Marcos 10 - Kaqchikel Santo Domingo (Xenacoj)

Ma rurayibꞌel ta ri Dios chi ri achi ndujech riꞌ rikꞌin ri rixjayil

¹ Ri Jesús xel pe pa tinamit Cafarnaúm, y xbꞌa pa teq lugares chin ri rochꞌulew Judea ri ekꞌo apu jukꞌan ruchiꞌ ri raqen yaꞌ Jordán. Y xbꞌekimoloꞌ chik kiꞌ santienta wineq rikꞌin, y ri Jesús kin achel wi ndubꞌen, xutzꞌen kitijoxik rikꞌin rutzij ri Dios.

² Xejel apu jujun fariseos apeꞌ kꞌo ri Jesús, y chin ta nditzaq pa kiqꞌaꞌ ndikajoꞌ, xkikꞌutuj razón chare si ma xajan ta chuwech ri Dios chi jun achi ndujech riꞌ rikꞌin ri rixjayil.

³ Ri Jesús xubꞌij chake: ¿Achike rubꞌanun kan mandar ri Moisés chiwa pa ruwiꞌ riꞌ?

⁴ Y rejeꞌ xkibꞌij: Ri Moisés xuyaꞌ qꞌij chin nditzꞌibꞌex wuj apeꞌ ndubꞌij chi ri achi ndujech riꞌ rikꞌin ri rixjayil y ndirelesaj e.

⁵ Pero ri Jesús xubꞌij chake: Roma rukowil iwánima, ri Moisés xuyaꞌ kan ri mandamiento riꞌ chiwa.

⁶ Pero xe jampeꞌ pa nabꞌey atoq ri Dios xerubꞌen nojel, rijaꞌ chi achi chi ixaq xerubꞌen.

⁷ Y romariꞌ, ri kꞌajol ngeruyaꞌ kan rute-rutataꞌ, chin ndukꞌuaj qa riꞌ rikꞌin ri rixjayil,

⁸ y chi ekaꞌiꞌ xe jun ndikibꞌen. Y romariꞌ, rejeꞌ ma ekaꞌiꞌ chi ta, xa jun bꞌanun chake roma ri Dios.

⁹ Romariꞌ, ri ekaꞌiꞌ ri xe jun bꞌanun chake, ma tijach kiwech koma ri wineq, xchajeꞌ.

¹⁰ Y atoq ri Jesús y ri discípulos ekꞌo pa jay, rejeꞌ xkikꞌutuj razón más pa ruwiꞌ ri xubꞌij.

¹¹ Y ri Jesús xubꞌij chake: Xa achike na achi ri ndujech riꞌ rikꞌin ri rixjayil y ndukꞌen chik jun ixaq, mak ndubꞌen contra ri rixjayil.

¹² Y si jun ixaq ndujech riꞌ rikꞌin ri rachijil y ndukꞌen chik jun achi, mak chuqaꞌ ndubꞌen.

Ri Jesús nduyaꞌ ruqꞌaꞌ pa kiwiꞌ akꞌolaꞌ

¹³ Y xeꞌukꞌuꞌex apu jujun akꞌolaꞌ chuwech ri Jesús chin nduyaꞌ ruqꞌaꞌ pa kiwiꞌ, pero ri discípulos xekichꞌolij ri eꞌukꞌuayon apu ri akꞌolaꞌ.

¹⁴ Pero atoq ri Jesús xutzꞌet chi keriꞌ ndikibꞌen ri discípulos, xyakatej royowal, y xubꞌij chake: Tiyaꞌ qꞌij chake ri akꞌolaꞌ chi ngepuꞌun wikꞌin, y ma tiqꞌet kiwech, porque ri ngeꞌok pa ru-reino ri Dios, ja ri kibꞌanun chare ri kánima achel kánima re akꞌolaꞌ reꞌ.

¹⁵ Kin qetzij nibꞌij chiwa: Xa achike na jun ri ma ndubꞌen ta achel ránima jun akꞌual chin ndukꞌen qa ri ru-reino ri Dios pa ránima, ma jubꞌaꞌ xtok pa ru-reino ri Dios, xchajeꞌ ri Jesús.

