Marcos 4 - Kaqchikel Santo Domingo (Xenacoj)

Ri parábola pa ruwiꞌ ri tikonel

¹ Jumbꞌey chik ri Jesús xutzꞌen kitijoxik ri wineq chuchiꞌ ri lago, y santienta wineq xbꞌekimoloꞌ kiꞌ chiriꞌ, romariꞌ xkꞌatzin chi xok pa jun barco y xtzꞌuyeꞌ qa. Y konojel ri wineq kimolon apu kiꞌ chuchiꞌ ri lago.

² Y rikꞌin parábolas, kꞌiy tijonik xuyaꞌ chake ri wineq. Y atoq ngerutijoj, kereꞌ ri tijonik nduyaꞌ:

³ Tiwakꞌaxaj reꞌ: Jun tikonel xbꞌetikon.

⁴ Atoq ndukiraj ri semilla, ekꞌo xeqaqa chuchiꞌ bꞌey y xebꞌeqaqa aj xikꞌ teq chikap, y xkikꞌux.

⁵ Jujun chik semilla xeqaqa pa ulew abꞌej ruxeꞌ, apeꞌ ma kꞌiy ta ulew kꞌo, y kin ja paqiꞌ xebꞌos pe, roma ma nej ta qa rupan ri ulew.

⁶ Y atoq xel pe ri qꞌij y xuyaꞌ pe ruchuqꞌaꞌ, xebꞌarabꞌo qa, y roma ma nej ta bꞌaneq qa kixeꞌ, xechaqiꞌj qa.

⁷ Jujun chik semilla xeqaqa pa kꞌixlej teq qꞌayis. Ri semillas xebꞌos pe y junan kikꞌin ri kꞌix xekꞌiy pe, pero ri kꞌix xkibꞌen chake chi xeqꞌaner qa, y ma xewachin ta.

⁸ Pero jujun chik semilla xeqaqa pa utzulej ulew, jabꞌel xekꞌiy y xewachin utz-utz. Ekꞌo xkiyaꞌ a 30, ekꞌo xkiyaꞌ a 60 y ekꞌo xkiyaꞌ a 100 kiwech.

⁹ Y ri Jesús xubꞌij: Ri nditiker ndukꞌoxomaj reꞌ, tukꞌoxomaj kꞌa.

Ri achike roma ri Jesús ngerukusaj parábolas

¹⁰ Atoq ri Jesús xkanej kan ruyon, ri kabꞌlajuj discípulos y jujun chik más ri kimolon apu kiꞌ chirij, xkikꞌutuj razón chare achike ndubꞌij tzij ri parábola xubꞌij chake ri wineq.

¹¹ Y rijaꞌ xubꞌij: Chiwa rix yoꞌon qꞌij chi ndiwetamaj ri ewan pe rubꞌeyal xe ojer kan pa ruwiꞌ ru-reino ri Dios, pero chake ri wineq ri ma kiyoꞌon ta kánima wikꞌin, nikusaj parábolas chin ngichꞌaꞌa chake,

¹² chin keriꞌ maske ngetzuꞌun, ma ndikiyaꞌ ta cuenta chare ri ndibꞌanatej chikiwech, y maske ndikakꞌaxaj ri nibꞌij, ma ndikikꞌoxomaj ta, ma kꞌateꞌ xtikiyaꞌ kan ri itzel kꞌaslen, xtikiyaꞌ kánima rikꞌin ri Dios, y xtikuyutej kimak.

Ri Jesús nduqꞌalajrisaj ri ndubꞌij tzij ri parábola pa ruwiꞌ ri tikonel

¹³ Ri Jesús xubꞌij chake: ¿La ma ndikꞌoxomaj ta rubꞌeyal ri parábola pa ruwiꞌ ri tikonel? Si keriꞌ, ¿achike modo xtikꞌoxomaj nojel ri chꞌaqa chik parábolas?

¹⁴ Ri tikonel ja ri tzijoy rutzij ri Dios.

¹⁵ Ri ulew chuchiꞌ bꞌey apeꞌ xeqaqa jujun semilla, ja ri wineq ri ndikakꞌaxaj ri utzulej rutzijoxik rutzij ri Dios, pero atoq kakꞌaxan chik, ja paqiꞌ nduqaqa ri Satanás y ndukꞌen e ri xtik pa kánima.

