San Mateo 22 - Kaqchikel Santo Domingo (Xenacoj)

Ri parábola pa ruwiꞌ ri nimalej waꞌin chin kꞌulubꞌik

¹ Ri Jesús jumbꞌey chik xerukusaj parábolas chin xchꞌaꞌa chake ri wineq y xubꞌij:

² Ri ru-reino ri aj chikaj Dios pa kiwiꞌ ri wineq, ndiqajunumaj rikꞌin ri xubꞌen jun rey, atoq xubꞌen rukꞌojlen jun nimalej waꞌin roma rukꞌulubꞌik ri rukꞌajol.

³ Xeruteq ri rusamajelaꞌ chin xebꞌekoyoj ri xtaq yan rubꞌixik chake chi kepuꞌun pa rukꞌulubꞌik ri rukꞌajol, pero ri xebꞌeꞌoyox ma xkajoꞌ ta xepuꞌun.

⁴ Xeruteq chik kꞌa chꞌaqa chik rusamajelaꞌ, y xubꞌij e chake: Tibꞌij chake ri nuyoꞌon rutzijol chake: Kixpuꞌun chupan re nimaqꞌij, porque nubꞌanun chik rukꞌojlen ri rikil chin ngojwaꞌ. Ri nuwakx y ri chꞌaqa chik wawej enutiojrisan ekamisan chik. Nojel chik kꞌo, romariꞌ kixpuꞌun chupan ri waꞌin chin rukꞌulubꞌik ri nukꞌajol, kixchajeꞌ chake.

⁵ Pero ri xeꞌoyox pa kꞌulubꞌik ma xkiyaꞌ ta pa cuenta ri taqon e rubꞌixik chake. Ekꞌo jujun xebꞌa pa kulew, jujun chik xebꞌekꞌayin,

⁶ y ri chꞌaqa chik xekitzꞌen ri rusamajelaꞌ ri rey, juyo kiwech xkibꞌen chake, y xekikamisaj.

⁷ Romariꞌ, ri rey xyakatej santienta royowal, xeruteq ri ru-soldados chin xebꞌekikamisaj ri xekamisan ri rusamajelaꞌ, y xbꞌekiporoj ri kitinamit.

⁸ Ri rey xubꞌij chake ri rusamajelaꞌ: Ri nimalej waꞌin chin rukꞌulubꞌik ri nukꞌajol bꞌanun chik rukꞌojlen, pero ri xenwoyoj chin ngetuwaꞌ wikꞌin, ma rukꞌulun ta chi ngepuꞌun.

⁹ Kixbꞌiyin kꞌa pa raqen teq bꞌey, y keꞌiwoyoj pe ri janipeꞌ ngeꞌiwil, chin ngetuwaꞌ pa rukꞌulubꞌik ri nukꞌajol.

¹⁰ Y ri samajelaꞌ xebꞌa pa teq bꞌey, xekimal pe jalajaj teq kiwech wineq ri xekil, utz y ma utz ta kinoꞌoj, y xnoj ri jay apeꞌ ndibꞌan ri kꞌulubꞌik.

¹¹ Atoq ri rey xok apu chupan ri jay chikitzꞌetik ri xeꞌoyox pa nimaqꞌij, xutzꞌet jun achi ri ma ruweqon ta riꞌ rikꞌin ri tzieq ndiyoꞌox chake ri ngekꞌojeꞌ pa kꞌulubꞌik.

¹² Y ri rey xubꞌij chare: Ale, ¿achike modo xatok pe waweꞌ y ma aweqon ta pe awiꞌ rikꞌin ri tzieq chin ngakꞌojeꞌ pa kꞌulubꞌik? Y ri achi ma jun achike xtiker xubꞌij.

¹³ Ja atoq riꞌ ri rey xubꞌij chake ri ngejachon pa kꞌulubꞌik: Tiximaꞌ e ruqꞌa-raqen, tiwelesaj e y teꞌiyaꞌ pa qꞌarachꞌaraj qꞌequꞌ apeꞌ ndiril oqꞌej y qachꞌachꞌen eyaj.

¹⁴ Ri niwojoꞌ nibꞌij chiwa rikꞌin reꞌ, jareꞌ: Kin ekꞌiy ri ngeꞌoyox, pero ma konojel ta echaꞌon roma ri Dios.

Ri Jesús ndikꞌutux razón chare si utz ndiyoꞌox ri méra ndikꞌutux pa rubꞌiꞌ ri rey

¹⁵ Ja atoq riꞌ xebꞌa ri fariseos chin ndikibꞌen ruwech achike ndikibꞌen chin ta nditzaq ri Jesús pa kiqꞌaꞌ rikꞌin ri tzij ngerubꞌilaꞌ.

