San Mateo 24 - Kaqchikel Santo Domingo (Xenacoj)

Ri Jesús nduqꞌalajrisaj chi ri rachoch ri Dios ndiwulix

¹ Atoq ri Jesús xel pe pa rachoch ri Dios chin ndutzꞌen bꞌey, ri ru-discípulos xejel apu chunaqaj chin xkikꞌut chuwech ri jalajaj teq jay chin ri rachoch ri Dios.

² Y ri Jesús xubꞌij chake: ¿Ngeꞌitzꞌet nojel re kꞌo waweꞌ? Kin qetzij nibꞌij chiwa, chi ngetuqaqa qꞌij atoq nixta jun abꞌej ndikanej kan pariꞌ jun chik abꞌej, xa kin nojel xtiwulix.

Ri ngebꞌanatej nabꞌey chi nduqaqa ri rukꞌisibꞌel qꞌij chin ri rochꞌulew

³ Y atoq ri Jesús tzꞌuyul chuwech ri raqꞌarik chin ri juyuꞌ rubꞌiniꞌan Olivos, ri discípulos xejel apu chunaqaj, y atoq kiyon ekꞌo rikꞌin, kereꞌ xkibꞌij chare: Roj ndiqajoꞌ chi ndabꞌij chaqe jampeꞌ ngebꞌanatej re xabꞌij. ¿Achike etal nditzꞌetetej chi jubꞌaꞌ chik ndirajoꞌ chin ngatuqaqa chik jumbꞌey y chi jubꞌaꞌ chik ndirajoꞌ chin ngekꞌis ri qꞌij chin re tiempo rojkꞌo?

⁴ Y ri Jesús kereꞌ xubꞌij chake: Tichajij iwiꞌ chi nixta jun tichꞌakatin iwichin.

⁵ Porque ekꞌiy ngetuqaqa ri ndikiqꞌabꞌaj kiꞌ chi ja yin xinuqaqa porque kereꞌ ndikibꞌilaꞌ: Ja riyin ri taqon pe roma ri Dios chukolik ri rutinamit, ngechajeꞌ. Y ekꞌiy wineq ngechꞌakatix koma rejeꞌ.

⁶ Chupan teq ri qꞌij riꞌ, ndiwakꞌaxaj chi ngetajin guerras y chi ngetzꞌukutej qa guerras. Rix ma tixibꞌij iwiꞌ, porque ndikꞌatzin chi keriꞌ ndibꞌanatej. Pero ma ja yan ta nduqaqa ri rukꞌisibꞌel chin nojel.

⁷ Porque chupan teq ri qꞌij riꞌ, ri wineq chin jun rochꞌulew ngeyakatej chikij ri wineq chin jun chik rochꞌulew, y keriꞌ chuqaꞌ reyes kikꞌin ri ki-soldados ndekibꞌanaꞌ guerra chake chꞌaqa chik reyes. Jalajaj teq apeꞌ ndipuꞌun wayijal y ngebꞌanatej nimaꞌq teq kobꞌraqen.

⁸ Pero nojel re kꞌayew reꞌ xa kꞌaja ri nabꞌey teq qꞌaxomal, achel ri nabꞌey teq qꞌaxomal chin alanik ri ndunaꞌ jun ixaq.

⁹ Chupan teq ri qꞌij riꞌ, ri wineq ngixkijech chin ndibꞌan itzel chiwa, ngixkikamisaj, y roma yin itaqin, itzel ngixtzꞌat koma konojel wineq.

¹⁰ Ekꞌiy ri ndikiyaꞌ kan rokacheq chuwech ri Ajaw roma ri kꞌayew riꞌ, y chikachibꞌil kiꞌ itzel ndikitzꞌet kiꞌ, y chꞌaqa ndikijachalaꞌ ri kachibꞌil pa kiqꞌaꞌ ri kꞌo uchuqꞌaꞌ pa kiqꞌaꞌ pa ruwiꞌ ri tinamit.

¹¹ Ekꞌiy ngebꞌeyakatej pe y ndikiqꞌabꞌaj kiꞌ chi e-profetas chin ri Dios, y ngekichꞌakatij santienta wineq.

