Gálatas 3 - Kaqchikel Santo Domingo (Xenacoj)

Ri Espíritu Santo ndiyoꞌox pa qánima roma ndiqataqij ri Jesucristo

¹ Rix aj rochꞌulew Galacia, xa rix achel nakaneq teq wineq keriꞌ. ¿Achike xchꞌakatin iwichin chin ma nditaqij ta chik ri qetzij? Rix hasta xkꞌut chiwech chin xitzꞌet rikꞌin iwech ri achike rubꞌanik xbꞌan chare ri Jesucristo atoq xkamisex cho cruz.

² Xaxe niwojoꞌ nikꞌutuj razón chiwa: ¿Xyoꞌox ri Espíritu Santo pa iwánima porque xibꞌen ri ndubꞌij ri ley xyoꞌox chare ri Moisés? Ma ke ta riꞌ. Ri Espíritu Santo xyoꞌox pa iwánima porque xitaqij ri Jesucristo ri xtzijox chiwa.

³ Xa kin qꞌalej chi rix nakaneq porque ndiwojoꞌ ndeꞌikꞌisaꞌ rikꞌin ri relik iwuchuqꞌaꞌ rix rukꞌuaxik ri kꞌakꞌakꞌ kꞌaslen ri xitzꞌen e rikꞌin ruchuqꞌaꞌ ri Espíritu Santo.

⁴ Nojel ri kꞌayew ikꞌulwachin pe, ¿La ma jun kami xkꞌatzin chare ri ikꞌaslen? Maneq cheꞌel chi keriꞌ.

⁵ Romariꞌ nibꞌij chiwa: Ri Dios ruyoꞌon pe ri Espíritu Santo pa iwánima y ndubꞌanalaꞌ chuqaꞌ milagros chiꞌikajal, y keriꞌ ndubꞌen ma roma ta chi rix ndibꞌen ri ndubꞌij ri ley xyoꞌox chare ri Moisés, xa kin roma xitaqij ri Jesucristo atoq xiwakꞌaxaj ri xqatzijoj kan chiwa.

Ri Abraham ma jun rumak xreqalej roma xutaqij chi ri Dios nduyaꞌ ri rusujun

⁶ Tiqatzꞌetaꞌ ri xubꞌen ri Abraham ojer kan. Rijaꞌ xutaqij chi ri Dios nduyaꞌ ri rusujun, y romariꞌ ri Dios xubꞌen chare chi nixta jun rumak xreqalej.

⁷ Romariꞌ, tiwetamaj chi ri qetzij eralkꞌuaꞌl ri Abraham, ja ri ngetaqin chi ri Dios nduyaꞌ ri rusujun.

⁸ Y chupan ri rutzij ri Dios ndiqil chi ri Dios xuyaꞌ jun utzulej rutzijol chare ri Abraham pa ruwiꞌ ri ndibꞌanatej más apu chuwech, atoq kereꞌ xubꞌij: Awoma rat, riyin nibꞌen chi ri jalajaj kiwech wineq chin nojel teq tinamit chin ri rochꞌulew kꞌo cheꞌel ndikil ri favor niyaꞌ, xchajeꞌ chare. Wokami kin ndibꞌanatej ri ndubꞌij ri tzij riꞌ, porque ri Dios ndubꞌen chi ri jalajaj kiwech wineq ma israelitas ta, nixta jun kimak ndikeqalej chuwech roma ndikitaqij ri Jesucristo.

⁹ Romariꞌ, konojel ri ndikitaqij chi ri Dios nduyaꞌ ri rusujun, ndikil ri favor nduyaꞌ ri Dios, achel xril ri Abraham ri xutaqij ri xubꞌij ri Dios chare.

¹⁰ Keriꞌ nibꞌij chiwa porque konojel ri ndikajoꞌ chi ma jun kimak ndikeqalej chuwech ri Dios xaxe rikꞌin ndikibꞌen ri ndubꞌij ri ley ri xyoꞌox chare ri Moisés, qꞌaton chik castigo pa kiwiꞌ. Porque chupan ri rutzij ri Dios, kereꞌ ndubꞌij: Ri ma ndubꞌen ta nojel ri ndubꞌij ri ley, kin ndiqaqa pa ruwiꞌ ri castigo nduyaꞌ ri Dios.

