San Mateo 25 - Kaqchikel Santo Domingo (Xenacoj)

Ri parábola ri ndichꞌaꞌa pa kiwiꞌ lajuj qꞌopojiꞌ

¹ Ri Jesús xubꞌij: Atoq riyin ngitzolij chi pe, ndibꞌanatej pa aj chikaj reino achel xbꞌanatej pa jun kꞌulubꞌik, atoq lajuj qꞌopojiꞌ xkitzꞌen ki-lámparas y xeꞌel e chukꞌulik ri kꞌajol ndikꞌuleꞌ.

² Ewoꞌoꞌ chikikajal ri qꞌopojiꞌ ndikinojij utz-utz ri ndikibꞌen y ewoꞌoꞌ ri ma ndikinojij ta utz-utz ri ndikibꞌen.

³ Ri qꞌopojiꞌ ri ma ngenojin ta utz-utz xkikꞌuaj ki-lámparas, pero ma xkikꞌuaj ta más aceite chin ndikinojisaj chik ri ki-lámparas.

⁴ Pero ri qꞌopojiꞌ ri utz-utz ngenojin, xkikꞌuaj ki-lámparas y xkikꞌuaj chuqaꞌ más aceite pa kibꞌambꞌal.

⁵ Y roma ma nduqaqa yan ta ri kꞌajol, konojel ri qꞌopojiꞌ xewixkur qa y xkitzꞌen qa waran.

⁶ Y pa nikꞌaj aqꞌaꞌ xakꞌaxex jun ri ndisikꞌin chubꞌixik: ¡Ja pataneq ri kꞌajol ri ndikꞌuleꞌ! ¡Kixel e chukꞌulik!

⁷ Ja atoq riꞌ xekꞌastej pe konojel ri qꞌopojiꞌ y xkibꞌanalaꞌ rukꞌojlen ri ki-lámparas.

⁸ Ri ewoꞌoꞌ qꞌopojiꞌ ri ma ngenojin ta utz-utz, xkibꞌij chake ri chꞌaqa chik qꞌopojiꞌ: Tiyaꞌ jubꞌaꞌ iwaceite chaqe porque ri qa-lámparas ja ngechupeꞌ qa.

⁹ Pero ri woꞌoꞌ qꞌopojiꞌ ri ngenojin utz-utz xkibꞌij chake: Más utz kixbꞌiyin apeꞌ ndikꞌayix aceite y teꞌiloqꞌoꞌ iwichin rix, ma kꞌateꞌ roma ndiqayaꞌ ri qaceite chiwa, ma xqojrubꞌen ta roj y nixta rix.

¹⁰ Y atoq ri ewoꞌoꞌ qꞌopojiꞌ ebꞌaneq chuloqꞌik ri aceite, xuqaqa ri kꞌajol ndikꞌuleꞌ, y ri woꞌoꞌ qꞌopojiꞌ ri kinabꞌan kiꞌ xeꞌok apu junan rikꞌin ri kꞌajol pa nimaqꞌij chin ri kꞌulubꞌik, y xtzꞌapix pe ri puerta chin ri jay.

¹¹ Jubꞌaꞌ teqꞌax atoq riꞌ, xebꞌeqaqa ri chꞌaqa chik qꞌopojiꞌ y xechꞌaꞌa apu chare ri kꞌajol ri ndikꞌuleꞌ y xkibꞌij: ¡Ajaw, ajaw, tajaqaꞌ re puerta chiqawech!

¹² Pero ri kꞌajol ndikꞌuleꞌ xubꞌij pe chake: Kin qetzij nibꞌij chiwa chi ma wetaman ta iwech, xchajeꞌ.

¹³ Roma kꞌa riꞌ, ma kixwer, porque ma iwetaman ta ri qꞌij, nixta ri hora atoq ngitzolij chi pe, xchajeꞌ ri Jesús.

Ri parábola pa kiwiꞌ ri samajelaꞌ ri xyoꞌox kan méra pa kiqꞌaꞌ chin ndikisamajij

¹⁴ Porque chupan ri aj chikaj reino ndibꞌanatej achel xbꞌanatej rikꞌin ri xubꞌen jun achi ri ndutzꞌen bꞌey chin ndibꞌa pa jun chik rochꞌulew. Ri achi riꞌ xeroyoj ri loqꞌon teq rusamajelaꞌ y xujech kan méra pa kiqꞌaꞌ chin ndikisamajij.

¹⁵ Pa ruqꞌaꞌ jun xujech kan woꞌoꞌ talentos, pa ruqꞌaꞌ jun chik xujech kan kaꞌiꞌ, y pa ruqꞌaꞌ chik jun xujech kan jun talento. Xujech kan pa kiqꞌaꞌ ri janipeꞌ ngetiker ndikisamajij chikijununal y rijaꞌ xbꞌa nej.

¹⁶ Ri samajel ri xjach woꞌoꞌ talentos pa ruqꞌaꞌ, xloqꞌon y xkꞌayin rikꞌin ri méra, y xuchꞌek chik woꞌoꞌ talentos pa ruwiꞌ ri méra jachon kan pa ruqꞌaꞌ.

