Apocalipsis 4 - Kaqchikel Santo Domingo (Xenacoj)

Ri Juan ndutzꞌet chi ri Dios tzꞌuyul pa ru-trono

¹ Y atoq xbꞌix yan reꞌ chuwa, riyin Juan kꞌateꞌ ruwech xintzꞌet jun puerta jaqel chikaj, y ri jun chꞌabꞌel ri xinwakꞌaxaj pa nabꞌey ri ndiqꞌajan achel jun trompeta, kereꞌ xubꞌij chuwa: Kajoteꞌ pe chireꞌ y riyin nikꞌut chawech ri ndikꞌatzin chi ngebꞌanatej más apu chuwech ri xatzꞌet yan.

² Y kin ja atoq riꞌ xikꞌojeꞌ chuxeꞌ ruchuqꞌaꞌ ri Espíritu Santo, y kꞌateꞌ ruwech xintzꞌet jun trono chikaj y xintzꞌet chuqaꞌ ri Dios tzꞌuyul pariꞌ ri trono riꞌ.

³ Y ri tzꞌuyul pa ru-trono, nditzuꞌun achel ri abꞌej ndibꞌix jaspe y cornalina chake. Y chirij ri trono rusiriren riꞌ jun kotoqꞌaꞌ, rex nditzuꞌun achel ri abꞌej ndibꞌix esmeralda chare.

⁴ Chirij ri trono riꞌ, kisiriren kiꞌ 24 tronos, y pa kiwiꞌ ri tronos riꞌ etzꞌuyul 24 rijilej teq achiꞌaꞌ kiweqon kiꞌ rikꞌin seq teq tzieq y pa kijolon kikusan coronas ebꞌanun chare qꞌanapueq.

⁵ Y chiriꞌ apeꞌ kꞌo ri trono ngeꞌel pe koyopaꞌ, y rayos ri santienta ngeqꞌajan. Chuwech ri trono ngekꞌat chuqaꞌ wuquꞌ antorchas, y ri wuquꞌ antorchas riꞌ ja ri wuquꞌ teq espíritu chin ri Dios.

⁶ Y chuwech ri trono kꞌo jun achel mar vidrio nditzuꞌun ruwech achel jun cristal, y pa nikꞌaj apeꞌ kꞌo ri trono kisiriren kiꞌ chirij ri trono ekajiꞌ ri kꞌo kikꞌaslen ri nojneq runaqꞌ teq kiwech chikij y chikiwech.

⁷ Ri nabꞌey chikiwech ri kajiꞌ kꞌo kikꞌaslen, achel jun koj keriꞌ. Ri rukan achel jun alaj wakx, ri rox achel ruwech jun achi keriꞌ, y ri rukaj achel jun kot ndirapap chikaj.

⁸ Ri kajiꞌ kꞌo kikꞌaslen, chikijununal kꞌo waqiꞌ kixikꞌ, y ri kixikꞌ nojneq rij-ruxeꞌ rikꞌin runaqꞌ teq kiwech. Y chi chaqꞌaꞌ chi paqꞌij ma ngeꞌuxlan ta ndikibꞌilaꞌ: Kin loqꞌolej, kin loqꞌolej, kin loqꞌolej ri Ajaw Dios Ri achoq pa ruqꞌaꞌ kꞌo nojel uchuqꞌaꞌ. Ja rijaꞌ ri kin xixkꞌo wi pe, kꞌo wokami y kin xtuqaqa wi.

⁹ Y nojel mul atoq ri kajiꞌ kꞌo kikꞌaslen ndikinimrisaj rubꞌiꞌ ri Dios tzꞌuyul pa ru-trono ri kin jumul wi kꞌo rukꞌaslen, y ndikiyaꞌ chuqaꞌ ruqꞌij y ngematioxin chare,

¹⁰ ri 24 rijilej teq achiꞌaꞌ ngexukeꞌ y ngelukeꞌ chuwech ri tzꞌuyul pa ru-trono, chin ndikiyaꞌ ruqꞌij rijaꞌ ri kin jumul wi kꞌo rukꞌaslen. Ndikiyalaꞌ apu ri ki-coronas chuwech y kereꞌ ndikibꞌilaꞌ chare:

¹¹ Ajaw y qa-Dios, Ja rat ri kin rukꞌulun chi ndiyoꞌox aqꞌij, y ndinimrisex abꞌiꞌ, Ja rat ri kin rukꞌulun chi achajin nojel ruwech uchuqꞌaꞌ. Porque xe wi rat bꞌanayon nojel ri ebꞌanun, Y roma arayibꞌel rat ekꞌo.