San Juan 3 - Kaqchikel Santo Domingo (Xenacoj)

Ri Jesús y ri Nicodemo

¹ Kꞌo jun achi fariseo rubꞌiniꞌan Nicodemo, y ri achi riꞌ jun chikikajal ri achiꞌaꞌ israelitas kꞌo uchuqꞌaꞌ pa kiqꞌaꞌ.

² Pa jun tokoqꞌaꞌ, xbꞌeqaqa apeꞌ kꞌo ri Jesús y xubꞌij chare: Tijonel, qetaman chi rat jun tijonel taqon pe roma ri Dios, porque ri retal ruchuqꞌaꞌ ri Dios ngaꞌabꞌanalaꞌ, nixta jun wineq nditiker ndubꞌen, si maneq ri Dios rikꞌin.

³ Y ri Jesús xubꞌij chare: Kin qetzij nibꞌij chawa, si jun wineq ma ndalex ta chik jumbꞌey, maneq cheꞌel ndok pa ru-reino ri Dios.

⁴ Ri Nicodemo xubꞌij chare ri Jesús: ¿Achike modo xtalex chik jumbꞌey jun wineq riꞌj chik? ¿Nditiker kami ri ruteꞌ ndiralaj chik jumbꞌey?

⁵ Ri Jesús xubꞌij: Kin qetzij nibꞌij chawa, si jun wineq ma ndalex ta rikꞌin yaꞌ y rikꞌin ri alaxik nduyaꞌ ri Espíritu Santo, ri wineq riꞌ maneq cheꞌel ndok pa ru-reino ri Dios.

⁶ Ri ngeꞌalex chikiqꞌaꞌ ri kite-kitataꞌ, xaxe ri aj rochꞌulew kꞌaslen kikꞌuan, pero ri kikꞌuan ri alaxik ri nduyaꞌ ri Espíritu Santo, kin ja ri kꞌakꞌakꞌ kꞌaslen pataneq rikꞌin ri Espíritu Santo kikꞌuan.

⁷ Ma tisach akꞌuꞌx rikꞌin ri xinbꞌij chawa, chi ndikꞌatzin ngatalex chik jumbꞌey.

⁸ Ri kaqiqꞌ ndiwujuj xa apejeꞌ na, y maske ndawakꞌaxaj chi ndiwujuj, ma awetaman ta apeꞌ pataneq y apeꞌ ndibꞌa wi. Keriꞌ ndibꞌanatej kikꞌin ri wineq ri kikꞌuan ri kꞌakꞌakꞌ alaxik. Ma qꞌalej ta achike modo ndisamej ri Espíritu Santo pa kánima chin ndujel kikꞌaslen.

⁹ Ja atoq riꞌ ri Nicodemo xubꞌij chare ri Jesús: ¿Achike modo ndibꞌanatej ri alaxik ri ndabꞌij?

¹⁰ Ri Jesús xubꞌij chare: Rat, rat jun nimalej kitijonel ri israelitas, y ¿ma awetaman ta rubꞌeyal re nibꞌij chawa?

¹¹ Kin qetzij nibꞌij chawa, chi ja ri qetaman y ri qatzꞌeton ri ndiqatzijoj, pero rix ma ndiwojoꞌ ta nditaqij ri ndiqabꞌij chiwa.

¹² Riyin ja ri achike ngebꞌanatej chochꞌulew ri nutzijon pe chiwa y ma nginitaqij ta. ¿Achike modo xkinitaqij si nitzijoj ta chiwa ri ngebꞌanatej chikaj?

¹³ Ma jun wineq chochꞌulew ri bꞌaneq ta e chikaj apeꞌ kꞌo ri Dios, chin ta ndurubꞌij achike rubꞌeyal nojel chiriꞌ, xa kin xe ri jun qajneq pe, y riꞌ ja riyin ri aj chikaj ri xinuꞌalex chiꞌikajal.

