Marcos 13 - Kaqchikel Santo Domingo (Xenacoj)

Ri Jesús nduqꞌalajrisaj chi ri rachoch ri Dios ndiwulix

¹ Atoq ri Jesús xel pe pa rachoch ri Dios, jun ru-discípulo kereꞌ xubꞌij chare: ¡Tijonel, tatzꞌetaꞌ re jabꞌel teq abꞌej ukusan waweꞌ, y ri jabꞌel rubꞌanik bꞌanun chare ri jalajaj teq jay chin re rachoch ri Dios!

² Y ri Jesús xubꞌij chare: ¿Ngaꞌatzꞌet re nimaꞌq teq jay reꞌ? Ngetuqaqa qꞌij atoq nixta jun abꞌej ndikanej kan pariꞌ jun chik abꞌej, xa kin nojel xtiwulix.

Ri ngebꞌanatej nabꞌey chi nduqaqa ri rukꞌisibꞌel qꞌij chin ri rochꞌulew

³ Y atoq ri Jesús tzꞌuyul chuwech ri raqꞌarik chin ri juyuꞌ rubꞌiniꞌan Olivos, juyuꞌ ri kꞌo apu chuwech ri rachoch ri Dios, ri Pedro, ri Santiago, ri Juan y ri Andrés atoq kiyon ekꞌo rikꞌin, kereꞌ xkikꞌutuj razón chare:

⁴ ¿Jampeꞌ ngebꞌanatej ri xabꞌij? y, ¿achike etal nditzꞌetetej atoq jubꞌaꞌ chik ndirajoꞌ chi ngebꞌanatej nojel ri xabꞌij?

⁵ Y ri Jesús kereꞌ xubꞌij chake: Tichajij iwiꞌ chi nixta jun tichꞌakatin iwichin.

⁶ Porque ekꞌiy ngetuqaqa ri ndikiqꞌabꞌaj kiꞌ chi ja yin xinuqaqa porque kereꞌ ndikibꞌilaꞌ: Ja riyin ri taqon pe roma ri Dios chukolik ri rutinamit, ngechajeꞌ. Y ekꞌiy wineq ngechꞌakatix koma rejeꞌ.

⁷ Atoq ndiwakꞌaxaj chi ngetajin guerras y chi ngetzꞌukutej qa guerras, rix ma tixibꞌij iwiꞌ, porque ndikꞌatzin chi keriꞌ ndibꞌanatej. Pero ma ja yan ta nduqaqa ri rukꞌisibꞌel chin nojel.

⁸ Porque chupan teq ri qꞌij riꞌ, ri wineq chin jun rochꞌulew ngeyakatej chikij wineq chin jun chik rochꞌulew, y keriꞌ chuqaꞌ reyes kikꞌin ri ki-soldados ndekibꞌanaꞌ guerra chake chꞌaqa chik reyes. Jalajaj teq apeꞌ ngebꞌanatej nimaꞌq teq kobꞌraqen y ndipuꞌun wayijal. Nojel ri kꞌayew riꞌ xa kꞌaja ri nabꞌey teq qꞌaxomal, achel ri nabꞌey teq qꞌaxomal chin alanik ri ndunaꞌ jun ixaq.

⁹ Pero rix tibꞌanaꞌ cuenta iwiꞌ, porque ri wineq ngixbꞌekijachaꞌ pa kiqꞌaꞌ ri bꞌotzaj achiꞌaꞌ israelitas kꞌo uchuqꞌaꞌ pa kiqꞌaꞌ, y pa teq sinagogas ngixkiraq, y roma yin itaqin ngixukꞌuꞌex chikiwech gobernadores y reyes chin ndiyaꞌ utzulej nutzijol chikiwech rejeꞌ.

¹⁰ Y ri utzulej teq tzij chin kolotajik ndikꞌatzin chi nditzijox nabꞌey chake konojel kiwech wineq.

