San Mateo 15 - Kaqchikel Santo Domingo (Xenacoj)

Ri ndichꞌabꞌaqrisan rukꞌaslen jun wineq

¹ Ja atoq riꞌ xejel apu rikꞌin ri Jesús jujun fariseos y jujun tijonelaꞌ chin ri ley xyoꞌox chare ri Moisés. Ri wineq riꞌ eꞌeleneq pe pa tinamit Jerusalén y kereꞌ xkikꞌutuj razón chare ri Jesús:

² ¿Achike roma la a-discípulos ndikiqꞌej ri costumbre kikꞌutun kan ri ojer teq qatit-qamamaꞌ? Porque ma ndikichꞌajchꞌojrisaj ta kiqꞌaꞌ pa rubꞌeyal nabꞌey chi ngewaꞌ, achel ri costumbre kikꞌutun kan ri qatit-qamamaꞌ.

³ Pero ri Jesús xubꞌij: Jakꞌa rix, ¿achike roma ndiqꞌej ri mandamiento ruyoꞌon kan ri Dios, chin ngeꞌibꞌen ri costumbres kikꞌutun kan ri ojer teq iwatit-imamaꞌ?

⁴ Porque ri Dios kereꞌ rubꞌiꞌin kan: Tanimrisaj kibꞌiꞌ ri ate-atataꞌ. Y rubꞌiꞌin kan chuqaꞌ: Ri xtibꞌiꞌin mal teq tzij chirij ri rutataꞌ o chirij ri ruteꞌ, kin tikamisex.

⁵ Pero rix ndibꞌij chi utz ndikibꞌen konojel ri ndikibꞌij kereꞌ chare kitataꞌ o kiteꞌ: Nojel ri nuchajin ri achoq ikꞌin kꞌo cheꞌel ngatintoꞌ, nusujun chik chare ri Dios.

⁶ Y rikꞌin ri keriꞌ ndiyaꞌ pa ruxikin jun alkꞌualaxel, ndikusaj ri costumbre chin ndiqꞌej ri mandamiento ruyoꞌon kan ri Dios. Y ma ndiyaꞌ ta qꞌij chare chi ngerutoꞌ ri rute-rutataꞌ rikꞌin ri ndikꞌatzin chake, roma ndubꞌen cumplir ri costumbre.

⁷ ¡Rix, xa kaꞌiꞌ ipalej! Kin qetzij chi pa iwiꞌ rix ruqꞌalajrisan kan ri profeta Isaías atoq xubꞌij:

⁸ Kereꞌ ndubꞌij ri Dios: Re tinamit reꞌ, xe rikꞌin kichiꞌ ndikiyaꞌ nuqꞌij, Pero ri kánima xa nej kꞌo chin ta qetzij ndikiyaꞌ nuqꞌij.

⁹ Xa ma jun reqalen chi ndikiyaꞌ nuqꞌij, Porque kibꞌanun chare ri costumbres kikꞌutun kan ri ojer teq katit-kimamaꞌ, chi achel ta mandamiento enuyoꞌon yin. Keriꞌ ruqꞌalajrisan ri Isaías, xchajeꞌ ri Jesús.

¹⁰ Y xeroyoj apu ri santienta wineq apeꞌ kꞌo rijaꞌ, y kereꞌ xubꞌij chake: Tiwakꞌaxaj y tikꞌoxomaj:

¹¹ Ri ndichꞌabꞌaqrisan rukꞌaslen jun wineq, ma ja ta ri achike ndukꞌux, xa ja ri itzel teq tzij ri ngeꞌel pe pa ruchiꞌ jun wineq, jariꞌ ri ndichꞌabꞌaqrisan rukꞌaslen, xchajeꞌ.

¹² Xejel kꞌa apu ri discípulos apeꞌ kꞌo ri Jesús y xkibꞌij chare: ¿Awetaman chi ri fariseos itzel xkinaꞌ chare roma ri xabꞌij pa ruwiꞌ ri ndichꞌabꞌaqrisan ri kikꞌaslen ri wineq?

