Marcos 5 - Kaqchikel Santo Domingo (Xenacoj)

Ri Jesús ndirelesaj e jun seqꞌ espíritu pa rukꞌaslen jun achi pa rochꞌulew Gerasa

¹ Ri Jesús y ri discípulos xebꞌeqaqa jukꞌan chik apu ruchiꞌ ri lago pa kirochꞌulew ri aj Gerasa.

² Y atoq ri Jesús xel pe chupan ri barco, kin ja paqiꞌ jun achi kꞌo seqꞌ espíritu pa rukꞌaslen xel pe chikikajal ri kikꞌojlibꞌel ri animaꞌiꞌ, y xurukꞌuluꞌ ri Jesús.

³ Ri achi riꞌ kin jumul kꞌo pa kikꞌojlibꞌel ri animaꞌiꞌ, y nixta jun wineq nditiker chik pa ruqꞌaꞌ chin ta nduyut rikꞌin cadenas.

⁴ Porque kꞌiy mul yutun ruqꞌa-raqen rikꞌin cadenas, y eruqupiloꞌon ri cadenas y nixta jun ri santienta ta ruchuqꞌaꞌ chin nditiker pa ruqꞌaꞌ.

⁵ Chi chaqꞌaꞌ chi paqꞌij ndisikꞌiyaj chikikajal ri kikꞌojlibꞌel ri animaꞌiꞌ y pa teq juyuꞌ, y ndusokolaꞌ riꞌ chare abꞌej.

⁶ Y atoq ri achi xutzꞌet chi ri Jesús kꞌa nej pataneq, juꞌanin xbꞌexukeꞌ chuwech.

⁷ Y xsikꞌin chubꞌixik: Rat Jesús, Rukꞌajol ri nimalej ruqꞌij Dios, ¿achike a-cuenta chuwa? ¡Nikꞌutuj chawa chi chuwech Dios tayaꞌ atzij chi ma nganabꞌen castigar!

⁸ Keriꞌ xubꞌij ri seqꞌ espíritu, porque ri Jesús rubꞌiꞌin chik chare: ¡Katel e pa rukꞌaslen re achi reꞌ!

⁹ Ri Jesús xukꞌutuj razón chare ri seqꞌ espíritu: ¿Achike abꞌiꞌ? Y ri seqꞌ espíritu xubꞌij: Legión nubꞌiꞌ, porque roj santienta, xchajeꞌ.

¹⁰ Ri seqꞌ espíritu kin ndukꞌutulaꞌ kamelal chare ri Jesús chi ma keroqotaj e nej chin ri rochꞌulew riꞌ.

¹¹ Y chunaqaj ri juyuꞌ apeꞌ ekꞌo, santienta aq ngewaꞌ.

¹² Y ri seqꞌ teq espíritu kereꞌ xkikꞌutuj chare ri Jesús: Qojataqaꞌ chin ngojok pa ki-cuerpo la aq ekꞌo apu kelaꞌ.

¹³ Ri Jesús xuyaꞌ qꞌij chake, y atoq ri seqꞌ teq espíritu xeꞌel e pa rukꞌaslen ri achi, xebꞌeꞌok pa ki-cuerpo ri aq. Ri aq ekꞌo chiriꞌ, jun laꞌeq 2,000. Y atoq keriꞌ xbꞌanatej, ri aq xkitelelaꞌ kiꞌ xexuleꞌ qa chuwech jun raqꞌarik juyuꞌ, xetzaq qa pa lago, y chiriꞌ xejiqꞌ.

¹⁴ Y ri ngechajin ri aq xeꞌanimej y xbꞌekiyaꞌ rutzijol ri xbꞌanatej chake ri wineq ekꞌo pa tinamit y ri ekꞌo pa qꞌas, y ri wineq xbꞌekitzꞌetaꞌ ri xbꞌanatej.

¹⁵ Ri wineq riꞌ xebꞌeqaqa chuwech ri Jesús, y ndikitzutzaꞌ ri achi xekꞌojeꞌ seqꞌ teq espíritu pa rukꞌaslen, chi tzꞌuyul, rukusan yan chik rutziaq, y kin pa ruxnaqil yan chik kꞌo. Y ri wineq xkixibꞌij kiꞌ.