¹¹ Y atoq ngixukꞌuꞌex chin ngixbꞌejach pa kiqꞌaꞌ ri kꞌo uchuqꞌaꞌ pa kiqꞌaꞌ, ma tichꞌujrisaj iwiꞌ chunojixik achike ndibꞌij apu. Rix ja ri tzij ndiyoꞌox pa iwánima ri hora riꞌ, jariꞌ tibꞌij, porque ma ja ta rix ri ngixchꞌaꞌa apu, xa kin ja ri Espíritu Santo ri ndiyoꞌon tzij pa ichiꞌ chin ndibꞌij.

¹² Chupan teq ri qꞌij riꞌ, ekꞌo kichaqꞌ-kinimal kiꞌ ri ndikijech kichaqꞌ o kinimal chin ngekamisex, ekꞌo chuqaꞌ teꞌej-tataꞌatz ngekijech ri kalkꞌuaꞌl y ekꞌo alkꞌualaxelaꞌ ngeyakatej chikij kite-kitataꞌ chin ngekijech pa kamik.

¹³ Y roma yin itaqin, itzel ngixtzꞌat koma konojel wineq, pero ri ma xtitzolij ta chirij y jumul xtukachꞌ ruwech hasta pa rukꞌisibꞌel, kin xtikolotej.

¹⁴ Atoq nditzꞌet chi ndajin ri santienta ndimulu rukꞌuꞌx ri Dios rikꞌin chupan ri lugar apeꞌ ma rukꞌulun ta chi keriꞌ ndibꞌanatej, y romariꞌ ri Dios nduyaꞌ kan ri lugar riꞌ, ri ekꞌo pa rochꞌulew Judea keꞌanimej pa teq juyuꞌ. Ri ndibꞌanun leer reꞌ, tukꞌoxomaj kꞌa.

¹⁵ Ri nduxlan pa terraza, ma tiqaqa chin ndok apu pa jay chukꞌamik jun achike, xa kin tanimej paqiꞌ.

¹⁶ Y ri kꞌo pa qꞌas, ma titzolij chukꞌamik rukꞌul chin nduqꞌuꞌuj.

¹⁷ Y chupan teq ri qꞌij riꞌ, ¡juyo ok kiwech ri ixoqiꞌ ri pataneq alanik chikij y ri kꞌa nditzꞌuman na akꞌual chikiqꞌaꞌ!

¹⁸ Romariꞌ tibꞌanaꞌ orar, tikꞌutuj chi man ta ndibꞌanatej reꞌ pa ru-tiempo tew.

¹⁹ Porque chupan teq ri qꞌij riꞌ, nduqaqa jun nimalej kꞌayew ri ma jumbꞌey bꞌanatajneq xe jampeꞌ ebꞌanun pe nojel ri kꞌo roma ri Dios hasta wokami, y nixta ndibꞌanatej chik jumbꞌey.

²⁰ Y si ri Ajaw man ta ngerukꞌen e qꞌij chare ri tiempo riꞌ, konojel ta ri wineq ngeken, pero ri Dios roma rujoyowaxik kiwech ri eruchaꞌon, ngerukꞌen e qꞌij chare ri tiempo riꞌ.

²¹ Romariꞌ, si jun wineq kereꞌ xtubꞌij chiwa: Titzꞌetaꞌ, chireꞌ kꞌo ri Jun taqon pe roma ri Dios chukolik ri rutinamit, o xtubꞌij: Ja chiriꞌ kꞌo, xtichajeꞌ, rix ma titaqij.

²² Porque ngebꞌeqꞌalajin pe wineq ri ndikiqꞌabꞌaj kiꞌ chi etaqon pe roma ri Dios chukolik ri rutinamit, y chuqaꞌ wineq ri ndikiqꞌabꞌaj kiꞌ chi e-profetas, y ngekibꞌanalaꞌ nimalej teq achike ri nixta jumbꞌey etzꞌeton y milagros, chin ngekichꞌakatij wineq, y xa ta ngetiker, hasta jajun ri echaꞌon roma ri Dios, ngekichꞌakatij.

²³ Pero rix tichajij iwiꞌ, porque nabꞌey chi ndibꞌanatej nojel reꞌ, riyin ja yan xinbꞌij chiwa.

