San Mateo 14 - Kaqchikel Santo Domingo (Xenacoj)

Rukamik ri Juan ri Bautista

¹ Chupan ri tiempo riꞌ, ri tetrarca Herodes xrakꞌaxaj ri utzulej rutzijol ri Jesús ndikibꞌen ri wineq.

² Y xubꞌij chake ri rusamajelaꞌ: Ri jun achi riꞌ xa ja ri Juan ri Bautista xkꞌastej pe chikikajal ri animaꞌiꞌ, romariꞌ kꞌo uchuqꞌaꞌ rikꞌin chin ngerubꞌen milagros.

³ Keriꞌ xubꞌij, porque atoq ri Juan ri Bautista kꞌa kꞌes, ri Herodes xubꞌen mandar chi xtzꞌan, xxim rikꞌin cadenas y xyoꞌox pa cheꞌ, porque ri Juan xuchꞌolij ri Herodes, roma ri Herodes rubꞌanun qa rixjayil chare ri Herodías. Ri ixaq riꞌ xok yan rixjayil ri Filipo ri kichaqꞌ-kinimal kiꞌ rikꞌin ri Herodes.

⁴ Romariꞌ ri Juan kereꞌ xubꞌilaꞌ chare ri Herodes: Rat xajan abꞌanun chuwech ri Dios, porque abꞌanun qa awixjayil chare ri Herodías.

⁵ Y ri Herodes xrajoꞌ xukamisaj ri Juan, pero xuxibꞌij riꞌ chikiwech ri wineq, porque pa kiwech ri wineq, ri Juan ri Bautista profeta wi.

⁶ Pero atoq xril qꞌij chin xbꞌan nimaqꞌij roma ri Herodes xukꞌis chik jun rujunaꞌ, ri xten ral ri Herodías xxaja chikiwech konojel chiriꞌ y xqaꞌ chuwech ri Herodes.

⁷ Romariꞌ xubꞌen jurar chare ri xten chi nduyaꞌ chare xa achike na ri xtukꞌutuj.

⁸ Y ri xten, atoq yoꞌon chik tzij pa ruxikin roma ri ruteꞌ, kereꞌ xubꞌij chare ri Herodes: Pa jun bꞌambꞌel tayaꞌ rujolon ri Juan ri Bautista chuwa.

⁹ Ri rey Herodes xbꞌison qa roma ri xukꞌutuj ri xten chare, pero roma chikiwech ri ekꞌo chuchiꞌ ri mesa xubꞌen jurar chare ri xten, rijaꞌ xubꞌij chi keriꞌ tibꞌanatej.

¹⁰ Romariꞌ xubꞌen mandar chi xqupix ruqul ri Juan ri Bautista pa cheꞌ.

¹¹ Xkꞌan kꞌa pe rujolon ri Juan pa jun bꞌambꞌel y xyoꞌox chare ri xten, y ri xten xbꞌeruyaꞌ chare ri ruteꞌ.

¹² Y ri ru-discípulos ri Juan xbꞌekikꞌamaꞌ ri ru-cuerpo y xbꞌekimuquꞌ. Y xebꞌa apeꞌ kꞌo ri Jesús, y xkibꞌij chare ri xbꞌanatej.

Ri Jesús ngerutzuq más e 5,000 wineq

¹³ Atoq ri Jesús xrakꞌaxaj ri xkibꞌij ri ru-discípulos ri Juan, xok e pa jun barco chin xbꞌa pa jun lugar apeꞌ maneq wineq chin ndikꞌojeꞌ ruyon. Santienta wineq xkakꞌaxaj chi xbꞌa, romariꞌ xebꞌeꞌel pe pa teq tinamit y chikaqen xkoqaj.

¹⁴ Atoq ri Jesús xel pe pa barco, xerutzꞌet santienta wineq, xujoyowaj kiwech y xerukꞌachojrisaj ri ngeyawej chikikajal.

¹⁵ Y atoq xqaqꞌij qa, xejel apu ri ru-discípulos rikꞌin y xkibꞌij chare: Re lugar apeꞌ rojkꞌo tzꞌiran-tzꞌiran y ja xqaqꞌij qa. Romariꞌ kaꞌataqaꞌ la wineq pa teq aldeas chin ndikilaqꞌ ri ndikikꞌux.

¹⁶ Pero ri Jesús xubꞌij chake: Ma ndikꞌatzin ta ngebꞌa, ja rix kixtzuqu kichin.

¹⁷ Pero rejeꞌ xkibꞌij chare: Roj xaxe ok woꞌoꞌ kaxlan wey y kaꞌiꞌ ker kꞌo qikꞌin.

¹⁸ Ri Jesús xubꞌij chake: Keꞌikꞌamaꞌ pe chireꞌ ri kaxlan wey y ri ker.

¹⁹ Y xubꞌen mandar chi ketzꞌuyeꞌ ri wineq cho kꞌin. Xeruliꞌej pa ruqꞌaꞌ ri woꞌoꞌ kaxlan wey y ri kaꞌiꞌ ker, xtzuꞌun e chikaj y xumatioxij chare ri Dios. Xeruper ri kaxlan wey, xuyaꞌ chake ri discípulos y rejeꞌ xkijachalaꞌ chake ri wineq.

