San Juan 12 - Kaqchikel Santo Domingo (Xenacoj)

Jun ixaq nduqꞌij jubꞌulej aqꞌon chirij raqen ri Jesús

¹ Waqiꞌ chik qꞌij ndirajoꞌ chin nditiker ri kinimaqꞌij ri israelitas rubꞌiniꞌan Pascua, atoq ri Jesús xbꞌeqaqa pa aldea Betania, rutinamit ri Lázaro ri achi xken y xkꞌastajbꞌex pe chikikajal ri animaꞌiꞌ roma ri Jesús.

² Y chiriꞌ xbꞌan jun waꞌin roma xbꞌeqaqa ri Jesús, y ja ri Marta ndijachon ri rikil y ri Lázaro jun chikikajal ri ekꞌo apu rikꞌin ri Jesús chuchiꞌ ri mesa.

³ Ja atoq riꞌ ri María xutzꞌen jun laꞌeq nikꞌaj litro jubꞌulej aqꞌon santienta rajel rubꞌiniꞌan nardo ri nixta jun achike xolon rikꞌin, y xuqꞌij chikij raqen ri Jesús y xerusuꞌ rikꞌin rusmal ruwiꞌ. Y ri achoch apeꞌ ekꞌo xnoj rikꞌin ruxlaꞌ ri aqꞌon riꞌ.

⁴ Pero jun chikikajal ri discípulos ri rubꞌiniꞌan Judas Iscariote, ri ndijacho e richin ri Jesús pa kiqꞌaꞌ ri wineq, xubꞌij:

⁵ ¿Achike roma ma xkꞌayix ta re jubꞌulej aqꞌon reꞌ? Porque xa ta xkꞌayix, xyoꞌox ta rajel 300 qꞌij rusamaj jun achi chuwech, y ri méra riꞌ, xjach ta chake ri wineq maneq ok kichajin.

⁶ Ri Judas xubꞌij keriꞌ, ma roma ta qetzij ndupoqonaj kiwech ri wineq ri maneq ok kichajin. Rijaꞌ keriꞌ xubꞌij xa roma kin eleqꞌon wi y pa ruqꞌaꞌ rijaꞌ jachon ri méra ndikikusaj ri Jesús y ri discípulos y xa kin kꞌo ndireleqꞌaj e rikꞌin ri méra riꞌ.

⁷ Ri Jesús xubꞌij chare ri Judas: Ma achike tabꞌij chare. Rijaꞌ ruyakon pe re jubꞌulej aqꞌon, chin xirunabꞌaꞌ yan apu chin ri qꞌij atoq ngimuq,

⁸ porque ri wineq maneq ok kichajin kin jumul ekꞌo chiꞌikajal, pero riyin ma jumul ta ngikꞌojeꞌ chiꞌikajal.

Ri sacerdotes israelitas ri más kꞌo ruchuqꞌaꞌ kitzij ndikibꞌen ruwech chi ndikikamisaj ri Lázaro

⁹ Santienta israelitas xkiyaꞌ cuenta chare chi ri Jesús kꞌo pa Betania, y ri wineq riꞌ xebꞌa chutzꞌetik, pero ma xe ta roma ri Jesús, xa roma chuqaꞌ ndikajoꞌ ndikitzꞌet ri Lázaro ri xkꞌastajbꞌex pe roma ri Jesús chikikajal ri animaꞌiꞌ.

¹⁰ Romariꞌ ri sacerdotes israelitas ri más kꞌo ruchuqꞌaꞌ kitzij, jun ruwech kitzij xkibꞌen chin ndikikamisaj chuqaꞌ ri Lázaro.

¹¹ Porque ndikibꞌij chi romak ri Lázaro, santienta israelitas ma ndikinimaj ta chik ri ndikibꞌij rejeꞌ, xa ja yan chik ri Jesús ndikitaqij.

Ri Jesús ndok apu pa tinamit Jerusalén

¹² Chukan qꞌij pa tinamit Jerusalén, santienta wineq kimolon kiꞌ roma ri nimaqꞌij. Y atoq xkakꞌaxaj chi ri Jesús bꞌaneq apu chiriꞌ,

¹³ xekitzꞌamalaꞌ ruqꞌaꞌ teq palma, y xeꞌel pe chukꞌulik ri Jesús, y ngesikꞌiyaj chubꞌixik: ¡Nim ruqꞌij re Kolonel reꞌ! ¡Kin nimalej favor kꞌo pa ruwiꞌ re pataneq pa rubꞌiꞌ ri Ajaw Dios, ja rijaꞌ ri ndok Rey pa qawiꞌ roj israelitas!