¹¹ Y kin qꞌalej wi chi nixta jun wineq roma ta ndubꞌen ri ndubꞌij ri ley, ndibꞌan chare chi nixta jun rumak reqalen chuwech ri Dios. Porque ri rutzij ri Dios kereꞌ chuqaꞌ ndubꞌij: Ri nixta jun rumak reqalen chuwech ri Dios, kin ndiril ri qetzij kꞌaslen, roma kuqul rukꞌuꞌx rikꞌin ri Dios.

¹² Jun wi ri ndabꞌen ri ndubꞌij chupan ri ley xyoꞌox chare ri Moisés, y jun wi ri kuqul akꞌuꞌx rikꞌin ri Dios. Porque ri ley xaxe ndubꞌij: Ri ndibꞌanun nojel ri ndubꞌij re ley reꞌ, kin ndiril ri qetzij kꞌaslen nduyaꞌ ri Dios. Keriꞌ ri ndubꞌij.

¹³ Ri Cristo xojrulaqꞌ atoq kꞌa rojkꞌo pa ruqꞌaꞌ ri castigo ruqꞌaton ri ley pa qawiꞌ, roma ja rijaꞌ xkꞌojeꞌ chuxeꞌ ri castigo riꞌ pa qakꞌexel roj ri roj aj mak. Kin qꞌalej chi xkꞌojeꞌ chuxeꞌ ri castigo porque chupan ri rutzij ri Dios tzꞌibꞌan kan ndubꞌij: Xa achike na jun ri nditzeqebꞌex chuwech jun cheꞌ, ri castigo ri nduyaꞌ ri Dios kin qꞌalej chi qajneq pa ruwiꞌ.

¹⁴ Keriꞌ xubꞌen ri Cristo, chin keriꞌ ri favor sujun chare ri Abraham roma ri Dios, kin ndiyoꞌox chake ri jalajaj kiwech wineq ma israelitas ta ri ndikitaqij rijaꞌ. Y keriꞌ roj qonojel ri ndiqataqij ri Cristo, ndiyoꞌox pa qánima ri Espíritu Santo ri rusujun ri Dios chi nduyaꞌ.

Ri ley xyoꞌox chare ri Moisés ma xuyuj ta ri favor rusujun ri Dios chare ri Abraham

¹⁵ Hermanos, tiwakꞌaxaj jun ejemplo ri ndibꞌanatej chiqakajal roj wineq: Jun wineq ri ndubꞌen jun trato rikꞌin jun chik, atoq kibꞌanun chik ruwujil, nixta jun nditiker ndiyuju y nixta jun nditiker nduyaꞌ más chupan ri trato riꞌ.

¹⁶ Y atoq ri Dios kꞌo xusuj chare ri Abraham y chare ri riy-rumam ri ndekꞌojeꞌ, ma pa kiwiꞌ ta ekꞌiy riy-rumam ri Abraham xchꞌaꞌa wi, xa kin xe pa ruwiꞌ jun riy-rumam xchꞌaꞌa wi, y riꞌ ja ri Cristo.

¹⁷ Y ri niwojoꞌ nibꞌij chiwa jareꞌ: Ri Dios xubꞌen jun pacto rikꞌin ri Abraham, y xuyaꞌ rutzij chare chi kin nduyaꞌ wi ri ndusuj. Y ri ley ri xyoꞌox chare ri Moisés 430 junaꞌ más kereꞌ pe, ma xujel ta ri pacto riꞌ, nixta xuyuj ri achike rusujun.

¹⁸ Xa ta roma ndiqabꞌen ri ndubꞌij ri ley xyoꞌox chare ri Moisés, roma ta riꞌ ndiyoꞌox chaqe ri rusujun ri Dios chupan ri pacto xubꞌen rikꞌin ri Abraham, riꞌ ndubꞌij tzij chi ndikꞌatzin ndiqachꞌek y ma sipanik ta. Pero ri Dios xubꞌij chare ri Abraham chi kin ndusipaj chare.

