Apocalipsis 14 - Kaqchikel Santo Domingo (Xenacoj)

Ri Alaj Karneꞌl y ri echaꞌon roma ri Dios

¹ Atoq xitzuꞌun chi apu, kꞌateꞌ ruwech xintzꞌet ri Karneꞌl peꞌel pariꞌ ri juyuꞌ rubꞌiniꞌan Sión, y rikꞌin rijaꞌ ekꞌo 144 mil wineq ri tzꞌibꞌan ri rubꞌiꞌ ri Alaj Karneꞌl y ri rubꞌiꞌ ri Rutataꞌ Dios pa runikꞌajal kiwech.

² Y xinwakꞌaxaj jun chꞌabꞌel pataneq chikaj. Ri chꞌabꞌel riꞌ, ndiqꞌajan achel santienta yaꞌ ri ngeqaqa pa kiwiꞌ abꞌej, achel chuqaꞌ ndiqꞌajan jun nimalej rayo y achel ngeqꞌajan ri arpas atoq ngeqꞌojomex keriꞌ.

³ Y ri 144 mil wineq ndikibꞌixaj jun kꞌakꞌakꞌ bꞌix chuwech ri Dios ri tzꞌuyul pa ru-trono, chikiwech ri kajiꞌ kꞌo kikꞌaslen y chikiwech ri rijilej teq achiꞌaꞌ. Y nixta jun nditiker ndiretamaj ri bꞌix riꞌ, xa kin xe wi ri 144 mil ri rikꞌin nimalej ajel xekolotej pe chochꞌulew.

⁴ Jareꞌ ri ma xekꞌojeꞌ ta kikꞌin ixoqiꞌ y kin chꞌajchꞌaj wi ri kikꞌaslen. Rejeꞌ ndikoqaj ri Alaj Karneꞌl apejeꞌ na ndibꞌa wi. Xeloqꞌ wi pe chikikajal ri wineq chochꞌulew, y eꞌachel ri nabꞌey teq ruwech tikoꞌ ndisuj chare ri Dios y chare ri Alaj Karneꞌl.

⁵ Y nixta jun chꞌakatinik xilitej pa kichiꞌ, xa kin chꞌajchꞌaj ri kánima.

Ri aj chikaj ri xalex chikikajal ri wineq y waqiꞌ ángeles

⁶ Y xintzꞌet jun chik ángel ndirapap pa runikꞌajal ri kaj rukꞌuan ri utzulej teq tzij chin ri kolotajik chin jumul, chin nderuyaꞌ rutzijol chake ri ekꞌo chochꞌulew, chake konojel wineq jalajaj kirochꞌulew, jalajaj katit-kimamaꞌ, kichꞌabꞌel y kitinamit.

⁷ Y rikꞌin kaw ruchꞌabꞌel xubꞌij: Tiyaꞌ ruqꞌij ri Dios y tinimrisaj rubꞌiꞌ, porque ja xuqaqa ri qꞌij chin nduqꞌet tzij. Kixxukeꞌ y kixlukeꞌ chuwech ri Dios ri xbꞌanun ri kaj, ri rochꞌulew, ri mar y ri alaxbꞌel teq yaꞌ.

⁸ Atoq xqꞌax yan riꞌ, xbꞌeꞌel pe jun rukan ángel ri xubꞌij: ¡Xkꞌis ruqꞌij, xkꞌis ruqꞌij ri nimalej tinamit Babilonia ri xbꞌanun chake ri wineq jalajaj kirochꞌulew chi xkiqꞌabꞌarisaj kiꞌ chupan nojel ri ruchuqꞌaꞌ ri mak ndajin chiriꞌ, y ri mak riꞌ ja ri ndikikꞌamalaꞌ qa kiꞌ xa achoq na ikꞌin chin ndikibꞌen mak!

⁹ Atoq xqꞌax yan riꞌ, xbꞌeꞌel pe jun rox ángel ri rikꞌin kaw ruchꞌabꞌel xubꞌij: Xa achike na jun ri xtiyoꞌon ruqꞌij ri itzel chikap y ri rachibꞌel y nduyaꞌ qꞌij chin ndiyoꞌox retal ru-sello ri itzel chikap chiruqꞌaꞌ o pa runikꞌajal ruwech,

¹⁰ ri wineq riꞌ kin xtutij nojel ruchuqꞌaꞌ ri castigo nduyaꞌ ri Dios, castigo ri kꞌo chupan ri copa chin ri royowal. Ndiyoꞌox kꞌayew chare pa qꞌaqꞌ ri ndiraqa rikꞌin azufre, y chikiwech ri loqꞌolej ángeles y chuwech ri Alaj Karneꞌl ndibꞌan wi.