¹⁶ Y xekiteq jujun ki-discípulos junan kikꞌin jujun ruwinaq ri rey Herodes chin kereꞌ xkibꞌij chare ri Jesús: Tijonel, qetaman chi rat ja ri qetzij ndabꞌij, y atoq ngatijon, ja ri qetzij bꞌey ri ndukꞌuan rikꞌin ri Dios ri ndakꞌut. Y nixta jun achoq chuwech ndaxibꞌij awiꞌ, porque junan kiwech ngaꞌatzꞌet konojel ri wineq.

¹⁷ Tabꞌij chaqe: ¿La xajan kami chuwech ri Dios chi ndiqayaꞌ ri méra ndikꞌutux pa rubꞌiꞌ ri rey César?

¹⁸ Pero ri Jesús roma retaman ri itzel teq achike kꞌo pa kánima, kereꞌ xubꞌij chake: Rix xa kaꞌiꞌ ipalej. ¿Achike roma ndiwojoꞌ ngitzaq pa iqꞌaꞌ?

¹⁹ Tikꞌutuꞌ pe jun moneda chinuwech ri achel ndikꞌutux pa rubꞌiꞌ ri rey César. Xkikꞌut apu jun moneda rajel jun qꞌij samaj chuwech,

²⁰ y ri Jesús xubꞌij chake: ¿Achoq achibꞌel y achoq bꞌiꞌaj kꞌo chuwech re méra reꞌ?

²¹ Y rejeꞌ xkibꞌij: Rachibꞌel ri rey César. Ri Jesús xubꞌij chake: Tiyaꞌ chare ri César ri richin ri César, y tiyaꞌ chare ri Dios ri richin ri Dios, xchajeꞌ.

²² Atoq xkakꞌaxaj ri xubꞌij ri Jesús, xsach kikꞌuꞌx chirij, y xkiyaꞌ kan, xebꞌa.

Ri Jesús ndubꞌij chi ri animaꞌiꞌ ngekꞌastajbꞌex pe

²³ Chupan ri qꞌij riꞌ, xejel apu apeꞌ kꞌo ri Jesús jujun saduceos. Ri saduceos ma ndikitaqij ta chi ri animaꞌiꞌ ngekꞌastajbꞌex pe, romariꞌ kereꞌ xkibꞌij chare:

²⁴ Tijonel, chupan ri ley ri xyoꞌox chare ri Moisés ndubꞌij: Si jun achi ndiken e, y maneq ralkꞌuaꞌl xkꞌojeꞌ kan chuqꞌaꞌ ri rixjayil, ndikꞌatzin chi jun ruchaqꞌ-runimal ri xken e ndok rachijil ri malkaꞌ ixaq, chin keriꞌ ndikꞌojeꞌ ral ri ixaq pa rubꞌiꞌ ri xken e.

²⁵ Chiqakajal roj xekꞌojeꞌ wuquꞌ achiꞌaꞌ kichaqꞌ-kinimal kiꞌ. Ri nimalaꞌtz xkꞌuleꞌ, pero xken e, y roma maneq ralkꞌuaꞌl xekꞌojeꞌ kan chuqꞌaꞌ ri ixaq, ri ixaq riꞌ xok kan rixjayil ri ruchaqꞌ.

²⁶ Y achel xbꞌanatej rikꞌin ri nimalaꞌtz, keriꞌ chuqaꞌ xbꞌanatej rikꞌin ri rukan, rikꞌin ri rox, y keriꞌ xbꞌanatej kikꞌin chi ewuquꞌ kichaqꞌ-kinimal kiꞌ, y nixta jun xkꞌojeꞌ kan ralkꞌuaꞌl chuqꞌaꞌ ri ixaq.

²⁷ Y pa rukꞌisibꞌel xken chuqaꞌ ri ixaq.

²⁸ Atoq ngekꞌastajbꞌex pe ri animaꞌiꞌ, ¿achoq ixjayil ndok ri ixaq riꞌ? Porque xok kixjayil konojel ri achiꞌaꞌ kichaqꞌ-kinimal kiꞌ.

²⁹ Y ri Jesús xubꞌij chake: Rix xa rix sachineq rikꞌin ri ndinojilaꞌ, porque ma ndikꞌoxomaj ta rubꞌeyal ri rutzij ri Dios, nixta ndikꞌoxomaj ri nditiker ndubꞌen ri ruchuqꞌaꞌ ri Dios.