¹⁴ Y achel xubꞌen ri Moisés pa chaqiꞌj y tzꞌiran ulew, xujotobꞌaꞌ chikaj ri rachibꞌel jun kumetz chutzaꞌ jun cheꞌ, keriꞌ chuqaꞌ ndikꞌatzin chi riyin ri aj chikaj ri xinuꞌalex chiꞌikajal ngijotobꞌex chikaj.

¹⁵ Chin keriꞌ, xa achike na ri nditaqin wichin, ndiril ri kꞌaslen ma ndikꞌis ta, xchajeꞌ ri Jesús.

Ri Dios ndirajoꞌ chi konojel wineq ngekolotej

¹⁶ Porque ri Dios santienta xerajoꞌ ri wineq, y romariꞌ xuteq pe ri junayon Rukꞌajol chochꞌulew, chin keriꞌ xa achike na wineq ri xtitaqin chi ja rijaꞌ ri rukolonel, ma ndibꞌa ta chupan ri kamik, xa kin ndiril ri kꞌaslen ma ndikꞌis ta.

¹⁷ Ri Dios ma chin ta nduruyaꞌ castigo pa kiwiꞌ ri wineq xuteq pe ri Rukꞌajol chochꞌulew, xa kin xuteq pe chin ngekolotej ri wineq roma ri Rukꞌajol.

¹⁸ Ri castigo ri nduyaꞌ ri Dios ma ndiqaqa ta pa ruwiꞌ jun wineq ri xtutaqij chi ja ri Rukꞌajol ri Dios ri rukolonel, pero ri ma xtutaqij ta, kin kꞌo chik ri castigo pa ruwiꞌ, porque ma rutaqin ta chi rukolonel ri junayon Rukꞌajol ri Dios.

¹⁹ Ri achike roma ri Dios nduyaꞌ castigo pa kiwiꞌ ri wineq, jareꞌ: Ri Jun ri ndiyikꞌan kikꞌaslen ri wineq xuqaqa chochꞌulew, pero ri wineq más xkajoꞌ xekꞌojeꞌ pa qꞌequꞌ, porque xa kin itzel wi ri ngetajin rikꞌin.

²⁰ Porque konojel ri ngekibꞌanalaꞌ itzel teq achike, ma ndikajoꞌ ta ndiyikꞌex kikꞌaslen y ma ngejel ta apu rikꞌin ri Jun ri ndiyikꞌan kikꞌaslen, chin ma tiqꞌalajin pe ri itzel teq achike ngekibꞌanalaꞌ.

²¹ Pero ri wineq ri ja ri qetzij ndubꞌen pa rukꞌaslen, ndijel apu rikꞌin ri Jun ri ndiyikꞌan rukꞌaslen, chin keriꞌ nditzꞌetetej chi ri ngerubꞌanalaꞌ, ja ri Dios ukꞌuayon richin chin ndubꞌen.

Ri Juan ri Bautista kꞌo chꞌaqa chik jabꞌel teq tzij xubꞌij pa ruwiꞌ ri Jesús

²² Atoq xbꞌanatej yan nojel reꞌ, ri Jesús junan kikꞌin ri ru-discípulos xebꞌa pa rochꞌulew Judea, y chiriꞌ xuqꞌasaj jun tiempo kikꞌin, y ngerubꞌen bautizar ri wineq.

²³ Chupan ri tiempo riꞌ ri Juan ri Bautista ndubꞌen chuqaꞌ bautizar pa rochꞌulew Enón, chunaqaj ri jun lugar rubꞌiniꞌan Salim, porque chiriꞌ santienta yaꞌ kꞌo, y ri wineq ngebꞌeqaqa chiriꞌ y rijaꞌ ngerubꞌen e bautizar.

²⁴ Nojel riꞌ xbꞌanatej atoq kꞌajani tiyoꞌox pa cheꞌ ri Juan ri Bautista.

²⁵ Pero jujun ru-discípulos ri Juan ri Bautista xkichuquchaꞌ kiꞌ chi tzij rikꞌin jun israelita pa ruwiꞌ ri achike chi chꞌajchꞌojrisanik ri más utz.