¹³ Pero ri Jesús xubꞌij: Nojel tikoꞌ ri ma tikon ta roma ri Nataꞌ kꞌo chikaj, kin xtikꞌuq wi.

¹⁴ Rix ma jun achike tibꞌij chake. Rejeꞌ xa eꞌachel soqꞌ ukꞌuey bꞌey chikiwech chꞌaqa chik soqꞌ. Si jun soqꞌ ndukꞌuaj bꞌey chuwech jun chik soqꞌ, chi ekaꞌiꞌ ngebꞌetzaq pa jul.

¹⁵ Ri Pedro xubꞌij chare ri Jesús: Taqꞌalajrisaj chiqawech ri ndubꞌij tzij ri parábola kꞌaja ok xabꞌij.

¹⁶ Ri Jesús xubꞌij: ¿Jajun chuqaꞌ rix kꞌajani tikꞌoxomaj ri xinbꞌij?

¹⁷ ¿Ma ndikꞌoxomaj ta kꞌa chi nojel ri ndukꞌux jun wineq, chirupan ndibꞌa qa y xa ndel chi e?

¹⁸ Pero ri itzel teq achike ndubꞌij jun wineq rikꞌin ruchiꞌ, pa ránima ndel pe y jariꞌ ri ndichꞌabꞌaqrisan rukꞌaslen.

¹⁹ Porque pa ránima jun wineq kꞌo itzel teq achike ngeꞌel pe achel reꞌ: Itzel ngerunojilaꞌ, ndikamisan, ndukanoj rukꞌexel ri achoq ikꞌin kꞌulan, ndukꞌamalaꞌ qa riꞌ xa achoq na ikꞌin chin ndubꞌen mak, ndeleqꞌan, ndutzꞌuk tzij chikij wineq y ndubꞌilaꞌ itzel teq tzij chikij chꞌaqa chik.

²⁰ Y ja re itzel teq achike reꞌ, ri ndichꞌabꞌaqrisan rukꞌaslen jun wineq. Pero si jun wineq ma nduchꞌajchꞌojrisaj ta ruqꞌaꞌ pa rubꞌeyal nabꞌey chi ndiwaꞌ, achel ri costumbre kikꞌutun kan ri iwatit-imamaꞌ, riꞌ ma nduchꞌabꞌaqrisaj ta rukꞌaslen ri wineq riꞌ.

Jun ixaq ma israelita ta kuqul rukꞌuꞌx rikꞌin ri Dios

²¹ Atoq ri Jesús xel pe chiriꞌ, xbꞌa pa rochꞌulew apeꞌ ekꞌo ri kaꞌiꞌ tinamit Tiro y Sidón.

²² Y kꞌateꞌ ruwech, jun ixaq aj Canaán, xel pe chukꞌulik ri Jesús y kereꞌ ndisikꞌiyaj chubꞌixik: ¡Tajoyowaj nuwech, Ajaw, rat ri rat riy-rumam kan ri rey David! ¡Porque ri wal xten kꞌo itzel espíritu pa rukꞌaslen ri tok ndubꞌen chare!

²³ Pero ri Jesús nixta jun achike xubꞌij chare ri ixaq. Xejel kꞌa apu ri discípulos apeꞌ kꞌo ri Jesús y xkikꞌutuj kamelal chare chi tutzꞌetaꞌ achike ndirajoꞌ ri ixaq chin nditzolij chirachoch, porque ndisikꞌin bꞌaneq apu chikij.

²⁴ Ri Jesús xubꞌij chake: Riyin yin taqon pe xe chikikanoxik ri israelitas ri kin eꞌachel karneꞌl esachineq, porque kiyoꞌon kan rubꞌey ri Dios.

²⁵ Pero ri ixaq xjel apu chuwech ri Jesús, xxukeꞌ y xubꞌij: ¡Ajaw, kanatoꞌ!

²⁶ Jakꞌa ri Jesús kereꞌ xubꞌij chare: Ma utz ta ndikꞌan e ri kaxlan wey kichin ri alkꞌualaxelaꞌ y ndiyoꞌox chake ri chꞌuteq tzꞌiꞌ.