¹⁶ Ekꞌo wineq eꞌachel ri ulew abꞌej ruxeꞌ apeꞌ xeqaqa jujun chik semilla. Rejeꞌ kin xe ndikakꞌaxaj ri utzulej rutzijoxik ri rutzij ri Dios, ja paqiꞌ ngekikot ndikikꞌen pa kánima.

¹⁷ Pero ri rutzij ri Dios ma ndibꞌa ta qa ruxeꞌ pa kánima, porque ri kánima kin achel abꞌej, y romariꞌ xa jubꞌaꞌ teq qꞌij ngekikot, y atoq nduqaqa jun kꞌayew pa kikꞌaslen, o ngetzeqlebꞌex chin ndibꞌan itzel chake roma koqan rutzij ri Dios, kin ja paqiꞌ ndikiyaꞌ kan ri Dios.

¹⁸ Ekꞌo wineq eꞌachel ri ulew kꞌo kꞌixlej teq qꞌayis chuwech apeꞌ xeqaqa jujun chik semilla. Rejeꞌ ndikakꞌaxaj rutzij ri Dios,

¹⁹ pero roma ndibꞌa kánima chirij ri ndikꞌatzin chake qꞌij-qꞌij, y chirij aj rochꞌulew bꞌeyomal, y chirij chuqaꞌ jalajaj teq achike ri ndikirayij, riꞌ ndubꞌen chi ndikꞌis qa ri rutzij ri Dios ri xtik pa kánima, y ri tzij riꞌ ma ndiwachin ta pa kikꞌaslen.

²⁰ Pero ekꞌo wineq eꞌachel ri utzulej ulew apeꞌ xeqaqa jujun chik semilla. Rejeꞌ ndikakꞌaxaj rutzij ri Dios y ndikiyaꞌ qꞌij chare chi ndubꞌen qa ruxeꞌ pa kánima y ndiwachin ri kikꞌaslen, achel ri tikoꞌ, ekꞌo ndikiyaꞌ a 30, ekꞌo ndikiyaꞌ a 60 y ekꞌo ndikiyaꞌ a 100 kiwech.

Ri parábola pa ruwiꞌ jun lámpara

²¹ Ri Jesús xubꞌij chuqaꞌ chake: Atoq ndikꞌan pe jun lámpara chin ndiyikꞌan, ¿la ndiyoꞌox kami chuxeꞌ jun cajón o chuxeꞌ jun chꞌat? Ma ke ta riꞌ. Ri lámpara xa kin pariꞌ rukꞌojlibꞌel ndiyoꞌox wi.

²² Porque ma jun achike ri ma ndiqꞌalajin ta wokami ri man ta xtiqꞌalajin, y nixta jun ri ewan ri man ta xtel cho luz.

²³ ¡Ri nditiker ndukꞌoxomaj reꞌ, tukꞌoxomaj kꞌa!

²⁴ Y ri Jesús xubꞌij chuqaꞌ: Tiyaꞌ ixikin utz-utz rikꞌin rutzij ri Dios ri nitzijoj chiwa, porque ri janipeꞌ ndikꞌoxomaj chare ri ndiwakꞌaxaj, jariꞌ ri ndiwetamaj, y kꞌa ndiwetamaj más pa ruwiꞌ ri xikꞌoxomaj.

²⁵ Porque ri kꞌo chik kikꞌoxoman, ndikikꞌoxomaj más, pero ri maneq ok kikꞌoxoman, hasta ri jubꞌaꞌ ok kikꞌoxoman, ndikꞌan e chikiwech.

Ri parábola pa ruwiꞌ rukꞌiyilen ri tikoꞌ

²⁶ Ri Jesús xubꞌij chuqaꞌ: Ri ru-reino ri Dios ndiqajunumaj rikꞌin ri ndubꞌen jun achi ri ndutik kan semilla pa rulew.

²⁷ Rijaꞌ ndiwer qa chaqꞌaꞌ y ndiyakatej atoq ndiseqresan pe, y qꞌij-qꞌij keriꞌ ndubꞌen. Ri semilla ruyon ndibꞌos y ndikꞌiy pe, pero rijaꞌ ma retaman ta achike modo ndibꞌanatej riꞌ.

