Apocalipsis 9 - Kaqchikel Santo Domingo (Xenacoj)

Ri ruwoꞌ trompeta ndixulex

¹ Atoq ri ruwoꞌ ángel xuxulaj ri trompeta yoꞌon chare, xintzꞌet chikaj jun chꞌumil tzaqineq qa chochꞌulew, y chare ri chꞌumil riꞌ xyoꞌox ri lawiꞌil chin ri rar siwan.

² Ri chꞌumil riꞌ xujeq ruchiꞌ ri rar siwan, y xbꞌeꞌel pe sibꞌ, achel ri sibꞌ ndel pe pa jun nim horno. Y ri sibꞌ riꞌ xubꞌen chi xqꞌeqꞌumer ruwech ri qꞌij y ri kaqiqꞌ.

³ Chupan ri sibꞌ xebꞌeꞌel pe sakꞌ ri xebꞌa chuwech ri rochꞌulew, y xyoꞌox uchuqꞌaꞌ chake chin ngetiꞌon achel alacranes.

⁴ Y xbꞌix chake chi ma tikibꞌen chꞌaꞌoj chake ri qꞌayis, ri tikoꞌ y ri cheꞌ ekꞌo chochꞌulew, xaxe tikiyaꞌ kꞌayew pa kiwiꞌ ri wineq maneq retal ru-sello ri Dios pa runikꞌajal kiwech.

⁵ Pero ma xyoꞌox ta qꞌij chake chin ngekikamisaj ri wineq, xaxe chin ngekiyaꞌ pa qꞌaxomal woꞌoꞌ ikꞌ. Y ri qꞌaxomal ndikiyaꞌ, achel ri qꞌaxon nduyaꞌ jun alacrán atoq nditiꞌon.

⁶ Chupan teq ri qꞌij riꞌ, ri wineq ndikikanolaꞌ kikamik y ma ndikil ta. Ndikirayilaꞌ pa kánima ngeken chin ngeꞌuxlan, pero ma jubꞌaꞌ ngerukꞌuaj ri kamik.

⁷ Ri sakꞌ riꞌ eꞌachel teq kej enabꞌan chik chin ngebꞌa pa guerra. Pa kijolon kꞌo achel coronas ebꞌanun chare qꞌanapueq, y ri kipalej achel kiwech wineq keriꞌ.

⁸ Ri kiwiꞌ achel rusmal kiwiꞌ ixoqiꞌ keriꞌ, y ri keyaj achel kichin koj,

⁹ kikusan chuqaꞌ jun tobꞌel chokikꞌuꞌx achel ri tobꞌel ebꞌanun rikꞌin chꞌichꞌ, y ri kixikꞌ ngeqꞌajan achel ngeqꞌajan ekꞌiy carruajes eqiriren koma kej ebꞌaneq pa guerra.

¹⁰ Ri kijey y ri ruchꞌutal kijey achel kijey alacranes keriꞌ, y chikijey kꞌo kuchuqꞌaꞌ chin ngekiyaꞌ pa qꞌaxomal ri wineq woꞌoꞌ ikꞌ.

¹¹ Ri ki-rey ri sakꞌ riꞌ, ja ri ángel rajawal ri rar siwan. Ri ángel riꞌ pa chꞌabꞌel hebreo rubꞌiniꞌan Abadón, y pa chꞌabꞌel griego rubꞌiniꞌan Apolión.

¹² Xqꞌax ri nabꞌey kꞌayew, pero chirij riꞌ epataneq kaꞌiꞌ chik kꞌayew.

Ri ruwaq trompeta ndixulex

¹³ Y ri ruwaq ángel xuxulaj ri trompeta yoꞌon chare, y xinwakꞌaxaj jun chꞌabꞌel xel pe chikikajal ri kajiꞌ ukꞌaꞌ chin ri altar bꞌanun chare qꞌanapueq ri kꞌo apu chuwech ri Dios.

¹⁴ Ri chꞌabꞌel riꞌ kereꞌ xubꞌij chare ri ruwaq ángel ri rukꞌuan ri trompeta: Kaꞌakiraꞌ ri ekajiꞌ ángeles eximil chuchiꞌ ri nimalej raqen yaꞌ rubꞌiniꞌan Éufrates.

¹⁵ Y xesoqꞌopix ri kajiꞌ ángeles ri enabꞌan apu chin ri hora, ri qꞌij, ri ikꞌ y ri junaꞌ chaꞌon chin ngekikamisaj jun rox parte ri wineq.

¹⁶ Riyin Juan xinwakꞌaxaj chi ri ki-ejército ri ángeles riꞌ e-200 millones ri ndikitzꞌuyubꞌej kej.

¹⁷ Chupan ri achel achikꞌ nibꞌen, xintzꞌet chi ri kej y ri etzꞌuyul chikij, chokikꞌuꞌx kikusaloꞌon tobꞌel keq nditzuꞌun achel qꞌaqꞌ, azul achel ri abꞌej rubꞌiniꞌan jacinto, y qꞌen achel ri azufre. Ri kijolon ri kej riꞌ, achel kijolon koj keriꞌ, y pa kichiꞌ ndel pe qꞌaqꞌ, sibꞌ y azufre.

¹⁸ Y roma ri qꞌaqꞌ, ri sibꞌ, y ri azufre ri ndel pa kichiꞌ, xeken jun rox parte ri wineq.

¹⁹ Ri kej riꞌ, pa kichiꞌ y chikijey kꞌo wi ri kuchuqꞌaꞌ; ri kijey kꞌo kijolon achel kijolon kumetz, y rikꞌin riꞌ ndikiyaꞌ qꞌaxomal.

²⁰ Ri wineq ri ma xeken ta pa ruqꞌaꞌ ri kꞌayew riꞌ, ma xkijel ta kinoꞌoj chin ta xkiyaꞌ kan ruyaꞌik kiqꞌij itzel teq espíritu y tiox ekibꞌanun chare qꞌanapueq, saqipueq, bronce, abꞌej y cheꞌ, tiox ri xa ma ngetzuꞌun ta, ma ngeꞌakꞌaxan ta y ma ngebꞌiyin ta.

²¹ Ma xkijel ta kinoꞌoj chin ta xkimalij kan ri ma utz ta ngetajin rikꞌin, achel ri ngekamisan, ri ngeꞌeleqꞌan, ri ndikibꞌen kiqꞌij wineq, y ri ndikikꞌamalaꞌ qa kiꞌ xa achoq na ikꞌin chin ndikibꞌen mak.