San Juan 15 - Kaqchikel Santo Domingo (Xenacoj)

Ja ri Jesús ri qetzij raqen uva

¹ Y ri Jesús xubꞌij: Ja riyin ri qetzij raqen uva, y ja ri Nataꞌ Dios ri samajiy richin.

² Nojel teq ruqꞌaꞌ re raqen uva reꞌ ri ma ngewachin ta, rijaꞌ ngerelesaj e. Y nojel ruqꞌaꞌ ri ndiwachin, nduqꞌet rutzaꞌ chin ndujosqꞌij, chin keriꞌ más jabꞌel ndiwachin.

³ Y rix xjosqꞌitej yan ri ikꞌaslen roma ri tzij nutzijon chiwa.

⁴ Rix jumul xe jun tibꞌanaꞌ wikꞌin, y riyin jumul ngikꞌojeꞌ pa iwánima. Porque kin achel ruqꞌaꞌ jun raqen uva maneq cheꞌel ruyon ta chuwech ndiwachin si ma jun ta rubꞌanun rikꞌin ri raqen uva, keriꞌ chuqaꞌ rix, maneq cheꞌel xtiwachin ri ikꞌaslen si ma jumul ta xe jun ibꞌanun wikꞌin.

⁵ Ja riyin ri raqen ri uva, y rix ri ruqꞌaꞌ. Ri jumul xe jun rubꞌanun wikꞌin y riyin rikꞌin rijaꞌ, santienta ndiwachin ri rukꞌaslen. Porque si rix ma jumul ta xe jun ibꞌanun wikꞌin, nixta jun achike ngixtiker ndibꞌen.

⁶ Ri ma jumul ta xe jun rubꞌanun wikꞌin ndelesex e saqil, ndibꞌan chare achel ri ruqꞌaꞌ teq uva ri ma ngewachin ta, ngechoy, ngechaqiꞌj qa, y ngemol chin ngetorix pa qꞌaqꞌ y ngekꞌat.

⁷ Si rix jumul xe jun ibꞌanun wikꞌin, y ri nutzij ndikꞌojeꞌ pa iwánima, tikꞌutuj ri ndiwojoꞌ, y kin ndibꞌanatej wi.

⁸ Rikꞌin ri santienta ndiwachin ikꞌaslen, ri Nataꞌ ndiyoꞌox nimalej ruqꞌij, y keriꞌ nditzꞌetetej chi rix nu-discípulos.

⁹ Achel ngirajoꞌ ri Nataꞌ, keriꞌ chuqaꞌ ngixinwojoꞌ riyin. Jumul kꞌa kixkꞌojeꞌ chupan ri ajowabꞌel riꞌ.

¹⁰ Si rix ndibꞌen ri ndikibꞌij ri nu-mandamientos, kin jumul ngixkꞌojeꞌ chupan ri wajowabꞌel. Achel riyin nibꞌen ri ndikibꞌij ri ru-mandamientos ri Nataꞌ, y romariꞌ kin jumul yinkꞌo chupan ri rajowabꞌel rijaꞌ.

¹¹ Nojel re nubꞌiꞌin chiwa, chin ngixkikot achel ngikikot riyin, y keriꞌ tzꞌaqet ngixkikot.

¹² Jareꞌ ri nu-mandamiento: Tiwojoꞌ iwiꞌ chiwech, achel ngixinwojoꞌ riyin.

¹³ Maneq ajowabꞌel más nim ke chuwech ri ajowabꞌel kꞌo pa ránima jun ri nduyaꞌ rukꞌaslen pa kikꞌexel ri erachibꞌil.

¹⁴ Y rix, rix wachibꞌil si ndibꞌen ri nibꞌij chiwa.

¹⁵ Y ma nibꞌij ta chik nusamajelaꞌ chiwa, porque ri samajelaꞌ ma ketaman ta ri achike ndunojij ndubꞌen ri kajaw. Riyin nibꞌij wachibꞌil chiwa, porque nojel ri rubꞌiꞌin pe ri Nataꞌ chuwa, nuqꞌalajrisan chiwech.