¹⁷ Keriꞌ chuqaꞌ xubꞌen ri samajel ri xjach kan kaꞌiꞌ talentos pa ruqꞌaꞌ, kin xuchꞌek chik kaꞌiꞌ talentos pa ruwiꞌ.

¹⁸ Jakꞌa ri samajel ri xe ok jun talento xjach kan pa ruqꞌaꞌ, xa xukꞌat jun jul chin xrewaj ri méra jachon kan pa ruqꞌaꞌ roma ri rajaw.

¹⁹ Y atoq qꞌaxneq chik kꞌiy tiempo, xtzolij pe ri kajaw ri loqꞌon teq samajelaꞌ riꞌ, xeroyoj chin ndiretamaj jarupeꞌ kichꞌakon pa ruwiꞌ ri méra rujachon kan pa kiqꞌaꞌ.

²⁰ Xbꞌeqaqa kꞌa ri samajel jachon kan woꞌoꞌ talentos pa ruqꞌaꞌ, y rukꞌuan apu woꞌoꞌ talentos más, y kereꞌ xubꞌij: Ajaw, woꞌoꞌ talentos ajachon pa nuqꞌaꞌ. Tatzꞌetaꞌ, yin xinchꞌek woꞌoꞌ más pa ruwiꞌ.

²¹ Ri rajaw xubꞌij chare: Utz xabꞌen, utzulej samajel, ri kin ndabꞌen ri ndibꞌix chawa. Rat utz xasamajij ri jubꞌaꞌ méra nujachon pa aqꞌaꞌ, romariꞌ nijech más kꞌiy pa aqꞌaꞌ. Katámpe y kakikot junan wikꞌin riyin ri awajaw.

²² Y xbꞌeqaqa chuqaꞌ ri samajel yoꞌon kaꞌiꞌ talentos pa ruqꞌaꞌ, y xubꞌij: Ajaw, kaꞌiꞌ talentos ajachon pa nuqꞌaꞌ. Tatzꞌetaꞌ, yin xinchꞌek kaꞌiꞌ más pa ruwiꞌ.

²³ Ri rajaw xubꞌij chare: Utz xabꞌen, utzulej samajel, ri kin ndabꞌen ri ndibꞌix chawa. Rat utz xasamajij ri jubꞌaꞌ méra nujachon pa aqꞌaꞌ, romariꞌ nijech más kꞌiy pa aqꞌaꞌ. Katámpe y kakikot junan wikꞌin riyin ri awajaw.

²⁴ Xbꞌeqaqa chuqaꞌ ri samajel jachon jun talento pa ruqꞌaꞌ y kereꞌ xubꞌij: Ajaw, riyin wetaman chi rat altíra anoꞌoj, ndawojoꞌ ndachꞌup ruwech tikoꞌ ri ma ja ta rat xasamajin y ndawojoꞌ chuqaꞌ ndamal ruwech tikoꞌ apeꞌ ma jun tikoꞌ abꞌanun.

²⁵ Y roma keriꞌ anoꞌoj, xinxibꞌij qa wiꞌ y xinwewaj ri améra pa ulew, pero tatzꞌetaꞌ, ja méra reꞌ ri ajachon pa nuqꞌaꞌ.

²⁶ Ri rajaw xubꞌij chare: Ma rat ta utzulej samajel, xa rat qꞌoroy. Xu awetaman chi yin nichꞌup ruwech tikoꞌ ri ma yin ta xisamajin y nimal ruwech tikoꞌ apeꞌ ma jun tikoꞌ nubꞌanun,

²⁷ ri xkꞌatzin ta chi xabꞌen, ja ta ri xayaꞌ ri numéra pa banco, chin keriꞌ atoq yin xinuqaqa, xyoꞌox ta chuwa ri numéra y ri ral ri xuchꞌek ta.

²⁸ Ri kajaw xubꞌij chake ri ekꞌo apu chiriꞌ: Tikꞌamaꞌ kan ri talento pa ruqꞌaꞌ y tijachaꞌ chare ri kꞌo lajuj talentos pa ruqꞌaꞌ.

²⁹ Porque ri rubꞌanun jun utz samaj rikꞌin ri jarupeꞌ jachon pa ruqꞌaꞌ, ndiyoꞌox más chare y más ndinimer chuwech, pero ri ma jun samaj rubꞌanun rikꞌin ri jachon pa ruqꞌaꞌ, hasta ri jubꞌaꞌ jachon pa ruqꞌaꞌ, ndikꞌan e chuwech.

³⁰ Romariꞌ ri samajel ri ma jun xubꞌen chin ta xusamajij ri méra xjach pa ruqꞌaꞌ, tiwelesaj e saqil pa qꞌarachꞌaraj qꞌequꞌ, apeꞌ ndiril oqꞌej y qachꞌachꞌen eyaj.

