Apocalipsis 22 - Kaqchikel Santo Domingo (Xenacoj)

¹ Atoq nutzꞌeton chik reꞌ, ri ángel ri ukꞌuayon wichin xukꞌut chinuwech jun raqen yaꞌ ri ndiyoꞌon ri kꞌaslen ma ndikꞌis ta. Ri raqen yaꞌ riꞌ, achel vidrio nditzuꞌun y ndalex pe apeꞌ kꞌo ki-trono ri Dios y ri Alaj Karneꞌl.

² Pa runikꞌajal ri nimabꞌey chin ri kꞌakꞌakꞌ tinamit Jerusalén ndeqꞌax ri raqen yaꞌ riꞌ y chi kaꞌiꞌ lado chin ri raqen yaꞌ kꞌo ri cheꞌ ri ndiyoꞌon ri kꞌaslen ma ndikꞌis ta. Ri cheꞌ riꞌ kabꞌlajuj mul nduyaꞌ ruwech pa jun junaꞌ, ikꞌ-ikꞌ ndiwachin. Ri ruxaq ri cheꞌ ndikꞌatzin chin ngeꞌoqꞌomex ri jalajaj kiwech wineq ekꞌo chochꞌulew.

³ Y chiriꞌ pa tinamit nixta jun ndikꞌojeꞌ chuxeꞌ ruchuqꞌaꞌ royowal ri Dios. Ri ki-trono ri Dios y ri Alaj Karneꞌl ndikꞌojeꞌ pa tinamit, y ri rusamajelaꞌ ri Dios ndikiyaꞌ ruqꞌij rijaꞌ,

⁴ y ndikitzꞌet ruwech ri Dios, y ri rubꞌiꞌ ndikꞌojeꞌ pa runikꞌajal kiwech.

⁵ Chiriꞌ ma ndichaqꞌaꞌ chi ta qa y ma ndikꞌatzin ta ruyikꞌinik lámparas nixta ruyikꞌinik ri qꞌij chake ri ngekꞌojeꞌ chiriꞌ, porque chiriꞌ ja ri Ajaw Dios ri ndiyikꞌan kichin, y rejeꞌ ndikibꞌen reinar chin jumul.

Ri Ajaw Jesús nduqaqa yan

⁶ Y ri ángel xubꞌij chuwa: Re tzij re awakꞌaxan kin qetzij y kin utz chi nditaqix. Ri Ajaw Dios, ri ndiyoꞌon ri rutzij pa kánima ri profetas chin ndikiqꞌalajrisaj, xuteq ri ru-ángel chin nduruqꞌalajrisaj chikiwech ri rusamajelaꞌ ri ndikꞌatzin chi ngebꞌanatej yan.

⁷ Ja atoq riꞌ ri Ajaw xubꞌij: ¡Tiwakꞌaxaj kꞌa! ¡Riyin ngibꞌa yan qa chochꞌulew! ¡Kin jabꞌel roruqꞌij ri ndibꞌanun ri ndubꞌij ri tzij etzꞌibꞌan kan chupan re wuj reꞌ! xchajeꞌ.

⁸ Y ja riyin Juan ri xinakꞌaxan y xitzꞌeto nojel reꞌ, y atoq xinwakꞌaxaj y xintzꞌet yan nojel ri xkꞌut chinuwech roma ri ángel, xixukeꞌ y xilukeꞌ chiraqen chin niyaꞌ ruqꞌij.

⁹ Pero ri ángel xubꞌij chuwa: ¡Ma ndabꞌen kelaꞌ! Porque chi roj kaꞌiꞌ roj rusamajelaꞌ ri Dios, achel ri a-hermanos ri profetas, achel chuqaꞌ konojel ri ndikibꞌen ri ndubꞌij ri qꞌalajrisan kan chupan re wuj reꞌ. ¡Ja ri Dios tayaꞌ ruqꞌij!

¹⁰ Y ri ángel xubꞌij chuqaꞌ chuwa: Ma tawewaj pa awánima ri tzij eqꞌalajrisan kan chupan re wuj reꞌ, porque ri qꞌij chin ngebꞌanatej, nduqaqa yan.