¹⁴ Y ri Jesús xril jun chꞌuti burro y xutzꞌuyubꞌej e, achel ndubꞌij rutzij ri Dios tzꞌibꞌan kan:

¹⁵ Ma tixibꞌij iwiꞌ rix israelitas ri rixkꞌo pa tinamit Sión; Titzꞌetaꞌ chi ri i-Rey ja pataneq, Tzꞌuyul pe chirij ral jun burra. Keriꞌ tzꞌibꞌan kan.

¹⁶ Nabꞌey, nojel reꞌ ma xkikꞌoxomaj ta ri discípulos, kꞌaja na atoq ri Jesús xbꞌa chikaj chin xkꞌojeꞌ chik nimalej ruqꞌij, xkikꞌuxlaꞌaj chi re xkibꞌen ri wineq chare ri Jesús, kin tzꞌibꞌan wi kan chupan ri rutzij ri Dios.

¹⁷ Y ri wineq ri xetzꞌeto richin ri Jesús atoq xusikꞌij apu rubꞌiꞌ ri Lázaro chin xukꞌastajbꞌaꞌ pe chikikajal ri animaꞌiꞌ, kiyoꞌon pe rutzijol pa tinamit chi keriꞌ xbꞌanatej.

¹⁸ Y romariꞌ, xebꞌeꞌel pe santienta wineq chukꞌulik ri Jesús, porque xkakꞌaxaj chi xubꞌen re jun retal ruchuqꞌaꞌ ri Dios reꞌ.

¹⁹ Romariꞌ, ri fariseos ndikibꞌilaꞌ chikiwech: Titzꞌetaꞌ kꞌa, ma jun chik achike ngojtiker ndiqabꞌen chin ndiqaqꞌet ri ndubꞌen re jun achi reꞌ, porque konojel wineq ebꞌaneq chirij.

Jujun wineq ma israelitas ta ndikikanoj ri Jesús

²⁰ Y chikikajal ri ebꞌaneq e pa tinamit Jerusalén chin ndikiyaꞌ ruqꞌij ri Dios pa nimaqꞌij, ekꞌo jujun wineq ma israelitas ta.

²¹ Ri wineq riꞌ xebꞌeqaqa apeꞌ kꞌo ri Felipe, y kereꞌ kamelal xkikꞌutuj apu chare: Ale, roj ndiqajoꞌ ndiqatzꞌet ri Jesús, ngechajeꞌ chare. Ri Felipe aj Betsaida, jun tinamit chin ri rochꞌulew Galilea.

²² Xbꞌa kꞌa ri Felipe y xbꞌerubꞌij chare ri Andrés ri ndikibꞌij ri ma israelitas ta, y chi ekaꞌiꞌ xbꞌekibꞌij chare ri Jesús.

²³ Pero ri Jesús xubꞌij chake: Ja xuqaqa ri tiempo chi riyin ri aj chikaj ri xinuꞌalex chiꞌikajal ngitzolij e chikaj y ndikꞌojeꞌ chik nimalej nuqꞌij.

²⁴ Kin qetzij nibꞌij chiwa: Rikꞌin ri nukꞌaslen ndibꞌanatej achel ndibꞌanatej rikꞌin jun chꞌuti ruwech trigo. Si ma xtimuq ta pa ulew, ma ndibꞌos ta, xa kin junajaꞌ ruwech ndikanej, pero si xtimuq, ndibꞌos pe y santienta ruwech nduyaꞌ.

²⁵ Keriꞌ chuqaꞌ, xa achike na jun chiwech rix, ri ja ri aj rochꞌulew rukꞌaslen ndupoqonaj, ma ndiril ta ri kꞌaslen ma ndikꞌis ta, pero xa achike na jun ri ma ndupoqonaj ta ri aj rochꞌulew rukꞌaslen chin nduqꞌasaj kꞌayew roma ngiroqaj, kin ndiril ri kꞌaslen ma ndikꞌis ta.