Ri Ajaw ngerukꞌen e ri utz kikꞌaslen chikikajal ri ma utz ta kikꞌaslen

³¹ Atoq riyin ri aj chikaj ri xinuꞌalex chiꞌikajal ngitzolij chi pe jumbꞌey, kin Rey wi nginuqaqa, y konojel ri nu-ángeles epataneq wikꞌin. Ja atoq riꞌ ngitzꞌuyeꞌ pa nu-trono ri kin kꞌo ruqꞌij.

³² Y ngeꞌukꞌuꞌex apu chinuwech konojel kiwech wineq chin ri rochꞌulew, y riyin nijech kiwech, achel jun yuqꞌunel ndujech kiwech ri karneꞌl kikꞌin ri cabras.

³³ Pa wikiqꞌaꞌ ngenyaꞌ ri karneꞌl y ri cabras pa nuxakan.

³⁴ Y ja atoq riꞌ riyin ri Rey nibꞌij chake ri ekꞌo pa wikiqꞌaꞌ: Kixámpe rix ri kꞌo ru-favor ri Nataꞌ Dios pa iwiꞌ, kixok chupan ri reino bꞌanun ruwech chi ndok iwichin xe jampeꞌ xbꞌan pe ri rochꞌulew roma ri Dios.

³⁵ Porque atoq xchꞌumu nupan, xinitzuq. Atoq xchaqiꞌj nuchiꞌ, xiyaꞌ nuyaꞌ. Atoq achel fuerano xibꞌeqaqa pa itinamit, xikꞌen apu nuwech pa iwachoch chin xinuxlan.

³⁶ Atoq maneq chi ok nutziaq nikusaj, xisipaj nutziaq. Atoq xiyawej, xinibꞌen cuenta. Atoq xikꞌojeꞌ pa cheꞌ, xinbꞌeꞌitzꞌetaꞌ.

³⁷ Y ja atoq riꞌ ri wineq chojmilej kikꞌaslen ri ekꞌo pa wikiqꞌaꞌ, ndikibꞌij chuwa: Ajaw, ¿jampeꞌ xatiqatzꞌet chi ndaqꞌasaj wayijal y xatiqatzuq? ¿Jampeꞌ xatiqatzꞌet chi ndichaqiꞌj achiꞌ y xqayaꞌ ayaꞌ?

³⁸ ¿Jampeꞌ xabꞌeqaqa achel fuerano pa qatinamit y xqakꞌen apu awech pa qachoch chin xatuxlan? ¿Jampeꞌ xatiqatzꞌet chi maneq chi ok atziaq ndakusaj y xqasipaj atziaq?

³⁹ ¿Jampeꞌ xatiqatzꞌet chi ngayawej, o xakꞌojeꞌ pa cheꞌ y xateqatzꞌetaꞌ?

⁴⁰ Y riyin ri Rey nibꞌij chake ri ekꞌo pa wikiqꞌaꞌ: Kin qetzij nibꞌij chiwa, chi roma xitoꞌ jun chikikajal re yin kitaqin re maneq ok kiqꞌij, riꞌ kin chuwa riyin xibꞌen wi.

⁴¹ Jakꞌa chake ri ekꞌo pa nuxakan nibꞌij: Kixel e chinuwech rix ri bꞌiꞌin chik pa iwiꞌ chi ngixbꞌeqaqa chupan ri qꞌaqꞌ ri ma ndichup ta, ri bꞌanun chin ndeyoꞌox ri itzel y ri ru-ángeles.

⁴² Porque atoq xchꞌumu nupan, ma jun rutzaꞌ nuway xisipaj. Atoq xchaqiꞌj nuchiꞌ, ma xiyaꞌ ta nuyaꞌ.

⁴³ Atoq yin fuerano xibꞌeqaqa pa itinamit, ma xikꞌen ta nuwech chiꞌiwachoch. Atoq maneq chi ok nutziaq nikusaj, ma jun nutziaq xisipaj. Atoq xiyawej, y atoq xiyoꞌox pa cheꞌ, rix ma xinbꞌeꞌitzꞌetaꞌ ta.

⁴⁴ Rejeꞌ ndikibꞌij chuwa: Ajaw, ¿jampeꞌ xatiqatzꞌet chi ndichꞌumu apan o ndichaqiꞌj achiꞌ? ¿Jampeꞌ rat achel fuerano xabꞌeqaqa pa qatinamit y ma xqakꞌen ta awech? ¿Jampeꞌ xatiqatzꞌet chi maneq chi ok atziaq ndakusaj o xayawej o xayoꞌox pa cheꞌ y ma xatiqatoꞌ ta?

⁴⁵ Ja atoq riꞌ riyin ri Rey nibꞌij chake ri ekꞌo pa nuxakan: Kin qetzij nibꞌij chiwa, chi roma ma xitoꞌ ta jun chikikajal re yin kitaqin re maneq ok kiqꞌij, kin chuwa riyin ma xibꞌen ta.

⁴⁶ Y nibꞌij chuqaꞌ chi re ekꞌo pa nuxakan ngebꞌa chupan ri castigo chin jumul, jakꞌa ri wineq chojmilej kikꞌaslen, ngeꞌok chupan ri kꞌaslen ma ndikꞌis ta.