¹⁶ Y ri xetzꞌeto ri xbꞌanatej rikꞌin ri achi ri xekꞌojeꞌ seqꞌ teq espíritu pa rukꞌaslen, y ri xbꞌanatej chuqaꞌ kikꞌin ri aq, xkitzijoj nojel chake ri xebꞌeqaqa chiriꞌ.

¹⁷ Y atoq keriꞌ xkakꞌaxaj ri wineq, xkikꞌutuj kamelal chare ri Jesús chi tel e pa kirochꞌulew.

¹⁸ Atoq ri Jesús ndok chi e pa barco, ri achi ri xekꞌojeꞌ seqꞌ teq espíritu pa rukꞌaslen xukꞌutuj kamelal chare chi tuyaꞌ qꞌij chare chi ndiroqaj.

¹⁹ Pero ri Jesús ma xuyaꞌ ta qꞌij y xubꞌij chare: Kabꞌiyin chiꞌawachoch y kikꞌin ri awoxpochel, y taꞌatzijoj nojel ri nimalej teq favores xubꞌen ri Ajaw pa akꞌaslen y chi xujoyowaj awech.

²⁰ Ri achi riꞌ, xbꞌa y xutzꞌen rutzijoxik pa teq tinamit chin ri rochꞌulew Decápolis nojel ri nimalej teq favores xubꞌen ri Jesús pa rukꞌaslen. Y konojel ri wineq xsach kikꞌuꞌx.

Ri Jesús ndukꞌachojrisaj jun ixaq ndiyawej y ndukꞌastajbꞌaꞌ jun xten

²¹ Atoq tzolijneq chi pe ri Jesús jukꞌan ruchiꞌ ri lago, santienta wineq xbꞌekimoloꞌ kiꞌ chiriꞌ, y rijaꞌ xkꞌojeꞌ chuchiꞌ ri lago.

²² Ja atoq riꞌ xbꞌeqaqa chuqaꞌ chiriꞌ jun achi rubꞌiniꞌan Jairo. Ri achi riꞌ jun ukꞌuey bꞌey chikiwech ri ndikimal kiꞌ pa sinagoga, y atoq xutzꞌet ri Jesús, xbꞌexukeꞌ chiraqen,

²³ ndukꞌutulaꞌ rukamelal chare y ndubꞌij: Ri numiꞌal yaméra ndiken, tabꞌanaꞌ kamelal, taꞌayaꞌ aqꞌaꞌ pariꞌ, chin keriꞌ ndikꞌachaj y ma ndiken ta.

²⁴ Ri Jesús xbꞌa chirij ri Jairo, y santienta wineq ndikitelelaꞌ apu kiꞌ chirij, y romariꞌ ndikipitzꞌ ebꞌaneq.

²⁵ Pero chikikajal ri wineq bꞌaneq chuqaꞌ jun ixaq ri ja kabꞌlajuj junaꞌ ndipelaꞌ pe kikꞌ chuxeꞌ.

²⁶ Ri ixaq riꞌ santienta qꞌaxon ruqꞌasan pe roma ri jalajaj teq achike kibꞌiꞌin pe ekꞌiy aqꞌomanelaꞌ chin ta ndikoqꞌomaj, rukꞌison chik nojel ri ruchajin y nixta jun aqꞌon kꞌachojrisayon richin, xa qꞌij-qꞌij más kꞌayew rubꞌanun qa pa ruqꞌaꞌ ri ruyabꞌil.

²⁷ Atoq ri ixaq xrakꞌaxaj nojel ri nimalej teq achike ndibꞌix chirij ri Jesús, xbꞌeqaqa chirij, chikikajal ri wineq, y xutzꞌen apu jubꞌaꞌ ruchiꞌ ri kꞌul ruqꞌuꞌun ri Jesús.

²⁸ Porque rubꞌiꞌin pe pa ránima: Xa ta nitzꞌen apu jubꞌaꞌ ri kꞌul ruqꞌuꞌun, ngikꞌachaj chuwech re yabꞌil reꞌ.

²⁹ Y atoq xutzꞌen apu jubꞌaꞌ ri kꞌul, kin ja paqiꞌ xtaneꞌ ri kikꞌ ndipelaꞌ pe chuxeꞌ, y xunaꞌ pa ru-cuerpo chi xkꞌachojrisex chuwech ri yabꞌil riꞌ.