¹² Y chupan teq ri qꞌij riꞌ, roma kꞌiyineq ri itzel teq noꞌoj, santienta wineq ndikꞌis qa pa kánima chi ngeꞌojowan.

¹³ Pero ri ma xtitzolij ta chirij y jumul xtukachꞌ ruwech hasta pa rukꞌisibꞌel, kin xtikolotej.

¹⁴ Y re utzulej teq tzij chin kolotajik reꞌ, ri ndichꞌaꞌa pa ruwiꞌ ru-reino ri Dios, ndeyoꞌox rutzijol nojel teq apeꞌ chochꞌulew, chin ndakꞌaxex koma konojel kiwech wineq, y kꞌajariꞌ nduqaqa ri rukꞌisibꞌel chin ri tiempo rojkꞌo.

¹⁵ Romariꞌ, atoq xtitzꞌet ri bꞌiꞌin kan roma ri profeta Daniel, chi chupan ri lugar más loqꞌolej chin ri rachoch ri Dios ndajin ri santienta ndimulu rukꞌuꞌx ri Dios rikꞌin, y romariꞌ ri Dios nduyaꞌ kan ri lugar riꞌ,

¹⁶ ri ekꞌo pa rochꞌulew Judea, keꞌanimej pa teq juyuꞌ. Ri ndibꞌanun leer reꞌ, tukꞌoxomaj kꞌa.

¹⁷ Ri nduxlan pa terraza, ma tiqaqa chin ndok apu pa jay chukꞌamik jun achike, xa kin tanimej paqiꞌ.

¹⁸ Y ri kꞌo pa qꞌas, ma titzolij chukꞌamik rukꞌul chin nduqꞌuꞌuj.

¹⁹ Y chupan teq ri qꞌij riꞌ, ¡juyo ok kiwech ri ixoqiꞌ ri pataneq alanik chikij y ri kꞌa nditzꞌuman na akꞌual chikiqꞌaꞌ!

²⁰ Romariꞌ tibꞌanaꞌ orar, tikꞌutuj chi atoq ndikꞌatzin ngixanimej, man ta pa ru-tiempo tew, nixta pa jun uxlanibꞌel qꞌij.

²¹ Porque chupan teq ri qꞌij riꞌ, nduqaqa jun nimalej kꞌayew, ri ma jumbꞌey bꞌanatajneq xe jampeꞌ tzꞌukutajneq pe ri rochꞌulew hasta wokami, y nixta ndibꞌanatej chik jumbꞌey.

²² Si man ta ngekꞌan e qꞌij chare ri tiempo riꞌ, konojel ta ri wineq ngeken, pero roma rujoyowaxik kiwech ri eruchaꞌon ri Dios, ngekꞌan e qꞌij chare ri tiempo riꞌ.

²³ Romariꞌ chupan ri tiempo riꞌ, si jun wineq kereꞌ xtubꞌij chiwa: Titzꞌetaꞌ, chireꞌ kꞌo ri jun taqon pe roma ri Dios chukolik ri rutinamit, o xtubꞌij: Ja chiriꞌ kꞌo, xtichajeꞌ, rix ma titaqij.

²⁴ Porque ngebꞌeqꞌalajin pe wineq ri ndikiqꞌabꞌaj kiꞌ chi etaqon pe roma ri Dios chukolik ri rutinamit, y chuqaꞌ wineq ri ndikiqꞌabꞌaj kiꞌ chi e-profetas, y ngekibꞌanalaꞌ nimalej teq achike ri nixta jumbꞌey etzꞌeton y milagros, chin ngekichꞌakatij wineq, y xa ta ngetiker, hasta ngekichꞌakatij ri echaꞌon roma ri Dios.

²⁵ Tikꞌoxomaj reꞌ, porque nabꞌey chi ndibꞌanatej, riyin ja yan xinbꞌij chiwa.

