San Mateo 19 - Kaqchikel Santo Domingo (Xenacoj)

Ma rurayibꞌel ta ri Dios chi ri achi ndujech riꞌ rikꞌin ri rixjayil

¹ Atoq ri Jesús xukꞌis rubꞌixik nojel reꞌ, xel pe pa rochꞌulew Galilea, y xbꞌa pa teq lugares chin ri rochꞌulew Judea ri ekꞌo apu jukꞌan ruchiꞌ ri raqen yaꞌ Jordán.

² Santienta wineq xeꞌoqan richin y chiriꞌ xerukꞌachojrisaj ri ngeyawej.

³ Xejel apu jujun fariseos rikꞌin ri Jesús, y chin ta nditzaq pa kiqꞌaꞌ ndikajoꞌ, kereꞌ xkikꞌutuj razón chare: ¿Xajan kami chuwech ri Dios chi jun achi xa achike na roma ndujech riꞌ rikꞌin ri rixjayil?

⁴ Ri Jesús xubꞌij chake: ¿Ma ibꞌanun ta kꞌa leer chupan ri rutzij ri Dios chi xe jampeꞌ pa nabꞌey, rijaꞌ chi achi chi ixaq xerubꞌen?

⁵ Y ri Dios kereꞌ rubꞌiꞌin kan: Romariꞌ, ri kꞌajol ngeruyaꞌ kan rute-rutataꞌ chin ndukꞌuaj qa riꞌ rikꞌin ri rixjayil, y chi ekaꞌiꞌ xe jun ndikibꞌen.

⁶ Y romariꞌ, rejeꞌ ma ekaꞌiꞌ chi ta, xa jun bꞌanun chake roma ri Dios. Romariꞌ, ri ekaꞌiꞌ ri xe jun bꞌanun chake, ma tijach kiwech koma ri wineq.

⁷ Y rejeꞌ xkibꞌij: Si keriꞌ achel ndabꞌij, ¿achike roma ri Moisés xubꞌen mandar chi jun achi ri ndirajoꞌ ndujech riꞌ rikꞌin ri rixjayil, tuyaꞌ wuj chare apeꞌ ndubꞌij chi xkijech kiꞌ y tirelesaj e?

⁸ Ri Jesús xubꞌij chake: Roma rukowil iwánima ri Moisés xuyaꞌ qꞌij chi ri achi kꞌo cheꞌel ndujech riꞌ rikꞌin ri rixjayil. Pero xe jampeꞌ pa nabꞌey, ma ja ta riꞌ rurayibꞌel ri Dios.

⁹ Y nibꞌij chiwa chi xaxe roma ri ixaq rukanon rukꞌexel ri rachijil, ri achi kꞌo cheꞌel ndujech riꞌ rikꞌin. Pero si ma roma ta riꞌ ndikijech kiꞌ, y ri achi ndukꞌen chik jun ixaq, mak ndubꞌen.

¹⁰ Y ri discípulos xkibꞌij chare ri Jesús: Si keriꞌ rubꞌeyal rukꞌaslen ri achi rikꞌin ri rixjayil, xa más utz man ta ndikꞌuleꞌ.

¹¹ Ri Jesús xubꞌij chake: Ma konojel ta ngetiker ngekꞌojeꞌ kiyon achel ndibꞌij rix, xa kin xe ri yoꞌon pe chake chi ngekꞌojeꞌ kiyon.

¹² Porque ekꞌo jujun kin kalaxibꞌen wi chi ma ngekꞌojeꞌ ta rikꞌin ixaq, ekꞌo chuqaꞌ jujun bꞌanun chake chi maneq modo ngekꞌojeꞌ rikꞌin ixaq, ekꞌo chuqaꞌ jujun kiyoꞌon pa kánima chi ma ngekꞌojeꞌ ta rikꞌin ixaq chin ndikibꞌen ri samaj chin ri ru-reino ri aj chikaj Dios. Ri nditiker ndikꞌojeꞌ ruyon, tubꞌanaꞌ kꞌa.

Ri Jesús nduyaꞌ ruqꞌaꞌ pa kiwiꞌ akꞌolaꞌ

¹³ Ja atoq riꞌ xeꞌukꞌuꞌex apu jujun akꞌolaꞌ chuwech ri Jesús chin nduyaꞌ ruqꞌaꞌ pa kiwiꞌ y ndubꞌen orar koma, pero ri discípulos xekichꞌolij ri eꞌukꞌuayon apu ri akꞌolaꞌ.

¹⁴ Pero ri Jesús xubꞌij chake ri discípulos: Tiyaꞌ qꞌij chake ri akꞌolaꞌ chi ngepuꞌun wikꞌin, y ma tiqꞌet kiwech, porque ri ngeꞌok chupan ri ru-reino ri aj chikaj Dios, ja ri kibꞌanun chare ri kánima achel kánima re akꞌolaꞌ reꞌ.

¹⁵ Y atoq xuyaꞌ yan ruqꞌaꞌ pa kiwiꞌ ri akꞌolaꞌ, xel pe chiriꞌ y xbꞌa chik jun apeꞌ.

