San Mateo 4 - Kaqchikel Santo Domingo (Xenacoj)

Ri Jesús nditaqchiꞌix roma ri itzel chin ta nditzaq pa mak

¹ Ja atoq riꞌ ri Jesús xukꞌuꞌex roma ri Espíritu Santo pa chaqiꞌj y tzꞌiran ulew, chin nditaqchiꞌix roma ri itzel ri ndirajoꞌ ndutzeq pa mak.

² Y atoq ri Jesús xubꞌen yan ayunar 40 qꞌij y 40 aqꞌaꞌ, xchꞌumu pe rupan.

³ Y ri itzel ri nditaqchiꞌin richin xbꞌeqaqa apeꞌ kꞌo ri Jesús y xubꞌij chare: Rat ri rat Rukꞌajol ri Dios, tabꞌij chi re abꞌej reꞌ keꞌok qa kaxlan wey.

⁴ Pero ri Jesús xubꞌij chare: Chupan ri rutzij ri Dios kereꞌ tzꞌibꞌan kan: Ma xe ta rikꞌin kaxlan wey ngekꞌaseꞌ ri wineq, xa kin rikꞌin nojel ri tzij ndel pe pa ruchiꞌ ri Dios.

⁵ Ja atoq riꞌ ri itzel xukꞌuaj ri Jesús pa loqꞌolej tinamit Jerusalén, y pariꞌ ri lugar más nej jatal chin ri rachoch ri Dios xbꞌeruyaꞌ e,

⁶ y kereꞌ xubꞌij chare: Rat ri rat Rukꞌajol ri Dios, taroqij qa awiꞌ pa xulan y ma jun achike xtakꞌulwachij, porque chupan ri rutzij ri Dios kereꞌ tzꞌibꞌan kan: Ri Dios ndubꞌen mandar chake ri ru-ángeles chi ngatikichajij. Ngatikikꞌuaj pa kiqꞌaꞌ, Chin ma ndapajkꞌij awaqen chuwech abꞌej.

⁷ Y ri Jesús xubꞌij chare: Tzꞌibꞌan kan chuqaꞌ chupan ri rutzij ri Dios: Ma tatojtobꞌej ri Awajaw Dios, chin ta ndubꞌen ri ndawojoꞌ rat.

⁸ Jumbꞌey chik ri itzel chin ndutaqchiꞌij ri Jesús, xukꞌuaj pariꞌ jun nimajuyuꞌ, y xukꞌut chuwech nojel ri reinos ekꞌo chochꞌulew y ri kibꞌeyomal.

⁹ Y ri itzel xubꞌij chare: Nojel reꞌ niyaꞌ chawa, si chixukulen ndayaꞌ nuqꞌij.

¹⁰ Pero ri Jesús xubꞌij chare: ¡Katel e chinuwech, Satanás! Porque chupan ri rutzij ri Dios kereꞌ tzꞌibꞌan kan: Ja ri Awajaw Dios tayaꞌ ruqꞌij, y kin xe wi ri ndirajoꞌ rijaꞌ tabꞌanaꞌ.

¹¹ Ja atoq riꞌ ri itzel xuyaꞌ kan ri Jesús, y xebꞌeqaqa ángeles apeꞌ kꞌo ri Jesús, y ndikilij.

Ri Jesús ndutzꞌen rusamaj ri Dios pa rochꞌulew Galilea

¹² Atoq ri Jesús xrakꞌaxaj chi ri Juan ri Bautista xtzꞌapix pa cheꞌ, xtzolij pa rochꞌulew Galilea.

¹³ Pero ma xkꞌojeꞌ ta pa tinamit Nazaret, xa xbꞌekꞌojeꞌ pa Cafarnaúm, jun tinamit kꞌo chuchiꞌ ri lago apeꞌ kꞌo kulew ri kiy-kimam kan ri Zabulón y ri Neftalí.