³⁰ Porque atoq ndiril ri tiempo chin ngekꞌastajbꞌex pe ri animaꞌiꞌ, ma ngekꞌuleꞌ chi ta, nixta ngeyoꞌox pa kꞌulubꞌik, xa kin ngeꞌok achel ri ángeles ekꞌo chikaj.

³¹ Pero pa ruwiꞌ ri kikꞌastajibꞌel ri animaꞌiꞌ, ¿ma ibꞌanun ta leer ri rubꞌiꞌin kan ri Dios chiwa chupan ri rutzij? Rijaꞌ kereꞌ rubꞌiꞌin kan:

³² Ja riyin ri ru-Dios ri Abraham, ru-Dios ri Isaac y ru-Dios ri Jacob, xchajeꞌ. Rijaꞌ ki-Dios ri kꞌo kikꞌaslen, y ma ki-Dios ta ri maneq kikꞌaslen, xchajeꞌ ri Jesús.

³³ Ri santienta wineq atoq xkakꞌaxaj ri xubꞌij ri Jesús, xsach kikꞌuꞌx chirij ri tijonik nduyaꞌ.

Ri mandamiento ri más kꞌo reqalen

³⁴ Atoq ri fariseos xkakꞌaxaj chi ri Jesús xubꞌen chake ri saduceos chi ma xetiker ta xkitzolij ruwech rutzij, xkimal kiꞌ chin xkibꞌen xe jun ruwech kitzij.

³⁵ Y jun chikikajal rejeꞌ ri santienta retaman pa ruwiꞌ ri ley xyoꞌox chare ri Moisés, chin ta xrajoꞌ xtzaq ri Jesús pa ruqꞌaꞌ, kereꞌ xukꞌutuj razón chare:

³⁶ Tijonel, ¿achike chi mandamiento ri más kꞌo reqalen chupan ri ley xyoꞌox chare ri Moisés?

³⁷ Y ri Jesús xubꞌij chare: Rikꞌin nojel awánima, nojel akꞌuꞌx, y nojel anojibꞌal, tawojoꞌ ri Awajaw Dios.

³⁸ Jareꞌ ri nabꞌey mandamiento ri más kꞌo reqalen.

³⁹ Y ri rukan mandamiento más kꞌo reqalen, jubꞌama junan rikꞌin ri nabꞌey y kereꞌ ndubꞌij: Kaꞌawojoꞌ ri wineq achel ndawojoꞌ awiꞌ rat.

⁴⁰ Re kaꞌiꞌ mandamientos reꞌ, jariꞌ rukꞌuꞌx nojel ri tzꞌibꞌan kan chupan ri ley xyoꞌox chare ri Moisés y rukꞌuꞌx chuqaꞌ ri xkitzꞌibꞌaj kan ri profetas.

¿Achoq riy-rumam kan ri Jun taqon pe roma ri Dios chukolik ri rutinamit?

⁴¹ Y atoq kimolon kiꞌ ri fariseos chiriꞌ, ri Jesús kereꞌ xukꞌutuj razón chake:

⁴² ¿Achike ndinojij rix pa ruwiꞌ ri Jun nditaq pe roma ri Dios chukolik ri rutinamit? ¿Achoq riy-rumam kan, ndibꞌij rix? Y rejeꞌ xkibꞌij: Riy-rumam kan ri rey David, xechajeꞌ.

⁴³ Ri Jesús xubꞌij: Si keriꞌ achel ri ndibꞌij rix, ¿achike roma ri David chuxeꞌ ruchuqꞌaꞌ ri Espíritu Santo xubꞌij Ajaw chare? Porque ri David kereꞌ xubꞌij kan:

⁴⁴ Ri Ajaw xubꞌij chare ri Wajaw: Katzꞌuyeꞌ pa wikiqꞌaꞌ, y chireꞌ kakꞌojeꞌ Kꞌa kenyaꞌ na chuxeꞌ awaqen konojel ri itzel ngetzꞌeto awichin. Keriꞌ xubꞌij.

⁴⁵ Xu ri David xubꞌij Ajaw chare ri Jun nditaq pe roma ri Dios chukolik ri rutinamit, y riy-rumam kan chuqaꞌ, ¿achike rubꞌeyal riꞌ?

⁴⁶ Y nixta jun chikikajal ri fariseos xtiker xutzolij ruwech rutzij, y xe jampeꞌ ri qꞌij riꞌ nixta jun chik xukowij riꞌ chin ta xukꞌutuj razón jun achike chare ri Jesús.