San Juan 10 - Kaqchikel Santo Domingo (Xenacoj)

Ri ejemplo pa kiwiꞌ ri karneꞌl y ri kiyuqꞌunel

¹ Kin qetzij nibꞌij chiwa: Ri ma ndok ta apeꞌ kꞌo ri tzꞌapiꞌ chin kikoral ri karneꞌl, y xa jukꞌan chik apeꞌ ndijoteꞌ chin ndiropin qa pa koral, xa jun eleqꞌon y tzꞌamoy kichin karneꞌl chin ngereleqꞌaj.

² Pero ri ndok apu apeꞌ kꞌo ri tzꞌapiꞌ chin ri koral, ja ri yuqꞌunel kichin ri karneꞌl.

³ Ri chajiy koral ndujeq pe ri tzꞌapiꞌ chuwech, y ri karneꞌl ndikakꞌaxaj ruchꞌabꞌel ri yuqꞌunel, y rijaꞌ ngeroyoj apu rikꞌin kibꞌiꞌ ri rukarneꞌl chin ngerelesaj e pa koral.

⁴ Atoq erelesan chi pe konojel ri rukarneꞌl, ndukꞌuaj bꞌey chikiwech y ri karneꞌl ndikoqaj porque ketaman ruchꞌabꞌel ri ndiyuqꞌun kichin.

⁵ Pero nixta jumbꞌey ndikoqaj jun ri ma kiyuqꞌunel ta, xa ngeꞌanimej chuwech, porque ri karneꞌl ma ketaman ta ruchꞌabꞌel jun ri ma kiyuqꞌunel ta.

⁶ Re jun ejemplo reꞌ xubꞌij ri Jesús chake ri fariseos ekꞌo apu rikꞌin, pero ma xkikꞌoxomaj ta rubꞌeyal ri xrajoꞌ xubꞌij chake.

Ja ri Jesús ri utzulej yuqꞌunel kichin ri karneꞌl

⁷ Ri Jesús xubꞌij chuqaꞌ: Kin qetzij nibꞌij chiwa: Ja riyin ri tzꞌapiꞌ chin ri koral apeꞌ ngeꞌel-ngeꞌok ri karneꞌl.

⁸ Konojel ri xetuqaqa nabꞌey chinuwech riyin y xkibꞌij chi etaqon pe roma ri Dios chukolik rutinamit, xa eꞌeleqꞌomaꞌ y etzꞌamoy kichin wineq chin ndikeleqꞌaj ri kikꞌuan, pero ri nukarneꞌl riyin ma xekoqaj ta.

⁹ Ja riyin ri tzꞌapiꞌ chin kikoral ri enukarneꞌl, y ri ndok pe chupan re tzꞌapiꞌ reꞌ, kin ndikolotej wi. Y achel ri karneꞌl ma ndikixibꞌij ta kiꞌ chin ngeꞌel-ngeꞌok pa koral y ndikil kiway, keriꞌ kikꞌaslen ri nginikitaqij.

¹⁰ Ri eleqꞌon nduqaqa xe chin ndeleqꞌan, ndikamisan y ndukꞌis ruqꞌij nojel, jakꞌa riyin xinuqaqa chin niyaꞌ kikꞌaslen ri enukarneꞌl, jun kꞌaslen tzꞌaqet ri ma ndikꞌis ta.

¹¹ Ja riyin ri utzulej Yuqꞌunel. Ri utzulej Yuqꞌunel nduyaꞌ rukꞌaslen koma ri rukarneꞌl.

¹² Jakꞌa ri samajel ri xaxe roma tojon ngeruyuqꞌuj ri karneꞌl, ma ja ta rijaꞌ ri yuqꞌunel y ma erichin ta ri karneꞌl. Romariꞌ ri samajel riꞌ atoq ndutzꞌet chi ndeqaqa jun utiw apeꞌ ekꞌo ri karneꞌl, ndanimej e y ngeruyaꞌ kan kiyon. Y ri utiw kꞌo karneꞌl ngeruxil, ngerukayej ngerukꞌuaj y ri chꞌaqa chik ndikikiraj e kiꞌ.