¹⁴ Keriꞌ xubꞌen chin ndibꞌanatej ri rubꞌiꞌin kan ri profeta Isaías, atoq xubꞌij:

¹⁵ Ulew kichin ri kiy-kimam kan ri Zabulón y ri Neftalí, Apeꞌ ndeqꞌax ri bꞌey ndeqaqa pa mar. Ulew ri kꞌo apu jukꞌan raqen yaꞌ Jordán, Chupan ri rochꞌulew rubꞌiniꞌan Galilea apeꞌ ekꞌo wineq ma israelitas ta.

¹⁶ Ri tinamit ekꞌo pa qꞌequꞌ, Xkitzꞌet jun nimalej luz, Y ri wineq ekꞌo pa rumochꞌochꞌil ri kamik Xyikꞌan jun nimalej luz pa kiwiꞌ.

¹⁷ Y xe jampeꞌ atoq riꞌ, ri Jesús xutzꞌen rutzijoxik re tzij reꞌ: Tiyaꞌ kan ri mak y titzolij pe iwánima rikꞌin ri Dios, porque naqaj chik kꞌo ri qꞌij chi ri aj chikaj Dios ndutzꞌuk ndubꞌen reinar.

Ri Jesús ngeroyoj kajiꞌ karunelaꞌ chin ngeꞌok ru-discípulos

¹⁸ Atoq ri Jesús ndibꞌiyin chuchiꞌ ri lago chin ri rochꞌulew Galilea, xerutzꞌet kaꞌiꞌ achiꞌaꞌ kichaqꞌ-kinimal kiꞌ, jun rubꞌiniꞌan Simón ri xbꞌix chuqaꞌ Pedro chare, y ri jun chik rubꞌiniꞌan Andrés. Rejeꞌ ndikiyalaꞌ qa yaꞌl pa yaꞌ porque ekarunelaꞌ.

¹⁹ Y ri Jesús xubꞌij chake: Kiniwoqaj, y riyin nikꞌut chiwech achike rubꞌeyal ndibꞌen chin ngeꞌikaruj wineq chin nginikoqaj.

²⁰ Y kin ja paqiꞌ xekiyaꞌ kan ri yaꞌl, y xkoqaj ri Jesús.

²¹ Atoq ri Jesús xbꞌiyin chi apu jubꞌaꞌ más, xerutzꞌet ekaꞌiꞌ chik kichaqꞌ-kinimal kiꞌ, jun rubꞌiniꞌan Santiago y ri jun chik Juan. Rejeꞌ ekꞌo apu pa barco rikꞌin ri kitataꞌ rubꞌiniꞌan Zebedeo, ndikikꞌojoj ri kiyaꞌl tzꞌambꞌel ker. Y ri Jesús xeroyoj apu.

²² Y kin ja paqiꞌ xkiyaꞌ kan ri kitataꞌ, xeꞌel pe pa barco, y chi ekaꞌiꞌ xkoqaj ri Jesús.

Ri Jesús ngerutijoj santienta wineq

²³ Ri Jesús xbꞌa nojel teq apeꞌ chuwech ri rochꞌulew Galilea, ngerutijoj ri israelitas pa teq ki-sinagoga y ndutzijolaꞌ ri utzulej teq tzij ri ndubꞌij ri achike rubꞌeyal chin ngeꞌok ri wineq pa ru-reino ri Dios y ngerukꞌachojrisaj ri wineq chuwech nojel yabꞌil y qꞌaxomal.

²⁴ Pa nojel rochꞌulew Siria bꞌaneq utzulej rutzijol ri Jesús, y chuwech rijaꞌ ngeꞌukꞌuꞌex ri kꞌo jalajaj teq kiyabꞌil, ri santienta qꞌaxomal ndikinaꞌ, ri kꞌo itzel teq espíritu pa kikꞌaslen, ri nduyaꞌ ataque chake, y ri kamineq kiqꞌa-kaqen. Y ri Jesús xerukꞌachojrisaj.

²⁵ Y ekꞌiy koqan ri Jesús. Ekꞌo wineq chin ri rochꞌulew Galilea, chin ri rochꞌulew Decápolis, chin ri tinamit Jerusalén, chin ri rochꞌulew Judea, y ekꞌo chuqaꞌ wineq ri kꞌo kachoch jukꞌan chik apu ruchiꞌ ri raqen yaꞌ Jordán.