¹⁶ Y ri Jesús ngeruchꞌelej ri akꞌolaꞌ y nduyaꞌ ruqꞌaꞌ pa kiwiꞌ chin ngerubꞌen bendecir.

Jun achi bꞌeyon kꞌo achike ndukꞌutuj razón chare ri Jesús

¹⁷ Atoq ri Jesús xel pe chiriꞌ, juꞌanin xbꞌeqaqa jun achi apeꞌ kꞌo rijaꞌ, xxukeꞌ qa chuwech y kereꞌ xukꞌutuj razón chare: Utzulej tijonel, ¿achike ndikꞌatzin nibꞌen chin ndok wichin ri kꞌaslen ma ndikꞌis ta?

¹⁸ Ri Jesús xubꞌij: ¿Achike roma ndabꞌij chi yin utz? Nixta jun utz, xa kin xe wi Jun ri utz, y riꞌ ja ri Dios.

¹⁹ Rat awetaman ri mandamientos: Ma kakamisan, ma takanoj rukꞌexel ri achoq ikꞌin rat kꞌulan, ma kateleqꞌan, ma taqꞌabꞌaj tzij chikij wineq, ma tawelesaj jun achike chiruqꞌaꞌ jun wineq chi chꞌakatinik, tanimrisaj kibꞌiꞌ ri ate-atataꞌ.

²⁰ Y ri achi kereꞌ xubꞌij chare: Tijonel, nojel ri mandamientos riꞌ, xe jampeꞌ kꞌa yin kꞌajol, jumul enuniman pe.

²¹ Ri Jesús rikꞌin ajowabꞌel pa ránima xutzutzaꞌ ruwech ri achi y kereꞌ xubꞌij chare: Kꞌo jun achike ri ma abꞌanun ta. Kabꞌiyin, takꞌayij nojel ri achajin y ri rajel tayaꞌ chake ri maneq ok kichajin, y keriꞌ ndikꞌojeꞌ abꞌeyomal chikaj, y kꞌateriꞌ katzolij pe chin nganawoqaj.

²² Pero atoq ri achi xrakꞌaxaj ri xubꞌij ri Jesús chare, xbꞌison qa y poyineq ruwech xbꞌa, porque kꞌiy bꞌeyomal ruchajin.

²³ Y ri Jesús kꞌulan xtzuyaj y kereꞌ xubꞌij chake ri ru-discípulos: ¡Ri kꞌo kibꞌeyomal, cuesta chake chi ngeꞌok pa ru-reino ri Dios!

²⁴ Ri discípulos xsach kikꞌuꞌx roma ri xubꞌij ri Jesús. Romariꞌ rijaꞌ xchꞌaꞌa chik chake y xubꞌij: Rix walkꞌuaꞌl, ¡kin qetzij nibꞌij chiwa chi ri bꞌaneq kánima chirij bꞌeyomal, cuesta chake chi ngeꞌok pa ru-reino ri Dios!

²⁵ Xa más ma cuesta ta ndeqꞌax jun camello chi racheq jun bꞌaq chin tꞌisoꞌ, ke chuwech xtok jun bꞌeyon pa ru-reino ri Dios.

²⁶ Pero ri discípulos más xsach kikꞌuꞌx, y kereꞌ ndikibꞌilaꞌ chikiwech: Si keriꞌ, ¿achike kꞌa jun xtikolotej?

²⁷ Ri Jesús xerutzutzaꞌ y xubꞌij chake: Kiyon chikiwech, ri wineq ma ngetiker ta ndikikal kiꞌ, pero chare ri Dios ma ke ta riꞌ, porque chare rijaꞌ ma jun achike cuesta rubꞌanik.

²⁸ Ja atoq riꞌ ri Pedro kereꞌ xubꞌij chare ri Jesús: Rat ayoꞌon cuenta chare chi roj qayoꞌon kan nojel y rat qoqan.

