzꞌet ri ma ndikitzꞌet ta ri wineq, nduyaꞌ rajel-rukꞌexel chawa.

Ri Jesús ndukꞌut achike modo ndikꞌatzin ndibꞌan orar

⁵ Rix atoq ndibꞌen orar, ma tibꞌen achel ndikibꞌen ri wineq kaꞌiꞌ kipalej, porque rejeꞌ tzꞌan ndikirayij ndikibꞌen orar epeꞌel pa teq sinagogas, pa teq bꞌey, y pa teq kꞌayibꞌel xe chin ngetzꞌat koma ri wineq. Kin qetzij nibꞌij chiwa chi xa kin xe ok riꞌ ri rajel-rukꞌexel ndiyoꞌox chake.

⁶ Pero rat atoq ndabꞌen orar, katok apu pa jay y tatzꞌapij pe ruchiꞌ ri jay, y tabꞌanaꞌ orar ayon ok rat chare ri Atataꞌ Dios. Y rijaꞌ ri kin ndutzꞌet wi ri ma ndikitzꞌet ta ri wineq, nduyaꞌ rajel-rukꞌexel chawa.

⁷ Y rix atoq ndibꞌen orar, ma xetal keꞌikamuluj tzij achel ndikibꞌen ri ma erutinamit ta ri Dios ri ndikinojij chi ngeꞌakꞌaxex pe roma ri tzꞌan tzij ndikibꞌilaꞌ.

⁸ Ma tibꞌen achel ndikibꞌen rejeꞌ, porque ri Itataꞌ Dios retaman chik ri achike ndikꞌatzin chiwa, atoq kꞌajani tikꞌutuj chare.

⁹ Rix atoq ndibꞌen orar, kereꞌ tibꞌij: Qatataꞌ Dios ri ratkꞌo chikaj, Kin jumul tinimrisex ri loqꞌolej abꞌiꞌ.

¹⁰ Kin ta nduqaqa yan ri qꞌij atoq ndabꞌen reinar pa ruwiꞌ nojel. Kin ta ja ri utzulej arayibꞌel tibꞌan chochꞌulew, Achel ndibꞌan chikaj.

¹¹ Tasipaj kꞌa ok ri rikil qaway ri ndikꞌatzin chaqe qꞌij-qꞌij.

¹² Takuyuꞌ ok ri mak qabꞌanun, Achel roj chuqaꞌ eqakuyun Ri kꞌo itzel kibꞌanun chaqe.

¹³ Y ma ndayaꞌ qꞌij chi ngojtaqchiꞌix chin ngojtzaq pa mak, Xa kin qojatoꞌ chin ma ngojqaqa pa ruqꞌaꞌ ri itzel.

¹⁴ Xubꞌij chuqaꞌ ri Jesús: Si rix ngeꞌikuy ri wineq rikꞌin ri itzel teq achike ngekibꞌen chiwa, keriꞌ chuqaꞌ ri Itataꞌ Dios kꞌo chikaj ndukuy ri imak rix.

¹⁵ Pero si rix ma ngeꞌikuy ta ri wineq ri ngebꞌanun itzel teq achike chiwa, keriꞌ chuqaꞌ ri Itataꞌ Dios ma ngixrukuy ta rikꞌin ri itzel teq achike ngeꞌibꞌen rix.

Ri Jesús ndukꞌut achike modo ndikꞌatzin ndibꞌan ayunar

¹⁶ Atoq ndibꞌen ayunar, ma tibꞌen chare ri iwech chi achel ta ngixbꞌison, achel ndikibꞌen ri wineq kaꞌiꞌ kipalej. Rejeꞌ ndikibꞌen chi ndibꞌison kiwech, xe chin ngetzꞌat koma ri wineq chi ndikibꞌen ayuno. Kin qetzij nibꞌij chiwa chi xa kin xe ok riꞌ ri rajel-rukꞌexel ndiyoꞌox chake.

¹⁷ Pero rat, atoq ndabꞌen ayunar, tayaꞌ jubꞌaꞌ jubꞌulej aqꞌon pa ajolon, y tachꞌajaꞌ utz-utz ri awech,

¹⁸ chin keriꞌ ri wineq ma ndikiyaꞌ ta cuenta chare chi ndabꞌen ayuno, xa kin xe wi ri Tataꞌaj Dios ri ma nditzꞌetetej ta ri ngarutzꞌet pe. Rijaꞌ ndutzꞌet ri ma ndikitzꞌet ta ri wineq, y kin nduyaꞌ wi rajel-rukꞌexel chawa ri ngatajin rikꞌin.

Tibꞌanaꞌ bꞌeyomal chikaj apeꞌ kꞌo ri Dios

¹⁹ Ma tibꞌa iwánima chirij ndibꞌen bꞌeyomal chochꞌulew apeꞌ xa ndichikopir y ndipusir, apeꞌ chuqaꞌ ri eleqꞌomaꞌ ndikijaqꞌ ruchiꞌ teq jay chin ngeꞌeleqꞌan.

²⁰ Más utz tibꞌa iwánima chirij ndibꞌen bꞌeyomal chikaj, apeꞌ nixta jun achike ndichikopir y ndipusir, apeꞌ chuqaꞌ nixta jun eleqꞌon ndujaqꞌ ruchiꞌ teq jay chin ta ndeleqꞌan.