¹⁹ Si keriꞌ, ¿achike xkꞌatzin chi ri Dios xuyaꞌ ri ley chare ri Moisés? Ri ley xyoꞌox chin ndiqꞌalajin chi ri wineq kin eꞌaj mak wi, y ri ley riꞌ kin kꞌo wi reqalen hasta kꞌa xuqaqa na ri jun riy-rumam ri Abraham ri sujun chare chi nduqaqa. Atoq ri Dios xuyaꞌ ri ley, nabꞌey xuyaꞌ pe chake ri ángeles, ri ángeles xkiyaꞌ pe chare ri Moisés, y ri Moisés xuqꞌasaj rubꞌeyal ri ndubꞌij chake ri wineq.

²⁰ Atoq ekaꞌiꞌ ndikibꞌen jun trato, ndikꞌatzin chi kꞌo jun ri ndiqꞌasan tzij chikiwech. Pero atoq ri Dios kꞌo xusuj chare ri Abraham, ma jun qꞌasey tzij xukusaj, xa kin ja rijaꞌ ri xchꞌaꞌa chare ri Abraham.

Rikꞌin ri ndiqataqij ri Cristo, ngojelesex chuxeꞌ ruchuqꞌaꞌ ri ley

²¹ Nojel reꞌ ndubꞌij tzij chi ri ley xuyaꞌ ri Dios chare ri Moisés, ma xuyuj ta ri rusujun ri Dios chare ri Abraham. Porque xa ta ri ley nditiker nduyaꞌ ri kꞌaslen ma ndikꞌis ta, ndubꞌen ta chuqaꞌ chaqe chi nixta jun qamak ndiqeqalej chuwech ri Dios.

²² Pero ri rutzij ri Dios ri tzꞌibꞌan kan ndubꞌij chi konojel wineq eꞌaj mak, chin keriꞌ ndiqꞌalajin chuqaꞌ achike roma ndikꞌatzin chi konojel ndikitaqij ri Jesucristo chin ndiyoꞌox chake ri rusujun kan ri Dios.

²³ Atoq kꞌajani tiqetamaj chi ndikꞌatzin ndiqataqij ri Jesucristo, ri ley xyoꞌox chare ri Moisés achel ta roj rutzꞌapin roj israelitas pa cheꞌ keriꞌ, y xojkꞌojeꞌ chuxeꞌ ruchuqꞌaꞌ hasta kꞌa xqꞌalajrisex na ri utzulej teq tzij ri achoq ikꞌin xqetamaj chi ndikꞌatzin ndiqataqij ri Cristo.

²⁴ Romariꞌ ndiqabꞌij chi ri ley xa achel jun tijonel pa qawiꞌ, ri jumul xojrutijoj hasta kꞌa xuqaqa na ri Cristo ri ndikꞌatzin chi ndiqataqij, chin keriꞌ nixta jun qamak ndiqeqalej chuwech ri Dios.

²⁵ Pero wokami qataqin chik, y ma rojkꞌo chi ta chuxeꞌ ruchuqꞌaꞌ ri ley ri xok achel jun tijonel pa qawiꞌ.

²⁶ Keriꞌ nibꞌij chiwa porque rix iwonojel ri itaqin ri Cristo Jesús, rix ralkꞌuaꞌl chik ri Dios.

²⁷ Porque roj qonojel ri qabꞌanun bautizar qiꞌ pa rubꞌiꞌ ri Cristo, xe jun qabꞌanun rikꞌin. Y kin ndiqꞌalajin ri Cristo pa qakꞌaslen, achel qaweqon ta qiꞌ rikꞌin ri rukꞌaslen rijaꞌ.

²⁸ Y chiqakajal roj ri xe jun qabꞌanun rikꞌin ri Cristo Jesús, ma jun ri más ta kꞌo ruqꞌij o maneq ta ok ruqꞌij chuwech ri Dios, si roj israelitas o ma roj ta israelitas, si rojkꞌo chuxeꞌ rutzij jun ajaw chochꞌulew o naq, si achiꞌaꞌ o ixoqiꞌ.

²⁹ Y si rix richin chik ri Cristo, kin rix riy-rumam kan ri Abraham, y ndok iwichin chuqaꞌ ri bendición sujun chare ri Abraham ojer.