²⁷ Pero ri ixaq xubꞌij chare: Ajaw, ja keriꞌ, pero hasta jajun ri chꞌuteq tzꞌiꞌ ngekikꞌux rupexkꞌal ri kaxlan wey ngetzaq e chuwech ri mesa apeꞌ ngewaꞌ ri kajaw.

²⁸ Ri Jesús xubꞌij chare: Ixaq, ¡santienta kuqul akꞌuꞌx rikꞌin ri Dios! Tibꞌanatej awikꞌin achel ri ndawojoꞌ. Y ja atoq riꞌ ri ral xten xkꞌachaj.

Ri Jesús ngerukꞌachojrisaj ekꞌiy ngeyawej

²⁹ Ri Jesús xel pe chiriꞌ, xbꞌeqaqa chuchiꞌ ri lago ri ndibꞌix Galilea chare, xbꞌa e cho juyuꞌ y xbꞌetzꞌuyeꞌ e chiriꞌ.

³⁰ Y santienta wineq xebꞌeqaqa e apeꞌ kꞌo rijaꞌ, ekikꞌuan e ri yutuyeq kiqꞌa-kaqen, ri esoqꞌ, ri kalaxibꞌen pe kamineq kaqen, ri emem, y ekꞌiy chꞌaqa chik ri ngeyawej. Konojel xeyoꞌox apu chiraqen ri Jesús y rijaꞌ xerukꞌachojrisaj.

³¹ Y ri wineq ndisach kikꞌuꞌx atoq ndikitzꞌet chi ri emem ngechꞌaꞌa, ri kalaxibꞌen pe kamineq kaqen xekꞌachaj, ri yutuyeq kiqꞌa-kaqen chaj yan chik ngebꞌiyin, y ri esoqꞌ ngetzuꞌun yan chik. Y ri wineq ndikiyalaꞌ ruqꞌij ri Dios, ri ki-Dios ri israelitas.

Ri Jesús ngerutzuq más e 4,000 wineq

³² Ri Jesús xeroyoj ri ru-discípulos, y xubꞌij chake: Nijoyowaj kiwech re wineq reꞌ, porque ja oxiꞌ qꞌij kekꞌojeꞌ chireꞌ, y maneq achike kꞌo kikꞌin chin ndikikꞌux. Y ma niwojoꞌ ta nibꞌij chake chi ketzolij chikachoch, xu maneq achike kikꞌuxun, ma kꞌateꞌ xtikꞌis kuchuqꞌaꞌ pa bꞌey.

³³ Ri discípulos xkibꞌij chare: ¿Apeꞌ xteqilaꞌ pe kꞌiy kaxlan wey chin ngeqatzuq re santienta wineq reꞌ, xu chireꞌ xa tzꞌiran-tzꞌiran?

³⁴ Y ri Jesús xubꞌij chake: ¿Jarupeꞌ kaxlan wey kꞌo iwikꞌin? Rejeꞌ xkibꞌij: Xe ok wuquꞌ y kaꞌi-oxiꞌ chꞌuteq ker.

³⁵ Ja atoq riꞌ ri Jesús xubꞌen mandar chake ri wineq chi ketzꞌuyeꞌ qa pa ulew,

³⁶ xutzꞌen ri wuquꞌ kaxlan wey y ri ker, y atoq rumatioxin chik chare ri Dios, xeruper, xuyaꞌ e chake ri discípulos y rejeꞌ xkijech chake ri santienta wineq.

³⁷ Konojel ri wineq xewaꞌ y jabꞌel xenanoꞌ. Atoq xekolaj, kꞌa xenojisex wuquꞌ chakech rikꞌin ruchiꞌ ri kaxlan teq wey y ri ker ri ma xekꞌuxeꞌ ta.

³⁸ Konojel ri xewaꞌ chiriꞌ, e 4,000 achiꞌaꞌ, y ri ixoqiꞌ y ri akꞌolaꞌ ma xeꞌajilex ta.

³⁹ Y atoq erutaqon chik ri wineq chi ketzolij chi teq kachoch, ri Jesús xok e pa jun barco, xbꞌa pariꞌ yaꞌ y xbꞌeqaqa pa jun lugar rubꞌiniꞌan Magadán.