²¹ Porque apeꞌ kꞌo ri ibꞌeyomal, chiriꞌ chuqaꞌ kꞌo ri iwánima.

Ri runaqꞌ teq qawech achel jun lámpara

²² Ri lámpara chin ri ru-cuerpo jun wineq ja ri runaqꞌ teq ruwech. Si rikꞌin utzulej ránima jun wineq ndutzꞌet nojel, nojel ri ru-cuerpo nojneq rikꞌin luz,

²³ pero si rikꞌin ma utzulej ta ránima ndutzꞌet nojel, nojel ri ru-cuerpo kꞌo pa qꞌequꞌ. Romariꞌ, si ri luz kꞌo pa akꞌaslen xa ndichup qa, kin qꞌequꞌ ndubꞌen qa ri akꞌaslen.

Tijonik pa ruwiꞌ ri bꞌeyomal

²⁴ Nixta jun samajel nditiker ndikꞌojeꞌ chuxeꞌ kitzij ekaꞌiꞌ ajaw pa jumbꞌey. Porque ri samajel riꞌ xtirajoꞌ jun y xa itzel xtutzꞌet ri jun chik, o xtunimaj rutzij jun, y ma xtirajoꞌ chi ta xtunimaj rutzij ri jun chik. Keriꞌ chuqaꞌ rix, maneq cheꞌel ndibꞌen ri ndirajoꞌ ri Dios si kꞌa bꞌaneq iwánima chirij ri bꞌeyomal chin ri rochꞌulew.

Ri Dios ngerubꞌen cuenta ri eralkꞌuaꞌl

²⁵ Romariꞌ nibꞌij chiwa: Ma kixel chꞌuꞌj chukanoxik ri ndikꞌatzin chiwa pa ikꞌaslen, ri achike xtikꞌux o xtitij, nixta kixel chꞌuꞌj chukanoxik tzieq chin ndikusaj. ¿La ma más ta kꞌa reqalen ri kꞌaslen ke chuwech ri achike ndikꞌuxeꞌ, y ri cuerpo ke chuwech ri tzieq ndikusex?

²⁶ Tiyaꞌ cuenta chake ri aj xikꞌ teq chikap ngerapap chikaj, rejeꞌ ma ngetikon ta, nixta ndikimal ruwech tikoꞌ, y nixta ndikiyek ruwech tikoꞌ pa teq yakbꞌel, pero ri aj chikaj Itataꞌ Dios ngerutzuq. ¡Y rix más iweqalen ke chikiwech ri chikap riꞌ!

²⁷ Y nibꞌij chuqaꞌ chiwa: Maske jun wineq ndel chꞌuꞌj, ma nditiker ta ndubꞌen chi ndikꞌojeꞌ jun hora más rukꞌaslen ke chuwech ri kꞌaslen rubꞌanun ruwech ri Dios chi nduyaꞌ chare.

²⁸ Y, ¿achike roma ngixel chꞌuꞌj roma ndiwojoꞌ itziaq chin ndikusaj? Tiyaꞌ cuenta chare achike modo ngekꞌiy ri kontzꞌiꞌj pa qꞌas. Rejeꞌ ma ndikikosisaj ta kiꞌ chi samaj, nixta ngekemon chin ta ndikibꞌen kitziaq.

²⁹ Pero nibꞌij chiwa chi nixta ri rey Salomón rikꞌin nojel ri bꞌeyomal ruchajin, ma xuweq ta riꞌ achel eweqon ri kontzꞌiꞌj roma ri Dios.

³⁰ Y si ri Dios rikꞌin kikontzꞌijal ngeruweq ri qꞌayis ri ngeꞌel pe pa qꞌas, y ri qꞌayis riꞌ ekꞌo kami y chuwaꞌq-kabꞌij xa ngeporox pa qꞌaqꞌ, ¿la ma xkixruweq ta kꞌa rix? Tiyaꞌ cuenta chare chi rix ma kin ta kuqul ikꞌuꞌx rikꞌin ri Dios.

³¹ Romariꞌ, ma kixel chꞌuꞌj y ma tibꞌij kereꞌ: ¿Achike kꞌa ndiqakꞌux? ¿Achike kꞌa ndiqatij? o ¿Achoq chare ndiqaweq qiꞌ?

³² Keriꞌ nibꞌij chiwa, porque ri jalajaj kiwech wineq ri ma kitaqin ta ri Dios, ngeꞌel chꞌuꞌj chukanoxik nojel reꞌ. Pero rix kꞌo ri aj chikaj Itataꞌ Dios ri kin retaman chi ngekꞌatzin nojel reꞌ chiwa.

³³ Romariꞌ, nabꞌey tibꞌa iwánima chirij ri ndubꞌen reinar ri Dios pa ikꞌaslen, y chuqaꞌ tibꞌa iwánima chirij ri ndikꞌuaj jun chojmilej kꞌaslen achel rukꞌaslen rijaꞌ. Si keriꞌ ndibꞌen, rijaꞌ kin nduyaꞌ wi pe nojel ri ndikꞌatzin chiwa.

³⁴ Roma kꞌa riꞌ, ma kixel chꞌuꞌj chunojixik ri achike ndukꞌen pe ri chuwaꞌq-kabꞌij, porque nojel teq qꞌij kꞌo kꞌayew ndikikꞌen pe, y ma ndikꞌatzin ta ndimal más kꞌayew chiwij ke chuwech ri ndiqꞌasaj chupan jun qꞌij.