¹⁶ Ma rix ta ri xixchaꞌon wichin, ja riyin ri xichaꞌon iwichin, y xixinchaꞌ chin ngixinteq chubꞌanik ri nusamaj chin más ngekꞌiyer ri ngetaqin wichin, y chin jumul ndikiyaꞌ kánima wikꞌin. Xixinchaꞌ chuqaꞌ, chin keriꞌ ri ndikꞌutuj chare ri Nataꞌ pa nubꞌiꞌ, rijaꞌ nduyaꞌ pe chiwa.

¹⁷ Y jareꞌ ri mandamiento ri niyaꞌ chiwa, chi tiwojoꞌ iwiꞌ chiwech.

Ri Jesús y ri ru-discípulos itzel nditzꞌat kiwech chochꞌulew

¹⁸ Si ri wineq ri ma kitaqin ta ri Dios itzel xkixkitzꞌet, tikꞌuxlaꞌaj chi ja riyin ri nabꞌey keriꞌ xkibꞌen chuwa.

¹⁹ Xa ta rix junan kikꞌin ri wineq ri ma kitaqin ta ri Dios, kin ngixojowex ta koma rejeꞌ. Pero rix ma rix achel ta ri wineq riꞌ, porque rix nuchaꞌon chikikajal, y romariꞌ itzel ngixkitzꞌet.

²⁰ Tikꞌuxlaꞌaj ri tzij nubꞌiꞌin kan chiwa: Ma jun samajel más ta kꞌo ruqꞌij ke chuwech ri rajaw. Romariꞌ, si ri wineq yin kitzeqlebꞌen chin ndikibꞌen itzel chuwa, keriꞌ chuqaꞌ xtikibꞌen chiwa rix. Pero si xtikinimaj nutzij riyin, kin xtikinimaj chuqaꞌ itzij rix.

²¹ Nojel reꞌ kin xtikꞌulwachij rix pa kiqꞌaꞌ ri wineq woma riyin, porque ma ketaman ta runoꞌoj ri taqayon pe wichin.

²² Y si riyin man ta xinuqaqa chochꞌulew chin xintzijoj ri nutzij chake, kꞌo ta cheꞌel ndikibꞌij chi ma kiyoꞌon ta kan rokacheq chuwech ri Dios. Pero wokami nixta jun reqal ngetiker ndikiyaꞌ chin ta ndikibꞌij chi maneq kimak.

²³ Ri itzel nginikitzꞌet riyin, itzel chuqaꞌ ndikitzꞌet ri Nataꞌ.

²⁴ Si riyin man ta xinbꞌen nimalej teq achike chikikajal ri nixta jun chik bꞌanayon, man ta kꞌo kimak keqalen. Pero wokami xkitzꞌet yan ri nimalej teq achike enubꞌanun, y maske kitzꞌeton, xa itzel nginikitzꞌet, y itzel chuqaꞌ ndikitzꞌet ri Nataꞌ Dios.

²⁵ Pero rejeꞌ itzel nginikitzꞌet, chin ndibꞌanatej ri tzꞌibꞌan kan chupan ri ley yoꞌon kan chake, ri kereꞌ ndubꞌij: Ma jun roma itzel xinikitzꞌet. Keriꞌ ndubꞌij ri tzꞌibꞌan kan.

²⁶ Pero atoq nduqaqa ri Bꞌochinel ri niteq pe riyin pa rubꞌiꞌ ri Tataꞌaj Dios, nduruqꞌalajrisaj achike riyin. Y ri Bꞌochinel riꞌ, ja ri Espíritu Santo ri ndiqꞌalajrisan ri qetzij. Rijaꞌ rikꞌin ri Tataꞌaj Dios ndel wi pe.

²⁷ Rix chuqaꞌ ndiqꞌalajrisaj achike riyin, porque xe jampeꞌ xintzꞌuk pe re nusamaj chochꞌulew, rixkꞌo pe wikꞌin.