Apocalipsis 6 - Kaqchikel Santo Domingo (Xenacoj)

Ri kajiꞌ nabꞌey teq sellos tzꞌamayon richin ri bꞌoton wuj

¹ Riyin xintzꞌet atoq ri Alaj Karneꞌl xuraqꞌachꞌij ri nabꞌey chikiwech ri wuquꞌ sellos tzꞌamayon richin ri bꞌoton wuj, y jun chikikajal ri kajiꞌ kꞌo kikꞌaslen, xinwakꞌaxaj chi xchꞌaꞌa, y rikꞌin ruchꞌabꞌel achel rayo xubꞌij: ¡Katámpe!

² Y atoq xitzuꞌun apu, xintzꞌet jun kej seq rij, y kꞌo jun ri tzꞌuyul pe chirij, rukꞌuan jun chꞌabꞌ, y xyoꞌox jun corona chare. Y achel jun chꞌakoyineq chik xel e, y chin ndichꞌakon bꞌaneq wi.

³ Atoq ri Alaj Karneꞌl xuraqꞌachꞌij ri rukan sello tzꞌamayon richin ri bꞌoton wuj, xinwakꞌaxaj ri rukan kꞌo rukꞌaslen chi xubꞌij: ¡Katámpe!

⁴ Y xbꞌeꞌel pe jun chik kej. Ri kej riꞌ keq rij, y ri jun tzꞌuyul pe chirij, xyoꞌox jun espada nim chare. Xyoꞌox qꞌij chare chin nduyaꞌ oyowal chikikajal ri wineq y chin ndubꞌen chake chi ndikikamisalaꞌ kiꞌ chikiwech.

⁵ Atoq ri Alaj Karneꞌl xuraqꞌachꞌij ri rox sello tzꞌamayon richin ri bꞌoton wuj, xinwakꞌaxaj ruchꞌabꞌel ri rox kꞌo rukꞌaslen chi xubꞌij: ¡Katámpe! Y atoq xintzꞌet, kꞌateꞌ ruwech xbꞌeꞌel pe jun kej xaq rij y ri jun tzꞌuyul pe chirij rukꞌuan jun etabꞌel pa ruqꞌaꞌ.

⁶ Ja atoq riꞌ xinwakꞌaxaj jun chꞌabꞌel pa kinikꞌajal ri kajiꞌ kꞌo kikꞌaslen ri xubꞌij: Kaꞌiꞌ libra trigo, o waqiꞌ libra cebada, rajel jun qꞌij samaj, pero ma jun achike tabꞌen chake ri aceite y ri vino.

⁷ Atoq ri Alaj Karneꞌl xuraqꞌachꞌij ri rukaj sello tzꞌamayon richin ri bꞌoton wuj, xinwakꞌaxaj ruchꞌabꞌel ri rukaj kꞌo rukꞌaslen chi xubꞌij: ¡Katámpe!

⁸ Y atoq xitzuꞌun apu, xintzꞌet jun kej qꞌen-qꞌen rij y ri jun tzꞌuyul pe chirij rubꞌiniꞌan kamik, y oqan pe roma ri Hades ri lugar kichin ri animaꞌiꞌ, y xyoꞌox uchuqꞌaꞌ chake pa ruwiꞌ ri rukaj parte chin ri rochꞌulew chin ngekikamisaj ri wineq rikꞌin espada, wayijal, itzel teq yabꞌil y kꞌuxunel teq chikap chin ri rochꞌulew.

Ri ruwoꞌ y ri ruwaq sellos ri tzꞌamayon richin ri bꞌoton wuj ngejaq

⁹ Atoq ri Alaj Karneꞌl xuraqꞌachꞌij ri ruwoꞌ sello tzꞌamayon richin ri bꞌoton wuj, xintzꞌet chuxeꞌ ri altar ri kánima ri ekamisan e roma ma xkimalij ta kan rutzijoxik ri rutzij ri Dios y ma xkiyaꞌ ta kan rutzijoxik chi kitaqin ri Dios.

¹⁰ Y rikꞌin kaw kichꞌabꞌel xkibꞌij: Ajaw, rat ri ratkꞌo pa ruwiꞌ nojel, rat ri kin rat loqꞌolej wi y kin ndabꞌen nojel ri ndabꞌij, ¿jampeꞌ ndaqꞌet tzij pa kiwiꞌ ri wineq ri xekamisan qichin chochꞌulew y ndayaꞌ rukꞌexel chake?

¹¹ Xyoꞌox seq teq tzieq chake chikijununal y xbꞌix chake chi tikoyobꞌej chi na jubꞌaꞌ, hasta kꞌa ketzꞌaqet na ri ejarupeꞌ chik más chikikajal ri kitaqin ri Jesucristo y erusamajelaꞌ chuqaꞌ ri Dios ri ngekamisex achel xkikꞌulwachij e rejeꞌ.

¹² Y atoq ri Alaj Karneꞌl xuraqꞌachꞌij ri ruwaq sello tzꞌamayon richin ri bꞌoton wuj, xintzꞌet chi xbꞌanatej jun nim kobꞌraqen, y ri qꞌij xqꞌeqꞌumer qa, y xok qa xaq achel jun tzieq chin bꞌis. Y nojel ruwech ri raqen ikꞌ xubꞌen qa keq achel kikꞌ.

¹³ Y ri chꞌumilaꞌ ekꞌo chikaj xetzaq qa chochꞌulew, achel ngetzaq qa ri rex teq ruwech ri cheꞌ higuera atoq ndiselox roma ruchuqꞌaꞌ jun nim kaqiqꞌ.

¹⁴ Y ri kaj xraqꞌachꞌitej y xubꞌat e riꞌ achel ndibꞌot jun wuj, y nojel teq juyuꞌ y chuqaꞌ ri chꞌuteq rochꞌulew ekꞌo pa mar, xjalatej kikꞌojlibꞌel.

¹⁵ Ja atoq riꞌ ri reyes chin ri rochꞌulew, ri wineq kꞌo kiqꞌij, ri eꞌukꞌuey kibꞌey soldados más nim kiqꞌij, ri bꞌeyomaꞌ, ri kꞌo uchuqꞌaꞌ pa kiqꞌaꞌ, ri loqꞌon teq samajelaꞌ, ri e-libre, konojel reꞌ xkewalaꞌ kiꞌ chupan teq jul y chikikajal abꞌej pa teq juyuꞌ.

¹⁶ Y kereꞌ ndikibꞌij chake ri nimaꞌq teq abꞌej y ri juyuꞌ: Kixtzaq pe chiqij y qojiwewaj chuwech ri Dios ri tzꞌuyul pa ru-trono y chuwech ri nimalej royowal ri Alaj Karneꞌl.

¹⁷ Porque wokami xuqaqa ri nimalej qꞌij chin ndiqaqa koyowal pa qawiꞌ, y, ¿kꞌo kami jun xtitiker xtukachꞌ ralal ri oyowal riꞌ? Nixta jun.