²⁶ Roma kꞌa riꞌ, si ekꞌo xkebꞌiꞌin chiwa: ¡Titzꞌetaꞌ! Ja pa chaqiꞌj y tzꞌiran ulew kꞌo ri jun taqon pe roma ri Dios chukolik ri rutinamit, xkechajeꞌ, rix ma kixbꞌa chutzꞌetik, o si xtikibꞌij: Ja chupan apu ri jun achoch riꞌ kꞌo, ma titaqij ri ndibꞌix chiwa.

²⁷ Porque kin achel ri koyopaꞌ nditiker pe ruyikꞌinik chikaj apeꞌ ndalex pe ri qꞌij y ndeqaqa hasta apeꞌ ndiqaqa ri qꞌij, keriꞌ chuqaꞌ ngitzꞌetetej riyin ri aj chikaj ri xinuꞌalex chiꞌikajal koma konojel atoq nginuqaqa chik jumbꞌey.

²⁸ Achel ndubꞌij ri tzij ndibꞌix: Apeꞌ pakꞌal jun cuerpo kamineq, chiriꞌ ndekimoloꞌ kiꞌ ri kꞌuch.

Ri ndibꞌanatej atoq ja nduqaqa chik jumbꞌey ri Jun aj chikaj

²⁹ Atoq xqꞌax yan ri kꞌayew richin teq ri qꞌij riꞌ, ja ndiqꞌeqꞌumer qa ruwech ri qꞌij y ri raqen ikꞌ ma ndiyikꞌan chi ta, ri chꞌumilaꞌ ngetzaq e chuwech ri kaj, y ri nimalej teq uchuqꞌaꞌ ri erichin chikaj ngeꞌelesex pa teq kikꞌojlibꞌel.

³⁰ Ja atoq riꞌ chikaj nditzꞌetetej ri etal wichin riyin ri aj chikaj ri xinuꞌalex chiꞌikajal, y ri jalajaj kiwech wineq santienta kixibꞌin kiꞌ ngeꞌoqꞌ roma ri xtibꞌanatej kikꞌin, y nginikitzꞌet riyin ri aj chikaj ri xinuꞌalex chiꞌikajal, chi yin pataneq pa kiwiꞌ teq nube cho kaj, rikꞌin nimalej uchuqꞌaꞌ y nimalej nuqꞌij.

³¹ Rikꞌin nimalej ruxulik trompeta, ngenteq ri nu-ángeles chuwech nojel ri rochꞌulew, chin ngebꞌekimoloꞌ ri enuchaꞌon. Y ma jun apeꞌ chuxeꞌ ri kaj ri man ta xkeꞌeqꞌax wi.

³² Tiwetamaj ri ndubꞌij tzij ri parábola pa ruwiꞌ ri higuera: Atoq ja ndijotayin pe y ngeꞌel pe kꞌakꞌakꞌ ruxaq, rix iwetaman chi ja nduqaqa ri tiempo chin qatataꞌ.

³³ Keriꞌ chuqaꞌ rix, atoq nditzꞌet chi ja ndajin nojel reꞌ, tiwetamaj chi ri qꞌij naqaj chik kꞌo, kin achel ta chuwaꞌq-kabꞌij keriꞌ.

³⁴ Y kin qetzij nibꞌij chiwa chi nojel ri nubꞌiꞌin pe ngebꞌanatej nabꞌey chi ngekꞌis e chochꞌulew ri wineq aj wokami.

³⁵ Ri kaj y ri rochꞌulew ngekꞌis, pero ri tzij enubꞌiꞌin, ma xe ta keriꞌ ngekꞌis, xa kin xkebꞌanatej wi nojel.

³⁶ Pero ri qꞌij y ri hora riꞌ, ma jun etamayon, nixta ri ángeles chin chikaj, nixta riyin ri Rukꞌajol ri Dios, xa kin xe ri Tataꞌaj Dios etamayon.

³⁷ Keriꞌ nibꞌij chiwa, porque achel xkibꞌen ri wineq pa ru-tiempo ri Noé, keriꞌ chuqaꞌ ndikibꞌen ri wineq atoq nginuqaqa chik jumbꞌey riyin ri aj chikaj ri xinuꞌalex chiꞌikajal.