¹³ Ri samajel tojon ndanimej e porque ma erichin ta ri karneꞌl, y romariꞌ ma jun achike ndunaꞌ chare ri ndibꞌanatej kikꞌin ri karneꞌl.

¹⁴ Ja riyin ri utzulej Yuqꞌunel, y wetaman kiwech ri nukarneꞌl y rejeꞌ ketaman nuwech riyin.

¹⁵ Achel ri Nataꞌ Dios retaman nuwech riyin, keriꞌ chuqaꞌ riyin wetaman ruwech rijaꞌ, y riyin niyaꞌ ri nukꞌaslen koma ri nukarneꞌl.

¹⁶ Riyin kꞌo chik chꞌaqa nukarneꞌl ri ma erichin ta re koral reꞌ; ndikꞌatzin chuqaꞌ ngenkꞌen pe chin ngenyuqꞌuj. Rejeꞌ kin xtikakꞌaxaj ri nutzij y xe jun bꞌotzaj ndikibꞌen konojel y xe jun qetzij yuqꞌunel ndikꞌojeꞌ pa kiwiꞌ.

¹⁷ Ri Nataꞌ Dios ngirajoꞌ porque nijech ri nukꞌaslen pa kamik chin ndikꞌojeꞌ chik jumbꞌey nukꞌaslen.

¹⁸ Ma jun nditiker ndikamisan wichin, nuyon chinuwech nijech ri nukꞌaslen pa kamik. Kin pa nuqꞌaꞌ yin kꞌo chin niyaꞌ ri nukꞌaslen pa kamik y pa nuqꞌaꞌ chuqaꞌ yin kꞌo chin ndikꞌojeꞌ chik nukꞌaslen. Jareꞌ ri rubꞌiꞌin pe ri Nataꞌ Dios chuwa chi nibꞌen.

¹⁹ Atoq ri israelitas xkakꞌaxaj ri xubꞌij ri Jesús, ma junan ta ruwech kitzij xkibꞌen chik jumbꞌey pa ruwiꞌ ri xubꞌij.

²⁰ Ekꞌiy chikikajal ri wineq riꞌ ndikibꞌilaꞌ: Xa kꞌo itzel espíritu pa rukꞌaslen y xa okuneq chꞌuꞌj. ¿Achike roma ndiwakꞌaxaj ri ndubꞌij?

²¹ Pero ekꞌo chik chꞌaqa ndikibꞌilaꞌ: Nixta jun wineq ri kꞌo itzel espíritu pa rukꞌaslen ndichꞌaꞌa utzulej teq tzij achel rijaꞌ. ¿Nditiker kami jun itzel espíritu ndukꞌachojrisaj jun wineq soqꞌ?

Ri wineq ndikajoꞌ ndikikꞌeq chi abꞌej ri Jesús

²² Chupan ri ru-tiempo ri tew, pa tinamit Jerusalén ndibꞌan ri nimaqꞌij kꞌuxlabꞌel chin ri qꞌij atoq xkꞌachaj rujosqꞌixik rupan ri rachoch ri Dios.

²³ Y ja tiempo riꞌ ndibꞌiyin ri Jesús pa rachoch ri Dios pa jun chijay ri ndibꞌix Chin Salomón chare.

²⁴ Ja atoq riꞌ ri achiꞌaꞌ israelitas kꞌo uchuqꞌaꞌ pa kiqꞌaꞌ xkimal apu kiꞌ chirij ri Jesús, y ndikibꞌilaꞌ chare: ¿Jampeꞌ kꞌa ndabꞌij chaqe achike rat? Taqꞌalajrisaj chiqawech si qetzij ja rat ri Jun taqon pe roma ri Dios chukolik ri rutinamit.

²⁵ Ri Jesús xubꞌij chake: Riyin xinbꞌij yan chiwa achike riyin, pero rix ma xinitaqij ta. Nojel ri samaj nibꞌen riyin, pa rubꞌiꞌ ri Nataꞌ nibꞌen, y ja ri samaj riꞌ ndiqꞌalajrisan wichin achike riyin.

²⁶ Pero rix xa ma nginitaqij ta, porque ma rix ta chin ri bꞌotzaj nukarneꞌl riyin.

