Hebreos 3 - Kaqchikel Santo Domingo (Xenacoj)

Ri Jesús más kꞌo ruqꞌij ke chuwech ri Moisés

¹ Romariꞌ, loqꞌolej teq hermanos ri rix oyon roma ri Dios chin ngixok richin, tiyaꞌ utz-utz cuenta chare ri ndubꞌen ri Jesús, ri qa-Apóstol y más nimalej ruqꞌij qa-Sacerdote, ri achoq ikꞌin kuqul qakꞌuꞌx achel ndiqatzijoj.

² Porque ri Jesús kin jumul ndubꞌen ri samaj yoꞌon pa ruqꞌaꞌ roma ri Dios, achel chuqaꞌ ri Moisés kin xubꞌen nojel ri xchilabꞌex chare chukꞌuaxik rutinamit ri Dios.

³ Pero ri Jesús xbꞌan chare chi más kꞌo ruqꞌij ke chuwech ri Moisés. Achel chuqaꞌ jun bꞌanuy jay, más kꞌo ruqꞌij ke chuwech ri jay rubꞌanun.

⁴ Nojel teq achoch kꞌo bꞌanayon richin, pero ri bꞌanayon nojel ri achike ekꞌo, ja ri Dios.

⁵ Y ri Moisés jun utzulej rusamajel ri Dios ri kin xubꞌen nojel ri xchilabꞌex chare chukꞌuaxik rutinamit ri Dios. Y rikꞌin nojel ri xubꞌanalaꞌ chukꞌuaxik ri tinamit riꞌ, rewan riꞌ ri achike nduqꞌalajrisaj ri Dios atoq xurilaꞌ ri tiempo.

⁶ Jakꞌa ri Cristo ma relik ta ok rusamajel ri Dios achel ri Moisés. Ri Cristo kin Rukꞌajol wi ri Dios, y jumul ndubꞌen nojel ri ndikꞌatzin pa ruwiꞌ rutinamit ri Dios, y ri tinamit riꞌ ja roj, si qetzij ma ndiqayaꞌ ta kan chi kuqul qakꞌuꞌx rikꞌin y ngojkikot ndiqoyobꞌej ri rusujun kan.

Ma tiqayaꞌ kan chi ndiqanimaj ri ndubꞌij ri Dios

⁷ Romariꞌ achel ndubꞌij ri Espíritu Santo chupan ri rutzij ri Dios tzꞌibꞌan kan: Si wokami ndiwakꞌaxaj ri ndubꞌij ri Dios chiwa,

⁸ Ma tikowrisaj iwánima, achel xkibꞌen ri ojer teq iwatit-imamaꞌ pa chaqiꞌj y tzꞌiran ulew Atoq rikꞌin ri itzel teq achike xekibꞌanalaꞌ, xkitojtobꞌej ri janipeꞌ ndikochꞌon ri Dios.

⁹ Romariꞌ ri Dios kereꞌ xubꞌij: Chiriꞌ ri ojer teq iwatit-imamaꞌ xkitojtobꞌej ri janipeꞌ ngikochꞌon, Maske 40 junaꞌ xkitzꞌet ri nimalej teq achike xenbꞌanalaꞌ pe chikiwech.

¹⁰ Romariꞌ, xyakatej woyowal chake ri ojer teq iwatit-imamaꞌ riꞌ, Y kereꞌ xinbꞌij pa kiwiꞌ: Jumul esachineq pa kánima Y ma ndikajoꞌ ta ndiketamaj ruchojmil ri bꞌey nukꞌutun chikiwech.

¹¹ Romariꞌ, pa woyowal xinbꞌen jurar: Ma la chuwaꞌq ma la kabꞌij xkeꞌok chupan ri uxlanen nusujun. Keriꞌ xubꞌij ri Dios.

¹² Rix hermanos, wokami ndikꞌatzin chi ndichajij ri ikꞌaslen, ma kꞌateꞌ kꞌo jun chiwech rix ri itzel xtubꞌen qa ránima y ma xtutaqij chi ta ri ndubꞌij ri Kꞌaslik Dios, y romariꞌ xtuyaꞌ kan.

¹³ Pa rukꞌexel riꞌ, qꞌij-qꞌij tibꞌochilaꞌ y tipixabꞌaj iwiꞌ chiwech, utz kꞌa yoꞌon tiempo chaqe, achel ndubꞌij ri rutzij ri Dios, chin keriꞌ nixta jun xtichꞌakatix roma ri mak y xtikowir qa ri ránima.

¹⁴ Porque kꞌo chuqaꞌ qaqꞌaꞌ chare ri yoꞌon chik chare ri Cristo, pero ndikꞌatzin chi jumul ndiqayaꞌ qánima rikꞌin hasta pa rukꞌisibꞌel, achel qabꞌanun pe xe jampeꞌ pa nabꞌey.

¹⁵ Achel ndubꞌij chupan ri rutzij ri Dios ri kꞌaja xqabꞌij pe: Si wokami ndiwakꞌaxaj ri ndubꞌij ri Dios chiwa, Ma tikowrisaj ri iwánima, achel xkibꞌen ri ojer teq iwatit-imamaꞌ ri xeyakatej chirij ri Dios. Keriꞌ tzꞌibꞌan kan.

¹⁶ Y kin ja ri wineq ukꞌuan kibꞌey roma ri Moisés ri xeꞌel pe pa rochꞌulew Egipto, ja wineq riꞌ ri maske xkakꞌaxaj ri xubꞌij ri Dios, xa xeyakatej chirij.

¹⁷ ¿Y achoq chake xyakatej royowal ri Dios 40 junaꞌ? Chake ri xekibꞌanalaꞌ mak, romariꞌ xeken y xepokꞌeꞌ kan pa chaqiꞌj y tzꞌiran ulew.

¹⁸ ¿Y achoq chake xubꞌen jurar ri Dios chi ma la chuwaꞌq ma la kabꞌij xkeꞌok chupan ri uxlanen rusujun? Chake ri ma xeniman ta.

¹⁹ Konojel ri wineq riꞌ, ndiqatzꞌet chi ma xeꞌok ta chupan ri uxlanen sujun, porque ma xkitaqij ta ri Dios.