¹¹ Ri ma kikꞌuan ta jun chojmilej kꞌaslen, kꞌa keriꞌ tikibꞌanaꞌ, y ri kikꞌuan jun seqꞌ kꞌaslen, kꞌa keriꞌ tikibꞌanaꞌ chuqaꞌ. Ri kikꞌuan jun chojmilej kꞌaslen, kꞌa keriꞌ tikibꞌanaꞌ, y ri kikꞌuan jun loqꞌolej kꞌaslen, kꞌa keriꞌ tikibꞌanaꞌ.

¹² Ri Ajaw xubꞌij: ¡Tiwakꞌaxaj kꞌa! ¡Riyin ngibꞌa yan qa chochꞌulew! Y nikꞌuaj qa ri rajel-rukꞌexel ri rukꞌulun chi niyaꞌ chake ri wineq roma ri kibꞌanun pa kikꞌaslen chikijununal.

¹³ Ja riyin ri Alfa y ri Omega, ri nabꞌey y ri rukꞌisibꞌel chin nojel, ja riyin ri kin yinkꞌo wi y ngikꞌojeꞌ chin jumul.

¹⁴ Jabꞌel rokiqꞌij ri ndikichꞌajchꞌojrisaj ri kikꞌaslen. Chake rejeꞌ ndiyoꞌox qꞌij chin ndikikꞌux ruwech ri cheꞌ ri ndiyoꞌon kꞌaslen ma ndikꞌis ta, y chuqaꞌ chin ngeqꞌax chupan ri puerta chin ngeꞌok apu pa kꞌakꞌakꞌ tinamit Jerusalén.

¹⁵ Pero chiriꞌ, ma ngeꞌok ta ri tzꞌiꞌ teq wineq, ri aj itz, ri ndikikꞌamalaꞌ qa kiꞌ xa achoq na ikꞌin chin ndikibꞌen mak, ri ngekamisan, ri ngeyoꞌon kiqꞌij tiox, y konojel ri ndiqaꞌ chikiwech ngereqꞌon y jutaqil ngereqꞌon.

¹⁶ Riyin Jesús, xinteq ri nu-ángel chin xbꞌeruqꞌalajrisaj nojel reꞌ chiwech rix ri bꞌotzaj teq ralkꞌuaꞌl ri Dios ri ndimal iwiꞌ pa rubꞌiꞌ. Y ja riyin ri ruxeꞌel kan ri rey David y ri riy-rumam kan chuqaꞌ; ja riyin ri chꞌumil ri ndiyikꞌan atoq ndiseqresan pe.

¹⁷ Ri Espíritu Santo y ri xten ri ndok rixjayil ri Alaj Karneꞌl kereꞌ ndikibꞌij: ¡Katuqaqa yan! Y ri ndirakꞌaxaj, tubꞌij chuqaꞌ: ¡Katuqaqa yan! Ri ndichaqiꞌj ruchiꞌ, tipuꞌun, y ri ndirajoꞌ ndutij ri yaꞌ ndisipex, tutijaꞌ ri yaꞌ ndiyoꞌon ri kꞌaslen ma ndikꞌis ta.

¹⁸ Chake konojel ri ndikakꞌaxaj ri tzij eqꞌalajrisan kan chupan re wuj reꞌ nibꞌij: Si jun nduyaꞌ ruwiꞌ ri tzꞌibꞌan kan chupan, ri Dios nduyaꞌ pa ruwiꞌ ri jun riꞌ ri castigo etzꞌibꞌan kan chupan.

¹⁹ Y si jun wineq kꞌo ndirelesaj chare ri qꞌalajrisan kan chupan re wuj reꞌ, ri Dios ma nduyaꞌ ta qꞌij chare chin ndukꞌux ruwech ri cheꞌ ri ndiyoꞌon kꞌaslen ma ndikꞌis ta, y ma nduyaꞌ ta chuqaꞌ qꞌij chare chi ndok apu pa loqꞌolej tinamit, y nixta nduyaꞌ chare ri utzulej rajel-rukꞌexel sujun kan chupan re wuj reꞌ.

²⁰ Ri xqꞌalajrisan re tzij reꞌ chinuwech, ndubꞌij: ¡Riyin ngibꞌa yan qa chochꞌulew! Y riyin xinbꞌij: Amén, ¡Katuqaqa yan, Ajaw Jesús!

²¹ Ri favor ri nduyaꞌ ri Ajaw Jesús kin ta xtikꞌojeꞌ pa iwiꞌ rix iwonojel.