San Juan 13 - Kaqchikel Santo Domingo (Xenacoj)

Ri Jesús nduchꞌej kaqen ri ru-discípulos

^1-4 Atoq jubꞌaꞌ chik qꞌij ndirajoꞌ chin nduqaqa ri kinimaqꞌij ri israelitas rubꞌiniꞌan Pascua, ri itzel ruyoꞌon chik pa ránima ri Judas, rukꞌajol jun achi rubꞌiniꞌan Simón Iscariote, chi ndujech ri Jesús pa kiqꞌaꞌ ri wineq. Ri Jesús retaman chi ja nduqaqa ri qꞌij chin ndel e chochꞌulew y nditzolij e chikaj apeꞌ kꞌo ri Tataꞌaj Dios. Retaman chuqaꞌ chi nojel jachon pa ruqꞌaꞌ roma ri Tataꞌaj Dios, y chi eleneq pe apeꞌ kꞌo ri Dios y chiriꞌ chik nditzolij e. Ri Jesús kin jumul xerajoꞌ ri erichin ri ekꞌo chochꞌulew, y chi jun rukꞌaslen xerajoꞌ. Romariꞌ pa jun tokoqꞌaꞌ, atoq ndiwaꞌ kikꞌin ri ru-discípulos, xyakatej pe ri apeꞌ ndiwaꞌ, xuchꞌil kan ri kꞌul ruqꞌuꞌun chirij, xutzꞌen jun toalla y xuxim chirupan.

⁵ Y xuyaꞌ qa yaꞌ chupan jun bꞌambꞌel y xutzꞌen ruchꞌajik kaqen ri ru-discípulos, y xerusulaꞌ rikꞌin ri toalla ruximon chirupan.

⁶ Y atoq xbꞌeqaqa apeꞌ tzꞌuyul ri Simón Pedro chin nduchꞌej raqen, ri Pedro xubꞌij chare: Ajaw, ¿rat ndachꞌej waqen riyin?

⁷ Y ri Jesús xubꞌij chare: Re ngitajin rikꞌin, ma ndakꞌoxomaj ta wokami, pero ndeqaqa jun qꞌij atoq ndakꞌoxomaj.

⁸ Ri Pedro xubꞌij chare: Ma la chuwaꞌq ma la kabꞌij xtachꞌej waqen. Pero ri Jesús xubꞌij chare: Si ma nichꞌej ta awaqen, ma ngatok chi ta nu-discípulo.

⁹ Ri Simón Pedro xubꞌij: Ajaw, si keriꞌ, ma xe ta re waqen tachꞌajaꞌ, tachꞌajaꞌ chuqaꞌ ri nuqꞌaꞌ y ri nujolon.

¹⁰ Pero ri Jesús xubꞌij chare: Ri xatin yan, xaxe ri raqen ndikꞌatzin ngechꞌaj, y ma nojel ta ri ru-cuerpo porque chꞌajchꞌaj chik, y rix, rix chꞌajchꞌaj chik, pero ma rix iwonojel ta.

¹¹ Ri Jesús keriꞌ xubꞌij, roma retaman achike ndijacho e richin, romariꞌ xubꞌij chi ma echꞌajchꞌaj ta konojel.

¹² Y atoq ruchꞌajon chik kaqen ri ru-discípulos, xbꞌeruqꞌuꞌuj chi pe ri kꞌul ruchꞌilon kan chirij, y xbꞌetzꞌuyeꞌ chik apeꞌ ndiwaꞌ y xubꞌij: ¿Xikꞌoxomaj achike roma xinchꞌej ri iwaqen?

¹³ Rix ndibꞌij Tijonel y Ajaw chuwa, y kin utz ri ndibꞌij, porque kin ja wi keriꞌ.

¹⁴ Y si riyin ri Tijonel y ri Ajaw xinchꞌej ri iwaqen, keriꞌ chuqaꞌ rix ri iwachibꞌil iwiꞌ ndikꞌatzin ndichꞌej iwaqen chiwech.

¹⁵ Riyin jun ejemplo xinyaꞌ chiwech, chin keriꞌ achel xinbꞌen yin, keriꞌ chuqaꞌ tibꞌanaꞌ rix.

¹⁶ Kin qetzij nibꞌij chiwa chi ma jun samajel más ta kꞌo ruqꞌij ke chuwech ri rajaw, y ma jun ri nditaq ri más ta kꞌo ruqꞌij ke chuwech ri nditaqo e richin.

¹⁷ Si rix xikꞌoxomaj utz-utz nojel reꞌ, y si ngeꞌibꞌen, kin jabꞌel roꞌiqꞌij ndikꞌojeꞌ.

¹⁸ Ma chiwij ta rix iwonojel nibꞌij chi jabꞌel roꞌiqꞌij, porque riyin wetaman inoꞌoj iwonojel ri rix nuchaꞌon. Pero ndikꞌatzin chi ndibꞌanatej ri tzꞌibꞌan kan chupan ri rutzij ri Dios ri ndubꞌij: Ri ndiwaꞌ wikꞌin, xa xyakatej chuwij.

¹⁹ Xinnabꞌeyaj rubꞌixik reꞌ chiwa, chin keriꞌ atoq ndibꞌanatej, rix nditaqij chi ja yin ri yin taqon pe roma ri Dios chukolik ri rutinamit.

²⁰ Kin qetzij nibꞌij chiwa, ri xtikꞌamo apu ruwech jun ri niteq riyin, kin achel ja ta riyin ri ndukꞌen apu nuwech keriꞌ, y ri xtikꞌamo apu nuwech riyin, kin achel ja ta ri taqayon pe wichin ri ndukꞌen apu ruwech.