²⁰ Konojel xewaꞌ y jabꞌel xenanoꞌ, y kꞌa xekinojisaj kabꞌlajuj chakech rikꞌin ruchiꞌ ri kaxlan teq wey y ruchiꞌ ri ker ri ma xekꞌuxeꞌ ta.

²¹ Ri xewaꞌ chiriꞌ, jun laꞌeq 5,000 achiꞌaꞌ y ma xeꞌajilex ta ri ixoqiꞌ nixta ri akꞌolaꞌ.

Ri Jesús ndibꞌiyin pariꞌ ri lago

²² Atoq xewaꞌ yan konojel, ri Jesús xubꞌen chake ri ru-discípulos chi xeꞌok e pa jun barco chin ngeꞌeqꞌax apu jukꞌan ruchiꞌ ri lago, chin ngenabꞌeyaj chuwech, mientras rijaꞌ ndichꞌaꞌa kan chake ri wineq y ngeruteq chikachoch.

²³ Atoq ri Jesús xeruteq yan ri wineq chikachoch, xbꞌa e chuwech jun juyuꞌ chin xbꞌerubꞌanaꞌ orar ruyon. Y atoq xchaqꞌaꞌ qa, kꞌo ruyon chiriꞌ.

²⁴ Pero ri barco apeꞌ ebꞌaneq ri discípulos, nej chik bꞌaneq apu pariꞌ ri yaꞌ, y ri bꞌoloj teq yaꞌ ndikiseloj ri barco, porque ri kaqiqꞌ ndubꞌajilaꞌ riꞌ chuwech ri barco.

²⁵ Y atoq jun laꞌeq oxiꞌ chik hora ndirajoꞌ chin ndisaqer pe, ri Jesús ndibꞌiyin xbꞌa apu pariꞌ ri yaꞌ chin ngebꞌerilaꞌ ri ru-discípulos.

²⁶ Atoq ri discípulos xkitzꞌet chi kꞌo jun ndibꞌiyin pariꞌ ri yaꞌ, santienta xkixibꞌij kiꞌ y roma kixibꞌriꞌil xesikꞌin y xkibꞌij: ¡Jun xibꞌinel! xechajeꞌ.

²⁷ Pero ri Jesús ja paqiꞌ kereꞌ xubꞌij chake: ¡Tikꞌojeꞌ ruchuqꞌaꞌ iwánima! ¡Ja riyin ri Jesús, ma tixibꞌij iwiꞌ!

²⁸ Y ri Pedro xubꞌij chare: Ajaw, si ja rat, tabꞌanaꞌ mandar chi ngibꞌiyin pariꞌ ri yaꞌ chin ngibꞌa apu apeꞌ ratkꞌo.

²⁹ Ri Jesús xubꞌij chare: Katámpe. Y ri Pedro xel pe pa barco, y xbꞌiyin pariꞌ ri yaꞌ chin ndibꞌa apu apeꞌ kꞌo ri Jesús.

³⁰ Pero atoq xunaꞌ ruchuqꞌaꞌ ri kaqiqꞌ, xuxibꞌij riꞌ, y roma ja ndibꞌa qa pa yaꞌ, xsikꞌin pe y xubꞌij: ¡Ajaw, kanakoloꞌ! xchajeꞌ.

³¹ Y ri Jesús ja paqiꞌ xuyuq apu ruqꞌaꞌ chin xutzꞌen ri Pedro, y xubꞌij chare: ¿Achike roma kakaꞌ akꞌuꞌx xabꞌen? ¡Rat jun achi ri ma kin ta kuqul akꞌuꞌx wikꞌin!

³² Y atoq xejoteꞌ apu pa barco, xsisoꞌ qa ri kaqiqꞌ.

³³ Y ri ekꞌo pa barco xkiyaꞌ ruqꞌij ri Jesús y xkibꞌij chare: ¡Kin qetzij wi chi ja rat ri Rukꞌajol ri Dios!

Ri Jesús ngerukꞌachojrisaj ri ngeyawej pa rochꞌulew Genesaret

³⁴ Atoq xeꞌeqꞌax yan pariꞌ ri lago, xebꞌeqaqa pa jun lugar chin ri rochꞌulew Genesaret.

³⁵ Atoq ri achiꞌaꞌ aj chiriꞌ xkiyaꞌ cuenta chare chi ri Jesús kꞌo apu chiriꞌ, xkiyaꞌ rutzijol nojel teq apeꞌ chin ri rochꞌulew riꞌ, y ri wineq xekikꞌuaj apu chuwech ri Jesús konojel ri ngeyawej.

³⁶ Y ndikikꞌutuj kamelal chare ri Jesús chi tuyaꞌ qꞌij chake chi ndikitzꞌen jubꞌaꞌ ruchiꞌ ri rukꞌul ruqꞌuꞌun. Y konojel ri xetzꞌamo ri rukꞌul, xekꞌachaj.