²⁶ Rejeꞌ xebꞌa apeꞌ kꞌo ri Juan ri Bautista y xkibꞌij chare: Tijonel, ri jun achi ri xchꞌaꞌa awikꞌin ri jukꞌan chik apu ruchiꞌ ri raqen yaꞌ Jordán, ri achoq pa ruwiꞌ rat kin utz xachꞌaꞌa wi, wokami ndubꞌen bautizar y konojel ri wineq ngebꞌa apu apeꞌ kꞌo rijaꞌ.

²⁷ Ri Juan xubꞌij chake ri ru-discípulos: Ma jun achike nditiker ndubꞌen jun wineq, si ma ja ta ri Dios ndiyoꞌon qꞌij chare chi ndubꞌen.

²⁸ Y rix iwakꞌaxan ri xinbꞌij chi ma ja ta riyin ri Jun ri taqon pe roma ri Dios chukolik ri rutinamit, xa yin taqon pe nabꞌey chin nuyaꞌ utzulej rutzijol rijaꞌ.

²⁹ Pa jun kꞌulubꞌik ri kꞌajol ndikꞌuleꞌ jariꞌ ri ndok rachijil ri xten, y ri kꞌajol peyon chin ndikꞌojeꞌ pa ruwiꞌ ri nimaqꞌij chin ri kꞌulubꞌik, santienta ndikikot atoq ndirakꞌaxaj chi ri aj kꞌulubꞌel ngetzeyaj chikiwech. Keriꞌ kꞌa chuqaꞌ riyin santienta ngikikot roma niwakꞌaxaj chi wokami santienta wineq ngebꞌa apu apeꞌ kꞌo ri Jun taqon pe roma ri Dios chukolik ri rutinamit.

³⁰ Porque ndikꞌatzin chi rijaꞌ ndinimer ruqꞌij, jakꞌa riyin ndikꞌatzin ndichꞌutiner nuqꞌij.

Ri Jun ri qajneq pe chikaj

³¹ Ri Jun ri qajneq pe chikaj más nimalej ruqꞌij ke chikiwech konojel wineq, y aj chikaj nojibꞌel ndurutzijoj chiqakajal. Jakꞌa ri rusamajel ri kꞌo chochꞌulew, kin aj rochꞌulew wi, y xaxe ok ri achike kꞌutun chuwech ndutzijoj. Ri Jun ri qajneq pe chikaj más nimalej ruqꞌij ke chikiwech konojel.

³² Ri Jun ri qajneq pe chikaj, ja ri rakꞌaxan y rutzꞌeton pe chikaj ri nduyaꞌ rutzijol, pero ri wineq ma ndikitaqij ta ri ndubꞌij.

³³ Jakꞌa atoq jun wineq ndutaqij ri nojibꞌel ndutzijoj ri Jun ri qajneq pe chikaj, rikꞌin riꞌ ndiqꞌalajin chi ri Dios jumul ndubꞌij ri qetzij.

³⁴ Porque ri Jun ri taqon pe roma ri Dios, ja ri tzij rakꞌaxan pe rikꞌin ri Dios ndutzijoj, porque ri Dios nduyaꞌ ri Espíritu Santo y ma ndukꞌekꞌej ta nduyaꞌ.

³⁵ Ri Tataꞌaj Dios santienta ndirajoꞌ ri Rukꞌajol, y nojel rujachon pa ruqꞌaꞌ.

³⁶ Ri nditaqin chi ja ri Rukꞌajol ri Dios ri Kolonel, kꞌo ri kꞌaslen ma ndikꞌis ta rikꞌin. Pero jun ri ma ndunimaj ta ri ndubꞌij ri Rukꞌajol ri Dios, ma ndikꞌojeꞌ ta ri kꞌaslen ma ndikꞌis ta rikꞌin, xa kꞌa keriꞌ kꞌo chuxeꞌ ri nimalej royowal ri Dios.