¹¹ Y ri rusibꞌil ri qꞌaqꞌ ri achoq chupan ngeyoꞌox ri ndiyoꞌox kꞌayew chake, kin chin jumul ndijoteꞌ chikaj. Nixta jun uxlanen ndiyoꞌox chake, chi chaqꞌaꞌ chi paqꞌij ndikiqꞌasaj kꞌayew, porque xkiyaꞌ ruqꞌij ri itzel chikap y ri rachibꞌel. Keriꞌ ndibꞌan chake ri ngeyoꞌon qꞌij chi ndiyoꞌox retal rubꞌiꞌ ri itzel chikap chikiqꞌaꞌ o pa runikꞌajal kiwech.

¹² ¡Chireꞌ nditzꞌetetej chi ri eloqꞌolej ralkꞌuaꞌl ri Dios ri kiniman ri ru-mandamientos y ma kiyoꞌon ta kan chi kuqul kikꞌuꞌx rikꞌin ri Jesús, ndikꞌatzin chi ngekochꞌon!

¹³ Ja atoq riꞌ riyin Juan xinwakꞌaxaj jun chꞌabꞌel chikaj ri xubꞌij: Tatzꞌibꞌaj reꞌ: Wokami nditiker e chi jabꞌel rokiqꞌij konojel ri ngeken y xe jun kibꞌanun rikꞌin ri Ajaw. Jaꞌn, keriꞌ, ndichajeꞌ ri Espíritu Santo. Porque kin ngeꞌuxlan chuwech ri itzel ndibꞌan chake roma rusamaj ri Ajaw, y nojel ri utz kibꞌanun ma xe ta keriꞌ ndikanej, xa kin ndiyoꞌox wi rajel-rukꞌexel chake.

¹⁴ Atoq wakꞌaxan chik riꞌ, kꞌateꞌ ruwech xintzꞌet jun nube seq, y pariꞌ ri nube tzꞌuyul Jun ri kin achel ri aj chikaj ri xuꞌalex chiqakajal. Pa rujolon rukusan jun corona bꞌanun chare qꞌanapueq, y pa ruqꞌaꞌ rukꞌuan jun jos santienta rey.

¹⁵ Ja atoq riꞌ jun chik ángel xel pe pa rachoch ri Dios, y rikꞌin kaw ruchꞌabꞌel xubꞌij chare ri tzꞌuyul pariꞌ ri nube: ¡Takusaj ri jos akꞌuan, taꞌaqꞌataꞌ kiwech ri tikoꞌ kꞌo chochꞌulew! Porque utz chik chin ngeqꞌat.

¹⁶ Y ri tzꞌuyul pariꞌ ri nube xukusaj ri rujos y xumal e ruwech ri tikoꞌ chochꞌulew.

¹⁷ Ja atoq riꞌ jun chik ángel xel pe pa rachoch ri Dios chikaj, rukꞌuan chuqaꞌ jun jos santienta rey.

¹⁸ Y jun chik ángel xbꞌeꞌel pe apeꞌ kꞌo ri altar. Ri ángel riꞌ yoꞌon uchuqꞌaꞌ pa ruqꞌaꞌ pa ruwiꞌ ri qꞌaqꞌ, y rikꞌin kaw ruchꞌabꞌel xubꞌij chare ri ángel ri rukꞌuan ri jos santienta rey: Takusaj ri jos akꞌuan y taqꞌataꞌ ri tzeqaj teq uva chochꞌulew, porque utz chik chin ngeqꞌat.

¹⁹ Y ri ángel xujuꞌ ri rujos chuxeꞌ ri tzeqaj teq uva chochꞌulew, xerumal e y xebꞌeruyaꞌ chupan ri nimalej pitzꞌbꞌel apeꞌ ngepitzꞌ ri ruwech uva, y riꞌ ndubꞌij tzij, ri nimalej castigo ri nduyaꞌ ri Dios chin ndiqaqa ri royowal pa kiwiꞌ.

²⁰ Y saqil e chin ri tinamit xeyeqꞌeloꞌox ri ruwech uva chi aqen chupan ri nimalej pitzꞌbꞌel, y chiriꞌ xel pe kikꞌ ri xjoteꞌ hasta apeꞌ kꞌo ki-frenos ri kej pa kichiꞌ, y jun laꞌeq 300 kilómetros xchemeꞌ ri kikꞌ riꞌ.