Apocalipsis 7 - Kaqchikel Santo Domingo (Xenacoj)

Ri ndibꞌanatej nabꞌey chuwech chi ndijaq ri ruwuq sello

¹ Atoq xbꞌanatej yan reꞌ, xitzuꞌun chi apu, y xintzꞌet ekajiꞌ ángeles epeꞌel chi jujun pa kiwiꞌ ri kajiꞌ ruchiꞌ ri rochꞌulew, kiqꞌaton ruwech ri kajiꞌ kaqiqꞌ, chin nixta jun kaqiqꞌ teqꞌax pa ruwiꞌ ri rochꞌulew, pa ruwiꞌ ri mar y nixta pa kiwiꞌ ri cheꞌ.

² Xintzꞌet chuqaꞌ jun ángel eleneq e apeꞌ ndalex pe ri qꞌij y jatal e chikaj, rukꞌuan jun sello chin ri Kꞌaslik Dios, ri achoq chare nduyaꞌ ketal ri eralkꞌuaꞌl ri Dios. Ri ángel riꞌ kaw xsikꞌin chake ri kajiꞌ ángeles ri achoq chake yoꞌon uchuqꞌaꞌ chin ndikiyaꞌ kꞌayew pa ruwiꞌ ri rochꞌulew y ri mar.

³ Y xubꞌij chake: Ma tiyaꞌ yan kꞌayew pa ruwiꞌ ri rochꞌulew, ri mar, y ri cheꞌ, kꞌa tiqayaꞌ na etal pa runikꞌajal kiwech ri erusamajelaꞌ ri qa-Dios.

⁴ Y xinwakꞌaxaj chi ri xyoꞌox ketal e-144 mil. Ri wineq riꞌ, kiy-kimam kan ri kabꞌlajuj rukꞌajol ri Israel.

⁵ Ri xyoꞌox ketal, kabꞌlajuj mil chikikajal ri eriy-rumam ri Judá, kabꞌlajuj mil chikikajal ri eriy-rumam ri Rubén, kabꞌlajuj mil chikikajal ri eriy-rumam ri Gad,

⁶ kabꞌlajuj mil chikikajal ri eriy-rumam ri Aser, kabꞌlajuj mil chikikajal ri eriy-rumam ri Neftalí, kabꞌlajuj mil chikikajal ri eriy-rumam ri Manasés,

⁷ kabꞌlajuj mil chikikajal ri eriy-rumam ri Simeón, kabꞌlajuj mil chikikajal ri eriy-rumam ri Leví, kabꞌlajuj mil chikikajal ri eriy-rumam ri Isacar,

⁸ kabꞌlajuj mil chikikajal ri eriy-rumam ri Zabulón, kabꞌlajuj mil chikikajal ri eriy-rumam ri José y kabꞌlajuj mil chikikajal ri eriy-rumam ri Benjamín. Konojel reꞌ xyoꞌox ketal.

⁹ Y atoq xbꞌanatej yan reꞌ, xentzꞌet santienta wineq ri nixta jun nditiker ndajilan kichin. Ri wineq riꞌ jalajaj kirochꞌulew, jalajaj katit-kimamaꞌ, jalajaj kitinamit y kichꞌabꞌel. Rejeꞌ kikusaloꞌon seq teq tzieq y kikꞌuan ruqꞌaꞌ teq palma pa kiqꞌaꞌ, epeꞌel apu chuwech ri trono y chuwech ri Alaj Karneꞌl.

¹⁰ Y rikꞌin kaw kichꞌabꞌel ndikibꞌilaꞌ: Ri xebꞌanun chi xojkolotej, ja ri qa-Dios Ri tzꞌuyul pa ru-trono Y ri Alaj Karneꞌl, xechajeꞌ.

¹¹ Konojel ri ángeles epeꞌel apu kisiriren kiꞌ chirij ri trono y chikij ri rijilej teq achiꞌaꞌ, y ri kajiꞌ kꞌo kikꞌaslen xexukeꞌ y xelukeꞌ qa chuwech ri trono chin xkiyaꞌ ruqꞌij ri Dios.

¹² Y ndikibꞌilaꞌ: ¡Amén! Ri qa-Dios kin utz ndibꞌix utzulej teq tzij chare, kin utz ndiyoꞌox ruqꞌij, Kin richin rijaꞌ nojel nojibꞌel, kin utz ndiyoꞌox matioxinik chare, Kin utz ndinimrisex rubꞌiꞌ. Rijaꞌ kin rukꞌulun wi chi ndubꞌen mandar pa ruwiꞌ nojel y chi kꞌo nojel ruwech uchuqꞌaꞌ pa ruqꞌaꞌ chin jumul. ¡Amén!

¹³ Y jun chikikajal ri rijilej teq achiꞌaꞌ xubꞌij pe chuwa: Re kiweqon kiꞌ rikꞌin ri seq teq tzieq, ¿eꞌachike rejeꞌ y apeꞌ eꞌeleneq pe ndabꞌij rat?

¹⁴ Y riyin xinbꞌij chare: Táta, rat etamayon. Y rijaꞌ xubꞌij chuwa: Rejeꞌ ja ri eꞌeleneq pe chupan ri nimalej kꞌayew y kichꞌajchꞌojrisan pe kiꞌ chupan rukikꞌel ri Alaj Karneꞌl, achel ndubꞌen jun ri nduchꞌej rutziaq y kin puchupuj ndubꞌen chare.

¹⁵ Romariꞌ, ekꞌo apu chuwech ru-trono ri Dios, Y ndikibꞌen rusamaj chi chaqꞌaꞌ chi paqꞌij, Y ri Dios ri tzꞌuyul pa ru-trono, Ndikꞌojeꞌ pa kinikꞌajal chin ngeruchajij.

¹⁶ Y ma jun chik ruchꞌumunik pamaj ndikiqꞌasaj, nixta ndichaqiꞌj chik kichiꞌ. Ri qꞌij ma ngerukꞌatisaj ta Y nixta jun chik kꞌaten ndikinaꞌ.

¹⁷ Porque ja ri Alaj Karneꞌl ri kꞌo apu apeꞌ kꞌo ri trono Ri ndiyuqꞌun kichin Y kin xkerukꞌuaj apeꞌ ndalex pe ri yaꞌ ri ndiyoꞌon kꞌaslen ma ndikꞌis ta, Y ja ri Dios ri ndisuꞌun e ri ruyiꞌal teq kiwech ri koqꞌej rejeꞌ.