²⁷ Ri nukarneꞌl, ndikakꞌaxaj ri nuchꞌabꞌel y riyin wetaman kiwech, y rejeꞌ nginikoqaj.

²⁸ Y riyin niyaꞌ ri kꞌaslen ma ndikꞌis ta chake, y ma ngebꞌa ta chupan ri kamik ri kin chin jumul, y nixta jun nditiker ngerumej e pa nuqꞌaꞌ.

²⁹ Ri eruyoꞌon ri Nataꞌ Dios chuwa, más nim keqalen ke chuwech nojel ri achike ekꞌo chochꞌulew, y nixta jun nditiker ngerumej pa ruqꞌaꞌ chuqaꞌ rijaꞌ.

³⁰ Riyin y ri Tataꞌaj Dios, xe jun rubꞌanun ri qánima.

³¹ Y ja atoq riꞌ ri israelitas xebꞌekisikꞌilaꞌ chi pe abꞌej chin ndikikꞌeq apu chirij ri Jesús.

³² Pero ri Jesús xubꞌij chake: Rikꞌin ruchuqꞌaꞌ ri Tataꞌaj Dios, santienta utzulej y nimalej teq achike enubꞌanun pe chiwech. ¿Achike chikiwech ri nimalej teq achike enubꞌanun pe, ri ma xqaꞌ ta chiwech, y romariꞌ ndiwojoꞌ nginikꞌeq chi abꞌej?

³³ Y ri israelitas xkibꞌij: Roj ma ngatiqakꞌeq ta chi abꞌej roma ri utzulej teq achike eꞌabꞌanun pe. Roj ngatiqakꞌeq porque xa rat relik ok achi, y ndajunumaj awiꞌ rikꞌin ri Dios, y riꞌ ndubꞌij tzij chi itzel ngachꞌaꞌa chirij ri Dios.

³⁴ Y ri Jesús xubꞌij chake: Chupan ri ley yoꞌon kan chiwa, ri Dios ndubꞌij: Riyin nibꞌij chiwa chi rix dioses. Keriꞌ tzꞌibꞌan kan.

³⁵ Y qetaman chi ri rutzij ri Dios maneq cheꞌel ndibꞌan chare chi ma qetzij ta. Romariꞌ si ri Dios xubꞌij dioses chake ri achoq chake xchꞌaꞌa wi,

³⁶ ¿achike roma rix ndibꞌij chi niyaqꞌ rubꞌiꞌ ri Dios xe roma xinbꞌij chi yin Rukꞌajol, xu ja rijaꞌ yin chaꞌayon chin xiruteq pe chochꞌulew?

³⁷ Si riyin ma nibꞌen ta ri samaj rubꞌiꞌin pe ri Nataꞌ Dios chuwa, ma kinitaqij.

³⁸ Pero si nibꞌen ri samaj rubꞌiꞌin pe ri Dios chuwa, maske ma nditaqij ta achike riyin, kinitaqij roma ri samaj nibꞌen, chin keriꞌ ndiwetamaj y nditaqij chi ri Tataꞌaj Dios jun rubꞌanun wikꞌin y riyin jun nubꞌanun rikꞌin rijaꞌ.

³⁹ Ja atoq riꞌ jumbꞌey chik, xkajoꞌ xkitzꞌen e ri Jesús, pero ri Jesús xbꞌa chikiwech.

⁴⁰ Ri Jesús xtzolij chi apu jukꞌan ruchiꞌ ri raqen yaꞌ Jordán y xbꞌekꞌojeꞌ chiriꞌ, apeꞌ ri Juan ri Bautista xerubꞌen bautizar wineq jumbꞌey kan.

⁴¹ Santienta wineq xbꞌekitzꞌetaꞌ ri Jesús chiriꞌ, y kereꞌ ndikibꞌilaꞌ chikiwech: Kin qetzij chi ri Juan ri Bautista ma jun retal ruchuqꞌaꞌ ri Dios xubꞌen, pero nojel ri xubꞌij kan pa ruwiꞌ re jun achi reꞌ, kin qetzij, ngechajeꞌ.

⁴² Y santienta chikikajal ri wineq ri ekꞌo apu chiriꞌ xkitaqij ri Jesús.