²⁶ Si kꞌo jun ndirajoꞌ ndubꞌen ri nusamaj, kiroqaj kꞌa, y apeꞌ yinkꞌo riyin, chiriꞌ chuqaꞌ ndikꞌojeꞌ ri nusamajel. Y ri ndibꞌanun ri nusamaj, ri Tataꞌaj Dios kin xtubꞌen chare chi ndikꞌojeꞌ ruqꞌij.

Ri Jesús ndubꞌij chi ndikamisex

²⁷ Wokami santienta kꞌayew ninaꞌ pa wánima. Pero, ¿la utz kami nibꞌij chare ri Nataꞌ: Kanakoloꞌ chuwech re kꞌayew reꞌ, xu chin niqꞌasaj re kꞌayew reꞌ yinkꞌo chireꞌ re hora reꞌ?

²⁸ Nataꞌ Dios, tabꞌanaꞌ chi ndiqꞌalajin ri nimalej aqꞌij, xchajeꞌ ri Jesús. Ja atoq riꞌ xakꞌaxex jun chꞌabꞌel chikaj ri ndubꞌij: Riyin nuqꞌalajrisan chik nuqꞌij, y niqꞌalajrisaj chik jumbꞌey.

²⁹ Y ri santienta wineq ekꞌo apu chiriꞌ ri xkakꞌaxaj ri chꞌabꞌel riꞌ, ndikibꞌilaꞌ: Riꞌ, xa jun rayo ri xqꞌajan, xechajeꞌ. Chꞌaqa chik ndikibꞌilaꞌ chi jun ángel ri xchꞌaꞌa pe chare.

³⁰ Y ri Jesús xubꞌij chake: Ri chꞌabꞌel ri xiwakꞌaxaj, ma woma ta riyin xchꞌaꞌa pe, xa iwoma rix chin kꞌo utz ndukꞌen pe chiwa.

³¹ Wokami ja xuqaqa ri qꞌij chin ndiqꞌat tzij pa kiwiꞌ konojel wineq, y ri itzel ri rajawal re rochꞌulew ndelesex e ri uchuqꞌaꞌ kꞌo pa ruqꞌaꞌ.

³² Y riyin rikꞌin ri ngijotobꞌex chikaj, nibꞌochiꞌij kánima konojel kiwech wineq chin ndikikuqubꞌaꞌ kikꞌuꞌx wikꞌin.

³³ Ri Jesús xubꞌij keriꞌ chin nduqꞌalajrisaj achike chi kamik nderuqꞌasaj.

³⁴ Y ri wineq xkibꞌij chare: Roj qetaman chi ri qa-ley ndubꞌij chi ri Jun ri nditaq pe roma ri Dios chukolik ri rutinamit kin jumul kꞌo rukꞌaslen. ¿Achike roma ndabꞌij chi ri Jun aj chikaj ri xtuꞌalex chiqakajal ndikꞌatzin ndijotobꞌex chikaj? ¿Achike kꞌa chi achi riꞌ? xechajeꞌ.

³⁵ Ri Jesús xubꞌij chake: Riyin ri ngiyikꞌan rubꞌey ri ikꞌaslen, kꞌa ngikꞌojeꞌ jubꞌaꞌ chiꞌikajal, romariꞌ, kixbꞌiyin chupan re yikꞌinik niyaꞌ riyin, utz kꞌa yinkꞌo chireꞌ, ma kꞌateꞌ tiqaqa qꞌequꞌ pa iwiꞌ. Porque ri ndibꞌiyin pa qꞌequꞌ, ndisach ri bꞌey chuwech.

³⁶ Pero utz kꞌa kꞌo re yikꞌinik reꞌ iwikꞌin, titaqij, chin keriꞌ ngixok wineq ri ngixyikꞌan pa ikꞌaslen achel riyin. Atoq rubꞌiꞌin chik keriꞌ ri Jesús, xeruyaꞌ kan ri wineq y xsacho riꞌ chikiwech.