³⁰ Y ja atoq riꞌ ri Jesús xunaꞌ chi kꞌo uchuqꞌaꞌ xel e rikꞌin. Xuyaꞌ vuelta, xerutzutzaꞌ ri wineq y xubꞌij chake: ¿Achike xtzꞌamo pe re kꞌul nuqꞌuꞌun?

³¹ Ri discípulos xkibꞌij chare: Rat ndayaꞌ cuenta chare chi santienta wineq ngatikipitzꞌilaꞌ, y ¿ndakꞌutuj razón achike ri xtzꞌamo pe awichin?

³² Pero ri Jesús kꞌulan nditzuyaj chin ndutzꞌet achike xtzꞌamo ri kꞌul ruqꞌuꞌun.

³³ Ja atoq riꞌ ri ixaq riꞌ ndibꞌarbꞌot roma ruxibꞌriꞌil, porque kin retaman wi chi xkꞌachaj chuwech ri ruyabꞌil, romariꞌ xpuꞌun, xbꞌexukeꞌ chuwech ri Jesús y xubꞌij chare chi ja rijaꞌ xtzꞌamo apu ruchiꞌ ri kꞌul ruqꞌuꞌun.

³⁴ Ri Jesús xubꞌij chare: Numiꞌal, tikꞌojeꞌ ruchuqꞌaꞌ ri awánima, porque rikꞌin nojel awánima xapuꞌun chinukanoxik, romariꞌ xakolotej chuwech ri ayabꞌil. Rikꞌin uxlanen pa awánima kabꞌiyin porque xakꞌachaj chi jumul chuwech ri ayabꞌil.

³⁵ Kꞌaja keriꞌ ndajin chubꞌixik ri Jesús, atoq xebꞌeqaqa jujun ri etaqon pe koma ri aj pa rachoch ri Jairo ri achi ukꞌuey bꞌey chikiwech ri ndikimal kiꞌ pa sinagoga, y xkibꞌij chare: Jairo, ri amiꞌal xken qa. ¿Achike roma kꞌa ndayaꞌ eqaꞌ chirij la Tijonel?

³⁶ Pero ri Jesús xrakꞌaxaj ri xbꞌix, romariꞌ kereꞌ xubꞌij chare ri Jairo: Ma kabꞌison qa, xa kin jumul tikuqeꞌ akꞌuꞌx.

³⁷ Ri Jesús xaxe chake ri Pedro y ri ekaꞌiꞌ kichaqꞌ-kinimal kiꞌ kibꞌiniꞌan Santiago y Juan xuyaꞌ qꞌij chi xebꞌa chirij.

³⁸ Y atoq xbꞌeqaqa chirachoch ri achi ukꞌuey bꞌey chikiwech ri ndikimal kiꞌ pa sinagoga, ri Jesús xerutzꞌet ri wineq chi ngeꞌel chꞌuꞌj, xerutzꞌet chuqaꞌ ri ngeꞌoqꞌ y ngesikꞌiyaj.

³⁹ Y atoq ri Jesús xok apu pa jay, xubꞌij: ¿Achike roma ngixel chꞌuꞌj y ngixoqꞌ? Ri xten ma kamineq ta, xa ndiwer.

⁴⁰ Ri wineq xa xetzeꞌen chirij ri Jesús, pero rijaꞌ xerelesaj e konojel ri wineq chiriꞌ. Ja atoq riꞌ junan kikꞌin ri rute-rutataꞌ ri xten y ri discípulos, xok apu apeꞌ libꞌan ri xten kamineq.

⁴¹ Ri Jesús xutzꞌen chiruqꞌaꞌ y xubꞌij chare: ¡Talitá kum! Reꞌ ndubꞌij tzij: Chꞌuti xten, chawa rat nibꞌij chi kayakatej.

⁴² Ja atoq riꞌ ri xten xyakatej pe y xbꞌiyin, porque kabꞌlajuj chik rujunaꞌ, y ri ekꞌo apu chiriꞌ, xsach kikꞌuꞌx rikꞌin ri xbꞌanatej.

⁴³ Ri Jesús xubꞌen mandar chi ma jun achoq chare tikitzijoj ri xbꞌanatej, y xubꞌij chuqaꞌ chi tikitzuquꞌ ri xten.