Ri Jesús ndubꞌij chi ja ri Judas ndijacho e richin

²¹ Atoq rubꞌiꞌin chik nojel reꞌ, ri Jesús axteq xunaꞌ chare roma ri bꞌis pa ránima y kereꞌ xubꞌij: Kin qetzij nibꞌij chiwa chi jun chiꞌikajal rix ngijacho e pa kiqꞌaꞌ ri itzel ngetzꞌeto wichin.

²² Ri discípulos ndikitzulaꞌ kiwech, porque ma ketaman ta achoq chirij xchꞌaꞌa ri Jesús.

²³ Y jun chikikajal ri discípulos, ri santienta ndojowex roma ri Jesús, raqꞌel apu chunaqaj ri Jesús.

²⁴ Chare ri discípulo riꞌ, ri Simón Pedro xubꞌen apu ruqꞌaꞌ chin tukꞌutuj apu razón chare ri Jesús achike ri ndijacho e richin.

²⁵ Y ri discípulo ri tzꞌan ndojowex xraqꞌeꞌ apu chorukꞌuꞌx ri Jesús, y xukꞌutuj apu razón chare: Ajaw, ¿achike ri ndijacho e awichin?

²⁶ Ri Jesús xubꞌij: Nimubꞌaꞌ jun peraj kaxlan wey, y ri achoq chare niyaꞌ, jariꞌ ri ngijacho e, xchajeꞌ. Ja atoq riꞌ xumubꞌaꞌ ri kaxlan wey y xuyaꞌ chare ri Judas rukꞌajol ri Simón Iscariote.

²⁷ Y atoq ri Judas Iscariote rukꞌuxun chi qa ri kaxlan wey xyoꞌox chare, xok ri itzel pa ránima. Romariꞌ ri Jesús xubꞌij chare: Ri ndawojoꞌ ndabꞌen, tabꞌanaꞌ paqiꞌ.

²⁸ Nixta jun chikiwech ri etzꞌuyul apu rikꞌin ri Jesús chuchiꞌ ri mesa xukꞌoxomaj achike roma keriꞌ xubꞌij ri Jesús chare ri Judas.

²⁹ Porque ekꞌo xkinojij chi ri Judas xtaq chin nderuloqꞌoꞌ ri ndikꞌatzin chake chupan ri nimaqꞌij, o chin nduyaꞌ jubꞌaꞌ méra chake ri maneq ok kichajin. Keriꞌ xkinojij, porque ja ri Judas ukꞌuayon ri méra ri ndikikusaj.

³⁰ Y keriꞌ kꞌa, atoq ri Judas xukꞌux yan ri kaxlan wey, xel e chiriꞌ, y atoq xel e, xa chaqꞌaꞌ chik.

Ri kꞌakꞌakꞌ mandamiento

³¹ Y atoq ri Judas eleneq chi e, ri Jesús xubꞌij: Wokami ja xuqaqa ri qꞌij chin ndiqꞌalajin chi kin kꞌo nuqꞌij riyin ri aj chikaj ri xinuꞌalex chiꞌikajal, y keriꞌ chuqaꞌ ri Dios ndiqꞌalajin chi kin kꞌo ruqꞌij woma riyin.

³² Y roma kin ndiqꞌalajin ruqꞌij ri Dios woma riyin, rijaꞌ chuqaꞌ kin nduqꞌalajrisaj nuqꞌij riyin. Y riꞌ ma kꞌa jampeꞌ ta na, xa kin ja yan paqiꞌ.

³³ Rix ri kin achel rix walkꞌuaꞌl keriꞌ, nibꞌij chiwa chi xa jubꞌaꞌ chik qꞌij yinkꞌo chiꞌikajal. Atoq ngibꞌa, rix nginikanolaꞌ, pero achel nubꞌiꞌin chik chake ri israelitas, keriꞌ chuqaꞌ nibꞌij chiwa rix, chi apeꞌ ngibꞌa, rix ma ngixtiker ta ngixbꞌeqaqa.

³⁴ Jun kꞌakꞌakꞌ mandamiento niyaꞌ kan chiwa: Tiwojoꞌ iwiꞌ chiwech achel ngixinwojoꞌ riyin, keriꞌ chuqaꞌ tiwojoꞌ iwiꞌ chiwech.

³⁵ Y si rix ndiwojoꞌ iwiꞌ chiwech, kin ndiqꞌalajin chikiwech ri wineq chi rix nu-discípulos, xchajeꞌ ri Jesús.

Ri Jesús nduqꞌalajrisaj chi ri Pedro xtubꞌij chi ma retaman ta ruwech

³⁶ Ri Simón Pedro xubꞌij chare ri Jesús: Ajaw, ¿apeꞌ kꞌa ri ngabꞌa? Ri Jesús xubꞌij chare: Ri apeꞌ ngibꞌa riyin, rat ma ngatiker ta nganawoqaj wokami, pero más apu chiqawech ngabꞌeqaqa chiriꞌ.

³⁷ Y ri Pedro xubꞌij chare: Ajaw, ¿achike roma ma ngitiker ta ngatinwoqaj wokami? ¡Riyin nuyoꞌon pa wánima chi niyaꞌ ri nukꞌaslen pa kamik awoma!

³⁸ Ri Jesús xubꞌij chare: ¿Ndayaꞌ ri akꞌaslen woma yin? Kin qetzij nibꞌij chawa, chi atoq kꞌajani titziritzin pe jun ekꞌ mamaꞌ, rat oxmul yan tabꞌij chi ma awetaman ta nuwech.