²⁹ Ri Jesús xubꞌij: Kin qetzij nibꞌij chiwa, chi nixta jun wineq ri ruyoꞌon kan rachoch, ruchaqꞌ-runimal, eranaꞌ, rute-rutataꞌ, ralkꞌuaꞌl, o ruxolal woma riyin y roma ri utzulej teq tzij chin kolotajik,

³⁰ ri man ta xtiyoꞌox 100 mul más chare chupan re tiempo rojkꞌo. Kin ndiyoꞌox rachoch, ruchaqꞌ-runimal, eranaꞌ, ruteꞌ, ralkꞌuaꞌl y ruxolal, pero nditzeqlebꞌex chuqaꞌ chin ndibꞌan itzel chare, y chupan ri tiempo más chiqawech apu, kin ndiyoꞌox ri kꞌaslen ma ndikꞌis ta chare.

³¹ Pero ekꞌiy ri nim kiqꞌij chupan re tiempo rojkꞌo, maneq kiqꞌij ndekꞌojeꞌ chupan ri tiempo más chiqawech apu, y ekꞌiy ri maneq ok kiqꞌij chupan re tiempo rojkꞌo, kin nim kiqꞌij xtikꞌojeꞌ.

Ri Jesús ndubꞌij chik jumbꞌey chi ndikamisex

³² Ri Jesús y ri eꞌoqayon richin kitzꞌamon bꞌey ebꞌaneq e pa tinamit Jerusalén, y ja rijaꞌ ri nabꞌey bꞌaneq chikiwech, y konojel ri eꞌoqayon e richin sachineq kikꞌuꞌx chirij y kixibꞌin kiꞌ koqan e. Ja atoq riꞌ ri Jesús xerukꞌuaj apu jubꞌaꞌ jukꞌan ri kabꞌlajuj discípulos y xutzꞌuk rubꞌixik chake ri achike nderukꞌulwachij. Y kereꞌ xubꞌij chake:

³³ Tiyaꞌ cuenta chare chi qatzꞌamon bꞌey roj bꞌaneq e pa tinamit Jerusalén, y riyin ri aj chikaj ri xinuꞌalex chiꞌikajal, ngijach pa kiqꞌaꞌ ri sacerdotes israelitas más kꞌo ruchuqꞌaꞌ kitzij y pa kiqꞌaꞌ ri tijonelaꞌ chin ri ley xyoꞌox chare ri Moisés. Rejeꞌ ndikiqꞌet tzij pa nuwiꞌ, y nginikijech pa kiqꞌaꞌ ri ma israelitas ta chin ngikamisex.

³⁴ Y ri wineq riꞌ nginkitzeꞌej, nginkichubꞌaj, nginkiraq y nginikikamisaj. Pero pa rox qꞌij, ngikꞌastej pe chikikajal ri animaꞌiꞌ.

Ri ndikikꞌutuj ri Santiago y ri Juan chare ri Jesús

³⁵ Ri Santiago y ri Juan, ri erukꞌajol ri Zebedeo, xejel apu apeꞌ kꞌo ri Jesús y kereꞌ xkibꞌij chare: Tijonel, roj ndiqajoꞌ chi ndabꞌen ri kamelal ndiqakꞌutuj chawa.

³⁶ Ri Jesús xubꞌij chake: ¿Achike ndiwojoꞌ chi nibꞌen iwoma?

³⁷ Rejeꞌ xkibꞌij: Roj ndiqajoꞌ chi atoq ratkꞌo chupan ri nimalej aqꞌij, ndabꞌen chi jun chiqawech roj nditzꞌuyeꞌ pa awikiqꞌaꞌ y ri jun chik pa axakan.

³⁸ Pero ri Jesús xubꞌij chake: Rix ma iwetaman ta ri ndikꞌutuj. Porque, ¿la ndikachꞌ kami rix ndiqꞌasaj ri kꞌayew ri niqꞌasaj yin? ¿La ndikachꞌ kami rix ri kꞌayew ri achoq chupan ngibꞌan bautizar?

³⁹ Rejeꞌ xkibꞌij chare: Ndiqakachꞌ. Ri Jesús xubꞌij chake: Ri kꞌayew niqꞌasaj yin, kin xtiqꞌasaj chuqaꞌ rix, y ri kꞌayew ri achoq chupan ngiqꞌasex yin, chin ngibꞌan bautizar, chupan ri kꞌayew riꞌ ngixqꞌasex chuqaꞌ rix.