Ri israelitas ma ndikitaqij ta ri Jesús

³⁷ Maske ri Jesús xubꞌen nimalej teq retal ruchuqꞌaꞌ ri Dios chikiwech ri wineq, ma xkitaqij ta achike rijaꞌ,

³⁸ chin keriꞌ xbꞌanatej ri rubꞌiꞌin kan ri profeta Isaías ojer, atoq xubꞌij: Ajaw, ¿kꞌo kami xetaqin ri qabꞌiꞌin pe pa abꞌiꞌ? ¿Kꞌo kami jun xarutaqij atoq xqꞌalajrisex ri nimalej awuchuqꞌaꞌ chuwech? Keriꞌ rubꞌiꞌin kan ri Isaías.

³⁹ Romariꞌ ri wineq riꞌ ma xetiker ta xkitaqij achike ri Jesús, y ma xe ta riꞌ rubꞌiꞌin kan ri Isaías xa kin ruqꞌalajrisan kan chuqaꞌ:

⁴⁰ Ri Ajaw kereꞌ rubꞌiꞌin: Yin nutzꞌapin kiwech re wineq reꞌ, Y nukowirisan ri kánima, Chin ma ndeqꞌax ta rubꞌeyal chikiwech ri ndikitzꞌet, Y ma ndikikꞌoxomaj ta ri ndikakꞌaxaj; Chin ma nditzolij ta pe kánima wikꞌin, Y riyin ma nichojmirisaj ta ri kikꞌaslen.

⁴¹ Keriꞌ rubꞌiꞌin kan ri Isaías roma xutzꞌet ri nimalej ruqꞌij ri Ajaw, y pa ruwiꞌ ri Ajaw chꞌoyineq wi kan.

⁴² Maske keriꞌ bꞌiꞌin kan chikij ri israelitas, ekꞌo santienta ri xkitaqij ri Jesús, hasta ekꞌo jujun achiꞌaꞌ israelitas kꞌo uchuqꞌaꞌ pa kiqꞌaꞌ ri xkitaqij, pero roma kixibꞌin kiꞌ chi ngeꞌoqotex pe pa sinagoga koma ri fariseos, ma xkibꞌij ta chi xkitaqij.

⁴³ Porque más ndikirayij chi ndinimrisex kibꞌiꞌ koma ri wineq ke chuwech ndinimrisex kibꞌiꞌ roma ri Dios.

Ri tzij ngerubꞌij ri Jesús, jariꞌ ri ndikusex chin ndiqꞌat tzij pa kiwiꞌ ri wineq

⁴⁴ Ri Jesús rikꞌin kaw ruchꞌabꞌel xubꞌij: Ri ngirutaqij, ma xe ta riyin ngirutaqij, xa kin ndutaqij chuqaꞌ ri taqayon pe wichin.

⁴⁵ Ri nditzꞌeto wichin, ndutzꞌet chuqaꞌ ri taqayon pe wichin.

⁴⁶ Ja riyin ri luz ri xinuqaqa chochꞌulew, chin keriꞌ ri nditaqin wichin, ma ndikanej ta pa qꞌequꞌ.

⁴⁷ Si jun ndirakꞌaxaj ri nutzij y ma ndubꞌen ta ri ndubꞌij, ma riyin ta ri ngiqꞌato tzij pa ruwiꞌ, porque riyin ma chin ta riꞌ xinuqaqa, riyin xinuqaqa chin ngenkal ri wineq.

⁴⁸ Y ri nduyaꞌ kan roracheq chinuwech y ma ndunimaj ta ri tzij nibꞌij, kꞌo ndiqꞌato tzij pa ruwiꞌ, y riꞌ ja ri tzij enubꞌiꞌin ri ndikusex chirij chin ndiqꞌat tzij pa ruwiꞌ pa rukꞌisibꞌel qꞌij.

⁴⁹ Porque riyin nixta jun tzij ri nuyon ta chinuwech nubꞌiꞌin; ri tzij nubꞌiꞌin pe chiwa, ja ri Nataꞌ ri taqayon pe wichin ri rubꞌanun pe mandar chin nibꞌij y ngixintijoj rikꞌin.

⁵⁰ Y riyin wetaman chi ri rubꞌanun pe mandar chin nibꞌij, kin nduyaꞌ ri kꞌaslen ma ndikꞌis ta. Romariꞌ, ri nibꞌij chiwa kin ja achel rubꞌiꞌin pe ri Nataꞌ chin nibꞌij.