Colosenses 4 - Kaqchikel Santo Domingo (Xenacoj)

¹ Rix ri rix ajaw pa kiwiꞌ loqꞌon teq samajelaꞌ, kin ja ri chaj y ri utz chin ndibꞌan ri tibꞌanaꞌ chake. Ma timestaj chi rix chuqaꞌ kꞌo jun Iwajaw chikaj ri ngixrutzutzaꞌ pe.

Pixabꞌanik chake konojel ralkꞌuaꞌl ri Dios

² Tixikꞌaꞌ iwiꞌ chin ndibꞌen orar, kꞌes-kꞌes iwech tibꞌanaꞌ orar y kixmatioxin chare ri Dios.

³ Tikꞌutuj chuqaꞌ chare ri Dios pa qawiꞌ roj chi nduyaꞌ qꞌij chaqe ndiqatzijoj ri rutzij, chin keriꞌ ndiqaqꞌalajrisaj ri ma kin ta qꞌalej rubꞌeyal ojer kan, ri ndichꞌaꞌa pa ruwiꞌ ri achike ri Cristo y ri rukꞌamon pe chaqe. Y riyin roma niyaꞌ rutzijoxik ri utzulej teq tzij riꞌ yin tzꞌapel pa cheꞌ wokami.

⁴ Tikꞌutuj chare ri Dios chi utz-utz ruqꞌalajrisaxik nibꞌen chare ri tzij riꞌ.

⁵ Utz inoꞌoj tibꞌanaꞌ chikikajal ri wineq ri ma kitaqin ta ri Cristo, ma xetal keriꞌ teqꞌax ri tiempo pa iwiꞌ.

⁶ Kin ta kiꞌ ndakꞌaxex ri itzij y kin ta pa rubꞌeyal ngixtzijon. Chin keriꞌ iwetaman achike tzij utz ndikusaj chin nditzolij ruwech kitzij ri kꞌo achike ndikikꞌutuj razón chiwa.

Ri Pablo nduteq ri rukꞌisibꞌel teq ruxunaqil kiwech ri aj Colosas

⁷ Ri hermano Tíquico ri tzꞌan niwojoꞌ nderuyaꞌ rutzijol chiwa nojel ri achike rubꞌanun ri nukꞌaslen. Rijaꞌ jun wachibꞌil ri kin rikꞌin nojel ránima ndubꞌen rusamaj ri Ajaw.

⁸ Romariꞌ, xinteq apeꞌ rixkꞌo chin nderuyaꞌ rutzijol ri ax cheꞌel qabꞌanun, y chin chuqaꞌ nderuyaꞌ ruchuqꞌaꞌ ri iwánima.

⁹ Chirij ri Tíquico nutaqon e chuqaꞌ ri Onésimo. Ri Onésimo jun iwinaq rix y jun hermano ri tzꞌan niwojoꞌ. Rijaꞌ kin kuqul rukꞌuꞌx rikꞌin ri Dios. Rejeꞌ ndekiyaꞌ rutzijol chiwa nojel ri ngebꞌanatej waweꞌ.

¹⁰ Ri hermano Aristarco ri wachibꞌil waweꞌ pa cheꞌ nduteq e ruxunaqil iwech. Nduteq chuqaꞌ ruxunaqil iwech ri hermano Marcos ri roxpochel ri Bernabé. Y achel nubꞌiꞌin chik chiwa, atoq ri Marcos xteqaqa iwikꞌin, jabꞌel rukꞌamik ruwech tibꞌanaꞌ.

¹¹ Y nduteq chuqaꞌ ruxunaqil iwech ri hermano Jesús, ri ndibꞌix Justo chare. Chikikajal ri israelitas ri kitaqin ri Cristo, xaxe rejeꞌ esamajneq junan wikꞌin chutzijoxik ri achike modo ngeꞌok ri wineq pa ru-reino ri Dios, y kin kiyoꞌon ruchuqꞌaꞌ ri wánima.

¹² Nduteq ruxunaqil iwech ri hermano Epafras, jun iwinaq rix. Rijaꞌ jun rusamajel ri Cristo Jesús, y kin jumul ndubꞌen orar. Ndukꞌutuj chare ri Dios pa iwiꞌ chi kaw ngixpeꞌeꞌ chiraqen ri Dios y ndikꞌiy utz-utz ri ikꞌaslen chuwech, y chi kin kuqul ikꞌuꞌx iwetaman ndibꞌen ri rurayibꞌel ri Dios.

¹³ Riyin rikꞌin nuwech nutzꞌeton chi ri Epafras santienta ruchajin pena iwoma, y koma chuqaꞌ ri hermanos ekꞌo pa tinamit Laodicea, y pa tinamit Hierápolis.

¹⁴ Ri hermano Lucas, ri aqꞌomanel ri tzꞌan ndiqajoꞌ, nduteq ruxunaqil iwech, y keriꞌ chuqaꞌ ri hermano Demas.

¹⁵ Tiyaꞌ ruxunaqil kiwech ri hermanos ekꞌo pa tinamit Laodicea. Tiyaꞌ ruxunaqil ruwech ri Ninfas y chuqaꞌ konojel ri hermanos ri ndikimal kiꞌ pa rachoch chin ndikiyaꞌ ruqꞌij ri Dios.

¹⁶ Y atoq rix xibꞌen yan leer re wuj reꞌ chikiwech ri hermanos chiriꞌ, titaqaꞌ e chuqaꞌ chake ri hermanos ri ndikimal kiꞌ pa rubꞌiꞌ ri Dios pa tinamit Laodicea chin ndikibꞌen leer. Y rix tibꞌanaꞌ leer ri wuj nutaqon e chake rejeꞌ atoq xtikiteq pe chiwa.

¹⁷ Tibꞌij chuqaꞌ kereꞌ chare ri hermano Arquipo: Tatijaꞌ aqꞌij chi utz-utz ndabꞌen chare ri samaj yoꞌon pa aqꞌaꞌ pa rubꞌiꞌ ri Ajaw, kixchajeꞌ chare.

¹⁸ Riyin Pablo rikꞌin nuqꞌaꞌ nitzꞌibꞌaj e ruxunaqil iwech. Tikꞌuxlaꞌaj chi yinkꞌo pa cheꞌ y tibꞌanaꞌ orar woma. Ri favor nduyaꞌ ri Dios kin ta xtikꞌojeꞌ pa iwiꞌ rix iwonojel.