Ri ndibꞌanatej atoq ja nduqaqa chik jumbꞌey ri Jun aj chikaj

²⁴ Atoq xqꞌax yan ri kꞌayew richin teq ri qꞌij riꞌ, ndiqꞌeqꞌumer qa ruwech ri qꞌij y ri raqen ikꞌ ma ndiyikꞌan chi ta.

²⁵ Ri chꞌumilaꞌ ngetzaq e chuwech ri kaj, y ri nimalej teq uchuqꞌaꞌ ekꞌo chikaj ngeꞌelesex pa teq kikꞌojlibꞌel.

²⁶ Ja atoq riꞌ nginitzꞌet riyin ri aj chikaj ri xinuꞌalex chiꞌikajal, chi yin pataneq pa teq nube rikꞌin nimalej uchuqꞌaꞌ y nimalej nuqꞌij.

²⁷ Y ja atoq riꞌ ngenteq ri ángeles chuwech nojel ri rochꞌulew, chin ngebꞌekimoloꞌ ri enuchaꞌon. Y ma jun apeꞌ chuxeꞌ ri kaj ri man ta xkeꞌeqꞌax wi.

²⁸ Tiwetamaj ri ndubꞌij tzij ri parábola pa ruwiꞌ ri higuera: Atoq ja ndijotayin pe y ngeꞌel pe kꞌakꞌakꞌ ruxaq, rix iwetaman chi ja nduqaqa ri tiempo chin qatataꞌ.

²⁹ Keriꞌ chuqaꞌ rix, atoq nditzꞌet chi ja ndajin reꞌ, tiwetamaj chi ri qꞌij naqaj chik kꞌo, kin achel ta chuwaꞌq-kabꞌij keriꞌ.

³⁰ Y kin qetzij nibꞌij chiwa chi nojel ri nubꞌiꞌin pe ngebꞌanatej nabꞌey chi ngekꞌis e chochꞌulew ri wineq aj wokami.

³¹ Ri kaj y ri rochꞌulew ngekꞌis, pero ri tzij enubꞌiꞌin, ma xe ta keriꞌ ngekꞌis, xa kin xkebꞌanatej wi nojel.

³² Pero ri qꞌij o ri hora riꞌ, ma jun etamayon, nixta ri ángeles ekꞌo chikaj, nixta riyin ri Rukꞌajol ri Dios, xa kin xe ri Tataꞌaj Dios etamayon.

³³ Rix tichajij iwiꞌ y ma kixwer chiwoyobꞌexik, porque ma iwetaman ta jampeꞌ nduqaqa ri qꞌij riꞌ.

³⁴ Porque riyin nibꞌen achel jun rajaw jay ri xbꞌa nej, xujech ri rachoch pa kiqꞌaꞌ ri loqꞌon teq rusamajelaꞌ chin ndikibꞌen cuenta y chikijununal xuyaꞌ kan kisamaj, y xubꞌij kan chare ri ndichajin ri puerta, chi ma tiwer pa ruwiꞌ ri rusamaj.

³⁵ Romariꞌ, tibꞌanaꞌ achel ndikꞌatzin ndubꞌen ri chajinel chin ri achoch. Ma kixwer, tichajij utz-utz ri ikꞌaslen, porque ma iwetaman ta atoq nduqaqa ri rajaw jay, ma kꞌateꞌ tuqaqa atoq ndokoqꞌaꞌ qa, o pa nikꞌaj aqꞌaꞌ, o atoq ngetziritzin pe ri ekꞌ kumaj saqer, o atoq ja ndiseqresan pe.

³⁶ Ma kꞌateꞌ ngixwer, y pa jumel ruwech nduqaqa ri rajaw ri achoch y xa ngixwer ngixurilaꞌ.

³⁷ Ri nibꞌij chiwa rix, nibꞌij chuqaꞌ chake konojel. Ma kixwer qa chiwoyobꞌexik. Keriꞌ xubꞌij ri Jesús chake ri discípulos.