³⁸ Porque chupan ri tiempo atoq kꞌajani tiqaqa ri kamik chi jabꞌ, ri wineq xewaꞌ, xkitij kiyaꞌ, xekikꞌulubꞌaꞌ ri kalkꞌuaꞌl y xekiyaꞌ ri kimiꞌal pa kꞌulubꞌik, y keriꞌ ngetajin rikꞌin hasta kꞌa xuqaqa na ri qꞌij atoq ri Noé xok pa arca.

³⁹ Y ri wineq nixta xkinabꞌej chi pataneq jun kamik chi jabꞌ pa kiwiꞌ, hasta ke konojel xerukꞌuaj ri yaꞌ, keriꞌ chuqaꞌ ri wineq ma ndikinabꞌej ta chi nginuqaqa chik jumbꞌey riyin ri aj chikaj ri xinuꞌalex chiꞌikajal, hasta atoq xtikitzꞌet chi xinuqaqa yan.

⁴⁰ Chupan teq ri qꞌij riꞌ, kaꞌiꞌ achiꞌaꞌ ekꞌo pa qꞌas, jun ndukꞌuꞌex y jun ndiyoꞌox kan.

⁴¹ Ekaꞌiꞌ ixoqiꞌ ngejokꞌon, jun ndukꞌuꞌex y jun ndiyoꞌox kan.

⁴² Romariꞌ ma kixwer, tichajij utz-utz ri ikꞌaslen, porque ma iwetaman ta ri qꞌij atoq nduqaqa ri Iwajaw.

⁴³ Pero ndikꞌatzin chuqaꞌ chi ndiwetamaj reꞌ: Xa ta jun rajaw jay retaman achike hora ndeqaqa jun eleqꞌon chaqꞌaꞌ, ma ndiwer ta qa chin ma nduyaꞌ ta qꞌij chare ri eleqꞌon chi nduchobꞌij apu ri jay.

⁴⁴ Romariꞌ, rix tinabꞌaꞌ apu iwiꞌ, porque riyin ri aj chikaj ri xinuꞌalex chiꞌikajal, nginuqaqa chik jumbꞌey atoq rix ma jun inabꞌen.

Ri utzulej samajel y ri ma utzulej ta samajel

⁴⁵ Y xubꞌij chuqaꞌ: Jun loqꞌon samajel ri ndubꞌen ri ndubꞌij ri rajaw chare y ndunojij utz-utz ri ngerubꞌanalaꞌ, ja samajel riꞌ ri ndichaꞌox roma ri rajaw chin nduyaꞌ pa kiwiꞌ chꞌaqa chik samajelaꞌ, chin keriꞌ atoq ndiril hora chin rujachik ri ndikꞌatzin chake chin ndikikꞌux, runabꞌan chi apu nojel chin ndujech chake.

⁴⁶ Kin jabꞌel roruqꞌij jun loqꞌon samajel ri nduꞌilox roma ri rajaw chi ndajin rikꞌin ri samaj bꞌiꞌin kan chare.

⁴⁷ Kin qetzij nibꞌij chiwa chi ri rajaw kin nduyaꞌ ri samajel riꞌ pa ruwiꞌ nojel ri rubꞌeyomal.

⁴⁸ Pero si ri samajel riꞌ xa itzel runoꞌoj y ndubꞌij qa pa ránima chi ri rajaw ma nduqaqa yan ta,

⁴⁹ y xa ndutzꞌen kichꞌeyik ri chꞌaqa chik samajelaꞌ, xe waꞌin nduyal y ndutij yaꞌ kikꞌin qꞌabꞌarelaꞌ,

⁵⁰ nduqaqa ri rajaw chupan jun qꞌij y jun hora ri ma runabꞌen ta ri samajel riꞌ,

⁵¹ y jubꞌama ndukamisaj chi chꞌeyekil, y nderuyaꞌ chikikajal ri wineq kaꞌiꞌ kipalej, apeꞌ kꞌo oqꞌej y qachꞌachꞌen eyaj.