²⁸ Porque ri ru-semilla trigo, nabꞌey ndibꞌos pe, kꞌateriꞌ ndikꞌiy pe rutun y pa rukꞌisibꞌel ndinoj pe rupan ri rutun. Nojel reꞌ ndibꞌanatej roma ruchuqꞌaꞌ ri ulew.

²⁹ Y atoq utz chik chin ndiqꞌat ruwech ri tikoꞌ, ja ndiqꞌat chare jos, porque qꞌij chik chin ndimol ruwech.

Ri parábola pa ruwiꞌ jun semilla mostaza

³⁰ Ri Jesús xubꞌij chuqaꞌ: ¿Achoq ikꞌin kami ndiqajunumaj ri ru-reino ri Dios, o achike jun parábola ndiqakusaj chin ndetamex rubꞌeyal?

³¹ Ndiqajunumaj rikꞌin jun semilla mostaza ri xtik qa pa ulew. Ri semilla riꞌ ja ri más kaꞌal chikiwech ri semillas ekꞌo chochꞌulew,

³² pero atoq tikon chik, ndikꞌiy pe y más nim ndel ke chikiwech konojel ri tikoꞌ, ndikꞌojeꞌ nimaꞌq teq ruqꞌaꞌ y hasta ri aj xikꞌ teq chikap pa rumujal ndikibꞌen kisok chi teq ruqꞌaꞌ.

Ri rukusaxik ri parábolas ndubꞌen ri Jesús

³³ Ri Jesús chin ndutzijoj rutzij ri Dios, ngerukusaj kꞌiy parábolas achel riꞌ, chin keriꞌ ekꞌo wineq ndikikꞌoxomaj y ekꞌo ma ndikikꞌoxomaj ta.

³⁴ Y ma jun achike xubꞌij ri man ta xerukusaj parábolas, pero atoq ruyon kꞌo kikꞌin ri ru-discípulos, rijaꞌ ndubꞌij rubꞌeyal ri parábolas chake.

Ri Jesús ndubꞌen chi ri kaqiqꞌ y ri jabꞌ ngesisoꞌ qa

³⁵ Atoq xokoqꞌaꞌ qa ri qꞌij riꞌ, ri Jesús xubꞌij chake ri discípulos: Qojeqꞌax apu jukꞌan ruchiꞌ re lago.

³⁶ Atoq xubꞌij yan chake ri wineq chi ketzolij chi teq kachoch, ri discípulos xkikꞌuaj ri Jesús chupan ri barco ri achoq chupan xtzꞌuyeꞌ chin xerutijoj ri wineq, y ekꞌo chuqaꞌ jujun chik barcos ri xeꞌoqan e kichin pa yaꞌ.

³⁷ Atoq ebꞌaneq apu pariꞌ ri yaꞌ, xtiker pe jun mama kaqiqꞌ y jabꞌ pa ruwiꞌ ri yaꞌ, y ri bꞌoloj teq yaꞌ ngeꞌok chupan ri barco, y ndinoj ri barco rikꞌin yaꞌ y ndubꞌen chi jubꞌama ndibꞌa qa chuxeꞌ yaꞌ.

³⁸ Ri Jesús chirij kan chupan ri barco ndiwer, y ruyoꞌon rujolon pariꞌ jun ruchꞌakat ruwiꞌ. Y ri discípulos xkikꞌasoj y xkibꞌij chare: ¡Tijonel! ¿Ma nduyaꞌ ta pena chawa chi ngojjiqꞌ pa yaꞌ?

³⁹ Xyakatej kꞌa pe ri Jesús, kaw pa ruchiꞌ xchꞌaꞌa chake ri yaꞌ y ri kaqiqꞌ, y xubꞌij: Tiqꞌileꞌ qa ri iwuchuqꞌaꞌ y kixtaneꞌ. Ja atoq riꞌ xtaneꞌ qa ri kaqiqꞌ, y nojel jabꞌel xsisoꞌ qa.

⁴⁰ Y ri Jesús xubꞌij chake ri discípulos: ¿Achike roma ixibꞌin iwiꞌ? ¿Kꞌajani tikuqubꞌaꞌ ikꞌuꞌx rikꞌin ri Dios?

⁴¹ Y ri discípulos santienta kixibꞌin kiꞌ ndikibꞌilaꞌ chikiwech: ¿Achike chi achi reꞌ, chi hasta ri kaqiqꞌ y ri yaꞌ ndikitaqij rutzij?