San Juan 16 - Kaqchikel Santo Domingo (Xenacoj)

¹ Nojel reꞌ xinbꞌij chiwa chin man ta ndiwil jun roma nginiyaꞌ kan.

² Rix kin xkixoqotex pe pa teq sinagogas, y nduqaqa ri qꞌij atoq xa achike na jun ri xkixkamisan, pa rutzij rijaꞌ rusamaj ri Dios ndajin rikꞌin.

³ Y keriꞌ ngekibꞌen ri wineq chiwa porque ma xketamaj ta runoꞌoj ri Nataꞌ y nixta nunoꞌoj riyin.

⁴ Nojel reꞌ nibꞌij chiwa, chin keriꞌ atoq xtuqaqa ri qꞌij, rix ndikꞌuxlaꞌaj chi riyin xinbꞌij yan chiwa. Y pa nabꞌey ma xinbꞌij yan ta nojel reꞌ chiwa, porque kꞌa yinkꞌo iwikꞌin.

Ri samaj ndubꞌen ri Espíritu Santo

⁵ Pero wokami ri ngitzolij e rikꞌin ri taqayon pe wichin, nixta jun chiwech rix ndikꞌutun pe razón chuwa: ¿Apeꞌ ngabꞌa?

⁶ Pa rukꞌexel riꞌ, xa xnoj iwánima rikꞌin bꞌis, roma xinbꞌij nojel reꞌ chiwa.

⁷ Pero riyin ja ri qetzij nibꞌij: Chiwa rix más kꞌo utz ndukꞌen pe ri ngibꞌa riyin, porque si ma xkibꞌa ta, ma nduqaqa ta ri Bꞌochinel. Pero si ngibꞌa, niteq pe iwikꞌin.

⁸ Y atoq nduqaqa ri Bꞌochinel, nduruqꞌalajrisaj chikiwech ri wineq chi eꞌaj mak, chi riyin nibꞌen nojel pa ruchojmil chuwech ri Tataꞌaj Dios, y chi nderilaꞌ qꞌij atoq ndiqꞌat tzij pa kiwiꞌ ri wineq.

⁹ Rijaꞌ nduruqꞌalajrisaj chikiwech ri wineq chi kin eꞌaj mak, porque ma nginikitaqij ta.

¹⁰ Nduruqꞌalajrisaj chuqaꞌ chikiwech chi riyin nubꞌanun nojel pa ruchojmil chuwech ri Tataꞌaj Dios, y romariꞌ ngibꞌa apeꞌ kꞌo rijaꞌ y rix ma nginitzꞌet chi ta.

¹¹ Y nduruqꞌalajrisaj chikiwech ri wineq chi nderilaꞌ qꞌij atoq ndiqꞌat tzij pa kiwiꞌ, porque wokami qꞌaton chik tzij pa ruwiꞌ ri itzel ri rajawal ri rochꞌulew.

¹² Riyin kꞌa kꞌiy achike ri ma nibꞌij chi ta kan chiwa, porque rix ma ndikꞌoxomaj yan ta y ma ndikachꞌ yan ta ndikꞌuaj.

¹³ Pero atoq nduqaqa ri Espíritu Santo ri ndiqꞌalajrisan chuqaꞌ ri qetzij, kin ja rijaꞌ ri ndukꞌuan iwichin chin ndikꞌoxomaj ri qetzij. Porque rijaꞌ ma ruyon ta chuwech ndurubꞌij ri ndirajoꞌ, xa kin ja ri ndirakꞌaxaj pe ri ndurubꞌij chiwa, y nduruqꞌalajrisaj ri ngebꞌanatej más chiwech apu.

¹⁴ Rijaꞌ kin ndirakꞌaxaj ri nibꞌij riyin, y nduqꞌalajrisaj chiwech y keriꞌ nduyaꞌ nuqꞌij.

¹⁵ Nojel ri kꞌo rikꞌin ri Tataꞌaj Dios, wichin chuqaꞌ riyin, y romariꞌ xinbꞌij chiwa chi ri Espíritu Santo, ja ri ndirakꞌaxaj wikꞌin ri nduqꞌalajrisaj chiwech.

¹⁶ Xa jubꞌaꞌ chik tiempo nginitzꞌet, y kꞌateriꞌ ma nginitzꞌet ta jubꞌaꞌ. Pero kꞌateriꞌ nginitzꞌet chik jumbꞌey.

Ri discípulos kin xtikiqꞌasaj bꞌis pero xa kin xkekikot yan chik

¹⁷ Y ja atoq riꞌ jujun ru-discípulos ndikibꞌilaꞌ chikiwech: ¿Achike xrajoꞌ xubꞌij atoq xubꞌij: Xa jubꞌaꞌ chik tiempo nginitzꞌet, y kꞌateriꞌ ma nginitzꞌet ta jubꞌaꞌ, pero kꞌateriꞌ nginitzꞌet chik jumbꞌey? y, ¿achike xrajoꞌ xubꞌij chuqaꞌ atoq xubꞌij chi ndibꞌa rikꞌin ri Tataꞌaj Dios?

¹⁸ Y xkibꞌij chik jumbꞌey chikiwech: ¿Achike ndubꞌij tzij xa jubꞌaꞌ chik? Roj ma ndiqakꞌoxomaj ta.