⁴⁰ Pero chin ngixbꞌetzꞌuyeꞌ pa wikiqꞌaꞌ o pa nuxakan, ma pa nuqꞌaꞌ ta riyin kꞌo chin niyaꞌ. Ri kꞌojlibꞌel riꞌ kichin ri achoq chake nabꞌan chin ndiyoꞌox.

⁴¹ Atoq ri lajuj discípulos xkakꞌaxaj keriꞌ, xyakatej koyowal chake ri Santiago y ri Juan.

⁴² Pero ri Jesús xeroyoj konojel ri discípulos y kereꞌ xubꞌij chake: Rix iwetaman chi ri ndibꞌix chi ndikibꞌen gobernar pa kiwiꞌ ri wineq chochꞌulew, kin ekajaw ri wineq ndikinaꞌ chare, y ri kꞌo uchuqꞌaꞌ pa kiqꞌaꞌ, kin xe ri ndikibꞌij rejeꞌ ndikajoꞌ chi ndibꞌan.

⁴³ Pero chiꞌikajal rix, ma tibꞌanatej keriꞌ, porque ri ndirajoꞌ ndikꞌojeꞌ ruqꞌij chiꞌikajal, ndikꞌatzin ndok isamajel.

⁴⁴ Y ri ndirajoꞌ ndikꞌojeꞌ más nim ruqꞌij chiꞌikajal, tok achel jun loqꞌon samajel kichin konojel.

⁴⁵ Porque riyin ri aj chikaj ri xinuꞌalex chiꞌikajal, ma chin ta nginilix xinuqaqa. Riyin xinuqaqa chin ngenwilij ri wineq, y niyaꞌ nukꞌaslen pa kikꞌexel ekꞌiy chin ngekolotej.

Ri Jesús ndukꞌachojrisaj jun soqꞌ rubꞌiniꞌan Bartimeo

⁴⁶ Ri Jesús y ri ru-discípulos xebꞌeqaqa pa tinamit Jericó. Y atoq kitzꞌamon bꞌey ngeꞌel e pa tinamit, ekꞌiy wineq eꞌoqayon kichin, y chuchiꞌ bꞌey tzꞌuyul jun achi soqꞌ rubꞌiniꞌan Bartimeo, ndukꞌutulaꞌ ru-limosna. Ri Bartimeo rukꞌajol jun achi rubꞌiniꞌan Timeo.

⁴⁷ Atoq xrakꞌaxaj chi ja ri Jesús aj Nazaret ri ndeqꞌax chiriꞌ, xsikꞌin chubꞌixik: ¡Jesús, rat ri riy-rumam kan ri rey David, tajoyowaj ok nuwech!

⁴⁸ Y ekꞌiy wineq ndikichꞌolilaꞌ chin tichꞌojochiꞌ qa, pero rijaꞌ más ndisikꞌin chubꞌixik: ¡Rat ri riy-rumam kan ri rey David, tajoyowaj ok nuwech!

⁴⁹ Ja atoq riꞌ ri Jesús xpeꞌeꞌ qa y xubꞌij: Tiwoyoj pe, xchajeꞌ. Xbꞌekoyoj kꞌa pe ri soqꞌ y kereꞌ xkibꞌij chare: Ma taxibꞌij awiꞌ, kayakatej, porque ngaroyoj ri Ajaw.

⁵⁰ Kin xe xrakꞌaxaj keriꞌ ri soqꞌ, xuroqij kan ri kꞌul ruqꞌuꞌun y rikꞌin jun tzokꞌ, xyakatej pe y xbꞌa apu apeꞌ kꞌo ri Jesús.

⁵¹ Y ri Jesús kereꞌ xubꞌij chare: ¿Achike ndawojoꞌ nibꞌen awoma? Ri soqꞌ xubꞌij: Tijonel, riyin niwojoꞌ ngitzuꞌun chik jumbꞌey.

⁵² Ri Jesús xubꞌij chare: Katzolij. Rat roma akuqubꞌan akꞌuꞌx wikꞌin xakꞌachaj, xchajeꞌ. Y ja paqiꞌ xtzuꞌun chik jumbꞌey ri soqꞌ, y xroqaj ri Jesús.