Jun kꞌajol bꞌeyon kꞌo achike ndukꞌutuj razón chare ri Jesús

¹⁶ Kꞌateꞌ ruwech xbꞌeqaqa jun kꞌajol apeꞌ kꞌo ri Jesús y kereꞌ xukꞌutuj razón chare: Tijonel, ¿achike utz ndikꞌatzin nibꞌen chin ndikꞌojeꞌ ri kꞌaslen ma ndikꞌis ta wikꞌin?

¹⁷ Ri Jesús xubꞌij chare: ¿Achike roma ndakꞌutuj razón chuwa pa ruwiꞌ ri utz? Xa kin xe wi Jun ri utz. Pero si ndawojoꞌ ngatok chupan ri kꞌaslen ma ndikꞌis ta, tanimaj ri mandamientos eruyoꞌon ri Dios.

¹⁸ Y ri kꞌajol kereꞌ xukꞌutuj razón chare: ¿Achike chi mandamientos riꞌ? Y ri Jesús xubꞌij chare: Ma kakamisan, ma takanoj rukꞌexel ri achoq ikꞌin rat kꞌulan, ma kateleqꞌan, ma taqꞌabꞌaj tzij chikij wineq,

¹⁹ tanimrisaj kibꞌiꞌ ri ate-atataꞌ, y kaꞌawojoꞌ ri wineq achel ndawojoꞌ awiꞌ rat.

²⁰ Y ri kꞌajol kereꞌ xubꞌij chare: Nojel ri mandamientos riꞌ enuniman pe. ¿Achike más ndikꞌatzin nibꞌen?

²¹ Ri Jesús xubꞌij chare: Si ndawojoꞌ ngatok nojel ri ndirajoꞌ ri Dios chi ngatok, kabꞌiyin, taꞌakꞌayij ri achajin y ri rajel tayaꞌ chake ri maneq ok kichajin, y keriꞌ ndikꞌojeꞌ abꞌeyomal chikaj, y kꞌateriꞌ katzolij pe chin nganawoqaj.

²² Atoq ri kꞌajol xrakꞌaxaj ri xubꞌij ri Jesús chare, ndibꞌison xbꞌa, porque kꞌiy bꞌeyomal ruchajin.

²³ Y ri Jesús kereꞌ xubꞌij chake ri ru-discípulos: Kin qetzij nibꞌij chiwa chi cuesta chare jun bꞌeyon chi ndok chupan ri ru-reino ri aj chikaj Dios.

²⁴ Y nibꞌij chuqaꞌ chiwa, chi más ma cuesta ta ndeqꞌax jun camello chi racheq jun bꞌaq chin tꞌisoꞌ, ke chuwech xtok jun bꞌeyon pa ru-reino ri Dios.

²⁵ Atoq xkakꞌaxaj keriꞌ ri discípulos, santienta xsach kikꞌuꞌx y kereꞌ ndikibꞌilaꞌ: Si keriꞌ, ¿achike kꞌa jun xtikolotej?

²⁶ Ri Jesús xerutzutzaꞌ y xubꞌij chake: Kiyon chikiwech, ri wineq ma ngetiker ta ndikikal kiꞌ, pero chare ri Dios ma jun achike cuesta rubꞌanik.

²⁷ Ja atoq riꞌ ri Pedro kereꞌ xubꞌij chare ri Jesús: Rat ayoꞌon cuenta chare chi roj qayoꞌon kan nojel y rat qoqan. ¿Achike kꞌa rajel-rukꞌexel ndiyoꞌox chaqe?

²⁸ Ri Jesús xubꞌij chake: Kin qetzij nibꞌij chiwa chi chupan ri qꞌij atoq ndibꞌan kꞌakꞌakꞌ chare nojel, atoq riyin ri aj chikaj ri xinuꞌalex chiꞌikajal ngitzꞌuyeꞌ pa nu-trono rikꞌin nimalej nuqꞌij, rix ri yin iwoqan ngixbꞌetzꞌuyeꞌ pa kabꞌlajuj tronos, chin ndiqꞌet tzij pa kiwiꞌ ri kiy-kimam kan ri kabꞌlajuj rukꞌajol ri Israel.

²⁹ Y xa achike na jun ri ruyoꞌon kan rachoch, ruchaqꞌ-runimal, eranaꞌ, rute-rutataꞌ, ralkꞌuaꞌl, o ruxolal woma riyin, kin ndiyoꞌox 100 mul más chare, y ndiyoꞌox chuqaꞌ ri kꞌaslen ma ndikꞌis ta chare.

³⁰ Pero ekꞌiy ri nim kiqꞌij chupan re tiempo rojkꞌo, maneq ok kiqꞌij ndekꞌojeꞌ chupan ri tiempo más chiqawech apu, y ekꞌiy ri maneq ok kiqꞌij chupan re tiempo rojkꞌo, kin nim kiqꞌij xtikꞌojeꞌ.