¹⁹ Ri Jesús xuyaꞌ cuenta chare chi ri ru-discípulos ndikajoꞌ ndikikꞌutuj razón chare pa ruwiꞌ ri xubꞌij, romariꞌ xubꞌij chake: ¿Rix ndikꞌutulaꞌ razón chiwech ri achike ndubꞌij tzij ri xinbꞌij, chi xa jubꞌaꞌ chik tiempo ri nginitzꞌet, y kꞌateriꞌ ma nginitzꞌet ta jubꞌaꞌ. Pero kꞌateriꞌ nginitzꞌet chik jumbꞌey?

²⁰ Kin qetzij nibꞌij chiwa, chi rix kin xkixoqꞌ y xkixbꞌison, jakꞌa ri wineq ri ma kitaqin ta ri Dios santienta xkekikot roma ri nikꞌulwachij. Rix kin xkixbꞌison, pero ri bꞌis riꞌ xa xtikꞌis y kin xkixkikot yan chik.

²¹ Ri bꞌis riꞌ ndikꞌis achel ndikꞌis ri qꞌaxomal ndunaꞌ jun ixaq atoq ndiralaj ral, pero atoq xalex yan ri ral, ndumestaj ri qꞌaxomal xuqꞌasaj, porque ndikikot chi xuyaꞌ jun chꞌuti akꞌual chochꞌulew.

²² Keriꞌ chuqaꞌ rix ngixbꞌison wokami, pero riyin ngixuntzꞌetaꞌ chik jumbꞌey, y ja atoq riꞌ ri iwánima kin xtikikot chik jumbꞌey, y nixta jun xtitiker xtubꞌen chiwa chi man ta ngixkikot.

²³ Chupan ri qꞌij riꞌ, ma chuwa chi ta riyin ndikꞌutuj ri ndiwojoꞌ. Pero kin qetzij nibꞌij chiwa chi nojel ri achike ndikꞌutuj pa nubꞌiꞌ chare ri Tataꞌaj Dios, rijaꞌ nduyaꞌ pe chiwa.

²⁴ Rix ma jumbꞌey ikꞌutun jun achike pa nubꞌiꞌ chare ri Tataꞌaj Dios; wokami tikꞌutuj y kin xtiyoꞌox pe chiwa, chin keriꞌ tzꞌaqet ndikikot ri iwánima.

Ri Jesús xtiker yan pa ruqꞌaꞌ nojel ruwech kꞌayew chochꞌulew

²⁵ Ri tzij nubꞌiꞌin pe chiwa, rewan jubꞌaꞌ riꞌ ri ndirajoꞌ ndubꞌij. Pero nduqaqa jun qꞌij atoq riyin ma niwewaj chi ta rubꞌeyal ri niwojoꞌ nibꞌij chiwa, xa kin qꞌalej yan chik ri nibꞌij chin niqꞌalajrisaj runoꞌoj ri Tataꞌaj Dios chiwech.

²⁶ Chupan ri qꞌij riꞌ, ma kꞌaja ta na riyin ri ndikꞌatzin nikꞌutuj iwoma, xa kin ja rix mismo ndikꞌutuj chare ri Tataꞌaj Dios pa nubꞌiꞌ.

²⁷ Porque ri Tataꞌaj Dios santienta ngixrajoꞌ, roma yin iwojowan pe, y itaqin pe chuqaꞌ chi ja ri apeꞌ kꞌo rijaꞌ yin eleneq wi pe.

²⁸ Apeꞌ kꞌo ri Tataꞌaj Dios yin eleneq wi pe, y xinuqaqa chochꞌulew. Y wokami, niyaꞌ kan ri rochꞌulew chin ngitzolij e apeꞌ kꞌo rijaꞌ.

²⁹ Ri ru-discípulos xkibꞌij chare: Wokami qꞌalej ri ndabꞌij y ma ndakusaj chi ta tzij ri xa rewan riꞌ ri ndirajoꞌ ndubꞌij.

³⁰ Wokami qetaman chi nojel awetaman, y ma kꞌaja ta na roma xtikꞌutux razón chawa, kꞌaja ta riꞌ xtawetamaj ri kꞌo pa ránima ri jun ndikꞌutun razón chawa, romariꞌ qetaman chi ja ri apeꞌ kꞌo ri Dios rat eleneq wi pe.

³¹ Y ri Jesús xubꞌij: ¿La ngixtaqin wokami?

³² Yin nibꞌij chiwa chi ja nduqaqa ri hora, y yaméra nduqaqa, atoq nditalux e iwech, ngixtzolij pa teq ibꞌey y nginiyaꞌ kan nuyon. Pero riyin ma nuyon ta yinkꞌo, porque ri Tataꞌaj Dios kꞌo wikꞌin.

³³ Y nojel reꞌ nibꞌij kan chiwa, chin keriꞌ rix, roma xe jun ibꞌanun wikꞌin, ndiwil uxlanen chin ri iwánima. Chochꞌulew ndiqꞌasaj kꞌayew, pero ma tixibꞌij iwiꞌ, porque riyin xitiker yan pa ruqꞌaꞌ nojel reꞌ.